تسلمين يالحلوة ..

نزلت بعد صلاة العصر لهم وكانوا جالسين ع قهوتهم بست رأسهم وإيديهم ، جده : كيفك ي أمي ذَا اللحين أحسن إن شاءالله
ايه الحمدلله حبيبتي
الجد : يومك ي بنيتي تعبانه وراك ماأرتحتي وتركتي هم الإستقبال لهم
ضميته : آفاا وَذَا كلام
أحم أحم رفعت راسي وشفته يناظرني بعصبيه وسفهته وضميت جدي أقوى: حبيبي مسوي العشا عشاني ولا أستقبل ضيوفي بنفسي مايصير
باس راسي : لا والله يصير ونص أهم ماعليّ راحتك ولو ادري بتعبك كان أجلته لليوم الثاني
بست خده : جعلتي فدا بس
بنبره عصبيه مخفيه :صبي لي قهوه
جدتي كانت اقرب مني للدلال صبت له
مافيه اليوم فطائر
الجده : الا أكيد فيه باقي من عشا أمس بس اذا انت جيعان خلني أحط لك غدا
لا لا بس ابي فطائر قومي هديل جيبي لي
الجد : وش لها تقومها من حضني نادي ع الشغالة تجيب لك ولا قم أخدم نفسك
ناظرني وصد : حميييده
حميده : يس بابا فيصل
بدون نفس : جيبي صحن الفطاير
اوك
أنا : ايه أحكوا لي كيف كان بعدي عنكم
الجد : ضيييم
الجده : أنا أشهد بالله
هههههههههه الله لايحرمني منكم
الجميع : اللهم آميين
الجده : وانت كيف كان السفر
اممم كرريه من غيركم لكن المدينة تخبل خصوصا الريف عندهم خيال لكن لو تكون جنه من دونكم ماتنطاق
فيصل بعتب وواضح عليه الزعل : العذر منك لو ندري كان خذناهم معنا
إبتسمت له : صحيح وجودهم بتكمل فرحتي لكن اللي مهون عليّ وجودك معي
الحمدلله يلا عن أذنكم
انا : ع وين
متواعد مع زيد محتاجين شي أجيبه معي
الكل : سلامتك
الله يسلمكم << طلع ولحقته في الحوش >> فيييصل
إلتفت لي بدون نفس: خيييير
قربت منه ومسكت ايده العب فيها : آفاا الحلو زعلان
سحب ايده : خلصي وش بغيتي
مسكت حواجبه المعقدة وبدلع : حبيبي معقد الحواجب ليش
بعد ايدي : مو فاضي لك قولي وش تبين ولا أمشي
طوقت رقبته وبدلع : أبيييك وماأبي غيرك
بزعل يفك ايدي : لا واضح
رجعت طوقته: واللي خلقني غيرك ماهويت وخلقه يشهدون ع كلامي غيرك ماتمنيت .
حوطني وابتسم : أحياناً أشك فيك
ضحكت : هههههه إني أحبك يعني
لا هذا متأكد كنه هههههههههه
أجل وش تشك فيه
إنك تتلذذين بغيرتي وتحبين تعذبيني
ببراءه : أناا
قرص خشمي : إيييه انت أنا ماقلت لك حضنك كلامك الغزل كله لي ولوحدي
بعدت عنه : ي اخي اطلب شي معقول انت عارف وش يعني لي جدي
رد قربني له : إييه عارف وهذا اللي ذابحني إنك تُحبين جدي أكثر مني
لا مو أكثر والله
طيب اذا مو أكثر أكيد انا ماتعديت عنه صح ولا
سكت مارديت
باس جبيني : سلام تأخرت ع زيد
طيب بس بتجي ع العشا
إن شاءالله المهم اذا احتجتي شي كلميني
إن شاءالله في وداعة الله ي قلبي
إبتسم وطلع ، وانا رجعت لجدّاني اللي وحشوووني 💞
طبعاً كلمت البنات يجون ع قولتهم مشتاقين لأكلي ومنها أعطيهم نقصتهم وجهات لطيفه مع بنتها ..
فيصل دخل علينا : السلام عليكم
