المشاركة الأصلية كتبت بواسطة fatoushi

ام داليا كفاكى ملحا على الجروح

فى موضوعك السابق ...... اشرتى لذان الموضوع وكانت اضاءات عن المطلقات ولو انك تتذكرين ردى فأنا اعلم تماما ماتتحدثين عنه
نعم المطلقه فى المجتمع العربى المدعى واقول المدعى لانه فعلا يظهر خلاف ما يضمر تعانى ويالها من معاناه
بداية من اهلها الذين لايعطونها ايه فرصه فى الحياه ويعاملوها على انها اناء عار لا غطاء له ويجب تغطيته فورا بأى زوج أى راجل والسلام
وكأنها هم وغم مش هيرتاحوا منها الا لما تبقى عند راجل
او يكون كلامهم على طول ماترجعى طاب ما ترجعيش ليه وماله !!!!!!!!!
ماحدش عارف ان الطلاق مادام حصل بيعمل شرخ فظيع وبيخلى الواحده تبعد عن الصوره الكليه لحياتها اللى كانت قبل الطلاق وتبدأ تبص بنظره تانيه من بعيد على كل اللى فات فى حياتها وتعيد تقييمه
لو لاحظتى هتلاقى فى المنتدى هنا مشاكل بجد تطير العقل ومالهاش حل الا الطلاق فعلا وتلاقى اللى بتبعت المشكله مذعوره من انها تتطلق وده حقها بس كمان ولا حد من الاعضاء بيجروء على انه يديها نصيحه بفراق حياتها الشنيعه دى
ناهيكى بقى عن اولاد المطلقه اللى معظمهم بيرمى اللوم على امهم انها خربت البيت او انها ما اتحملتش عشانهم وانها انانيه والمجتمع اللى حواليها اللى بيقول نفس الكلام سواء كانوا اهلها او جيرانها او ايا من كان
انتى عارفه انها لو اتحملت عشانهم مسيرهم يكبروا ولما تيجى تقول لهم انا اتحملت عشانكم ابسط رد هيكون ماحدش قال لك تتحملى كان ممكن تتطلقى عاوزانا نعمل لك ايه؟ ساعتها وسطها هيتقطم من الكلمه
كمان تخيلى النظره دى انها كان لازم تتحمل وتضحى المجتمع بيورثها للعيال فيطلعوا هم كمان عندهم نفس الفكر يعنى ما فيش حاجه هتتغير ولا بعد مليون سنه بقت حاجه فى الجينات
كمان القانون اللى بيقول الام اللى تتجوز اولادها ابوهم ياخدهم وتتحرم منهم - حتى القوانين بتشجع على النظره للمطلقه اللى بتحاول تعيد بناء حياتها على انها ست مش كويسه لانه بالمنطق هتتخلى عن عيالها فى سبيل نفسها!!!!!!!! واولادها واللى حواليها هيقولوا باعت عيالها عشان راجل!!!!!!!!!!!!!!!!!!!!!!!!!!!!!!!!!!!!!
انتى متخيله المعاناه يعنى يا تعيش قرده محرومه يا ترجع للعذاب وساعات كمان العذاب جه ما بيبقاش متاح لو طليقها مثلا اتجوز او مارضيش يرجعها
ده اللى بيخلى اظن معظم الستات ترضى بالقهر وضل راجل.......اللى كتير ما بيبقاش راجل بجد
والتجربه التانيه بتبقى صعبه ومخيفه جدا وكتير من الطلقات بيرفضوها من كتر الذعر .........
مافيش حل يا ام داليا صدقينى
الطلقه لو اتجوزت معدد ياويلها من مراته الاولانيه ولو اتجوزت مطلق طليقته مش بتسيبها فى حالها وياسلام لو عنده اولاد كمان هيبقى الصراع دوبل لان امهم هتقومهم عليها
ولو اختارت تسيب عيالها عشان تتجوز وده بيبقى بالاجبار زى ما سبق وقلت .......هتتطلق تانى لان قلبها مشغول بيهم واحساسها بالذنب والانانيه تجاههم هيقضى على اى فرصه للحياه
ده غير ان بيتبص لها على انها ساكند هاند وحتى اللى عنده 100 سنه نفسه فى بنت هو اول حد فى حياتها
ولو حبت تتجوز واحد مالهوش تجربه يعنى اعزب ...........بجد هتشوف من اهله او مجتمعه اسود ايام حياتها لانهم هيبصوا لها على انها وقعته واغرته لحد ما اقترف الغلط الشنيع ده واتجوز واحده مطلقه .......وحتى هو من كتر ضغط الكل والمجتمع عليه ممكن يتغير ناحيتها
وتبدأ تبص لنفسها على انها صغيره وقليله وكويس ان حد رضى بيها اصلا فتتحمل ايام سودا
ولو اتجوزت حد اقل من جوزها الاولانى برضه هتسمع من اهلها او اللى حواليها كلام يسم بدنها
ده غير طليقها اللى هيصر يبوظ لها الجوازه لانه عاوزها كده قرد قطع
مع احترامى لكلام الدكتوره انها بتقول ان المطلقه مش لازم تقعد مع مطلقات او عوانس ولازم تنفتح على الحياه
اى حياه دى؟ تروح مجتمع المتزوجات اللى بيبقى رافضها وعلى طول خايف منها او بيلقح عليها بالكلام واللى هى بالنسبه له مصدر تهديد
مافيش حل صدقونى.......... الحل ان المجتمع كله يتغير وده مش هيحصل