^^^

اهلييين بالحلوين اللي منورين موضوعي والمنتدى كله

ايو الله الله يعافيه ويعافي والدك

الخربشات ارقام وحروف صراحه ما اتذكر شكلها بالضبط لكن اتذكر اهلي كيف كانوا مستغربين مررره منها
سألت امي عنها قبل فتره وقالت ارقام وحروف واشياء مدري كيف ما اعطتني وصف دقيق لها
بس انا فكرت لو ارقام عاديه كان طبيعي لان كثير فلوس مكتوب عليها ارقام بس في شي غلط كان عليها عشان كذا استغربو


كمان سألت امي وش سوا بالفلوس قالت مدري

صبرك ما شفتي شي بلاوي متلتله بالنسبه لي
واوقات اشياء بسيطه بس مدري ليه اخذها بعين الاعتبار
وويقابلها تطنيش من اهلي
واشياء غرررريبه تصير عليها علامات استفهام من قبلي

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

بهالفتره صار عبدالرحمن هو المسؤل عن كل شي بما انه اكبر واحد فينا
وامي رفضت تدخل احد من اقاربنا
مع انه كان وقتها صغير على المسؤليه واول مره بحياته يكون مسؤل عن شي
بيوم وليله صار كل شي عليه
موقف صعب

بقى ابوي بالمستشفى فتره طووووويله وبعدها طلع
كنت ادري انه ماراح يقدر يمشي او يتكلم بس ما كنت متصوره ان الوضع كذا
طلع
انسان كان يمشي ويتحرك وله مكانته بالبيت
صار مايقدر يتحرك الا بمساعدة احد وبالذات اذا كان اب

اخذوه اخواني على جده عشان العلاج الطبيعي وتمارين عشان يقدر يمشي
وصرنا مشتتين اللي مرافق مع ابوي واحنا كل اسبوع نسافر لجده ونزوره
وكان مسموح لي بالدخول لانه مستشفى خاص
وكل اسبوع اشوفه ما كان فيه تحسن
كانوا يعطوني امل كل مره انه راح يرجع زي ما كان
وانا انتظر متى ونفس الحال بقى مده بجده وحولوه لمستشفى بنفس المدينه اللي ساكنين فيها
وتمارين واخر شي قالوا مافي فايده وطلع زي ما وديناه وصار مواعيد من فتره لفتره


انقطع الامل عندي
حتى الاكل كانو نوف وعبير يأكلونه واوقات امي لازم نساعده بكل شي

عرفت وقتها ان الامل كذب مو موجود من الاساس

مرت هالسنه كلها بالمستشفيات لانه كان يقعد بالشهور بالمستشفى
سنه مليااانه حزن وكأبه
تشتتنا اخواني كل يوم واحد مرافق
واخواتي كل الوقت جالسين وحدهم ويبكون
امي ما تكلم احد واذا تكلمت تصارخ
انا وندى ما ندري وين الله حاطنا عاد انا كنت اهون منها

سبحان الله كنا مخططين ننتقل لمدينه ثانيه وابوي بنا فيها بيت لنا وكان الكل عينه عليه مسااااحه كبيره وشكل
فخم من جو ومن برا اللي نعرفهم وقبيلتنا كلهم يقول اول مره يشوفون بيت
انشل ابوي وتغير كل شي وبقينا بمدينتنا وما انتقلنا مواعيده هنا واخواني متوظفين هنا وخرب كل شي


نجحت هالسنه بس مو زي السنوات اللي طافت
صح التقدير ممتاز بس مو الاولى ولا بشهادة تفوق

بالنسبه لي كنت مضغوطه من كل مكان
اعطوني امل وما شفت شي
البيت جوه مايساعد وانا فاااااقده شي كبيييييييييييير بحياتي
ما يتعوض
والمدرسه لوحدها كوم ثااااااني
المدرسات ما يطيقوني كله بسبب نجود
كانوا عادي معي بس قلبو
البنت ذي ما ادري شلون تفكر
تتخيل سالفه براسها وتصدقها وتحطها واقع وتروح تبكي وتشتكي عند المدرسات
وبندري سوت وقالت وضربتني وووووو ما تخلي مصيبه الا وتقول سويتها

ويالله تعالي يا بندري ويفتحون لي مشروع ليه سويتي وليه قلتي
وانا والله ما سويت شي
اناظرها تبكي يؤؤ واللي تقوله ماصار تتبلاني بوجهي اناظر بالبنت نجووود سلامات انا قلت كذا مافي خاشه بعيني
ايه قلتي
وتهزيء وتوصل للضرب يقالهم بيأدبوني مالت عليهم
وصرت احقد حقد حقد من بعد الظروف اللي صارت بالبيت ونجود تدري وتقرب لي ومع ذالك عادي
والمدرسات بصفها
لانها تبكي وانا ما ابكي مدري من مفهمهم ان المظلوم لازم يبكي والظالم لا
ما قلت لاحد من البيت باللي يصير بالمدرسه

المدرسات اي شي تسويه البندري يهوووول ويصير مصيبه حتى لو هو تافه
واذا ما حصلو شي علي يخترعون

لدرجة اوقات اغيب يوم السبت لاني ما ارجع االا متأخر من جده والمدرسه عندهم خبر باني كل يوم سبت ما اداوم عشان كذا
وهم ما يصدقون اغيب السبت واداوم الاحد اكيد ما ادري عن الدروس ولا الواجبات تبع يوم السبت
ولا هو من حق اي استاذه تحاسب الطالبه على الواجب باليوم اللي غابته الا اذا كان عندها يوم حضرته واللي بعده عندها هالماده والمصيبه ما يسوونها مع باقي الطالبات
لكن انا لا احضر وما ادري عن الواجب اقول كنت غايبه تقوم تهزء وانتي وانتي وتفتح محاااضره وخليك وااقفه
الله لا يوفقها كان معي طالبه غايبه جلستها ولا قالت لها ثلث الثلاثه كم
وربي لو كان ابوي متعافي وقلت له ليحوسهم بس وش اقول
بلعناها وسكتنا

نجود اذا بغت دفاتري تبي تكمل او غابت اعطيها دفاتري تكمل ولا اقول لا
لكن هي مستحيل تعطي العالم كلهم الا انا
وبعلم اهلها للمعلوميه يعني
اهلها دارين لا تقولون حركات اطفال وش معنى ما تطلع الا معي


