ايوة بس افتكرت قالي زوجي ..
و بما انه يقول دعاباته وقت الزعل مرات
و هذه ميزة فيه ..


ماشاءالله عليك .. لا تحتاجي لا أم و لا أب ..
تعرفي تاخذي حقك لوحدك ..

انت كذا من غيرهم ..
كيف لو كانوا فيه

صح ضحكني وقتها ..
بس انا قسيت عليه بزيادة ..

بس برضو ..
هو كان براسه انه يبغى يراهق

الدليل اني قبلها بسنة
شفته محمل برنامج دردشة

كان تووووووه حمل اابرنامج
و كنت انا حامل بالخامس ..

و جلس يبرر و يكذب ووو الخ

.
.

دحين شرط جلوسي معاه

لو مو بس شفت او شكيت ..
لو حسيت بس انه فيه تغيير ..

خلاص ينساني و ينسى اولاده
ما حاتعب راسي و راسه ..

و لاراح اقول ارضي

فاقدة الامل خلاص ..

انا انسانة اعرف كيف اتعامل مع الزوج ..
مثلا لما يقول ان عجب ..
ارد عليه .. اكيد بيعجبني ؟ و اعطيه كلمتين حلوة ..

بس هو مايستاهل .. جربت معاه كل شي

.
.

مثلا .. انا شلت العناد و كل شي من راسي ..
و باحسن تعاملي معاه عشان ربنا .. و علشان لايجي اي تقصير مني ..
بس احسه يبدأ يرجع ..

لازم اشد شوي كل مرة ..

اليوم كان بيترك صلاة الظهر و يجمعه مع العصر ..
ماقدرت امسك اعصابي .. لانه كذب علي و قال صليت و هو ماصلى

انقهر من بروده و اهماله و استهانته ؟؟؟
يقدم الدنيا عالاخرة ؟؟؟

المهم ..
صلى الظهر ..

حاول ياخدني بالصوت و اسكت .. بس عاندت غصب عني ..
ماراح احكي الحكاية .. المهم انه زي الاطفال ..

بعدين كلمته عالجوال و قلتله معليه .. بس تضايقت لما شفتك طنشت صلاة الظهر
وباقي 10 دقايق عالعصر .. الخ
جلس يكذب و يقول كنت ناوي البس الثوب بعدين اصلي .. كذاب و اعرفه لما يكذب
بس بيضحك علي

بس براحته ..
لما تجيه مصيبة فوق راسه .. وقتها يعرف معنى قيمة الصلاة

صح انا مرات ااخر الصلاة بسببه صرت كذا
بس بداخلي حرقة و تانيب و اعاقب نفسي

.
.

المهم ..

جلست مع نفسي و جلست افكر كيف اكلمه باسلوب اقناع حلوووووو ..
عشان يهتم بالصلاة

انا المشكلة انه صبري نفذ معاه

حتى اني مقررة بعد 12 محرم لو جلس بدون شغل

راح اهجره 6 اشهر اقل شي ..

زوجي وقت ابعد عنه.. يغيب عقله

مثلا هو وقت حمل برنامج الشات.. انا كنت ببيت اختي بمدينة تانية
جلست عندها 4 ايام.. هو اقترح علي اروح اغير جو عندها
و كنت رافضة اجلس عندها بس استخرت و جلست ..
وقتها هو حمل برنامج الشات

حتى ببريطانيا نفس الشي
مرة نزلت السعودية و جلست عشرة ايام ..
شفته مسجل بموقع و كان نفس تاريخ اللي نزلت به للسعودية
بس انكر و قال صاحبي ووو الخ

.
.

المرة هذه لما جلست عند اختي .. قالي 4 ايام من السبت للربوع و اكون اصلا مشغول بالدوام
و تغيري جو عندها .. اختي هذه كانها امي .. كنت محتاجة اجلس عندها عشان نفسيتي كانت تعبانة

استخرت كم مرة و رضيت اجلس عندها
هو وقتها كان صحيح يفكر بيا و كان صادق

بس مجرد ما اغيب عنه.. يبدا يسمع لشيطانه ..
لانه حمل الدردشة وقت كنت عند اختي .. تركني هو فجر السبت و جاني الربوع

.
.

