السلام عليكم ورحمة الله وبركاته ..
احترت وعاجزة أيش أسوي بحكم أول مره يمر على موقف كذا ..
وماأبغى أغلط أو أتصرف تصرف من وجهة نظري بعد ماقرأت هذه الجملة لأحد الأعضاء " فكري بعقل رجل عندما تعاملين مع رجل "..
فأريد التصرف اللى يردع هذا الشخص عن فعلته ..
تذكروا مره خبرتكم عن حملة توعوية عن مرض السكري ..
وأني مشتركة فيها ..
كان يترأسنا شاب " مثقف صحي لمرضى السكري " بس مالنا علاقة فيه بحكم وجود مرؤوسة تتكلم باسمنا..
أول اجتماع استغربت جداً نظرته اتجاهي بعد مانطقت بإسم قبيلتي ..
و جاء يوم الحفل..
ووالدتي طلبت مني اتأكد من موضوع عذر الغياب بحكم راح أترك محاضرتين نقاش..
وبفعل سألت المرؤوسة علينا قالت ماعندي علم وكانت مرره مشغولة وقالت لي روحي أنتي اسأليه طبعاً أنا قلت مستحيل سمعتني وحده من البنات وقالت لي أنا أسأله وتعالي معايا علشان تسمعي جوابه ..
وبفعل رحنا وبحكم أني أضيع نظري في أي شيء بما أني أمام رجل فوقعت عيني على اسمه وعرفت ليش سبب نظرته الغريبة ذاك اليوم طلع أن الأخ من نفس القبيلة ..
وعدى اليوم ..
وثاني يوم كان عندنا حفل في N2مول عرفت وقتها أنه عنصري قبلي لأني لما جيت أول وحده وكلمت الدكتورة وقلتها أيش نعمل اليوم؟ فنادته وسألت عن أسمي وقلت لها في النهاية قال للدكتورة: ماأوصيك هذه " " اسم قبيلتي فردت عليه : أنت بس جبلنا " " اسم قبيلتي ..
وعدى اليوم ..
وانتهت كذا الحملة ..
طبعاً جاء وقت أسعى فيه لورقة تأكد وجودي في هذه الحملة حتى لا ينحسب علي غياب ..
البنت اللى كانت تترأسنا وهي مجموعتها كلموا الدكتور بحكم أن المجوعة كلها مشتركة في الحملة وتأجل لهم جلسة النقاش ، أما أنا الوحيدة المشتركة من مجموعتي ولازم أجيب الورقة ..
وقالت لي اتصلي فيه و اسأليه من وين تجيبيها ..
وحصل واتصلت وقال لي أنا مشغول دحين و راح أرد عليك شوية ..
بعد كم ساعة اتصل رديت وقالي الورق عند دكتورة الفلانة الفلانية وأنا ماأعرفها ، قالتله وين احصلها ؟ ، رد علي خلاص أنا أجهز ورقتك وأرد عليك وقفل وماأعطاني فرصة أقله لا خلاص أنا أسعى بنفسي على ورقتي ..
طبعاً أنا طنشته وبمعرفتي وصلت لهذه الدكتورة وسكرتيرتها ماسكة الموضوع وعرفت أن السالفة حصل فيه لخبطة بس علشان ورقة ياناس أخذت مني أسبوع والله يسامح اللى قالوا لي أن الغياب الواحد بدرجة كان ماتعبت نفسي عليها لأن كلامها طلع غلط وماكان عليه شيء..
المهم اتصل علي مارديت عليه لعدة أسباب أولا قلت ما أحتاج خدماته وبعدين وقتها ماكنت في حالة تسمح أكلم رجل كان صوتي شوي تعبان قفلت جوالي ونمت لما صحيت حصلت له اتصال ورسالة مكتوب فيها (د. شيماء أعتذر على الإزعاج لكن أبغى أتأكد وصلت لك الورقة ؟ .. )
المهم تذكرت أن السكرتيرة خبرتني أنه كل شوية يجيء عندها وبإسمي يأكد ويوصي توصلني الورقة وتقلي لاتزعلي منه تراه ماقصر " لأن للأسف ما كان كلمه ذاك اليوم كلمة رجل " وأنا كنت متضايقة من الموقف اللى انحطيت فيه بس مو منه وقلت لها هذا الكلام ..