بس شوفوا التناقض هالبنت غريبه عجيبه اسرارها عندي كل شي اعرفه عنها وبكلامها لدرجة قالت لي على بلاطه احب اخوك فارس كل شي يخصها تقوله لي وبنفس الوقت تخترع مشاكل بينا
طيب ما تخاف اقول لاي احد اللي تقوله لي
وقسم لحد اللحين ما طلعت ولا كلمه من اللي تقوله لي
انا ما اقدر اقول لها اي سر لا هي ولا غيرها واصلا اسرار ما عندي شي اخاف لا اقوله
اللهم كل اللي عندي حزن وضغط بس ما اقول شي والله غير تطلع على سطح بيتهم وتولول بندري حزيييييييينه و شايله هم وتعطيهم نشره مفصله
البنت ذي اذاي اشترت شي تجي وتستعرض قدامي وكنها مالكه الدنيا واذا ما اعطيتها وجه تتكلم شوفي غصب
والى اللحين اخرها قبل امس المشكله مدري وش تحس به والله اشتري اشياء جديده يبي لها وقت عشان تشتري زيها او اهلها يقتنعون يجيبون لها زيها ولا اقولها الا تعرف بالصدفه ان الشي ذا عندي
ولا اطلع اغراضي قدامها ما احب الاستعراض شوفو وش عندي عادي ما ملكت الارض
تحسب ان تفكيري سطحي لهالدرجه



وجت الاجازه كانت ممله لابعد الحدود لا سافرنا ولا طلعنا ولا شي منثبرين بالبيت
وقبل كنا كل اجازه حتى لو هي اسبوع نسافر ونروح ونجي
يااااه اخس صيفيه مرت علي
ملل حزن كبببت ضغط



طلع لنا قطو اسود بنفس السنه هالقطو نشبه مو راضي يطلع من الحوش
واخواني يعشقون تربيت الحمام ومسوين له شبك بركن بالحوش
ويشترون انواع غااليه واشكال تجنن
هالقطو يقتل بالحمام من غير ما ياكله
حاولو اخواني بكل الطرق يصيدونه بدون فايده
وحطو له سم باللحم وما اكله
لازق بالبيت يقول بيت ابوه
بتقولون وش دخل القطو اصبرروا وشوفوا الشي الغريب اللي لاحظناه وقولوا لي بعدها عادي ....

انتهت هالسنه وبدت سنه جديده وجلطه جديده لابوي
ومن يوم انشل ابوي وكل سنه حدث مرض مشاكل موت
اي شي بس ما تمر سنه كذا بسلام ...........




..........................................

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

الف سلامه يا رب

ذكرتيني وقت والدي مرض بالذبحه الصدريه

قضيت الوقت مثلك انما كنت كبيره اقتربت فيه اكثر من والدي

اكملي متابعه ووقت يرجع المستشار ان شاء الله رح يفرح بما كتبتي

اكتبي يا قلبي

__________________
http://live.gph.gov.sa/
اللهم اني استودعك اولادي

اشجعك على الكتابه
اسلوبك حلو وصادق ..

بالنسبه لوضع الوالد الله يشفيه
ويعافيه ويرجع احسن من اول..

لكن لاحظت شيء ...
ممكن وضعكم المضغوط اساسه امر معين
مثلا انه الوالد يمشي بعدها ما بيقدر..
او حتى الفلوس الي مكتوب عليها
او حتى القطه الي مو راضيه تبعد عن بيتكم..
كلها تحتوي على ترابط و حلقه وصل ..

انا سبق وقرات موضوعك بقسم ساعدني
هل اكملتي مع الاخ الجانب الاخر ..

ومعلش سؤال :
انتي ذكرتي انه مابيصير اطفال
يدخلوا المشفى ..
عفوا انتي صغيرة يعني .. كم عمرك..؟

اسفه اذا في احراج
بس اعتراني الفضول ..

__________________
**..اللهم صلي على سيدنا محمد..**
** اللهم ما أصبح بي ( وفي المساء : ما امسى بي ) من نعمة أو بأحد من خلقك فمنكــ وحدك لاشريكــ لكــ فلكــ الحمد ولكـ الشكر..(( من قالها صباحا ومساءً فقد ادى شكر يومه )).

يهمني تواجدك هنا يالغلا

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

اتمنى ان الحياه كتاب اغلفه باللون اللي ابيه
واقرا اللي يعجبني واترك اللي يحزني
والون حروفه بالواني اللي احبها صفحاته بزخرفها واخليه احلى كتاب
لا مليت منه قفلته واخذ راحه وارجع افتحه واقرا احسن سطوره
واذا تعبت من القراءه اروح لاخر صفحه واقرا احلى نهايه وارجع اكمل قرايتي الوانه حلوه كلها فرح ولعب وضحك راحه نفسيه مع اللي احبهم بكامل صحتهم نجاح مستقبل حلو
بس هاذي اكبر طموحاتي مابي غيرها.....

لكن خساره هي فعلا كتاب بس غصب عني اقراه اقرا كل شي فيه سواء حزين او مفرح
مكتوب بلون اسود ما اقدر اتخطى ولا حرف منه صفحاته سودا وما يظهر منه الا اللي قريناه والجزء الثاني صفحاته سودا مظلمه
اخاف وش تحمل بين طياتها
مجبره امر عليه كامل
ولا حتى اقدر اقلب على الصفحه الاخيره واشوف النهايه حلوه او لا
كتاب غامض مرات نفرح ونطرب مع حروفه ومرات تنزل دموعنا بغزاره لمرارة اللي بين الصفحات
الاسوء انا ما نعيش لنفسنا بس مرتبطين باللي حولنا
ام اب اخوان اقارب اصدقاء
نحبهم نشيل همهم ونخاف عليهم واي تأثر يصير لهم يلحقنا ضرر
وانقلاب بكيانا

كنت اتوقع اني نسيت وتقبلت كل شي تقبلت حياتي بزينها وشينها من بديت اكتب هالموضوع واكتشفت اني ادور بنفس الدايره
وما طلعت منها ممكن حاولت اتناسى اللي يتعبني طلعت اخزنه بصندوق احس بألمه كل يوم واتجاهل السبب
واخترع مبررات ثانيه
لا انا جد باقي الصغيره اللي انصدمت وما طلعت من اللي هي فيه انا باقي موجوده داخل الدايره الحزينه
ما راح اطلع ابدا الا بحالتين يا تصير معجزه ونرجع زي ما كنا بالضبط
او انا انشال على كتوف اخواني على المقبره
غير كذا ماراح ارتاح مافي حلول وسط مافيها مثاليات ولاتيأسين وخلي عندك امل انا كل شي احط املي فيه انصدم اكثر

الامل خلاص ماااات من زمان كان ظاهره موجوده قبل اللحين انقرضت مالها وجود
على الاقل اكون حاطه ببالي الاسوء وقاطعه الامل نهائي لو حصل وتغير شي حتى لو بسيط افرح فيه
احسن من احط املي بشي واتعلق فيه ويطلع سراب

هههه قصتي مع الامل تضحك والله

كذاااااااب اللي يقول الحياه حلوه
نقول حلوه عشان نضحك على انفسنا وبالاساس
نفرح يومين والباقي احزان وهموم


بعدين تعرفون ليه انا كارهه نفسي
المشكله اني احب اعز نفسي والمواقف تنزل

الله يصبرني بس
ما ينفعني لا تشجيع ولا اي شي مقطوع الرجا فيني منتهيه صلاحيتي بهالدنيا عايشه زي الصوره اللي تعكس شكل الانسان بس ما فيها اي معنى للحياه

ودي انعزل عن الكل ابعد واعيش وحدي
ادخل الموضوع اكتب ابكي ابكي لحد ما انام
يبي لي انظم وما اكتب كل يوم عز الله عيوني بتروح فيها
وعندي عقليات تهبل بسم الله ماشاء الله انتبهو تحسدونهم ولا شي
بيحسبوني ابكي على خايب الرجا وحزينه على فرقاه الله فلم مصري حزين ولا احلى والله مشكله تبكي على شي اكبر من تصورهم وهم يناظرون بالتفاهه وكأنها اعظم همومي

رضيت املك واتطلق واخلعه واترمل وكل شي بس ارتاح من اللي انا فيه والله كل شي يهوووون وما عاد اشوفه شي



,,,,,,,,,,,

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

وانا بالصف الرابع
استقرت الاوضاع شوي ورجع ابوي للبيت
وصرنا نهتم فيه
تغير كل شي تغيير جذري
قبل كان ابوي ماسك اخواني مزبوط
اذا طلعو لهم وقت محدد واللي يتأخر دقيقه وحده بس
يعني ترجع الساعه تسعه تسعه ودقيقه
يعلقه ويتوطى ببطنه
ويخافون منه
طبعا عبدالرحمن ومحمد وعبدالله
عادي متوظفين مع انهم كانوا صغار مررره على انهم يتوظفون كلهم توظفو قبل مرض ابوي
باقل من خمس شهور
لكن باقي فارس بسن مراهقه
وابوي كان ممشيه على السراط المستقيم قبل
وفجأه كذا صار كل شي مفلوت
صار يطلع يرجع متأخر للبيت
وما يقعد بالبيت ابدا ما يسمع كلام احد نهاااائي
وامي واذا احد كلمه يهدد بانه راح يترك البيت
ياخذ مصروفه كل شهر ويدج غياااب عن المدرسه
تأخير مشاكل بينه وبين اخواني
والله تخيلو كان يرجع من المدرسه قبل ما ياكل شي او حتى يبدل ملابسه يروح يوضي ويصلي
يوميا يقرا قران
واحسن اخواني من ناحية الدين
بيوم وليله قلب حاله
سافر اكثر من مره وكل مره مكان طبعا مو خارج السعوديه لا
بس كل فتره بمدينه مره

صلاه ماصار يهتم فيها مثل قبل مره يصلي وعشره لا تغير بكل شي
عصبي ما يعطي احد وجه
وامي تقول اتركوه وبيرجع ولدي واعرفه
عمامي قعدو يلومون امي ان الولد بينحرف ومخدرات وكلام كثييير
صح كان يتأخر بس يرجع عادي زي ماهو لا فيه ريحة دخان ولا تصرفاته غريبه
واهمل الصلاه
انقلبت نفسيته او احنا كنا نحسب ان كل هالتصرفات نفسيا وهي شي ثااااااني
بتعرفونه لما اكمل


بهالسنه مرضت اصغر وحده من اخواتي كان عمرها تقريبا سنتين
حمى شوكيه من دون سابق انذار
شوي قالو عندها مويه بالراس !!!!!
كانت عادي طيب وما لاحظو عليها شي

وتنومة بالمستشفى فترره مره طويله ومن اثر الحمى الشوكيه سببت لها شلل
ما تتحرك
وقررو يركبون لها جهاز في راسها عشان المويه وقعو العمليه وسووها

البيت امي مو موجوده بالبيت نوف رجعت بيت زوجها
وما باقي غير عبير بالمتوسط
هي المسؤله مكان امي الاكل كله من برا طبعا الا اكل ابوي لانه ممنوع من اشياء كثير
عبير غياب عن المدرسه

مشاكل اعصاب مشدوده
وكل شي ورى بعض ورى بعض مافي ناخذ نفس الا مصيبه ثانيه

جو البيت كأأأأأأبه بشكل ماحد يتصوره

انا باقي بمشاكلي بالمدرسه مع المدرسات ونجود
وهالمره اتبعت اسلوب ثاني غير اني ضربتها
لا اللحين تشويه سمعه بالكلام
سبتك قالت فيك والبعض يصدق والبعض لا لانهم عارفيني معهم من اول
وعارفين اللي بيني وبينها هي بس الف الفت مجلدات في سوء اخلاقي
وهي تروح وتجي ومرتاحه اني ماراح اتكلم فيها مهما كان تقرب لي
وانا عندي نظام يقرب لي ما اسبه قدام احد غريب لو اش يسوي


علاقتي صارت اقوى مع اخواني
وما ارضى احد يتكلم فيهم مو بس ما ارضى الا الله يعينه اللي يقول عنهم نص كلمه
وما اشوووف زيهم بالدنيا كلها
ما اتوقع منهم ابدا انهم يغلطون بحقي او يسوون شي ما يرضيني
حياتي كلها تمحورت امي ابوي اخواني هم المرتبه الاولى
كل شي بالنسبه لي وبشكل فوق الطبيعي لدرجة اني ما اشوف اغلاطهم ومعهم معهم حتى لو هم غلط
ما اعترف واقول غلطو لااااااااااااااااااااااااااااااااااا اخواني كيف واهيء لنفسي انهم صح
وافتخر فيهم اشوفهم شي كبببببببببببببببببيرمره فوق السحاب


القطو الاسود لسا المحاولات قائمه عشان يصيدونه اخر ما توصلو له انهم
يحطون له سم بالتونه
وفعلا سووها
وانتظروا ويجلسو يراقبون راح القطو وقرب من التونه وتركها ما اكل منها شي
وجو اليوم الثاني حصلوها زي ماهي وهو فوق السور
شالو التونه ويحللون انها ما عجبته وجابو له لحم وحطو السم نفس الطريقه قرب منها وما اكلها
حطو السم بالمويه ماصار شي
حولوه على شبك ويحطون فيه لحم يدخل ياخذ اللحم ويطلع بسرررررعه قبل ما ينصك


