كلكم رجال وكلكم تفهمون على بعض..استحلفكم بالله تساعدوني - الصفحة 2

06-06-2006, 10:37 PM

افكار...

عضو دائم

تاريخ التسجيل: Jun 2005

المشاركات: 51

كلكم رجال وكلكم تفهمون على بعض..استحلفكم بالله تساعدوني

ارجوكم تفزعون لي رجال ونساء

وانتم الرجال تفهمون بعضكم..وانتم الي في ايدكم تساعدوني اني افاتح زوجي بمشكلتي بطريقه سليمه.

بدون مقدمات...

عرض علي زوجي اني اقيم معه في غرفته في بيتهم..ماكنت استنكر هالشي ولا اعارضه

وقبل مايجهز الغرفه رفضت الفكره وبقوه لما درست السلبيات الي بتواجهني

فهو عارضني لانه ما استعد ماديا لتجهيز شقه..

هذا غير انه خسر في الاسهم خساره كبيره

والان انا عايشه في غرفه في بيت اهله صار لي شهرين..

وماقادره اتحمل وضعي..

_على طول لابسه العبايه...

وعشان اشيلها لازم احبس نفسي في غرفتي..

-يطلب مني اطبخ له وانا ماعندي استعداد احرج نفسي قدام اسره كامله لو ماطلعت الطبخه مظبوطه..

-هذا غير اني بغسل واطبخ بالعبايه عشان حمياني..

-بدل ما اغسل مواعين فردين اغسل مواعين 10 افراد..>>>وبالعبايه

-اذا جاني الخميس والجمعه..

ما اقدر البس له على كيفي..او بالاصح...لازم البس قبل وصوله بدقايق لاني لا لبست بظل انحبس في الغرفه عشان محد يشوفني حتى ما اقدر اشرب ماي الا لما البس العبايه اول

-قلبي يتفطر وانا

اشوف اخواني يجهزون شقق لحريمهم واتخيل كيف راح اتصرف بحريه وكيف بكون سعيده لو كنت مكانهم..

اتخيل اني اقدر بكل سهوله اجهز له صينية مكسرات او فاكهه او كاس عصير..

وانا ما احاتي اني لازم بنزل تحت عشان اغسله..

او اني اغسله من الحمام...الله يكرمكم..

عشان كذا انا مقصره بحقه لهالسبب

والان انا مالاقيه اي فايده من تنازلي عن حقي في البحث عن الخصوصيه..

في العيش في شقه..مستقله..

ما اقدر اتخيل اني ماراح اسكن في شقه الا وانا عندي عيال ينكدون علي..

الان انا حامل ...حملت بالغلط.. من اول اسبوع من زواجنا

مانيب قادره افرح بهالنعمه بسبب هالمشكله..

هذا غير اني عرفت ان اخته تقول..لو انها تبي شقه مثلنا كانت قالت له

والله اني ادري ان في بيئتنا الي تتنازل مايشكرون لها هالشي ولا يمدحونها...الا يقولون ماعندها لنفسها مقدار

وانا هذا الي جارحني

انا اسكن في غرفه واخواني يسكنون زوجاتهم في شقق من احلا مايكون...وهم مايعجبهم العجب

انا ما اقدر اصبر اكثر..

ما ابي اقعد بيت اهلي واسوي مشكله ويظنون اهله انهم مقصرين علي في شي

انا ماشفت منهم شي..بس ما اقدر اصبر ولا اتحمل هالعيشه..

كرهت بيتهم خلاص..

ما احس اني عروس

وهو الحمدلله ماعليه قصور يقدر يسكنني في شقه والتأثيث على الطول

والان انا اسألكم وارجوكم تكفون تردون علي

ابغي افاتحه بالموضوع وانا لسا ما كملت شهرين من زواجي..

شلون اقدر اختار الوقت والاسلوب المناسب عشان يتجاولب معاي ولا يردني

انتوا كلكم رجال وكلكم تقدرون تحطون انفسكم مكانه وتتخيلون ايش هي انسب طريقه واسلوب لمفاتحته في الموضوع

عشان ما اكدر خاطره

اتمنى القى عندكم الجواب

التعديل الأخير تم بواسطة افكار... ; 06-06-2006 الساعة 10:40 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه