ما اعرف ما احس ان الامور راح تتطور لدرجة اننا نتفق انه يكتم او ما يكتم .. احس راح نتطلق خلاص ..

و ان كان في الموضوع رجعة .. ما احسه بيتوب .. بو طبيع ما يجوز عن طبعه

بالنسبة لشكله كنت قبل اشتكي من سمنته الزائدة عن الحد .. و كان ما يستجيب لنصايحي ابدااااا

تركته يولي و اشتغلت على نفسي رياضة و اكل صحي .. لين صرت رشيييقة و بيرفكت و توه من 3 شهور تحمس معاي دايت و رياضة و بدا ينزل وزنه ..
لكن اعتراضي عدم اهتمامه بلبسه و نظافته .. في الوقت اللي هو يطلب مني اكون على سنقة عشرة 24 ساعة و الميك اب على طووول ز.
اوكي ما عندي مانع بس انت كمان اهتم بنفسك و لبسك

استغرب من بعض الرجال يفكرون بس هم اللي يفتنهم تالجمال و يدوخون مع الرزة .. الحمدلله و الشكر .. ترا حتى الحريم اوادم

ويمكن زوجك معصب عشان ......
انتي ادرى في زوجك هل يحب العلاقه باستمرار
من حقه عليك تهتمي فيه وما في أحلى من النظافه والعطر بدون تزين مكلف اشويه دلع وخلاص وينتهي الموضوع بالسرعه
وتأني مره لمى زوجك يعصب وبذات. عند أهله خليه يبربر على كيفه ولا تدخلي بالصراحه لا تزعلي مني ياليتك مارديتي عليه ولا اخذتي الموضوع بشكل شخصي لانه تطور وكبر واحرجك قدام أمه
وصدقيني راح يتواصل معاك وأكيد هو ندمان وراح يحسب زي كل مره انتي راح تتصلي وينحل الموضوع بينكم
الله يعينك ويهدي سركم لكن خروج الزوجة من بيتها صعب
كيف علاقه زوجك مع اهلك
وهل أبوك من النوع الهادي ولا ممكن يكبر الموضوع ويتازم الوضع بينكم

__________________
ريم نواف سابقا

المشكله ومافيها انتي ساهجته وهاجرته
المشكله انتي سببها لاتنكرين
خلاص هو يحب العلاقه ليه انتي جافه !
هو معصب وحمق وفاض فيه الكيل عند اهله لانه زي ماقلتي من زمان مو ماخذ حقه
عطيه حقه وتزيني له لو يتزوج بكرا تعالي نشوف وجهك عقبها !
الله يهيدك بس
الحرمه ان بغاها زوجها سفهته وان سفهها ركضت وراه تبي نظره بس
وبعدين ودي افهم ايش كلمت مشغوله ذي اللي طايحين فيها
يعني ماتغضين ولا ربع ساعه تعطيه حقه !

شكرا لتعليقك و ان كان قاسي بعض الشيء

نعم انا مقصرة بحقه الشرعي لانني فعلا مشغولة و متعبة من العمل الطبي ثم من العمل البيتي و مطالب الصغير و مطالبه هو التي لا تنتهي ..

ثم و بعدين ايش يحصل لما هو اللي يبادر لو بكلمة الله يعطيك العافية و مسحة على الراس .. بدال ما يقلب وجهه و يعصب و يجلس منتفخ .. و تعالي انتي فكيه

كيف يعني .. والله حتى الانسان اللي مافيه شي .. ينفر و ما يشتهي يعمل شي

و نرجع لموضوع مشكلتي معه ..
انا اشوف مهما حصل .. ما يعطيه مبرر يمد يده قدام الناس

اولاً يا اختي ليش ماتجيبين خادمه؟؟ تنظف وترتب وتراعي لطفلك اذا كنتي بالدوام !! الجنسيه الفلبينيه اذا كانت كبيره في السن ممتااازه للاطفال ..واذا انتي مره حريصه حطي كميرات بالبيت ، الضغط بالعمل برا البيت وداخل البيت يسوي اكثر من كذا ش فايدة الفلوس اذا ماعزتني وجبت اللي يخدمني!! هذي نقطه النقطه الثانيه يا اختي اذا زوجك عصبي لاتراددينه حتى لو قولتك ( ماراح ارد عليك وانت عارف ليش) لو اكتفيتي بالصمت ولحظة الرضا بينتي الاشياء اللي ضايقتك منه كان حبه حبه يبدا يتدارك اخطائه ..اذا كان لابد من كلامك معه لحظة غضبه فقط ذكريه بقولك بنبره هاديه قول اشهد ان لا اله الا الله..ذكر الله فقط،،وربي الانسان العصبي يبي له صمت ومداراة ،،

ومضه: الانسان اللي يسوي دايت في حال افترضنا انه بينزل وزنه (ع اساس مواضيع سابقه) يصير نار مولعه الريجيم يلعب بالنفسيه لعب

شكرا عزيزتي لاضافتك الراقية

انا فعلا كانت عندي خادمة و انا اللي جايبتها و ادفع رواتبها

لكن للاسف سافرت و كذبت قالت برجع و ما رجعت

احنا اللحين مقدمين و هالوضع مؤقت .. و كنت ناوية اجيب بالساعات تنظف الشغل اللي ما اقدر عليه و تمشي .. لكن ما مداني و صارت هالمشكلة

نعم خير ما قلتي .. الصمت من ذهب ..

لكن اعتقد و ان احتد النقاش بين الطرفين و لووو الى ابعد من ذلك .. رغم ان اساس المشكلة سخيف

ليه الواحد يعطي نفسه الضوء الاخضر بسهووولة انه يسب و يهين حبيبه و ممكن يضربه

اي حب هذا ؟؟ اي بطيخ ؟
ما نبي حب .. نبي بس احترام ..

والله على قد ما قال انه يحبني .. كذاااااااااب و ما عرف الحب كيف يكون

الحب عنده على السرير و بس .. هذا حب حيوانات مو اوادم

والله اني اكره العلاقة لهذا السبب .. هو يستمتع و ينبسط .. و انا قلبي مجروووح من اهانة سابقة او جرح .. هو ما اهتم انه يطيب الجرح قبل ما يجيني .. اهم شي هو ..

والله مرت علي ايام .. وقتها اصيييح دم بيني و بين نفسي .. لاني فعلا احس اني حيوانة و انه ماخذني عشان هالشي و مضطرة اعطيه و انا ماكلة هوااا لانه حرام علي

هذا هو يعتبره حب ..

و انا عن نفسي .. كنت احبه لكن كثرة جروحه خلت نفسي تعافه .. اجامله كثير الصراحة

ليش يا اختي رجحتي الطلاق على طول
شوفي راح احاول اوصلك الفكرة الحالية اللي ببال زوجك
هو يرى زوجته انسانه بارده وجافة عاطفيا ومتعبه و
مشغولة طوال الوقت ومهملة بعض الشيء بأمور المنزل
وبارده في فراشه وليست رومنسية
بينما هو يتعب برعاية طفلكما في غيابك
ويصبر على بكائه وطلباته وهو ينتظر عودتك لتعوضيه
فيجدك متعبه باردة جافة
تراكمات هذا الأمر لديه لاسيما كا يتعرض له من فتن
في مجال عمله جعلته ساخطا على النساء عامة وعليك خاصة



طبعا هذا لا يعطيه عذر ان يضربك او يسيء لك
خاصة امام والدته

ارى لاتعودي حتى يتفاهم معه والدك
ويتعهد بعدم تكرار ذلك
وعليك اختي ان تساعدي نفسك لتتهيء لزوجك
فعملك يستهلك كل طاقتك ومجهودك
انصحك بشرب المقويات وخاصة كبسولات غذاء الملكات
فهي مقوي عام وجيد جدا لمثل حالتك

اصلح الله حالكم

__________________
ربنا هب لنا من ازواجنا وذرياتنا قرة أعين

واجعلنا للمتقين إماما

شكرا غاليتي .. على ردك الحنون

شعرت بدفء قلبك

لا اتوقع تجاوب منه مع والدي . فهو لا يحترم اهلي كذلك

و يعصب كثييييير لما احد يكلمه من اهلي او اهله .. يقول ما ابغى احد يتدخل بمشاكلنا ...

