السلام عليكم ورحمة الله وبركاته ..

صراحة ودي اعرف اذا زوجي يعتبر بخيل ولا ماسك ولا ماعنده فلوس

ابي اعرف عشان لاأظلمه واصبر عليه ...

فايليت ترشدوني ....

بقولكم عن حياتنا :

هو راتبه يعتبر جيد يعني حالتنا المادية وسط
شقتنا إجار
عليه اقساط سيارة
عليه تسديد فواتير موبايلين حقي وحقه كل شهرين
عليه تسديد فواتير الكهرباء كل 6 شهور
تسديد الهاتف الثابت كل 6 شهور ايضا

يعطني مصروف شهري 500 ريال >>>> مع اني اشوفها ماتكفي

يعطني فلوس حق ملابس لي وللأطفال(طفلين) 500 ريال كل 4 شهور
غير عن كسوة العيد يعطني 1500 ريال

بتقولون وين المشكله طيب

بقولكم ان الحياة غلت وهو مايزيدني فلوس

واذا صار ظرف طارئ واحتجت فلوس يقول ماعندي فلوس ماأقدر اعطيك

مثلا حفله زواج هدية لأحد او شي اضطراري

او حتى لنفسي مااقدر اشتري الي نفسي فيه كل اخاف مصروفي يخلص ولا يبقى معي شي
وتعرفون ان الاسعار في ازدياد وهالـ 500 ريال ماتسوي شي
يعني مثلا لو بشتري عطر ماركة طاااارت الفلوس

وانا لاتحسبوني مبذرة
لا لا
والله اني قنوعه
بس المجتمع الي يحيطني يحتم علي اطالع واتمنى اصير مثلهم

بس اعرف انا زوجي بيقولي مااقدر

مع العلم ان عنده اسهم بالسوق كثيرة
وماحد ضيعنا الا هالأسهم
كل يبي يوفر عشان يشتري اسهم
وماشفنا من وراها اي فائدة او ربح إلا خسارة ومضيعة للفلوس


وبقولكم شي ثاني اني اذا دخلت معاه السوبر ماركت نقضي اغراض للبيت
مو كل شي يرضى لي أخذه يقول مولازمنا ومانحتاجه مع اني اشوف انه مهم
واذا بناخذ شي يقولي اخذي بكميات قليله لاتكثرين مع ان نحتاجه طول الشهر
فأقوله ليش ماتفك نفسك وتشتريه مرة وحدة بدل الروحة والجية
يقول ماعليك اذا خلص هالشي انا ارجع اشتريه مره ثانية
وبعض المرات يشتريه ومرات لا
ويحدد لي مبلغ معين يقول لاتزيدين الفاتورة عليه
واذ زاد عن المبلغ يقولي وقفي لاتاخذين شي وانا اكون محتاجته يقول خلاص مرة ثانية اشتريه لك

واذا وصلنا لآخر الشهر واحتجنا شي يقولي اصبري لمن ينزل الراتب اول الشهر
وساعات يكون باقي على نزول الراتب 10 ايام فأتضايق يا الله شيصبرني....

وبالنسبة للطلعات والمطاعم مرتين بالشهر
وساعات مرة وحده بس


والله اني احبه واموت عليه بس الحياة ماتكمل
نفسي تتحسن حالتنا ونعيش مرتاحين

اعذورني اني ثرثرت واجد بس شسوي حبيت افضفض شوي
لاني هالشهر بالذات متضايقة من قلة المادة


دعواتكم لي ولزوجي بالفرج


يالله همتكم كلن يدلو بدلوه

تحياتي لكم