حياتي بدأت بالتفكك..وتفكيري مشتت!
بسم الله الرحمن الرحيم
قدّر الله علينا واجتمعنا
حبينا
وعشقنا
وضاعت الأمور
إيه نعم كل شي يضيع شوي شوي من يديني ويديها
ضاعت مشاعري فتاهت زوجتي وبدأت بالنفور والكره لي
تزوجنا منذ 4 سنوات
ولدينا طفل عمره 3 سنوات..وهي الحين حامل في الشهر الرابع
بداية التغير الكبير كان في شهر 6 من عام 1430 هــ
كنت في شمال المملكة وهي في المنطقة الوسطى
سبب البعد هو ظروف عملي يعني جلست شهر لوحدي
اشتقت لها حيل ولطفلي
حصلت قصيدة وسجلتها بصوتي
وارسلتها لواحد من الشباب وسمعها
ومن جوال لجوال وانتشرت بين جماعتنا
ولسان حالهم يقول ... القصيدة مهديها إلى زوجته
طبعا في بداية الأمر لم يحصل أي تغيير
لكن بعدها بشهر حسيت ببرود مشاعري تجاه زوجتي
سافرنا لجنوب المملكة ومعنا أهلها
وجلسنا أيام في الجنوب وبعدها نزلنا لمكة
في السفرة هذي آحس بضيقة صدر ورغبة في البكاء لما تكون زوجتي قريبة من عندي أو لما نركب في السيارة
طبعا كنت أنام في غرفة مع أخوان زوجتي
وزوجتي تنام مع النساء في غرفة أخرى
قبل النوم تبادلنا الرسائل عن طريق الجوال
وسألتني عن سبب الضيقة اللي فيني ؟
قلت لها : أنا مدري وش فيني آحس إذا صرت قريب من عندك أتضايق وأبي أبكي ويجيني شعور أحيان إن ودي نفترق للأبد وأعيش مع غيرك
أرسلت المسج ونمت دقايق
شوي وتجي أم زوجتي وخايفة وتقول : قم زوجتك تعبانه مدري وش فيها
أنا قمت ورحت لها وسألتها وش فيك ؟
قالت مدري حسيت جسمي صار بارد ورجولي ترتعش وهي طبعا جالسه تبكي
أخذتها وطلعنا لمستوصف وتم الكشف .. والنتيجة أعصابها تعبانه ولازم ترتاح نفسياً
ومن يومها وإلى يومكم هذا والشعور مني تجاه زوجتي نفس الشعور وهو البرود .. لا أحد يقول حاول تطيب خاطرها بكلام حلو ..حاولت بداخلي لكن لما يجي الواقع أحس إني أخدعها لما أقول لها كلام حلو لأن الشعور عندي بارد
في الفترة هذي طبعا رجعنا للدوام بحكم إني معلم وجاني نقل للشرقية
واخذت شقة مفروشة في اول أسبوع والأسبوع الثاني زوجتي سافرت معي لمقر عملي وجلست أسبوع وبعدها رفضت تجلس بالشقة بحجة أنها صغيرة وتبغى شقة نأثثها بمزاجنا
قلت لها الحين مو وقته . أول لازم نشوف وضعنا وندبر امورنا المادية
لكنها رفضت ترجع معي وتركتها براحتها عند أهلها كما أرادت
في الفترة هذي ومع الغربة تعرفت على فتاة عن طريق الانترنت وصرت اكلمها
وقبل 3 أسابيع من كتابة الموضوع زوجتي فتحت جوالي من وراي وشافت مسجات من البنت
وجلست تبكي وتقول آخر شي كنت اتوقعه إنك تسوي كذا..!!
وطلبت مني اترك البنت
تركتها مبدئيا
وحتى البنت تركتني وطلبت مني اهتم بزوجتي وطفلي
ورجعت معي زوجتي لنفس الشقة بعد ما اكتشفت إني أكلم .
والأسبوع هذا خليتها عند اهلها لأنها حامل ولا ودي إنها بيومين تقطع مسافة 600 كيلو وهي حامل
المهم قبل يومين كلمت زوجتي ولما قفلت
أرسلت لي مسج تقول فيه :
كلامنا جاف . وش اللي غاصبك تكلمني ؟
ليتك تتركني وتبتعد أسعد لك .
وآخر شي فكرت فيه إني ادخل أهلي وأهلك بالموضوع لأني بديت أحس بكره ونفور منك .
وعلى فكرة هذي مو أول مرة نجيب موضوع الإنفصال
وانا رافض الإنفصال علشان طفلي والثاني اللي في بطنها
وبنفس الوقت مابي اظلمها معي في انها تعيش وأنا مشاعري معها باردة رغم إني حاولت لكن اللي بالقلب غير !!!!
أنا لا أكرهها ولا أحبها
ومحتار في امري
يعني بإختصار :
1 : مشاعري تجاه زوجتي تتصف بالبرود وهذا من 7 شهور.
2 : السبب إلى الآن غير واضح.
3 : لا تعتقدون إني مكالمتي للبنت هي السبب لأن البنت علاقتي فيها من فترة بسيطة والتغير مع زوجتي من عدة أشهر.
4 : حاولت بالتقرب من زوجتي وضمها ولكن من دون مشاعر بالقلب , طبعا حاولت والأمر مو بيدي.
وأرجو منكم مساعدتي في حل هالوضع الغريب.
11-01-2010, 09:43 PM
ضوابط المشاركة
العرض الشجري