فقلت خليني أرسله رسالة ماأتصل عليه بحكم أني توي صاحية من النوم وصوتي ماينفع أكلم رجل .. وأبغى أنهي الموضوع خلاص ومايتصل أو يرسل .. كتبت فيها ..(السلام عليكم ، الورقة راح توصلني بكره إن شاء الله والموضوع انتهى و جزاك الله خير .. )
بعد دقائق تجيني رسالة منه تصدمني ..
شايل التكلفة واستبدل كلمة د. شيماء بالغالية تخيلوا الوقاحة وين وصلت ..
ويقولي فيها أنا في الخدمة وخبريني أيش راح يصير معاك بكرة بالتفصيل الممل ..
وكلام المهم قفلت الرسالة وكان عندي اختبار ثاني يوم فقررت أفكر في مستقبلي أحسن لي وأعتبرت ماكأني شفت هذا الكلام إلى أن أخلص الإختبار ..
ثاني يوم قابلت بنات قدام مطعم المستشفى وسألوني عن اختباري و أتفاجأ أنه طوال الوقت وهو واقف يناظرني وسمع كلامنا أخذت نفسي ورحت ..
جلست أفكر أيش أعمل استشرت زميلتي بطريق غير مباشر قالت لي طنشيه وقلت لصحبتي كل اللى حصل كمان قالت لي طنشي ..
بعدها تخيلوا رسل لي رسالة " د. شيماء أيش عملتي في اختبارك طمنيني عليك !!! "
طنشته طبعاً بس كان ودي أعمل شيء علشان يوقف عند حده ومايستغل اللى حصل وما يحسبني أني من البنات اللى تحب هذا الشيء أو تمشي في هذا الطريق وكنت أفكر أشتكي عليه بس ماأحد وافقني واستخرت وبعدها ترددت ونسيت الموضوع ..
رجع مره ثانية بفترة ورسل لي رسالة يطلب مني أسماء البنات اللى كانوا معاي في المول ..
عصبت وانقهرت واتصلت على المرؤوسة علينا وخبرتها وقالت لي أيوه اتصل علي وكلمته بس ماقالي باللي طلبه منك .. أنا قالتلها بأي صفة هو يتصل علي أنا مالي شغل ..قالت لي خلاص أنا أشوف الموضوع ..
المهم عدت شهور .. وحمدت الله أني انتهيت من هذا الموضوع ونسيته ..
لكن اللى رجعه هو رسالة معايدة ليلة الجمعة الساعة 3 ونصف في الليل رسالها ومختومة بـ محبكم : فلان الفلاني ..
وقتها كنت في طريق جدة ينبع ويعدها انشغلت في ترتيب البيت واستعداد في العيد وماكان عندي وقت حتى أفكر ..
و اليوم قررت أستشيركم أيش رأيكم ؟
أستمر في التطنيش بالرغم أحس لو أن التطنيش فاد كان وقف عند حده من أول مرره ..
أو أشتكي عليه ..
أو أخبر أخوي وأخليه يتصل عليه ويوقفه عند حده ...
أنا والله من الرسالة اللى كتب فيها غالية وإلى هذا اليوم وأنا أرجع كل كلمة قلتها وكل موقف حصل ..
أبغى أعرف غلطت في أيش علشان هو تمادى كذا ...؟
بس أتذكر الموضوع أرجع أبكي وأدعي ربي والله مررره مقهورة ...
وربي يجزاكم خير ..
ويلهمكم السداد والرشاد والصواب ...
20-09-2009, 10:37 PM
ضوابط المشاركة
العرض الشجري