أحب جارتي لكنها فضولية و أخجل من إخبارها بذلك
السلام عليكم ورحمة الله و بركاته ،،،
انا متزوجة ويعتبر زواجي حديثا في عمر الزواج يعني سنة و 3 شهور
المهم اسكن في عمارة قدامي شقة وتحتي شقتان
عندي جيران عيلة هما
اب وام وبناتهم و ابنهما
ناس كويسين رغم بعض الاختلافات بيننا
لكن احسن من بلاش
ولديهم بنات صبايا
المهم بنت من هالبنات
غير عن خواتها اجتماعية و فضولية وحبابة يعني احيانا نطلع سوا او باجي عندهم او تطلع عندي
البنت طبعها انو ماخدة بعض الامور ببساطة
ولحتى مااظلمها فهي تراعي اني متزوجة يعني لما يكون زوجي بالبيت بتقلي مابدي اجي عشان زوجك
ولو اجت بتقعد بالكتير ساعة وبتقلي خلص زوجك بالبيت
ويعني هية اجتماعية ومنفتحة يعني احيانا اكون بدي اطلع معها هية وامها واخوتها الصغار بتقلي
ازا زوجك فاضي خليه يطلع يتنبسطو معنا
ليس قصدها شي لانها بتقول هالكلام قدامي لو في نيتها سوء اكيد مابتحكي اي شي قدامي
وازا قابلت زوجي تحت وسلمت عليه كلمتين وهيك
بتقلي اليوم شفت زوجك هيك حكتلو ولما عرفت انك موجودة قلت اجي اشوفك بما انو برة
لكن احيانا انقهر من بعض تصرفاتها او كلامها يعني تحسها فضولية
مثلا زوجك بتاخر بالشغل ياحرام والله بتعب يلا الله يرزقكو
يعني الكلام مافي شي
لكن كل متيجي تزودها بالحكي لازم تتاكد زوجي طالع ولا لا و كيف الدوام
مابتهمها انو قصدها شي لانها بتصير تخفف عني وتقلي بهمش بكرة بتتغير الظروف
لكن الي مابعجبني انو كتير بتسال وتتدخل بالمواضيع بدون قصد منها
وبتحب تعرف كل شي و هيك
تاني شغلة لما تيجي عندي ونكون لحالنا بحسها ماخدة راحتها زيادة
يعني ممكن تروح داخلة غرفة النوم وفاتحة درج المكياج فجاة وانا بنصدم مابعرف شو بقلها
مرة عزمتها هية وصديقتي عالغدا وكنت محضرة حمام الضيوف الي برة والحمام الخاص فينا جوة
مابحب حد يدخل عليه كان الغسيل متكوم و انا بنظف الحمامات كل يوم لكن يومها صحيت متاخر ومانظفتو
يعني مابدي حد يدخلو
فبقلها غسلي هون
وكررت اكتر من مرة
لاقيتها عغفلة دخلت الحمام الي جوة وانا ادايقت جدا
وميلت عغرفة النوم تستعمل مكياجي عشان بدها تطلع مدري وين
شو اعمل انا طيب؟؟؟
انا بعد الزواج لم اعد ارغب ان تكون لي صداقات مبالغ فيها يعني احببت ان يكون هناك مساحة في اي صداقة
لانو وضعي غير وصرت متزوجة
وخاصة هية لسة انسة
ويعني مابحب حد يدخل في بيتي كتير
خلص صالون الضيوف نظيف وزي الفل وفي تلفزيون كمان
لشو التجوال في انحاء الشقة
يعني احيانا غرفة نومي فيها خصوصيات
ملابس خاصة او ملابس لزوجي خاصة به داخلية مثلا(العفو مو قصدي لكن لابين وجهة نظري)
او حتى بالحمام تكون الغسيل مكوم وطالعة بعض الاشياء الخاصة
فكيف موقفي لما بنت انسة لسة تشوف هيك اشياء
وحتى لو متزوجة
بس لو متزوجة بكون اهون شوي يعني مابتخاف منها بالاخر بتقول هاي الها زوج
بس بكل الاحوال مابحب لا المتزوجة ولا الانسة تدخل في بيتي بهالشكل
يعني هية شايلة اي كلفة لانو هية تتعامل هيك في بيتهم
لما ادخل بتقلي تعالي فوتي او ازا كنا لحالنا بقلها بدي اشرب بتقلي افتحي التلاجة وهيك
بس انا مابحب هادا الاسلوب ولست مجبرة اتعامل به مع اي احد لمجرد انو هوة بتعامل معي فيه
غير انو بيت العيلة غير وبيت الزوجية غير
يعني بيت الاهل بضل اكثر اهلية
مرة كنت انا و هية في محل عطورات غالية
وكان نفسي بواحد ولم اشتريه لانو غالي ولم يكن معي ثمنه في حينها
وجبت سيرتو لزوجي وراح جابو هدية
وهية بالمحل كانت تقول شو هادا غالي كتير
المهم بيوم ماسكة الفاتورة ورايحة بدي اخبيها في درج
ورنت عالجرس وفتحت الباب وطلبت شي وتركت الفاتور عالطاولة لاحضر لها الشي
نسيت ان اخذها معي وتركتها
وذهبت هية لبيتها
واذا بي القى الفاتورة مفتوحة !!!
