بصراحه كلكم مو راضي يتحمل مسؤوليه الثاني ...

يعني معليش يا اخي انت بتعطيها بالقطاره ... بصراحه مصارفيها طبيعيه ولا وكمان محدوده ..
هو صراحه ظرفك صعب .. لكن زوجتك أشوفها من ناحيه الطلبات والله مو مقصره معاك

من ناحيه السوق
انت عارف الفلوس اللي معاها وين تروح ! وهي صريحه معك من ناحيه الفلوس
فليش وديتها السوق ..؟
ع الاغلب انت متوقع ان معاها فلوس ...
طيب اذا كل اللي تعطيها اياه بتقول لك فين ينصرف ... اجل من فين تجيب؟ تبيع ذهبها ولا تأخذ من اهلها ؟ ... أتمنى انك ما كنت اخر حاط خيارين في بالك ... لأنها مصيبه ان الرجل يتخلى عن مسؤولياته وينتظر غيره يقوم فيها...

و زوجتك كمان بصراحه مو راضيه ..تتحمل مسؤوليه بيتها .. شغاله في وضعكم ابدا مو خيار

احتمال اكون مخطئه ...لكن اشوف اللي تسويه زوجتك ..ردة فعل.. على تقصيرك ماديا ..

طيب ايش هي قناعاتك؟

اذا كانت اغلبها من المذكور اعلاه.. فكثير منها تزمت ومافيه مرونة..


جعلها اسوا مشاكلك انها طلبت ايفون ولا صبغت شعرها قول امين

نبض الدان محقة..

واماني قالت اللي ببالي

بشهادتك كان لايعلى عليها.. لكن ممكن ممكن بعد ملاحظة التقصير فكرت بهذه الطريقة:

زوج يغصبني على اشياء ما ابيها ومقصر علي ماديا وعاطفيا.. ايش الدافع اني اسوي له امور كمالية؟

مثل خدمتها لاهلك.. خدمة اهل الزوج غالبا تكون من الزوجة اللي فعلا تقدر زوجها والتقدير مايجي الا بسبب ولا يجي من فراغ..

لو فهمت احتياجاتها صح حياتكم بتستقيم.. وفهم احتياجاتها لازم له شغل على المصارحة والحوار بينكم

__________________

اختلافي عنك لا يعني اختلافي معك

انا ممكن لساني شوي
بس برودها ذبحني ما تحس
والله تعبت حتى جسديا ما أنام
من التفكير انا انسان ما أتحمل الضغوط مرة
والضغوط زادت علي مع تاخر الحمل وان المشكلة في
انسان مؤمن بس الدكتور قال تحتاج راحة نفسية مع العلاج
هي لا تزيدني ضغوط مع بيتين و ما احد يقدر ظروفك
من الضغوط وزني الحين 47 قبل سنتين 58 كيلو
وصار معاي كلسترول وأنزيمات في الكبد صرت أفكر بحالتي المرضية
كثير وهي تفكر في نفسها بس
احيان أفكر انفصل وما ابي الزواج خلاص برتاح من الضغوط

الله يهديها

اماني

انا فاهمتها لما جابت الشغالة
ببالها متساوية
خربانه خربانه
شفتي لما الواحد يكون مضغووط ومافيه تقدير بحياته يخرررربها
اذا الشخص عاش مع شخص صعب الارضاء ويشوف الواجب لاشكر عليه يخرررربها..

الاخ فارس
انت تبيها تقدرك
انا اشوف انها مقدرتك لاني اقارنها باللي اشوفه بمجتمع النساء
ومثل ماانت تطالبها تصبر عليك حالتك المادية وظروفك الصحية والاجتماعية هل أنت صابر على احتياجاتها وشطحاتها، هل تحصل منك تقدير وعرفان على صبرها..
تصرفها بالشغالة وغسلك للصحون يوضح مدى تعبها من محاولة ارضائك واحباطها
فكر واصدق مع نفسك هل انت من النوع اللي تمن عليها بعطائك ايا كان نوعه؟
هل أنت شحيح عاطفيا؟
هل انت كثير الشكوى والتذمر امامها؟

ربي يصلح لكم الحال

ليه أحس أعصابك مشدوودة .. خذها على الهون الدنيا سهالات الله يسهل علينا وعليك .. أوك صارلك مدة من تزوجت وللحين ماجوك عيال .. لكن الحمدلله الطب تطور وربك كريم ويا كم ناس نعرفهم جلسوا 8 و 10 سنين ثم ربي فرجها عليهم و امتلى بيتهم بنين وبنات .. خلك متوكل على ربك وواثق بكرمه ورحمته ما بعد الصبر إلا الفرج . . وأكثر من الإستغفار ربي يشرح بالك .

بالنسبة لزوجتك مصاريفها والله قليييلة، احمد ربك غيرها تصرف بالأسبوع ألووف، و مبلغ 500 ريال للعيد مع إحترامي جدا جدا جدا قليل .. بكرة لو ربي عطاك عيال البيبي اللي عمره بالشهور ما تكفيه للعيد 500 ريال .. !!

الحل لمثل حالتكم / تعطيها مصروف شهري نسبة وتناسب مع راتبك .. بحيث يكون المبلغ للصالون والشوبينق فقط . . . وخلاص هي تصرفه بكيفها وإنت نبهها إنها لو لعبت فيه ماراح تعطيها ريال واحد للسوق . ولا تقول ما أقدر أكسر خاطر أحد معليش هي مرة وحدة تعطيها مصروفها اللي تتفقوا عليه وإذا خلصته وجات طلبت لا تعطيها واقسى مرة بعدها بتستوعب الدرس وراح تدبر المبلغ .. أهم شيء المبلغ يكون عادل لأنه واضح إنك بخييل شوي مابي أظلمك الله أعلم يمكن ظروفك وميزانيتك هي اللي حاكمتك .

الله يهديكم ويرزقكم الذرية الصالحة المعافاة بحوله وقوته .

__________________
فقدتك يا بعد عمري وحبي وأطهر أشواقي، فقدت أيام ما ترجع فقدت البيت واللمة، رحلتي بالفرح كله وبعدك مابقى باقي، وتركتي وحشة الذكرى تجر الروح يا يمه، يا أغلى قلب ودعني ومثله صعب أنا ألاقي، يا أروع من عن الدنيا رحل وأطهر ثرى ضمه ..💔

السلام عليكم ورحمة الله
الرجل يغسل ملابسه ويكويها ويغسل الاواني ..
ويعمل لنفسه الشاي .. ويمر بضغوط ماديه وصحيه
وكل الردود تحمله فوق طاقته كما فعلت زوجته بالضبط !!

مالها عذر بأي شيء لا احد يعذرها و مصاريف العيد و الخرابيط ذي خلاص زوجها وضعه كذا تتنازل عشانه و ربي بيعوضها


اللي واضح لي انها تعاني من نقص و تعوضه بالمتطلبات هذي و مستغلة طيبتك الزايدة عن حدها
صعب اننا نقول لك خلك حازم و قوي معاها لأن هالشيء اذا انعدم من البداية مستحيل راح يأثر بعدين

بإختصار هي مو خايفة منك

قسم راتبك حسب الاحتياجات
مثلا المقاضي ثابتة كل شهر لكل البيتين و لها هذا القدر من الراتب مثلا 1200
المستشفى و علاجاتك الف ريال كل شهر و حتى لو هذا الشهرر ما احتجت الالف تحفظها في رصيد مصاريف المستشفى
هي لها مصروف شهري تفاهم انت وياه عليه حسب استطاعتك و انتبه تغلب عليك الحنية و تحسب لها فوق طاقتك

الطلعات و التمشيات ما ادري ليه الناس تبالغ فيها و مع هذا حط لها ميزانية خاصة
و ع هذا المنوال

..

اذا انت تعول عائلتين اهلك مو مسجلين في الضمان ؟؟

والله يا اخي راجع نفسك
500 ريال للعيد!!
قليلة جدا جدا جدا
وانت مدرس ، هل راح يطير راتبك لو قدمت لها ألفين


الله يصلح الحال

مدري بس ابغى ارد على بعض الاشياء اذا سمحتي

هل انتي بتعذري زوجك عن مصاريف العيد ؟ وهل مالها داعي في حياتك ؟
هل انتي بتتنازلين عن شئ يخصك وبالذات اذا عرفتي انه واجب عليه وهو مدرس وراتبه زين ماشاء الله ماعليه قصور وواجب عليه دامه قادر يفتح بيت لازم يتكلف في اهل البيت اللي فتحه هذا وهو بدون اطفال الله يرزقه الذريه الصالحة ان شاء الله

اكيد بتعاني لانه مهملها عاطفيا ومعنويا ومقصر عليها وحاجياتها المهمه في نظرها مهمشه ومالها داعي في نظر زوجها طيب ليه الوحده تتجمل عشان ترضي زوجها وترضي نفسها ليه تحرم نفسها لانه لو ما تجملت وما اهتمت له بيجي بعد فتره يفتح موضوع زوجتي ما تتشيك لي زوجتي ما تهتم في نفسها وش بتردين عليه بعدين ؟

كيف تقولين حط مصروف للبيتين 1200 ريال هل هذي بنظرك تكفي اسرتين في هذا الغلا وفي هذا الوقت صراحة لما ندخل سوبر او هيبر نشتري فقط الاساسيات بالحبة فقط تطلع الفاتوره فوق 700 ريال هذي بس الاساسيات في الماكل من غير ادوات التنظيف اذا انتي تكفيك خبرينا من وين تشتريين اغراضك بروح اقضي لان هذا الموضوع شاغل بالي ما تكفي فلوسي ولازم احرم نفسي عشان اكمل المقاضي

اسمعي حبيبتي الله يسعدك ويعطيك العافية قبل تنصحيين زوج على زوجته وزوجه على زوجها تقمصي شخصيتها وشوفي وش يصير لك وبعدين فكري لان الواحد منا يجي مندفع يبغى ينصح وبعدين يورط المنصوح وتخرب الدنيا ترى الكلام للجميع
والعذر والسموحه منك ومن الجميع لاني ما احب ازعل احد بس يحرقني الحق والله يوفقكم

__________________
الحمد لله الذي جعل بعد العسر يسرا... و بعد الضيق فرجا... و بعد الغم راحة ...وبعد الفراق عودة
« الْحَمْدُ للّهِ حَمْداً كَثِيراً طَيِّباً مُبَارَكاً فِيهِ »