المهم ..

لاحظت انه يعجبه تعاملي معه كأنه طفل ..

مثلا اليوم لما عصبت وقت شفته بيطلع من البيت و هو ماصلى الظهر .
لانه نام الصبح وقت الاذان و صحي قبل اذان العصر و بكل رواقة يمشط شعره
ويتعطر ..

سالته صليت ؟
قالي ايوة ..
قلتله متى ؟
قالي دحين ..
قلتله ماشفتك ؟

طبعا زمان كنت اصدقه و اكذب حالي ..
بس ماقدرت اسكت ..

قلت له بطل تكذب علي .. قوم صلي ..
قالي صلاتي مالك دخل ..
قلتله وعدتني تصلح علاقتك مع ربنا ووو الخ

جا بيعصب علي ..
قمت انا اللي عصبت المرة هذه ..
وحطيت عيني بعينه و قلتله ( كانه طفل )

قوم صلي دحيييين .. يالله ..

شفت الابتسامة العريضة بوجهه و فرحان من قلبه ؟؟؟

قام صلى الظهر و برضو مبسوط ..

لما اعامله كانه طفل .. ينبسط ..
و انا ماقدر اتحمل الدور هذا .. لانها مو طبيعتي ..

ولدي الي عمره 5 سنوات .. وقت ما اكلمه ..
ما اتامر عليه .. و كل شي بالقناعة و بالنقاش ..

حتى الشغالة تقولي ولدك مايسمع كلامك عشان مايخاف منك ..
صار ولدي اسلوبه كذا بالتعامل مع الناس و مع اخوه و معانا

.
.

ام زوجي الصراحة .. ما كأنها أم ..
انانية .. مادية.. ما تهتم باولادها مثل ماكانت امي معانا و مع اخواني خاصة
امي صح قاسية كانت بعد موت ابوي
بس كانت مرررررة تهتم فينا و تضحي عشاننا و زاهدة الدنيا ..

زوجي ما حس بمعنى اهتمام الام او حنان الام ..
بس انا كمان ما اقدر استمر كذا ..

خلاص اعصابي تنفلت ..
مو كفاية ابوي انحرمت منه و امي .. و اجي كمان اطبطب عليه ؟؟؟؟

يحب يشوفني اعصب ..
وانا انسانة هادية بتعاملاتي .. و احب الروقان ..

.
.

عشان كذا كان يخطر ببالي مرات ..
اخلص من الهم هذا .. و اشيل حمله و ثقله عن اكتافي و انفصل و ارتاح ..

بس مازلت شايفة تغيرات بسيطة فيه للافضل ..
و مازلت اعطي قرصة ..
و مازلت احسن التبعل معه و تعاملي .. و احاول التناسي عما فات ..

مرات افكر .. يمكن ربي رزقني زوجي هذا
عشان كنت دايما ادعي .. يارب خليييييني داعية لك .. و اكبر داعية

فيمكن عشان اتعلم الاسلوب الافضل للاقناع ؟؟؟

.
.

مثلا .. صرت بعد ما اختلف معاه ..
اعتذر منه .. بعدين استغل فترة غيابه .. عشان الاقي موضوع او مقطع قصير
اسنعه لزوجي او احكي له باسلوب مشوق ..

.
.

زي دحين كنت افكر بصلاته و انه لازم الاسلوب يكون بحكمة ..
و جلست اقلب بدماغي

سبحان الله .. يوصلني هذا البرودكاست ..
و اخزن الصور عندي عشان اقوم احكي له بطريقة مختصرة و مشوقة

لانه يكره القراية

مخاصماتنا زي كذا غالبا .. وقتها و خلاص تنتهي ..
مرة انا اتنازل و مرة هو ..

