|
مافي شك أنهم أن شاء الله فيهم خير
لكن هذا أسلوبهم ومتعودين يتعاملون معاج بطريقة معينه وما يبون يغيرون هالطريقه.. الرد على قد الكلام وبدون مزح ما يجرأ السفيه ويحفظ كرامتج من السفهاء.. أيضا الصمت هيبه و أنا أخوج .. الله يطيب خاطرج 🙏 |
حنا هنا صديقاتي ان شاء الله وفخورين بك ..
دكتوراه في شو؟؟ كنت راح اسجل بمجال الطب واهلي منعوني اتصور بتشجعيني على هذا كان والدي موافق ولما تخرجت من الثانوية رفض حتى اكمل بسبب الناس الغيرانه والحقوده كل الي يسوونه زميلاتك معاك وتعاملهم بسخرية بسبب الغيرة محد وصل لمستواك العلمي والخُلقي.. مثل ماقالو لك البنات الصديقة الصدرقه بتبحث عنك وبتتواصل وياك. الله يوفقك .. |
تعرضت حق هالموقف مرتين بحياتي...
المرة الأولى لما صرت محامية.. احنا شلة تقريباً 10 بنات تقريباً كل 3 تخصصهم نفس الشيء واحنا 3 قانونيات... وصرنا محاميات في نفس الفترة... والباقي للحين ما بين دراسة وما بين خلاص تخرجوا وفي البيت ووحدة في بنك... لما كانوا يتكلمون عن سالفة صارت أو مثلاً وحدة تسألنا عن قضية ما أو إجراء في المحكمة فيه ثنتين دايماً يترصدون لنا .. مو من باب الغيرة وانما لان كنا كلنا راعيين وناسة وضحك ومقالب ويتكلمون بحسن نية بس يحبطونا بكلام ( يعني تسوون روحكم واووو احنا المحاميات اللي محد قدنا ) ( ويييه شغلكم كله كرف وقضيتوا حياتكم في قاعات المحاكم تنتظرون القضاة يوصلون ) وكلام اقوى.. في البداية خذينا الامر مزح.. بعدين وقفناهم عند حدهم .. ومشت امورنت . المزقف الثاني لما تزوجت والمقربين والاهل يعرفون اني مزوحة و دايما مبتسمة ففيه وحده في كل تجمع عائلي تكون موجودة و دايما لما امزح تعلق : بالله عليكم هالهبلة تصلح مرت فلان الفلاني ؟!!! والموقف القوي مرة قالته واحنا مسافرين الحج وكنا قروب بنات كبييييير و قاعدين بالقاعة التحتية اللي بالفندق قالت نفس الجملة و احرجتها : قلت لها : مرت فلان الفلاني مزوحة وبشوشة تعكس اخلاقها و روحها الحلوة جدام الناس .. عيل لما اكون مرت فلان الفلاني اكون مبوزة و ارد بتعالي مثلا ؟ 😊 البنات خذهم الحماس وقاموا يصفقون .. وهي صارت على قولت الشاميين ئد البلوطة . الخلاصة اذا ما تبين تخسرين الشلة اختاري الموقف الأقوى واحرجيهم فيه |
1) إما أن يستمر الوضع على ما هو عليه سابقاً.
2) أو تنصرفي عنهنَّ. 3) أو تأخذي دور العضو الصامت أو قليل الكلام في المجموعة. 4) لا داعي للحديث عن أبحاثك وعملك أمام أشخصا آخرين لا يمتون لهذا العمل بصلة. 5) مع ضرورة التطلع لإنشاء صداقات جديدة أخرى. 6) وحتى مع التغيير الجديد لا بدَّ من بعض الأصدقاء الذي يرتاح لهم الشخص فيرفع الكلفة معهم وترتاح نفسه. |
دايما وابدا ضع خطوط في التعامل مع اصدقائك ولا تسمح بأن يتم تجاوزها ..
يعني اذا طول فترة صداقتكم متعودين على نظام ثم بعد التطور سواء في المجال الوظيفي او التعليمي ولو عن حسن نيه . هنا الاغلب راح يعتبرها ان فلانه تغيرت علينا بعد الشهاده .. ففي حالتج مالج الا انج تتحملين قطاتهم عليج وتاخذين الامور بوناسه وسعة صدر مثل ما كنتي تتقبلينها قبل الشهاده .. انتوا بنيتوا حياتكم على انه لا وجود لحد معين في التعامل او الحديث مع الاخر وأي تغيير من أي شخص ما راح تتقبلونه .. يعني مثلا لي اصدقاء من عشر سنين مزج وضحك ومقالب .. وفي سنه حصلت لي شهاده وتخرجت وصرت اللي صرت عقب اقول لهم يا جماعه انا بحط حدود للتعامل ومزحكم ومقالبكم ما اقدر اتقبله الحين !!!!! موضوعك نفس موضوع مسؤولنا في الاداره.. كان موظفحاله حالنا .. وكان يقعد ويجلس معانا ونفطر مع بعض ونضحك ونسولف وهذا يقط على هذا .. بس لما صار مسؤول وجب عليه انه يتغير .. مو معقوله يمر المدير العام ويشوف مسؤول القسم تارك مكتبه وجالس يسولف ويضحك ويمقلب موظفينه .. والان هو مو قارد يدير القسم ابدا ابدا .. والله انه في مره قال لاحد الزملاء يا فلان تراك تاخرت في انهاء ها المعامله .. رد عليه زميلنا روووح زييين .. يعني صرت مدير خلاص بتركب فوق روسناا ويضحك .. !!!! ولا اخفيج انه بعض من زميلاتج راح ياخذونها بدافع الغيره .. واتوقع الغيره عند البنات اكبر منها عند الشباب وها الشي حسيته من خواتي في البيت .. عندج حلين .. يا انج تستمرين معاهم في نفس اسلوب تعاملكم قبل الشهاده .. او تقطعينهم وتكونين لج صداقات يديده .. |
مواقع النشر |
![]() |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|