السلام عليكم ورحمة الله وبركاته
اشكر صديقي الذي دلني على هذا المنتدى انا اعرف المعرف حقه وفضلت انه مايعرف المعرف حقي
وبصراحه اشكركم على روح التعاون
تابعتكم لفترة وحسيت انكم فعلا اسرة واحده تشيلون هم بعض
بصراحه دخلت هنا ابي اعرف رايكم في زوجتي وهل هي تكرهني او لا وابيكم تصارحوني وتكونون زي اخواني وخواتي
صارحتها كثير حول وش السبب في هالنقاط بس تتعذر احيان باعذار مقنعه واحيان غير مقنعه
بذكر لكم تعامل زوجتي معي وكثير ممن استشرتهم قالو لي يا انها ما تطيقني او انها كانت مغصوبه علي
وقدري ان احببها فيني لين تحبني يعني تكرهني نوعا ما او اني مو الشخص اللي كانت تطمح انها تتزوجه
ملاحظه ثلثين النقاط من اول الزواج
وهذي النقاط
1-ما في ترحيب واشتياق اذا سافرت فترة ورجعت واحيان كثيره مو لابسه ومتشيكه ولا حتى ابتسامه واذا مو مسافر عدم الاهتمام لقدومي من الخارج وموافاتي والفرح بدخولي المنزل
2- تنتظر مني غلطه عشان تقلب الدنيا على راسي وخصوصا اذا قصرت في حق من حقوقها وتكبر اخطائي بشكل كبير وماتذكر حسناتي او الاشياء الحلوة فيني
3- نظافة البيت اخر اهتماماتها
4- تحب تكون عند امها دايم وتكره تقعد في البيت اكثر من يومين واذا طولت اكثر من يومين بدا التذمر وكلمة اوفف طفش رغم اني مااخلي بها مكان وتماشي
5- التزامها الصمت معي في اغلب الاحيان
6- عدم النظر الي او الى وجهي او الى عيني لفترة طويله واذا ناظرتها تسال اش فيك تطالعني او ما احب تناظرني رغم ان نظرتي لها بابتسامه ورومنسيه
7- منشغله عني يعني ما تحب تجلس معي واذا جلست يكون بيدها شي يلهيها او مع اي احد على المسن مع الصديقات او اهلها
8 - مقطبه الوجه
9 - عنيده لابعد الحدود وتحب تسوي الاشياء اللي تزعلني وتعيدها بعدما اكلمها اكثر من مرة واذا صارحتها توعدني انها تتغير بس ما تتغير واذا تركت البيت زعلانه ماترد على رسايلي او اتصالاتي ولا ترجع الا عشان خال او عم مو عشاني
10 - تغتابني عند اهلها وعند بعض من اهلي يعني مايعطيني ومقصر و و و و .. و لا تصارحني بجوانب تقصيري رغم اني اسالها دائم ايش انا مقصر فيه عشان اعدل فيكون جوابها ما فيك شي وعند الاهل فيني النون وما يعلمون
11- ولا فيه يوم رحبت باهلي وتهلل بهم
12- في المعاشره تكره المداعبه وكل شي تبيه بسرعه بسرعه
13- عدم لبس لاباس محتشم عند النساء وانا اكره هذا الشي حاولت افهمها هذا باللين ولكن دون جدوا
14-ماتغار علي وماتحب تسافر معي لبلدان اوروبيه وتخليني اسافر لحالي وتعرف ان النساء هناك على جمال وفتنه فبالنسبه لها عادي
15-ما تتانق لي رغم انا لسى صغار وفي بدايه العمر
16- لا تهتم ان اكلت انا او ما اكلت تعشيت او ماتعشيت يعني ما قد اتصلت من عند اهلها تطمن اذا اكلت , تعشيت جيعان لازم انا اللي اقول (عشان ما اظلمها احيان تسالني
17- اسرار بيتنا برى البيت مابقي الا سر واحد وحاطته دليل انها ما تطلع اسرارنا
18-ما تهتم باغراضها تهديها لاهلها والمشكله حتى هداياي تهديها لاهلها يعني ما تحتفظ باي هديه اهديتها اياها
19- اذا طلعنا نتمشى نجلس عشر دقايق ربع ساعه في بحر ولا غيره تقول يالله نرجع البيت او الشقه اذا رجعنا احسها تبي تنام
20 - تصور لاهلها ولاهلي وحتى اكتشفت انها تصور بعد لزوجات اصدقائي اني معيشها في جحيم وان مافي اقسى مني

يا اخوان واخوات ابيكم تكونون صريحين معي
وكيف اتعامل معها
تزوجتها لاخرجها من وضع كانت تعيشه ووهبتها كل ما املك واحببتها فكان هذا منها
حقا تجري الرياح بما لا تشتهي السفن
اتمنى من الكل التفاعل وانا والله صابر لي خمس سنوات واكثر
هل ممكن تكون مغصوبه علي او اني مو الشخص اللي كانت تتمناه او كانت راسمته في خيالها وهل هذه العلامات جد من علامات بغض او كره الزوجه للزوج
واذا امكن اخواتي العضوات هل فعلا اذا كرهتي او تكرهين شريك حياتي تكون هذه تصرفاتك
ابيكم تكونون صريحين معي وتعتبروني اخ لكم
واسف على الاطاله وعدم ترتيب النقاط بس المهم الاجابه على السؤالين
الله يطول باعماركم
ارجو من الكل المشاركه وعدم البخل علي باي معلومه