بعد ماخرج من البيت دقيت عليه و قلتله معليييه و كذا ..

بعدين جلست افكر .. يمكن ربي اعطاني زوجي لحكمة ؟
كنت دايما ادعي ياااارب اجعلني داعية لك ؟؟؟

فهو عينة قدامي اجرب عليه كل الطرق و الاساليب ؟

لاني جلست افكر مع نفسي كيف اخليه يهتم بالصلاة من حاله ؟
و لقيت موضوع حلو و فيه صور .. حملت الصور عندي ..
و وقت مايشوف الصور .. اجلس احكي له ما كاني مخططة انه عشان يهتم بالصلاة ..

.
.

مااشاء الله عليك يا عصامية
مانتي محتاجة حد
عارفة نقاط قوتك و ضعفك
وعارفة و فاهمة شخصية زوجك
وكيف تتصرفي معه ..
فقط كنتي محتاجة للفضفضة و ترتيب افكارك
ربي يسعدك ويوفقك ويكتب لك الخير ويصلح لك زوجك و يهديه و يحفظ اولادك

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

ماكنت مجرد افضفض ..

انا حاسة اني بامشي على ارض صلبة ..
بكم و معكم عرفت كيف ارجع اعيش ..

.
.

كنت من يوم تزوجت .. مابين مد و جزر مثل ما وصف الاخ ابو حكيم

زوجي عارف نقاط ضعفي و كنت احسب حالي اذكى منه ..
طلع هو اللي كان يحركني بمزاجه ..

.
.

المهم ..

قراري ..

له حقوقه علي كزوج .. و اب لاولاده ..
مو اكثر من كذا ..

بالمقابل ..
انا لي حقوق كزوجة .. و ما اتنازل عنها ..

.
.

رجعت هنا لانه حصل موضوع .. و ماعرف اذا كان تصرفي حكيم او كيف !!!؟
مابغى افتح موضوع جديد ..

بس باعرف ..
تصرفي صح او لا ؟؟؟

طيب كيف المفترض اني اتصرف ؟؟؟

.
.

انيم ولدي و بالفجر اكتب اللي صار
عشان مابغى زوجي يقرا ..

بانتظارك عصامية ... بس ترى الفجر راح وصرنا الظهر

ان شاء الله ألحق ردك لأن معي لغاية فجر بكره ومن بعدها مسافره كم يوم وارجع الاحد القادم باذن الله

__________________

اعتذر عن التأخر ..

بأقفل الموضوع خلاص ، لإنه الحمد لله و الشكر ،، مابقالي شي غير نصائحكم ..
بجد استفدت كثييييييييييييييير من تواجدي هنا معكم ..
و بمجرد ما بدأ عام 1434 هـ فتحت باب جديد من حياتي ..

اللي خلاني أتأخر ،، لإني بالأصل ( كنت ) انسانة كتومة و هذا طبعي من يوم انولدت ..
و ما أحب أبدا إني أجلس اشتكي من الهموم و المآسي و التشائم ووو إلخ .. و أكره حالي وقتها ، لإني أشعر اني انهزامية ..

و نفسيتي لإنها استقرت الآن و الحمد لله نوعاً ما و بشكل كبيييير .. فبدأت أرجع لتفاؤلي ، و لثقتي ، و لإيماني و يقيني بالله ..
و هذا سبب تأخري .. صرت ماني عارفة إيش اكتب .. حتى كلامي مع الآخرين رجع قليل و أستمع أكثر مما أتكلم مثل
زمان ..


:::::::::::::::::::::::::::::::::::::::::::::::::: :::::::::::


قراراتي حسب الأولوية .. و الخاتمة :

1 - بإذن الله اتفقنا نتشارك أنا و كم فرد من أخواني و أخواتي ، و نشتري عقار مع فكرة استثمار ..
و يتقسم طبعا .. و زوجي و أخوي بيدوروا و يسألوا حاليا ..