والمشكلة انو مافكرت تداري فضولها او قلة زوق الحركة وتسكر الورقة
لا رمتها عالطاولة وهية مفتوحة
يعني ماهمها انتبه او لا
يعني مافكرت انو هاي قلة زوق
لشو تعرف انو زوجي جابلي هدية؟هاي خصوصيات ومابدي حد يعرفها
!!!
البنت كويسة ولكن فيها حشرية وقلة زوق ربما حسب طريقة عيشها في بيتهم
صحيح انو المواقف لم تكن كثيرة لكن انا لا اريد ان تتدخل او تتداخل في حياتي او بيتي كثيرا
وظاهريا البنت حسنة النية وتصرفاتها نابعة عن طبيعتها هية هيك شخصتها فضولية و اجتماعية زيادة عن
اللزوم
ومابتفكر تراعي انو انا متزوجة وبيتي الو خصوصية
طبعا لما زوجي يكون موجود ما بتعمل هالحركات اصلا وقتها زوجي بنتحر لانو مابحب هيك
وانا بمنعها
لكن هية ماعملت هيك اي و زوجي موجود
انا لا اريد الموضوع ان يزيد و تفكر انو هادا اسلوبي انا ايضا
فكرت ان افتح معها الموضوع بطريقة غير مباشرة انو اقول عن قصة صديقة امي من تاليفي
كانت تتصرف نفس التصرفات بالاخر امي انزعجت وصارت تتجاهلها
لكن خفت احرجها
واما ان اقول لها صراحة فهادا مستحيل لانو صح بدي احط حدود للعلاقة لكن مابدي الغي العلاقة
انا بغربة ومحتاجة يكون لي صديقات لكن بحدود
قبل الزواج كنت غير لكن من نصائح الكل قالو لي ماعمرك تدخلي احد بيتك وخصوصياتك ولاعمرك
تسمحي لبنت مهما كانت غالية انها تتداخل في حياتك
وهالكلام هوة الصح
فما العمل لحتى المرة الجاية ان اجت تعمل هيك حركات امنعها وبنفس الوقت بدون احراج لي او الها
وبطريقة لطيفة
اليس معي حق ؟؟؟ ام اني ابالغ؟
اريد خبراتكم
انا من النوع مابحب احرج الناس وبخجل
اتمنى ان تقولو ارائكم وان غلطانة توضحو غلطي اين
وبارك الله فيكم وماحرمني منكم
عفواً ... تم تعديل العنوان ليتناسب مع المحتوى . شكراً
__________________
{ اللهم صل و سلم على سيدنا محمد }
رفيق العمر سافر حيث شئت وجرب في حياتك ماأردت
سترجع ذات يوم حيث كنت فعمرك في يدي والعمر أنت
التعديل الأخير تم بواسطة النور والحنان ; 24-06-2008 الساعة 07:48 PM
23-06-2008, 12:38 AM
ضوابط المشاركة
العرض الشجري