طيب لما انت انسان مو كفووو تحل مشاكلك بنفسك و مو حافظ زوجتك و لا صاينها شلوووون ما يتدخل احد ؟؟

انا بالنسبة لي تدخل والدي معناه ان المشكلة وصلت لمراحل متقدمة جدا

شوفي حبيبتي لازم هالمررره توقفيه عند حده
انتي اربع سنين لسا
انا 12سنه مع انسااان عصبي زي زوجك ولسانه وقت العصبيه الله لايوريكي
احيان يقول كلااام يقشعر بدني منه ويكسرررني من جوا
احيان قدام اولادي وقدام امه بعد يقولي كلام الدمعه تتحجر بعيوني من قسوته
بس يجي يراضيني يقولي وقت زعلي امانه اسمعي من اذن وطلعي من الثانيه
وصرررت اطنش كلاااامه
زوجي عنده صفات وايجابيات تخليني احبه وهو يحبني الا خصلة هالعصبيه الكريهه
دخلت الوالد مره بمشكلة عصبيته وتعدل بعدها حبتين
بس الحين بعد 12سنه خلص بطلت اغث الوالد بمشاكلي وتقبلت هالصفه بزوجي الله يهديه
انسي تلقي عند هالنوعيه من الرجال الحوااار مهما كنتي راقيه بااسلوبك وحاولتي تغيريه ماراح تقدري
الوالد كان ينادي زوجي المجلس ويناديني ونتواجهه وكان زوجي يستحي وينخزي من ابوي لما اقول لاابوي عن كلامه وقت الزعل
يتعدل فتره بس ابو طبيع مايترك طبعه
قالي الوالد ابعدي عنه وقت الزعل ولاتستفزيه ولا تتكلمي معه واعطيه كامل حقوقه وانتي ساكته
واسمعي من اذن وطلعي من الثانيه
وطبقت كلااام الوالد بس الا مانصير كل فتره مشكله كذا ولا كذا تنغص ع الواحد حياته
انسي سالفة الكرامه بينك انتي وياه
يعني بينك وبينه يقول الي يبي انتم ستر وغطاء علي بعض
بس قدام امه ولا قدام أي احد لا والف لا
حاولي تعالجي الامر بحكمه ولا تتنازلي خلي الوالد يقوله كرامة بنتي من كرامتي ولا ارضئ تضربها وتهينها قدام اهلك
شفتها مقصره ولا غلطانه جيبها بيت اهلها وقول بنتك غلطانه بكذا وكذا لكن مو تضربها وتهينها
الله يهدي نفوسكم يارب ويسخره لك

يعني معاناتي مافي امل تنحل و تتعدل؟؟ لان مداها بعييييييد

انا كل جرح جرحني اياه مستحيل انساه .. خصوصا المرات اللي مد يده علي

مستحيل اقدر احبه .. و حتى لما اسأل نفسي ان كنت احبه او لا .. والله ما القى جواب

هو انا متعلقة فيه صحيح بحكم العشرة و الاستقرار و تنظيم الامور على اساس الحياة الزوجية

كوني ارجع بيت اهلي يعني امور كثيرة راح تختل و تحتاج ترتيب من جديد و اولها مشاعري

كمان تعلقي فيه من باب اني خايفة من لقب مطلقة ..

و انا بهالفترة جالسة احاول اتقبل وضعي كمطلقة و اني اواجه الناس و اعيش حياتي

حياتي معاه خوف و انعدام امان

احس علاقتنا اساسها ضعيف جدااااا

خطر جداااا اننا نبني عمارة من عشر ادوار على اساس ضعيف