منها :
أ. أضمن سكن - ملك - لأولادي بإذن الله و لزوجي و علشان لو مت لا سمح الله .. بيكون فيه مكان يجمعهم
و لو عشت يصير ما أحتاج لأحد غير لربنا ،.
ب. يكون فيه مكان يجمعنا أنا و أخواني و أخواتي .. خاصة بعد موت الوالدين الله يرحمهم ، و أولادي يكونوا قريبين
من أولاد أخواني و أخواتي .. و ما تتشتت العيلة ..
جـ . واحد من الشركاء ، أخوي ولي أمري .. و الشي هذا بيمدني بإذن الله بالشعور بالأمان ..
د. إذا سافرنا بإذن الله ،، يكون فيه مكان نحفظ فيه أغراضنا .. و نلاقي مكان نجلس فيه إذا نزلنا بالإجازات ..
هـ. حفظ للمال من الضياع ، و وضعه بشي مفيد ..

2 - ماشية بالإجراءات تبع الدراسة و السفر .. و الحمد لله و الشكر و اخترت مكان مناسب لي و لعيلتي الصغيرة
من جميع النواحي ،، سواءً ( تعليمية ، أمنياً ، اجتماعياً ، بيئياً ، دينياً ، مادياً ) و استخرت و يارب تتيسر ..

و وعدت زوجي ، إن أكمل دراسته هناك .. إني بأوقف معاه إذا رجعنا بالحصول على وظيفة ..
لإنه وقتها بيكون بإمكاني الحصول ( له ) على وظيفة بإذن الله و بسهولة ،،
أو أساعده بمشروع .. و ما راح أتركه أبدا و بأوقف معاه ..


3 - الصلاة ،، و الأمور الدينية ..
صح إني مقصرة ، بس خلاص .. زوجي فهم إنه الشي هذا مافيه أي نقاش و لا لعب بعد كذا ..
لإنه لما يهمل ، أنا راح أهمل و أصير مثله غصب عني .. كنت زمان أتبعه بالشي هذا ، لكن المرة هذه هو يتبعني ..
( زوجي ما كان يترك الصلاة ، لكن يهمل و ما يصلي بأوقاتها إذا كان نعسان أو مشغول أو برة أو نايم ..
كنت أحسبه ينسى .. بس عرفت إنه كان بالقصد ، و مو بداخله وازع أو رادع أو خوف )

فخلاص ..
كل شي يتأجل بعد كذا ، علشان الصلاة ..
( طبعا الموضوع مو بالسهولة .. لإني اخترت الزواج من إمام عشان الصلاة .. عشان شخص يشجعني ،.
فدحين لازم أدفع نفسي و زوجي و ولدي .. و الحمد لله ربي رازقني شغالة تهتم بصلاتها و تخاف الله )

4 - أبغى أرجع أقرأ ، و اكتب و اهتم بعلاقاتي بالآخرين و بعملي و دراستي .. يعني عايشة حياتي ..
و أحمد الله ليل و نهار .. لإني بصحتي و الحمد لله و الشكر أنا و أولادي و زوجي و حبايبي و أخواني و خواتي ..
( من أصبح آمناً في سربه، معافىً في جسده، عنده قوت يومه، فكأنما حيزت له الدنيا بحذافيرها )

لإني شفت أمي كيف عانت و تعبت ،، فعلشان كذا .. بأستغل كل ثانية و كل لحظة ..
( من أجل .. صنع السعادة و الإبتسامة لنفسي و للي حولي )
افتكر بعد ما تزوجت ، و حتى أوصل لنقطة اتفاق بيني و بين زوجي و حتى أحاول فهمه ..
قررت أتوقف عن القراءة و التفكير ،، علشان أنزل أنزل أنزل على أرض العالم الواقعي ،،
بس ماحد خلاني أثبت و الحمد لله بعد ما عشت التجارب المؤلمة بالحياة الواقعية
( غير الكتب هذه و اللي قرأته و تعلمته سابقا .. فلازم أرجع أغذي قلبي و روحي و جسدي و عقلي )

5 - رجعت و الحمد لله ،، أهتم بالآخرين و مساعدتهم مثل زمان .. و محاولة إدخال السعادة بقلوبهم ..
لإني من زمان أؤمن ، بإنه ربي خلقنا من أجل الآخرين .. مو علشان نعيش مثل البهايم أكرمكم الله ..