طلعت اختي وامي من المستشفى
وتو ما امدانا شهر مرتاحين
نمت صحيت قالو ابوك بالمستشفى وش فيه خير
جلطه ثانيه
ليه وش السبب مافي سبب جلطه وتكررت
كمان قعد حوالي الشهر بالمستشفى وطلع عادي مثل اول احنا نسوي له كل شي


سنه مرت مره امي مره ابوي غايبين عن البيت
قعدنا فتره ورتفعت حرارة اختي الصغيره وصدرها صاير كللله احمر
ودوها المستشفى قالوا التهاب بالجهاز ولازم نشيله ونحط واحد ثاني
امي معها ومره بالعنايه المركزه ومره بالتنويم


اكتشفنا امي معها سكر سكر ما ينخفض ابدا داااايم مرتفع حتى مع الحميه اقل شي اذا نزل مره l 350
اما اذا طلع مره يوصل للـ l 500


ورجعت امي مع اختي مستوانا الدراسي نزل
فارس دايم غايب
وعبير نفس الحاله لان مافي غيرها بالبيت والباقين في وظايفهم
انا ولاول مره اجيب جيد جدا


ندى كانت اول سنه لها بالدراسه
وكمان مافي احد فاضي يهتم لاحد
او يشوف وش ناقص عليه وضع غير اللي كنا متعودين عليه

عبير محتاسه ما تدري وش تسوي لانها زي وضعي اللحين لا تعرف تطبخ ولا تدري عن شي في شغل البيت
ومتلخبطه
فارس صار كل مصروفه يروح بشحن او كرت اتصال للثابت
ويقعد بأي مكان يكلم بأي مكان كان وياويل احد يدخل عليه تليفون البيت دايم مشغول ليه فارس يكلم من يكلم ؟؟؟؟؟؟؟

ما ندري

يخلص فلوسه كلها ويجي عند عبير يطلبها ومره انا وندى ويقعد يحزنا لحد ما نعطيه
قلنا لامي قالت بجي وبشوف وش فيه بس متى ياحسره باقي مع اختي بالمستشفى


وقعو كمان عمليه ثانيه لها عشان يغيرون الجهاز
وغيروه
وصار وفتحو فتحه براسها وصارو يسحبون المويه عن طريق انبوب
كل المويه اللي تطلع كأنه ببسي مره سوووودا
ومو راضيه توقف واذا وقفت بيطلعونها طوووولت على هالحال
واحنا على وضعنا


بعدها كان مع امي وحده بنفس الغرفه بنتها تقريبا نفس الوضع بس هي اخف
وجابت شيخ عشان يرقي بنتها
وعلى طول تحسنت قالت امي لعبدالرحمن واخذت رقم الشيخ وكلمه اخوي
وفعلا جا اليوم الثاني وقرا عليها



خلص من هنا والمويه اللي كأنها ببسي تحولت لمويه صااااافيه
وتحسنت مررره
وقال فيها عين قويه البنت
هو صادق كثير تكلمو فيها



طلعت بعدها بأسبوع ورجعت امي للبيت
ونبهتنا ما نعطي فارس شي من مصروفنا
وصار يطلبنا وما نعطيه ويطلب امي وما تعطيه

يصير زي المجنون اذا ما كلم ويقعد يصارخ ويقعد بزاويه ويتغير وجهه وعيونه تصير كأنه يبكي
ويسكت ومعد يتحرك

محد انتبه كلنا مضيعين ما ندري وين الله حاطنا

انتهت السنه الدراسيه
فارس رسب بسبب غيابه

عبير نجحت لانهم عارفين بالمدرسه ظروفها وساعدوها
انا جبت تقدير جيد جدا وانقهرت مره
وقعد ابكي لاني ماني متعوده
ندى ممتاز عاد اولى مايبي لها فلاحه
نفس الصيفيه الاولى
بالبيت ما طلعنا لمكان
جونا عمامي علشان ابوي وقعدو عندنا
غيرنا جو شوي


وانا وبنت عمي اللي بسني سوينا بلاوي متلتله
وافكار مدري من وين جبناها


اقولها بالرد الثاني







....................................

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

كان ولد عمي دايم يخوفنا بقصص
عن الجن ويجيب اشياء تخوف وكله عشان نخاف وننام
بس انا وهي نخاف وقتها وبعدين ننسى
خطر ببالنا فكره عشان نخوف اهل البيت

وبما انهم عندنا فما في نوم الا الفجر انا وهي نكمل لحد ما ينامون كلهم
ونحرك الاشياء البيت
نشيل جوالاتهم ونحطها بمكان ثاني
ناخذ الشنط ونرميها بالصاله
اشياء خفيفه يعني نقدر عليها وبعدها نروح ننام

اول مره عدت والمره الثانيه بدو يستغربون
واحنا بريئين ما ندري عن شي
وكملنا وكل مره نسوي نفس الشي

ويالله على هالحال لحد ما راحو من عندنا
بيتنا المحترم صرنا نلمح اشياء سودا تمر بين الغرف
والباب نصكه ينفتح نسمع اصوات ركض بالبيت
وكلها بااخر الليل تصير
بس ان اشياء تضيع لا


واشياء كذا استمرت لحد ما طلعنا من البيت قريب
مشت الاوضاع زي ماهي اخذنا راحه شوي
اغلب المشاكل ما تصير بالصيفيه والاجازات كلها وقت مدارس

فارس على نفس وضعه مع المكالمات يوميا وبالساعات
ويقلب الدنيا اذا ما كلم

امي صارت تعصب عليه وهو يهدد انه يترك البيت ومعد يرجع اخواني يحاولون فيه
بس بكل الطرق مره معند اشرطه كتب عشان الصلاه ابدا
غير كذا نقول له قول لا اله الا الله يرفض
وحتى على الاكل ما يسمي ونقول له سم طيب قبل تاكل وهو ما كأنه يسمعنا


بهالسنه عبدالرحمن يبي يتزوج وخطبنا له وحده تقرب لنا وليتنا ما خطبناها
وافقت وملكو وكل شي
تغير عبداالرحمن شوي يعني مو بالاول
البيت اغاني على طول امي تجيها الام كل شهر ببطنها على كلامها مثل الاام الولاده وتقعد تعبانه
راحت المستشفى اكثر من مره وما في تشخيص معين

صرت خامس
ونفس الموال بس هالمره غير الاستاذات يجمعون الدفاتر ويضبعون دفاتري
واللي يقهر اني من النوع ما اخلي دفاتري عادي اهتم فيها وتسطير وطوابع واغلف الدفتر من برا
وابدع فيها
وتضيع كل البنات ترجع دفاترهم الا انا وين تروح ما يدرون ياحرام
دفتر دفترين ثلاث ولمواد مختلفه عبير لاحظت انو كل شوي اعيد دفتر من اول واتفاهم مع الاستاذه انو دفتري معك
وهي ابدا وتقولها بكل برود روحي دوري الدفتر على مكتبي اذا لقيتيه كان بها اذا مالقيتيه عيدي
وقلت لها باللي صار
وجت المدرسه وكلمتهم وين تطير الدفاتر ويقعدون يستهبلون ويوعدون فيها انهم يدورونها لحد ما تروح
وكأن شي ما صار
ندى عادي تعاملهم معها وهي اصلا مؤدبه ما تتحرك شبر خارج الفصل عكسي كنت ما اجلس وكل ما زاد الضغط بالبيت
اطلعه بالمدرسه ما اجلس بالفصل العب اصرخ
اخرب اكتب اي شي اهم شي ما اقعد كذا
جتنا استاذة عربي جديده ودرستنا ما تسمع فيني وانا كل شي عندها وتحب تسولف معي وراي بكل مكان
بالفسحه والصرفه على طول تدورني

وبعد صار مشكله افتعلتها نجود وقالت اني اسب المعلمات ووو وياحركات الورعان وتخلف الكبار اللي مدري وش يحسون
وزعلت يومها وتخاصمنا
وهي عندها لين بالعظام ومن اهون دقه تطيح وما تقدر تشيل شطنتها لحد الفصل وتتعب اصلا من الدرج والشنط ثقيله
فكنت دايم اشيل شنطتها في الصبح وبالصرفه انزلها واطلعها لها

لما زعلت بطلت اشيلها لها
وحلفت ما عاد اسوي لها شي لو اشوفها تموت قدامي وصلت معي صبرت صبرت ومره مافي امل
وشالتها اول يوم وكل شوي تطيح بالدرج وببالي تستاهل عشان تعرف من انا
وقعدت اسبوع تشيل
وجتني هاذي الاستاذه اللي مضيعه دفتري وتهزء ليه ما تشيلين شنطة نجود
وقتها بديت استوعب وارد
قلت ماني ملزومه اشيلها تبين تشيلينها شيليها او خلي اي وحده تشيلها انا مالي شغل
وعصبت علي واليوم الثاني جايتني وتقول شيليها يؤ قلبت عناد قلت مافي الشنطه بيدك وتدلين الفصل
وديها ورفضت رفض بات وجت المديره طبعا ما تدري وش صاير من الاساس
وليه ما تبين عمل الخير واعطتني محاضره قلت لا ما ابيه وتركتني

رجعت البيت منا وتدق علينا ام نجود منا
رديت انا قالت وش فيك ما عاد شلتي شنطة نجود ما تقدر
قلت كيفها تقدر ولا ما تقدر شنطتها وانا يالله بشنطتي مو مسؤله عن احد
قبلها قلت لامي وش صار بيني وبينها بعد محاولات
وكلمت امي وليه ومدري ايش قالت امي بندري مي شغاله عند احد زين واذا نجود ما تقدر تشيل شنطتها والله مو مسؤلية بنتي


انتهى الموضوع شلت يدي نهائي من اي شي ممكن ينفع نجود
ارفض نكون انا وياها بمجموعه وحده او نشترك بشي

رجعت ترسل بالبنات عشان نتصالح وتصالحنا بس كملت وما صرت اعطيها وجه


بالبيت
اخيييييييييرا صادو القطو الاسود اللي معذبهم من اول
وحطوه بشبك وصفقو فيه تصفيق الين تفل العافيه
ما قتلوه ودوه مكان بعيييييييد ممره عشان ما يرجع
لكن وش صاااااار ما رجع بس اليوم الثاني


قطوه سوداغيره محضره بالبيت
وناشبه مثله
رايحه جايه بس هي ما تقتل شي بس تتفرج وتتمشى بالحوش


سافر فارس وقعد حوالي اسبوع ورجع
رجع وش يقول
انا بتزوج تتزوج ياحمزه وانت توك بزر بالثانوي
واحبها وابيها وتجنن تاخذ العقل

وبيتهم يجنن ويناسبون مررره لنا
ويتكلم وامي بتنفجر مره مصر وبقوه

وصاحبه وش يقول طبعا اصحاب اخواني يعرفون بعض
وبالذات عبد الله وفارس

صاحب فارس وش يقول يقول وربي يا عبدالله لو تشوف بيتهم خرااااابه يقصد بيت البنت اللي فارس متعلق فيها
مو بس خرابه الا شبه مهجور وبحي بعيد وحالته صعبه
غير كذا البنت واهلها سمر سمر
ولا شافت الجمال
واخوي شايفها غير البيت مطيره فوق والبنت ملكة جمال

عادي عرفنا ليش ما احد انتبه تحرك شي مدري
بروووود تام

رجعت اختي انتكست وتوقف عندها القلب ثلاث مرات
وقعدت بالمستشفى وحالتها كل مالها في النازل


ابوي قعد يأشر اشارات ما فهمناها الا بعد طلوع الروح
وكان يقصد ان بالبنك فلوس
ومدري والله عن التفاصيل كيف عبدالرحمن صار يستخدم صرافة ابوي ويجددها
ماني متذكره كيف
حصل مبلغ كبييير بالبنك لابوي
وبنك ثاني فيه كمان مبلغ وقدره

وتحدد زواج عبدالرحمن بالصيفيه
وبدا يحجز وساعده ابوي بكل شي

ونفس الحال رجعت اختي تعبت وتنومت اغلب الوقت امي مو بالبيت


...................................

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

من بعد ما خرجت اختي وامي من المستشفى
لحد زواج عبدالرحمن مافي شي مهم كلها عادي
وتم زواج عبدالرحمن
زوجته طيبه واخلاق ومثاليه وكل شي مؤدب بالدنيا هذا مبدئيا
بس بينها وبين عبير شوي مشاحنات
مع ان عبوره مسكييييينه وضعييييفه اكثر من الازم
بس زوجة اخوي اعوذ بالله
حشرررريه وش لبست وش قالت وش سوت وين طلعت
كل شي في عبير تتدق فيه غير الدق بالكلام
واختي على نياتها تسكت وتقعد تبكي بعدين

وش صارت تسوي الاخت اي شي تطلبه امي من عبير تروح هي تسويه ليه عشان تبين لامي ان اختي مدلعه وما منها رجا
والصدق والله مشت خطتها صارت امي ما تعبر اختي ودايم تهزء فيهاا وهي احسن منكم وووو

اختي تنقهر ووالله من حقها لانها دايم تسوي كل شي مطلوب منها وما تتأخر الا اذا كان عندها شغله ضروريه وحتى اوقات يكونون بالمطبخ وامي تقول عبوره جيبي شي من الثلاجه تروح زوجة اخوي تركض وتفتح الثلاجه وتطلع اللي طلبته امي وتعطيها

امي صارت تشوفها فووووووق وما تسمع فيها
وتحبها اكثر منا يووووه حتى تزعل لو قلنا فيها ربع كلمه
وتعصب علينا
وش هالملاك بعدين عندها بيت لازقه عندنا
اربع وعشرين ساعه عبد الرحمن يروح الدوام تجي تبلط عندنا
طيب واخواني الشباب ما ياخذون راحتهم يبون يروحون ويجون بالبيت مو كل شوي في احد

بالنسبه لي كنت بزر ما فكرت بهالاشياء بس عبير كانت تتضايق
ونوف نفس الوضع تشوفها ملاك
ومافي زيها

الله صررررت سادس


صرت ارد تدريجيا واصرح بالعناد واوضح انها عناد
بديت احس اني كبرت وابي ارجع زي اول كلامي مسموع يكفي صبرت ثلاث سنين والله كثييير

بالبيت صوتي عالي اذا طلبت شي مافي يتأخر دقيقه
لازم يجيبونه لو من تحت الارض واذا طنشو صرت استعمل اسلوب ثاني اروح لابوي واقول له وهو بدوره يصر معي يجيبونه
وبكذا ما ينرد لي طلب
كأأنهم بدو يعطوني وجه وما يسفهوني زي اول
صرت اعشق اخرب اي شي سريري احب اكسر فيه
اي شي قدامي لازم العب فيه وافككه
بديت ارسم ورسمي كان متقن بس كل اللي ارسمه ارواح
عصافير بط حيوانات
انمي كلها بقلم الرصاص ما الون والى اللحين احب كل رسماتي بقلم الرصاص من دون الوان
انصدمو اخواني ان هالرسمات انا رسمتها لانها مزبوووطه وبالتفصيل
تنومة امي علشان السكر ارتفع عندها مررره وطلع معها ضغط بعد
وطلعو عمامي بشي جديد اللي هو الكوي عشان يرجع ابوي يمشي رفضوا اخواني

بس مع اصرارهم قالت امي خلاص ودوه عشان يريحونا وما يقولون انا ما سوينا اللي يبون او يحطون علينا لوم
واقنعو ابوي انه خلاص بنكويك من هنا بتمشي وترجع زي اول
عني والله تحمست قلت خلاص اخيرا فيه حل

وفعلا راح وكووه ورجع زي ما هو ابوي تحطم وانا مو باحسن منه
اخواني امي نفس الحال باستثناء فارس اللي بعاااالم ثاني

شفتو دفاتري الضايعه يالله طلعت بعد ما صرت ما احتاجهم
ارسلوها لي مع طالبات وش ابي فيها اللحين بعد ما عدت السنه اخذت الدفاتر ورحت لهم قلت خلوها عندكم مو بحاجتها اللحين
وطلعت

نجود ااااااه يا نجود كل سنه طلعه شكل وبالسنه نتزاعل الف مره
امي ما تحب تحضر اي ندوة امهات عندنا بالمدرسه ما كنت ادري ليه
دايم اجي فرحانه البيت اليوم الثاني امي بتحضر معي وما تجي
ليه تصررررريف مره ما صحيت ومره تعبانه ومره مشغوله ووو يا كثر الاعذار

دلخه مشيت عادي
عاد اكتشفت انه كان غير مرحب بي وانها كانت تبي تنزلني بس طلعت نشبه وليتها نجحت محاولاتها وما انخلقت كان احسن او مت وانا صغيره

عادي ما اثرت فيه مررره بس يعني اللي قهرني شوي انها كانت فرحانه باخواني كلهم او على الاقل متقبله الوضع

نرجع للقطوه جابت قطاوه صغارر يدننون صغاااار مره
واحد ابيض والثاني بني وابيض والثالث اسووووود
مع الوقت كبرو الصغار وراحت هي وراحو القطوين الثانين وبقى الاسوووود
والله وباقي ترو الشغله وراثه


عبد الرحمن زوجته حامل وهو التزم بطل يسمع اغاني وصار يوميا يصلي بالمسجد

واختي اوقات بالبيت واوقات بالمستشفى وكل مره عله غير مره جرثومه بالدم ومره نقص اوكسجين وابوي مراجعات وكذا


عدت السنه وانا خلاص علقت على جيد جدا ماعاد فيه ممتاز
تخرجت من الابتداائي واخييييييييييرا بعد قرف ست سنوات
بفتك من مدرساتي كل همي ارجع لهم زياره واوريهم
عندي حب انتقام او بمعنى اصح ما احب اخلي شي لازم ارد كل شي
صيفيه ممله زي اللي قبلها مافيها جديد اللهم نطلع نتمشى بنفس المدينه ووواع مليت منها حامت كبدي حفظتها شبر شبر خلاااااص


وصررررت اتغطى بالمدرسه
دخلت المتوسط عالم ثاني غير الابتدائي وسماجتها فله ووناسه وهبال واداره مافيه المديره تطلع مره كل ترم والباقي مغرزه بمكتبها
والبنات ماخذين راحتهم طووول بعررررررض
تعرفت على بنات جدد بالاضافه للي اعرفهم من الابتدائي
كنت انا بفصل ونجود بفصل جحدها ولا اعترف انها تقرب لي الا اذا احد جا سالني واصر اني اجاوب
تجلس معي بنفس الشله

مافي اجلس في الفصل برا على طول وصرت ماخذه عقده من المدرسات اي كائن مدرس ما نعرف بعض لو هو اخوي مع نفسه
احلى ايام قضيتها بالمدرسه كنت العب واضحك وحتى الفسحه نقضيها لعب بالمويه ونشتري اي شي ونتضارب عليه مو قل فلوس لا بس عشان نتونس
رد على المدرسات وما اسمع كلام احد لا بالبيت ولا بالمدرسه كل شي امشيه غصب
الفصل بالقوه ادخل اعاند وارمي على الاستاذه المساحات وعالم ثاني عجبني مررررررررره
وصديقاتي حبيتهم من قلب


امم امي مو كانت ما تحضر معي لاي ندوه للامهات
صارت تحضررر مع ندى بعدييييين عرفت ان مالها خلق لشكاوي المدرسات مني تبي بس مدح وهذا شي يتنافى مع تصرفاتي

