السلام عليكم ورحمة الله وبركاته
اخواني واخواتي في هذا المنتدى الرائع
احببت هذا المنتدى جدا فأردت له الخير
وكوني اشعر كما تشعرون باننا في هذا المنتدى كأخوة
ومن باب انني اخت لكم فساقول لكم بكل صراحه مالم يعجبني !!!
فلقد وجدت امور كثيره لم تعجبني ومن باب احساسي انه شي غلط
ولا يجوز ان يكون فاحببت ان اقوله لكم !!
باختصار .....!!
في امور كثيره في المنتدى تصير من قبل الاعضاء واحس انها تخدش الحياء
والله العظيم اني اخجل وانا اقراها وخاصه وان المنتدى عباره عن رجال ونساء
فمثلا تقوم امراه بطرح سؤال خاص جداً انا كامراه ومتزوجه اخجل من قراءته
خاصه وانا اعلم ان هناك كثير من الرجال سيقرؤنه وكذلك يزيد خجلي حين يكون الرد من رجل
واعلم ان لا حياء في العلم ولكن ليس لهذه الدرجه تفصيل دقيق لامور خاصه بالنساء
المفروض ان تسال عنها طبيبه ....اخت....... أي حد..!! بس ماتكتبه في منتدى ويقرأه الرجال!!

ثانيا لفت انتباهي مواضيع كثيره من المتزوجين عند طرح استفسار لهم
يعني مثلا لو امراه تريد ان تقول انه تم بينها وبين زوجها اتصال أومعاشره
فبدل ان تقول باختصار كلمة اتصال او كلمة معاشره تقول بالتفصيل الممل
نمت وزوجي والتصقنا ... و سوينا حركات ........ وصار اللي صار............ الخ
وهذا من النهي اللي تكلم عنه الرسول من ان يفشي احد الزوجين مايتم بينهم من علاقه
يعني ماضر الكاتب زوجاً او زوجه ان يختصر الكلام في هذه الامور سواء كانت مشكله او غيرها

ايضا اتمنى عدم التعمق بمثل هذه الامور يعني انتوا تعرفون ان هناك مطلقات وغير متزوجات
وكذلك مطلقين وعزاب يعني من باب مراعاة لمشاعرهم مافي داعي التفصيل والتفاخر بهالامور

وايضا والله اني استغرب لمن اعرف ان هناك اعضاء من الجنسين اعمارهم 15 و16 سنه
وغير متزوجين ويدخلون هذا المنتدى !!!!!!!!!
يعني حتى لو قلنا بيستفيدون للمستقبل بس المستقبل لازال بعيد عنهم !!
والى ان يتزوج كيف يتصرف طوال هذه السنوات وهو يقرا في هذا المنتدى امور خاصه بالمتزوجين
واوضاع الاتصال وغيرها من امور التي تأثر في النفس وتهيجها !!!!!
يعني اللي اقصده وش العبره من دخوله منتدى متزوجين !! بدري عليه!!
ليش يفتح نفسه او البنت الصغيره تفتح نفسها على امور لازالت هي صغيره عليها وتشغل نفسها فيها !!

انا والله احيانا من بعض المواضيع اخاف اقراها عند عيالي لاني اخاف يقرونها احس فيها كلام كبير !!
فاقوم بتغيير الصفحه ولازم اكون فاتحه على صفحة الاثاث او الديكور حتى لو قرب مني حد من عيالي
اغير الموضوع اللي اقراه !!
وفي مره شفت ولدي المراهق وعمره 14 سنه يتصفح هذا المنتدى لاني انشغلت شوي وتركت المنتدى
ولمن رجعت لقيت ولدي قاعد على هالمنتدى و يشوف شنو اقرا ولمن شفته ضاق صدري !!!
والله ماحبيته يقرا أي شي منه !!
بدري يفهم بهالامور ويتفتح عليها وهو توه على الزواج !!

وقلت له: شتسوي في هالمنتدى الخاص بالمتزوجين ؟؟
قالي: قاعد اشوف ....... !
قلت له: شتشوف !!! تبيني ازوجك؟
قالي : لا والله مابي !!
قلت له: طيب خلاص خلك بمنتدياتك الخاصه بالكوره والنوادي ولا تدخل بامور المتزوجين !
وإذا حبيت تتزوج تعال ........!! المنتدى عندك دشه وقت ماتبي !
ومن بعدها صار مايدش المنتدى.......
بجد انا اخاف يفهم الامور قبل وقتها !!