6 - من يوم تزوجت ، و أنا أعارض نفسي عشان أرضي زوجي .. كنت كل شي أحكي له و يقوم يشككني بنفسي
و يستغل اللي أقوله لصالحه بأي طريقة ، سواءً هو أو أهله .. و على نياتي كنت صريحة و واضحة و ساذجة ..

و أمي نصحتني كم مرة و قالت لي ( إنت زي الكتاب المكشوف عند زوجك ،، لا تحكي له كل شي )
و ما صرت دحين أحكي له أي شي .. يعني ما صرت اهتم إني كل شي أقول له أول بأول ، فيه أمور مالها داعي ..

أيام الملكة كنت زي كذا ،، و كان يحاول إني أحكي له و يسعى لمعرفة أسراري ..
بس كنت أرفض إني أسمح لأي شخص يقتحم عالمي الخاص .. فشاركته عالمي و ندمت و اهتزت قواعدي .،
بس دحين رجعت مثل قبل .. و هو رجع يهتم بمعرفة كل أموري ..

هذه كانت أهم الأشياء اللي قمت بها .. و مو علشان ( موضوع زوجي ) ..
بس لإني من يوم أمي ماتت الله يرحمها و صار كل اللي صار من تغيرات .. ( قررت أبدأ اصنع حياتي من جديد )
فكنت راح أشرك زوجي حياتي الجديدة ، لكن ( أشكره و اشكر كل شخص أساء لي ، و بسببهم رجعت أقوى من قبل )

7 - اللي يشجعني أكثر على كل هالأمور ،، إني شايفة ولدي بيتعلم مني من غير ما أعلمه ..
أراقبه و أشوفه نسخة مني الله يسعده ، و ماشاء الله عليه .. يسألني دايما عن كل شي ..
و ولدي راح يعلم أخوه أكيد .. و هكذا .. : )


:::::::::::::::::::::::::::::::::::::::::::::::::: :::::::::::


:: المطلوب من زوجي ::

- يتحمل مسئوليتنا بشكل كامل ( مع تقديري لوضعه المادي ) .، و نكون نحن رقم ( 1 ) عنده .،
- يشتغل و ما يجلس بدون وظيفة ، و مالي دخل بأي ظرف .. ( قلتله ، ما أجلس مع زوج عاطل بعد اليوم )
- ما راح أتحمل أي سهر يتجاوز عن حده المنطقي ، و لا أي كذب إيش ما كان لونه ، و لا أي استغلال و تغابي ،
و لا مراوغة ، و لا لعب بالأعصاب بتشكيك و غيره ، و لا استفزاز بتطنيش و اهمال ، و لا قلة احترام أو ألفاظ سوقية ،
و لا تعامل غير راقي ..
- يقدّرني أمام أهله ، و أسرارنا و مشاكلنا تنحل ما بيننا و ما نظهر لهم أي شي بيننا ..
- ما يشتم أولاده و لا يعاملهم بطريقة حيوانية تهين كرامتهم و انسانيتهم ..
- أعرف راتبه فين بينصرف و متى بيستلمه .. مو لازم كل قرش و فلس ..


:::::::::::::::::::::::::::::::::::::::::::::::::: :::::::::::


الموضوع اللي صار .. راح أكتبه زي ما حصل لإني وعدتكم ..
بس خلاص اقتنعت بقراري اللي اتخذته .. لإنه العبرة بالدروس اللي خرجنا منها و التغيير اللي شفته سواءً فيا أو في زوجي ،
مو بالموضوع نفسه .. و ما حيبقى غير إني اشكركم كلكم لوقفتكم معاي ..