ندى بس بالفصل ما تكلم احد ولا تطلع وهااااااديه
بالمتوسط كمان جحده ما تعرفني امي بعدين انا سويت فيها عزت نفس ومعد اقول لها ان عندي ندوات
وش الفايده بقوله وبتطنشني

قلت يالله ما بطيح وجهي زياده واخذت عهد على نفسي ما عاد اقول عندي ندوه لو اش يصير

وجت ندوه وسكت وما قلت شي وجو اعطوني ورقه وشقيتها على طول بالفصل
بعد ما خلصت الندوه عرفت امي من ام نجود وزعلت علي مرره وحسيتها انصدمت مني رحت قلت يا امي ليه زعلانه يعني لو قلت لك بتحضرين
ماراح تجين ومن يوم درست ما جيتي الا مرتين على بعضها فليه اتعب نفسي واوريك الورقه وانا عارفه النتيجه
قالت ليه يعني زعلانه اني ما اجي قلت لا مو زعلانه وعادي عندي
بس لا تزعلين وانتي ما تجين حتى لو قلت لك

وانا والله كنت انقهر ليه كل البنات يجون معهم امهاتهم وانا لا بس اسكت وابلعها واشرب عليها مويه وتمشي الامور

نجود عندها صديقه بفصلها وعلاقتهم ببعض مره قووويه
وتقعد معنا بس بالصرفه
وانا اكون موجوده ويكون بينا سوالف بس سطحيه
ومره جت قالت لي ممكن اصير صديقتك قلت ممكن
من يومها سحبت على نجود واغلب وقتها معي ونهبل بالمدرسه



طلعت لي بنت وانا بأولى من ثالث تقول انها معجبه وكلام الدلاخه اللي صاير اللحين طبعا انا ما عندي هالكلام وعبير مفهمتني من اول كل شي من الناحيه ذي
وصرت استهزء بالبنت واطفشها وارمي عليها علب وكأني مو قاصده وانا اعطيها من قلبي عشان تعورها

احداث السنه هاذي كثييييره
عبدالرحمن ما ادري وش جاه وصار يقرا كتب عن الجن والرقيه
وكيفية العلاج
وبما اني مسويه قويه اقرا معه واي كتاب يخلصه انا بعده اقراه
ما كنت افهم مره بس يعني اني فاهمه
واقعد قعده على الكتاب اخلصه باربع ايام

الموهم عبدالرحمن جايب معه عود مدري مسك حاجه كذا
ويبي يسأل امي وش رايها فيه ويستاهل قيمته ولا لا
فارس كان بنفس الغرفه
وشم ريحته وقعد يصارخ وخروووه ريحته خايسه كتمني
وجلس بالزاويه
وشوي ويبكي


,,,,,,,,,,,,,,,,,,,,,

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..

^ ^ ^


وبما ان عبدالرحمن بدا يقرا بهالاشياء
عرف ان وضعه مو طبيعي
وداه لراقي
وتأثر مره واعطاه زيت وموية زمزم واشياء كثير يستخدمها
رفض انه يستخدم اي شي منها
وما يروح للشيوخ ابدا
صار يقرا عليه عبدالرحمن بالبيت
وهو يتأثر بس يكون ساكت ما يرد على اي سؤال
ويقعد يبكي
واوقات يده تتحرك بقوه
انا لازم اكون موجوده بموقف كذا ما كنت اخاف من الاشياء ذي ابدا
وبالعكس احب اشوف وش يصير
ويقرا عليه كل فتره والثانيه
ومره اتذكر جابو بطاريه ماا اردي كيف سوو فيها ويقربون الاسلاك من بعض يطلع زي الشرر كثييييير
عشان يخوفون اللي بفارس مع القراءه
وصارت مضاربه جامده بينهم كنت موجوده بنفس الغرفه
ومعي عبدالرحمن ومحمد وانا اتفرج شوي بسم الله قامت حرب بين فارس ومحمد
وقتها بغيت اموت من الخوف
اخذ عبدالرحمن مويه وكتها على فارس جلس على طول وقعد يبكي واستمر يقرا عليه
وصارت رجله تتحرك بقووه
وبعدين نقول له وش صار يحلف انه ما سوا شي من اللي قلناه ومو مصدقنا
ويقول بالله انا بمد يدي على اخوي صاحين انتو ولا مجانين


صار اوقات يجلس معنا على الاكل ويقول لنا وخرو عن اولادي يجون ياكلوون
وتكرر كلامه ذا اكثر من مره
واوقات يطلعنا من المكان اللي هو فيه ويقول اطلعو بتجي من هي ؟؟؟؟؟
ما ندري

استمر على وضعه
وكل مره يزيد لحد ما صار حتى رمضان بالغصب يصومه
واوقات اذا قرا عليه عبدالرحمن يسالها يقول انتي مسلمه ويحرك راسه انو لا بس ولا كلمه تنطق بس بالاشارات


عبدالرحمن صار عنده بنت
وعبير انخطبت وكمان محمد خطب وكلهم الاثنن ملكو
بنفس السنه


ممكن اخف سنه كانت ذيك السنه مع انا انشغلنا مره مع فارس وتصرفاته
المدرسه مستمره الوناسه فييها كنت ارفه عن نفسي فيها كثييير عكس البيت جوه كئيب
وقت اطلع الصبح ارووح فرحااااانه وبس ارجع احس اني متضاااايقه
وما ابي اكلم احد
ندى كانت متعلقه مرررره بعبير وانا بعد بس انا اخف من ندى
صارت عبير اغلب وقتها تكلم تكلم من هنا ندى تقعد تبكي وتصرخ لاتكلمينه

ما كنت اهتم مررره كل يومي اقضيه تخطيط لليوم الثاني وش بسوي بالمدرسه
او اكلم صديقاتي وتنفق وش نجيب ووش نسوي
وماني حول احد بالبيت

صرت اطلب اي شي مره وحده جابوه كان بها ما جابوه معد افتح سيرة الموضوع نهائي
واوقات يتذكرون واوقات ينسون
كان متحدد زواج محمد وعبيربالصيفيه
وناسه صرت انا وعبير كل يوم بالسوق
ورايحين جايين تونست مررره ونفر نفر وما نخلي شي الا نشتريه
وكل يوم على هالحال وبالذات لما قربت الصيفيه
صرنا يوميا ارجع من المدرسه انام اصحى قرب المغرب وعلى السوق لحد الساعه عشره تسعه بالليل
واوقات تكون امي معنى واوقات لا

الواجبات ما اعترف فيها لا هي ولا المذاكره
واجباتي احلها على طول بالفصل والاختبارات عاد الله المستعان كلها غش وضحك


اخييييييرا سافرنا بعد طلوع الروح
ورحنا جده شهر
وتونسنا وكل يوم بمكان


تزوج محمد عادي مافي شي مهم يعني
وقرب زواج عبير وحزن وبكى وكأبه
عاد نوف متزوجه من اول يعني عادي قدنا متعودين لكن عبير لاا معنا من اول وكبرنا وهي معنا عشان كذا تأثرنا
قبل زواجها بيوم البيت فل ناس
وما طلعو الا بعد العشا راحت امي تنام وحلفت لو جت وحن صاحين لتندمنا
انتظرنا لحد ما نامت
وقعددنا نسولف كأخر يوم لها معنا ونتضارب وعبينا الغرفه مويه
وقعدت انا وهي وفارس لحد الصبح اما الباقين نامو
وراحت تسوي لنا عصير لا انا ولا فارس ننسى طعمه الى اللحين ودايم نتذكره ونضحك
يالله مدري كيف اوصف طعمه مو حلوووووو انا اشرب وبالقوه عشان ما احطمها حرام اخر يوم وبعد محشات
فارس شرب النص وراح نام معد قام

اه يا ذاك اليوم بعد الزفه وكل شي رحت ابكي وبنات عمي يسكتوني وعبير النذله تضحك ومستانسه اللحين انا خلاص
خلصت دموعي وهي تضحك
قلت والله لا اوريها وبعد ما راحت تكلمني اليوم الثاني
وتقول مشتاقه لكم
واقعد اسوي نفسي ابكي وهي تصدق وتمسك خط معي وانا خلاص طفشت من كثر ما بكيت
واقعد اسبوع كل ما كلمتني اسوي نفسي ابكي وهي تبكي من جدها
اجل ابكي انا وهي طالعه من القصر وهي تضحك


واكيد اخواني اللي تزوجو تغيروا مو زي اول عادي ما يقصرون بس في شي مو زي اول
في حاجه تغيرت


ثااااااااااااااااااااااااني متوسط
احلى سنه مرت علي بحياتي بالمدرسه الجنان زاد وكل يوم نجيب اكل ونقعد ناكل بالحصه
كل اسبوع باالاداره وتعهدات واستدعاء لامهاتنا
مطبقات ولعبنا فيهم لعب استهزاء وتريقه واستعباط كل شي يخطر بالبال ونطلع من الحصص
ونقعد بالدرج
ومره ننكشف ومره لا
صارت علاقتننا اقووووى جننا المدرسه كلها
بين فتره وفتره نجيب بودرة اطفال ونلعب فيها ومرات نجيب بيض وبلونات نعبيها مويه ونلعب فيها
ما خلينا شي ابدا

نجووووود هالسنه دووووري خلاص كفايه كل سنه هي وانا اسكت
هالسنه طلعت سالفه وفيها لحقت اخواني بالسب
وقتها ما عاد شفت شي واصرخ عليها ببالفسحه المدرسه كلها عرفت وش صار
وهي تبكي ياحرام ما كأنها هي اللي بدت
طلعت المديره والوكيله ونص المدرسات
وودونا على الاداره والشله كلها
وش فيه ليه الصراخ وقعدت تهزء المديره قلت مافي شي سالفه بيني وبينها
قالت وشي قلت خاصه مو لازم تعرفينها
عاد جت المديره قالت اعتذرو من بعض
قلت اوكي هي اللي غلط هي اللي تعتذر اول وبعدين انا
قالت المديره يالله يانجود اعتذري واعتذرت وجا دوري
قالت يالله اعتذري يابندري قلت ما غلط عشان اعتذر مابي
وتحاول وتهزء اعتذري قلت والله لو قام جدي ابو ابوي من قبره وقال اعتذري ما اعتذر
وحتى لوغلطانه ما بعتذر مزاج
ونجود بغى يجيها انهيار عصبي من القهر بتكتبين تعهد قلت اكتب امك تجي قلت تجي ليه لا
وكتبت تعهد وقالت امك تجي بكره قلت طيب
واطلع واصله السما انتصرت اخيرا طلعت حرتي فيها
البنات نص معي ونص معها وقلت لهم اللي تبي تروح تروح تروا ماهي واقفه عليكم المدرسه مليانه بنات
اللي زعل من كلامي واللي مشاه
بس وش اسوي لهم اترجاهم


قعدنا فتره وتصالحنا
ووصلت السالفه لامي وليه ما اعتذرتي زي ما اعتذرت وعبدالرحمن مؤيد لكلام امي
وفارس يقول وقسم لو كنتي اعتذرتي كان صفقتك انا

اختي رجعت للمستشفى بس هالمره كان فيه شغاله
هي اللي شايله البيت وانا بس على النت وعلى الى البلايستيشن
ولعب وكل شي سويته بهالسنه

صح ان غياب امي ومرض اختي مأثر بس تعودنا كل مره شي
نتأثر بالبدايه وبعدين خلاص

هالمره قالوا معها تسمم بالجلد
ما ادري وش هالتسمم بس تنومت عشانه
ومرات بالعنايه المركزه
وصارت على الاوكسجين وحتى لو طلعت لازم اوكسجين معها وبخار واشياء كثير


وطولت كانت اكثر مره قعدتها بالمستشفى
ابوي كل ماله يزيد عناد اكثر من اول باشياء بسسيطه ما تحتاج عناد اصلا بس عاد

وقرر الاخ عبدالله بعد يخطب وخطب وزواجه بعد رمضان
محمد جاه نقل من دوامه لمدينه ثانيه
وبعده على طول عبدالله ونقل هو الثاني
صار مافي غير عبدالرحمن وفارس عندنا



والقطاوه السود على حالهم تولد تجيب قطاوه ملونيين وواحد اسود
يروحون كلهم حتى الام ويبقى الاسسود الصغير ناشب
وباقي الاشياء السودا اللي تمر بس بعد ملاحظه كانت رايحه جايه اكثر شي من غرفة امي وابوي
للصاله وبقية الغرف نادر

الباب اللي يطل على الحوش هو اللي دايم نقفله نلاقيه مفتووح




توفت بهالسنه خالة ابوي الله يرحمها كنت احبها مررررره
وحزنا عليها مررره وبعد فتره زوجها


عادي بقيت الايام لا جديد وبعد تزوج عبدالله ومافي شي مهم او اثر علي
بس ثالث متوسط واولى ثانوي وثاني وثالث اعووووووذ بالله الله لا يعيدها ايام




.....................

__________________
... هذا المستخدم لم يعد موجودًا...~ حللونا ~

همسھٓ ....
إن مرت ذكرايےّ علےّ قلوبكم فاذكرونيےّ بدعوھٓ فيےّ ظهر الغيب..