واللحين اشوفه صار يدش منتدياته الخاصه بالكوره ومنتديات الشباب اللي بسنه او الالعاب
لان الكمبيوتر عندي في الصاله يعني اشوف عيالي وهم يستخدمون النت واي مواقع يدشونها
ونفس الشي مع بنتي لو كبرت شوي في امور الواحد المفروض مايعرفها الا في وقتها
حتى مايتضرر بمعرفتها وينشغل في التفكير فيها او انتظار حدوثها

وانا رغم ان عمري 29 سنه الا اني اعتبر ان الفئة اللي اعمارهم في هالسن مثل عيالي
و تمنيت مايدخلون هالمواقع وزعلت على دخولهم .... وتساءلت وين الأهل عنهم !!
لو كانوا متزوجين عادي !! بس توهم عزاب !! حرام والله !!



وبصراحه في اشياء وامور كثيره كانت في بالي بس هالشي اللي حضرني وماقدرت اسكت عنه
قلت لازم اصارحكم فيها وماسكت عنها ..........
بتقولون لي احنا اسره واخوان صح معاكم بس مو لدرجة نشيل الحيا !!
يعني نظل احنا مسلمين وعرب وحياءنا يمنعنا من التكلم بامور المفروض تكون خاصه جدا !!

بتقولون محد يعرف أحد .. ومجهولين .. وعندها او عنده مشكله ومالقى غير المنتدى يسال عنه
بقولكم والله العظيم لو اسأله تستاهل ماعليه بس والله احيانا تكون مالها داعي اسئله تحرج جداً
وتخدش الحياء !!
يعني شاب يسال عن امور خاصه في الشباب ويسال كيف تكون عند البنت !! وهل تتصرف نفس الولد !!
او بنت تسال عن شي تافه المفروض ماتسال عنه او حتى تسال بس مو في منتدى فيه رجال ونساء !!
او اشياء الحريم مايسالون بعض عنها وتقوم تكتبه في منتدى وهي تعلم ان الرجال بيقرونه !!
وتبي حل لمشكلتها بعد !! طيب انا ابي حل من اللي تكتبونه !!

يعني صعبه والله امراه تسال عن شي في النساء ومحرج ويرد عليها رجل!!
يعني معقوله الرجل بيكون افهم منج يا امراه !!!

وكم تسوء حالتي واخجل وانا اقرأ الرد من رجال
وانا اعلم انها تعلم انه سيقرأه أو يرد عليها الرجال !!
يعني تكتب في منتدى تفاصيل مخجله وهي تعرف ان فيه رجال ستقرأ !!!

والله احنا حريم نسال بعض ومابنموت لو ماسالنا وعندنا الف والف امراه غريبه نسالها
ومو معقوله مانلقى اللي نساله !!!
يعني تستحين تسالين طبيبه ولو بالتلفون!!
وما تخجلين تسالين في منتدى قد يكون الرجال اكثر من النساء !!
(( طيب في كلتا الحالتين انتي مجهوله )) تسالين في منتدى ليش؟؟
مو لهذي الدرجه !!!!
ولو كنا بمنتدى يا اخواتي الحياء والأخلاق تمنع نتكلم عنها

طبعا انا ماقصد ان مايجوز يجاوب الرجال هناك فعلا اسئله تطرح ويجاوب عليها الجنسين
مافيها شي ولا حياء في العلم بس في امور لاتجوز !!!
والرسول نفسه استحى من امراه لمن سالته كيف تغتسل من حيضتها وكان افضل لها تسال امراه
او حتى تسال زوجة النبي ولا تسال النبي عليه الصلاة والسلام
وانا هذا اللي اشعر فيه هناك اسئله اشعر بالخجل منها
و المفروض تخجل البنت او المرأه من طرحها وهي تعلم ان الرجال سيقرؤنها وقد يعلقون عليها ...!!!

المهم ... انا مادري وش اقول!! بس اكيد انتوا فهمتوا اللي اعنيه !


اخيرا .........

اتمنى ان تتقبلوا صراحتي بسعة صدر
واعتبروني اخت لكم شعرت بغيرة تجاه هذا المنتدى الضخم
والذي شعرت من الاغلبيه حرصهم على الخير للجميع ولمست طابع الدين بهم
وجزى الله من انشأه واشرف عليه وسعى فيه بالخير خير الجزاء
وماتعليقي لهذه الأمور الا من باب الغيره
اذ كما ان اصحاب المنتدى حريصين على التمسك بالدين والاخلاق في منتداهم الرائع
اردت انا ان يكون الاعضاء ايضا يتمتعون بالاخلاق الساميه
وان تكون نساء هذا المنتدى نساء مسلمات حييات
ويكون رجاله رجالا بمعنى الكلمه ونلتمس رجولتهم من خلال ردودهم
ونستشعر من حديثهم شعور الاخت لأخيها.......

ختاماً .....

اعتذر منكم جميعا واسمحولي على صراحتي

اختكم صريحه جداً

__________________