الكل : وعليكم السلام
فيصل أخذ هجير من امها : خير مجتمعين عند النبي إن شاءالله
لطيفه : الخير بوجهك ي الغالي أمس ماجلسنا مع بعض عدل قلت أجي اليوم نسولف
حياك الله ي الغاليه بس جايه وساحبه غنمك مع لييييش
وسن : غنم اللي يرفسك
عطاؤها نظره يمثل انه عصبي: حسك أقصريه ي البزر وأحترمي خالك
وسن حذفت عليه الخداديه : أقووول شب بس قال خال قال
ع وضعه وحذف الخداديه: مو عاجبك ولا مو عاجبك
لا مو عاجبني يكفيك الحب
تغيرت ملامحه وبهيام: اااااه ي الحب جعلني فداها
منى صفرت : أموووت ي العاشق
مد ايده : اللهم آمييين
ضربته ع خفيف : بِسْم الله عليها
عقد حواجبه ومد بوزه مثل الأطفال : تحبينها أكثر مني
هههههه أكيد لا بس هي ماعدت عليك ولا أحبك تدعي عليها منى غالييييه كثير عندي
منى سحبتني وضمتني: جعلني فدا بس
سحبني منها وضمني ع جنب : هييييي انت قبل تحضنينها لازم تستأذنيني وعليها أشوووف أملاك خاصه ذي ي أبوي
نوره : بععععد حتى هديل ضميتها من ضمن أملاكك
ناظرني بحب : هي راس مالي وكل جاهي ولو ماأملك الا هي أنا غني
الجد بفرح : عسى الله يديم الحب بينكم ولا يفرقكم ويديم السعاده والهنا بينكم
الجميع : اللهم آميين
لطيفه : حبيبي قم ابيك بكلمة راس
أبشري ي الغاليه تبين نطلع برا ولا نروح المجلس
لا برا برد نروح المجلس أزين وأصد
حياك ي قلبي
أنا : طيب انا بقوم أجهز العشا اذا خلص ناديتكم
فيصل : أوك بس خلي الغنم يساعدونك مو بس ياكلون ويمسحون يدهم بالطوفه
وسن معصبه : أقول ذه حب وابتلشنا فيه
أنا : ههههههههههه حرام عليك والله مايقصرون
خذت البنات نجهز الأكل وهم دخلوا المجلس وبعد ماجهزنا الأكل قلت لمنى تنادي عليهم لكن فيصل طلع وملامحه غييير ولطيفة واضح عليها انها كانت تبكي خفت انه يكون صاير شي لأحد : وش فيه
فيصل مسك ايدي : مافيه حبيبتي جهز الأكل ولا حدي جيعان
ناظرت لطيفه اللي عيونها باقي فيها دموع : اييه جهز حياك
الكل جلس وانا رحت اجيب علاجهم قبل الأكل وبعده بدينا بالأكل وعيوني كانت تراقب فيهم كان فيصل ياكل وكأنه يتهاوش مع الصحن ولطيفة مالها خلق شي حتى بنتها هجير اللي ذبحت عمرها بكي ورحمتها وسن وخذتها منها
الجده : وش فيك هديل ماتاكلين
إلتفت لي وقلت : الا آكل ي قلبي بس يمكن شبعت مع الطبخ
الجد : لا ي ابوك أكلي زين صحتك هب عاجبتني
فيصل بحزم : أتركي عنك الكلام الفاضي وأهلي زين
إن شاءالله ، وبعد الأكل فيصل أستأذن منهم يرتاح ، ولطيفة خذت بنتها هجير ورجعت بيتها وتركت وسن تسهر معنا بعد رجا جدي وجدتي وكملنا السهر مع بعض وجداني ناموا وانا عقلي وفكري معه وبحالهم اللي قبل شوي أستأذنت منهم أتطمن عليه وأرجع وهم طلعوا يجهزون جلسه برا ، طلعت له وحصلته جالس في الصاله والتي في شغال وعالي وهو مش معه سرحان قصرت ع الصوت وجلست ع الطاوله قباله : يااهو نحن هنا
رفع نظره وإبتسم : حي هالزول
يحيك، وش سرحان فيه
مبتسم : ولا شي أمور شغل لاتهتمين ، راحو ؟
لا البنات باقيين سهاري تعال معنا بدل جلستك لوحدك
لا حبيبتي تعبان وابي أرييح شوي
حبيبي فيصل وش فيك حالك متغير
سحبني وجلسني جنبه : قلت لك أمور شغل ي قلبي لاتهتمين
لا ماأقصد اللحين حالك متغير من طلعت من المجلس مع لطيفه وحالكم مقلوب واضح عليها البكي وانت العصبيه ؟ لطيفه فيها شي مع زوجها ولا أحد من العايله صاير معه شي
ضمني : فدييتك ي عمري والله مااحد فيه شي كلهم بخييير لاتحاتين
بعدت عنه : بس أنا ....
حط إصبعه يسكتني: اوووش لاتفكرين بالأمر كثييير وإذا مطوله حضرتك بمنعك لاتسهرين معهم أدمنت وجودك ونومي صار صعب وانا بعيد عن حضنك
نقزت عنه : لا يابابا نام لوحدك البنات ينتظرون تصبح ع خير
طلعت وهو يضحك عليّ إبتسمت ع ضحكته وشقاوته لكن قلبي مو مرتاح كلللش
نزلت للبنات وكملنا السهر للفجر وبعده ناموا بالغرفه المخصصه لهم وانا نمت معهم بس لما صحيت الظهر لقيتني بغرفتي خذت شور ونزلت لجدّاني تحت وكان جالس معهم سلمت عليهم وجلست : تغديتوا
الجده : تو قايم الغدا تبين تحط لك حميده
بدون نفس: لا حبيبتي مش مشتهيه كلش تو جالسه من النوم
فيصل : هذا والله اللي بناخذه من السفر نفس مسدوده ونوم متقلب وبغرف غيرنا
: يعني انت اللي طلعتني فوق
بحزم : اييه ولا أبيها تتكرر لو سمحت
طيب
وشو طيب قولي إن شاءالله
الجد : شوي شوي عليها البنت توها جالسه من النوم مالها خلق للأكل ولا لها خلق مناجر
هههههه صادق جدي
ماتبين أناجرك نفذي كلامي ولاتعصبيني
الجده : وش عصبيتك فيه كل اللي سوته نامت مع البنات مو بالشارع
مديت له لساني أقهره الكل يدافع عني : لو فكرت تزعلي فكر مليون مره قبل هههههههه
عض ع لسانه: بتتمردين عليّ دوامهم معنا
الجد ضربه بالعصا : لا أطردنا من بيتي بعد
فيصل بمزح : ليش أطردنا آخذ حرمتي وأطلع لبيتي
الجده بخوف : ي ويلك لو تسويها مالنا غناتن عنها
بزعل : افاا بس عنها
الحد : عنكم أنتم الأثنين بس اذا انت بايع وش له نشتري تكفينا هديل
بست ايدينهم : مايفرقني عنكم الا الموت
الجد والجده : لك طولة العمر ي الغاليه
فيصل : أمزح ي الغالين لو بسويها كان سويتها من زماان من يوم كثرت فلوسي وكبر جيبي
انا : اي والله صحيح بعد ماكنت في لندن وشفت غناك كان عندي سؤال وأنسى أسألك
يشرب قهوته : الا وهو
ليش ماطلعت من هنا وبنيت لك قصر وخذت جداني معك ليش ظليت هنا ببيت قديم شعبي يناقض مركزك
بحب : لأَنِّي ماأقدر أعيش بعيد عنهم جربت بس ماقدرت صحيح أسافر وأبعد وأظل شهور بس أرجع لهم أنا ربيت ع يدهم من كنت بالمهد حتى لما كبرت مافكرت أرجع لبيت أبري لأنه البيت هذا صار بيتي وذكرياتي
الجد : حاول كثير فيصل يطلعنا من هنا ويبني لنا قصر مثل ماقلت ويسجله بأسمي عشان ماأحس إني دخيل او له فضل عليّ لكن رفضت .
الجده : البيت هذا ي بنيتي مو طابوق وحديد البيت هذا إنبنى ع ساس الصبر والحب التعب والراحه الشقى والفرح كل طابوقه في البيت هذا شهد ع كل شي مرينا فيه انا وجدك وعيالنا وأحفادنا واليوم راح يشهد لك ولحياتك مع فيصل وإذا ماطلعتوا منه من بعد عينا راح يشهد عيالكم ..
فيصل : لكم طولة العمر بالطاعه ، لما رفضوا وقرر جدي ع زواجي جددت فيه يتماشى شوي مع زمنا بس ع فكره ماتغير فيه شي كثير حاولت قد ماأقدر أحافظ ع ذكرياتهم .
بإنبهار : ماشاءالله بيت عامر بذكره يارب
آمييين
الجد: ولا كل واحد من عيالي يتمنى أجي أسكن عنده لكن تعلقي بالبيت هذا يمنعني إني أخون عشرته وأبعد
: الوفاء جمييل
فيصل : ماراح تروحين بيت عمك تسلمين عليهم
الا أكيد العصر إن شاءالله
ع خير وانا بمر عند أختي لطيفه
الجده : وش عندها
ماعندها ي الغاليه بس بنزل أتقهوى عندها
بس هي عندك أمس
ههههههه وإذا يعني الواحد مايزور اخته يتقهوى
الجد : الله يسهل أمرك
في خاطري وضعكم أمس يقول انه فيه شي واليوم زيارتك لها يأكد ظني ي فيصل الله يستر بس
وبعد العصر هو نزلني وكمل طريقه وقبله طلبته أجلس لليل لكن رفض وسمح لي العصريات بس 😤
بعد السلام والشوق جلسنا نتسامر وأعطيتهم نقصتهم والحمدلله عجبهم ثم سحبني ع جنب عمي : كيفك ي بنيتي
بحب كبير للإنسان هذا : الحمدلله انت طمني عنك
أنا بخير طول ماعيالي بخير
الحمدلله كلنا بخير
وأمورك مع زوجك تمام
ايه ي الغالي بخير ولله الحمد وفيصل مو مقصر معي بشي لا تحاتي
واضح هالشي من عيونك ي أبوي
إبتسمت : كيف واضح مافهمت
لمعة عيونك اللي كنت أشوفها قبل بعد وفاة أهلك أختفت لكن ظني السفره نفعت وردتها
هههههههه نفس كلام جدي سبحان الله
الله يديم عليك الراحه والسعاده
بوجودك ي الغالي
ها بتجلسين عندنا للعشا
لا ي قلبي حاولت مع فيصل لكن رفض
تبيني أكلمه
لا ي عمرري مره ثانيه إن شاءالله
إن شاءالله
وبعد صلاة المغرب إتصل عليّ ينتظرني برا طلعت له : السلام عليكم
وعليكم السلام ، كيف اللي كنتي عندهم عساهم طيبين
الحمدلله يسلمون عليك وتمناك عمي معي ونبقى للعشا كان بيكلمك ع فكره لكن قلته مره ثانيه إن شاءالله
إن شاءالله
ايه وش أخبار اللي كنت عندهم
بخير
لاحظت للطريق غير: وين بتاخذني
البحر
البحررر ، ليش
وشو ليش عيب آخذك ولا ممنوع
لا مو كذا بس ماقلت قبل ع الأقل شفت البنات وجداني يمكن ودهم بالروحه
بطفش : أوووف يعني اللحين كل طلعه نطلعها لازم قبيلتك معك
لاحظت مزاجه المعكر : لا مو قصدي بس قلت اللمه حلوه
بضجر : وانا لما أكون معك ماأحب الزحمه
طيب خلاص ع راحتي حبيبي
زفر : آسف ي قلبي عصبت عليك
مو مشكله أنا بعد غلطانه
مسك ايدي وباسها : أحبببك
وانا بعد
بنص عين : وانت إييش ي البخيله
ههههههههه أحبببببك
آآآه ي قلبي شفتي أنا كيف بالمحبه كريم وانت بالعطا بخيله
حرام عليك والله
وانا عند ربي صادق بالله كم مره في اليوم تقولينها
خلاص أسجلها لك وش رايك
حذف ايدي : إنقلعي زييين أنا ابي أسمعها منك أحس فيها مو تسجيلك صوت من دون أحساس ي البخيله
هههههههههههه
ايه ضحكي البزر
هيييي انت نفتك من كلمة طفلة تجينا ببزر
سمعيني اللي أبي أسمعه وقلبي شفقان له وأبشري باللي يرضيك
ماااافيه عناد فيك
بزر ماقلت شي فيك غلط
وصلنا للبحر ونزلت منه زعلانه وهو يضحك علي: اذا منتظره مني أراضيك لاتحلمين اذا إنت عنيده ترا أنا أعننند قولي لي اللي ابيه وأقولك اللي تبينه
ماابي شي كذا حنا متفقين
ههههههههههههه طيب
ومرت علينا لحظات وساكتين وهو سرحان ويناظر بالموج وانا أناظر فيه أحس في باله حاجه مزعجته بس ليش مكتم عليها ليش مايفضفض لي ويرتاح مسكت ايده وبعدتها وحطيت راسي ع صدره وضميت يده : الجو بااارد
آسف حبيبتي ناسي انه الجو بارد مره في البحر خصوصاً وحنا في الشتا
اللي ماخذ عقلك حبيبي
أنت مااحد غيرك
هههههه طيب
اذا بردانه ي قلبي مشينا
لا حضنك يكفيني
ضمني أكثر ، فيصل
هممم
حبيبي وش اللي شاغل بالك ومعسكر مزاجك فديتك فضفض يمكن ترتاح
شد بحضنته: لاتهتمين ي قلبي
وشو ماأهتم إنت ي فيصل بالنسبه لي شي كبير ومهم يمكن ماأعرف أعبر عن مشاعري مثلك وأتكلم بالكلام اللي تقوله لي ، مع إني أحاول وأتعلم منك بس ماقدرت تحصليني أُعبر لك من تصرفاتي حبيبي أنا لو أشوفك بضيقه أتضايق وأفرح لما أشوف ضحكتك ، حبيبي مو انت قلت لي قبل تبي تشاركني همي وحزني فرحي وسعادتي طيب ليش تبخل عليّ ذَا الحق .
باس جبيني : ماأبخل عليك وأدري فيك << قرص خدي >> صدق أحب وأتمنى أسمع منك اللي يعشقه قلبي بس لأَنِّي أعرفك وفاهمك عاذرك بس هاااا ماراح أصبر كثير صبري قليل راح أعلمك ع ايدي وأفوقك بعد هههههههههه
إبتسمت له : وانا راح أكون التلميذة المجتهدة هههههههه
فديت تلميذتي << وعبرنا عن مشاعرنا >> إبتعد عني : وش رايك نتعشى برا
اممم بس
بدا يعصب : ي ويلك لو قلتيها
ههههههههههه لا مو قايله بس ع الأقل نعطيهم خبر لاينتظرونا
اها اذا كذا أوك .
كلمهم وخبرهم وحنا بعد صلاة العشا مشينا صحيح أقترح نتعشى برا عشان نكون لوحدنا ونقضي أكبر وقت مع بعض من دون عزول لكن كان موجود معي جسد فكره كلللش مو معي وكل شوي سرحان حاولت معه يتكلم بس فشلت كل شوي يتهرب ويحصل له منفذ يطّلع منها وإذا ماحصل إبتدا بحركاته معي 🙈
رجعنا البيت هو صعد وانا دخلت أتطمن عليهم وجلست معهم شوي إلين ناموا ، صعدت وبدلت وحصلته نايم او يمثل انه نايم كانت حركته كثيير لا هو نام ولا تركني أنام كل تفكيري معه وبلطيفه اللي أكيد مزاجه كذا بسببها قمت وشغلت ع القران يمكن ع الأقل باله يرتاح ورجعت ألعب بشعره إلين إرتخى ونام ونمت بعده !!

ومضه :
الشفاه وإن إمتنعت عن الكلام ، هناك رووح تتمزق من الألم !!

بخمن امممم أتوقع أهل زوج لطيفة يضغطوا عليها تزوج أخوها لأسماء أو تتطلق

صح وعد
لا تطولي علينا.... آآآخ من أسلوب التشووويق .......

__________________
سبحان الله وبحمده..سبحان الله العظيم

نفس تفكيري

الشعب*** يريد **** معرفة**** المزيد

ههههههه

__________________
أشهد أن لا إله إلا الله و أشهد أن محمدا رسول الله صلى الله عليه و سلم

أعتذر عن بارت اليوم او الحلقه مثل ماتسموها 😁
لكثرة أشغالي ! لكن بحاول وإذا قدرت نزلت ولا وعدنا بكره إن شاءالله 💝

لااااااااااه

__________________
أشهد أن لا إله إلا الله و أشهد أن محمدا رسول الله صلى الله عليه و سلم

.......

جالسه مع جداني نسولف ونزل فيصل وشكله تعبان
الجده : وش فيك
فيصل : مصدع
الجد معصب : من النوم الكثير حتى صلاتك تصليها هنا
فيصل : والله ي جدي مافيه نوم مقطع وأحلام الله يكفينا شرها
انا : ملاحظه عليك تقلباتك بس طبيعي دام بالك مشغول << قلت أحكيه بِنَا إنه ماتكلم معي يمكن عند جداني يغصبونه يتكلم ، لأنه شاغل بالي وقلبي وهو بالحال هذا مش مرتاحه وأحاتيه !!
الجده : وش منه بالك مشغول
فيصل : أمور الشغل ي الغاليه << 😕طلع منها
الجد : العمر ي ابوك يمضي والشغل مايخلص ، إترك أمور الشغل مكان الشغل وارجع بيت صافي العقل ارتاح مع أهلك وريحهم ولاتقصر عليهم بحقوقهم
مسك ايدي بأسها : أنا أشهد أني مقصر معها لكن تعذرني وتبشر باللي يرضيها
بحب : وجودك جنبي مرتاح البال وخالي هي غناتي
الجده : الله يسعدكم ويهنيكم .
اللهم آميين
خذ له كوب قهوه وجا بيطلع : وين
إلتفت لي : الشركه ي قلبي
طيب بتجي ع العشا أحسبك
بشوف وأكلمك
طيب في وداعته
الجد: حاله مو عاجبني ويظن أني صدقت عذره ، ي بنيتي ي هديل ماتدرين وش فيه زوجك
والله ي عمري أسأله ورده مثل ماقال لكم
الجده : بِسْم الله ع وليدي لاتوسوسون بي
إبتسمت لها : لاتحاتين ي قلبي هو بخير إن شاءالله
الجد والجده : إن شاءالله
ومر الوقت وخيم علينا الليل وبعد ماجهزت العشا رجعت أجلس معهم ورن علينا الجرس وكانت لطيفه لوحدها من دون عيالها إستغربنا جيتها مو بالعاده وبعد السلام والسوالف قالت : الا وين فيصل مو هذا وقت رجعته
الا وقته لكن قال انه بيتأخر اليوم
اهاا زين ، لأنه جيت اليوم أكلمك في موضوع مهم
آمري وش بغيتي
لا نكون لوحدنا ومكان هادي أفضل نروح المطبخ أزين
طيب حياك
وبعد مامرت لحظه وهي ساكته : هذا حنا لحالنا تكلمي وش بغيتي
أممم أنا تعمدت أجي اليوم وفيصل مش موجود لأنه الكلام اللي بقوله لك ماظنتي بيرضا عليه وأتمنى الكلام اللي يدور بينا يظل بينا
اهمم وش عندك من كلام أنا أسمعك
لطيفه : أنا من ...
هدييل
إلتفتنا وكان فيصل واقف وملامحه ماتتفسر: فيصل متى جيت
فيصل ويناظر لطيفه نظرات غضب : هذا جيتي ، ماشاءالله لطيفه عندنا وش الطارئ عسى في جئتك خير ي بنت أبوي
إبتسمت له : وحشتوني قلت أسير وبعده قمت أساعد هديل بتحظير العشا
: ماقصرت حبيبتي يعطيك العافيه
لطيفه : أخليك بروح أجلس مع جداني
وطلعت وفيصل ناظر فيها إلين إلتفت لي : وش كانت تبي منك
: ولا شيء حبيبي كنّا نجهز الأكل
بعصبيه : لاتكذبين عليّ أختي وأعرفها وش قالت لك تكلمي
مسكت ايده وضغطت عليها : والله ماقالت شي هو صدق كانت بتقول شي لكن انت قاطعتنا
بعصبيه : ذي بتجنني ماتفهم بالكلام أبد << جا بيطلع ووقفته >> وش السالفه ليش معصب منها ووش الكلام اللي خايف منه لاتقوله لي
صد عني وبيطلع لكن مسك وجهه ولفيته عليّ : ماتعودت عليك كذا ي فيصل وش منه خايف
انا مو خايف
طيب وش الكلام اللي ماتبيني أسمعه
غلط
وشو الغلط
مو ماأبيك تسمعينه ماأبيك تضايقين نفسك بسبب أمور تافهه
طيب وش هي ولا تحاتي دام انه تافهه مستحيل أعطيها بال
باس جبيني : لاتفكرين بالأمر كثير وأنسي ي قلبي
بس << ماكملت لأنه طلع من المطبخ >> لا ي فيصل نظرتك اليوم هي اللي خوفتني من قبل أسمع والشي هذا يخليني أصر أعرف وش مخبي عني وخايف لأختك تقوله !!
بعد العشا إستأذنت لطيفه تروح لبيتها وبعد ماناموا جداني صعدت فوق وحصلته كل العاده مو حول التي في دخلت الغرفه بدلت ملابسي وبدلت شعري وطلعت له طفيت التي في ، وسويت لنا قهوه ومديت له الكوب: بس انا ماطلبت منك وبعدين اللحين وقت نوم
وانا أشرب : لا حبيبي هو صح وقت نوم بس انا وانت عارفين انه ماراح تنام لذا خلينا سهرانين ونتمتع بالقهوه
إبتسم لي : قولي إنك مشتاقه لي من دون مراوغه
مشتاقه لك بكل وقت وبكل دقيقه وثانيه
قرب مني ودفيته: لا الليله بالذات لا تعال نجرب طريقه ثانيه
عقد حواجبه : وش هي ألطريقه
انه نتكلم نقضي الليله بالكلام مع بعض
نفس نظرته : وأي نوع من الكلام
أشرت ع عقله : الكلام اللي يدور هنا << وأشرت ع قلبه >> ومخبيه هنا << وأشرت ع شفايفه >> مانع هذا لايطلع ويفضحك
قام وقف متنرفز: اوووف وبعدين معك انا قلت لك مافيه شي ولاتكبرين السالفه
ببرود عكسه : لو مافيه مثل ماتقول كان ماكانت ردة فعلك كذا
ردة فعلي سببها انتي وإصرارك من انه فيه شي << دخل وصفق الباب وراه , ولحقته >>
فيصل اذا ماتبي تتكلم انت حر لكن تأكد إني راح أعرف اليوم ولا بكره
تصبحين ع خير << تغطى وتركني آكل في نفسي وأفكر >>
طلعت برا الغرفه لأزعجه وجلست بمكاني أفكر وأسرح وماأنتبهت الا ع ايده يمسح ع شعري : حبيبي ليش مانمتِ
عدلت بجلستي: ماجاني النوم وانت ليش قمت من فراشك
جلس جنبي وشدني لحضنه وحط راسي ع صدره : وانا أقدر أنام وانت بعيده عني
مارديت عليه وجلسنا كذا فتره أنا مع اللي يدور داخلي وشاغلة بالي وهو كذالك وبهمس : فيصل ريح لي بالي وقل لي وش اللي شاغل بالك ومزعجك
بنفس نبرة صوتي : آآه ي قلبي والله مااحد شاغلن بالي وفكري غيرك
رفعت له راسي وانا مازلت بمكاني : يعني الأمر يخصني
وش قصدك ؟!!
فاهمني ي فيصل
وش تبين تعرفين
وش فيها لطيفه وش قالت لك بذيك الليله وأزعجتك وخايف لاتقوله لي
بعد ايده عني وبعد بجلسته شوي ونزل راْسه : أنا ماودي أقول لك بس عشان ماتتضايقين وتزعلين بس بعد أعرف ماراح ترتاحين الا لما تعرفين
مسكت ايده : مو فضول والله وانت تعرفني مافيني الصفه ذي لكن اللي يزعجك يزعجني متأكده من راحتك لما تتكلم وتقول اللي شاغل بالك
ضم ايدي بين إيدينه ورد ظهره لورا: تذكرين لما سألتيني ليش لطيفه تعاملك كذا وإذا تعرف بحقيقة الزواج اولا
أهممم أذكر حبيبي
وقلت لك أنا ماأعرف
صح
طيب تذكرين ليلة اللي سهرنا بالحوش منى ووسن وبلطيفه قبل طيحة جدي اليوم اللي زعلت لطيفه وطلبتي مني أراضيها
أتذكر ذَا الليله وش فيه
يومها أنا تعمدت أوصلها لبيتها عشان أعرف وش قصتها معك وليش تتصرف معك كذا أنا ماأنزعجت منها بذيك الليله بس لا أنا أعرف بسوالفها معك حتى وانا مسافر من منى او جدي كنت أنبسط من اللي تسويه لكن لما شفت بعيوني وسمعت بأذوني تضايقت وحيييل يومها كنت أظن لأنك ملكي واللي يهينك يهيني<< إلتفت مبتسم >> بس كنت غلطان انا يومها كنت أعشقك وبسببه كنت أثور
طيب حبيبي وش دخل هذا بالموضوع اللي نتكلم فيه
جايك بالكلام حبيبتي : وصلتا وتناقشنا وانهارت عندي وقالت لي ليش تكرهك وحاقدة عليك
بصدمه : تكرهني وتحقد عليّ لييش ؟
نزل راْسه : نفس السبب اللي كنت أكرهك عشان وأبعدك عني
قصدك !!
اييه عشان جدي غصبني عليك والكل يدري بالشئ هذا لطيفه أختي الوحيده وتعرف مكانتها عندي ومكانتي عندها كبيييره أحياناً تعاملني مثل ولدها مع انه الفرق بينا مو كبير واجهت الكل عشاني بس ماسمعوا لها وبيوم من الأيام دخلت جناحنا وشافت مكان نومتنا كل واحد بغرفه وسمعت كلامك مع منى وزاد كرهها لك تأكدت بفنونها انه انت سبب تغريبي وبعدي عنهم
بس انا مالي دخل بكل هذا انت اللي اخترت تبعد وانت اللي غربت نفسك
هي ظنت وماتأكدت مني والكره والحقد سكن خافقها وبدلا ماتنظر لك كأخت لها او زوجة اخ نظرت لك كعدو لها
إبتسمت بسخريه : سمعت بغيرة خوات الزوج بس كره وحقد ذي مامرت عليّ طيب يوم سألتك يومها اذا تعرف لطيفه او لا ليش نكرت
لأنه ماكنت ابي أزعلك خصوصاً وانا عارف انك ماتبين حد يدري باللي بينا
طيب ليش ماكنت تبيها تقول الكلام هذا عادي ويمكن لو تكلمت معها بالموضوع كنّا راح نحل المشكله بينا وماأشوف له داعي لضيقتك ذي
شد ع ايدي ومازال منزل راْسه : هذا شي عادي بس اللي بقوله لك مو عادي
وشو
رفع نظره لي : لما شد الكلام بينا بين انظلمت وماإنظلمت وأنها اختي وإعلانه علي ّ ووو طلع مني من دون ماأقصد إني قررت أتزوج وإني تفاهمت معك ع الموضوع ووافقتي
سحبت ايدي منه مصدومه : اييه
رد مسكهم : مدري ليش قلت او تكلمت يمكن وقتها كنت ثائر ومعصب منها وأبيها تتركك بحالك وماتضايقك وانا جد يومها كنت مخربط ومو عارف حقيقة مشاعري من ناحيتك كنت أهتم لكبريائي وغروري ولطيفة ضغطت ع هذا وقلت اللي قلته .
غمضت عيوني أهدي نفسي وفتحتها : طيب وبعدين
بعدين << شد ع ايدي >> أبيك تصدقيني وتثقين فيني أنه مالي دخل بكل اللي صار
ماعاد فيني صبر : تكلم وش صار بعدين
بعصبيه : بلقافه منها طلبت من زوجها يد اخته لي وقالت لهم انه بعد سفرتي راح أتقدم لهم رسمي
ايييييييش
حبيبتي والله مالي دخل ماطلبت منها أساساً فكرة الزواج ماكانت حقيقية اذا صدق بقدم ع الخطوه او لا كنت بس ابي انتصر لكبريائي
وانا معصبه : وأختك كيف تطلب بنت الناس من دون علمك ماخافت تنحط بموقف بايخ مع زوجها وأهله
بنفس عصبيتي : لأنه ماعندها عقل يوم قالت لي أنصدمت منها وعصبت وترجتني أني أتقدم رسمي وماأفشلها هذا خطتها انها راح تقدر تضغط علي من هنا
بضيقه : يعني راح تتزوج اخت زوجها
مسك ايدي وجلس عند ركبتي : أكييييد لا مستحييييل أموت ولا أسويها ي المجنونه أنا أحبك تعرفين وشو أحبك يعني مستحيل أضيعك مني تحت اي سبب كان كيف لو كان سبب ناس غبيه
طيب كيف وكلام اختك مع الناس
لطيفه لما كانت هنا أنا كنت عند زوجها عشان كذا قلت لك بتأخر كلمت زوجها وفهمته كل الموضوع بطريقة ماتضر أختي ولا تجرح كرامتهم ، وعرفت من وسن انها عندكم وخفت لا تتكلم وتضايقك
براحه : وتفهم زوج لطيفه
اييه الحمدلله عاد مدري اذا من داخله ولا يمثل عليّ المهم إني طلعت من المشكله اللي حطتني فيها لطيفه
ضميته من دون تفكير : أحبببك أحبببك
ضمني: وأنا مجنون غرامك
بعدت عنه : ممكن طلب
أشر ع عيونه : عيوني ي أغلى من نظرها
حبيبي لا تخبي عني شي من اليوم ورايح سواء يخصني او مايخصني كل شي بخاطرك ويكدرك شاركني فيه من حقي هذا مو بس بالسعاده شريكتك
باسني من عيوني : إن شاءالله حبيبي
ورفعني : يلا ننام كفايانا سهر ورآنا دوامات وصلاة مو مثل بعض الناس عاطلين
ضربته ع صدره من الخجل ونمنا ..

ومضه :
الحقد ، الكره ، الحسد ، الغيره << كل تلك المشاعر الكريهه >> هل سألت نفسك يامن تمتلكها هل تستحق الدنيا أن أتعب قلبي بهم !! هل أستحق أن أعيش ناقصاً طوال حياتي !! لما لا أتحرر وأحرر قلبي من تلك المشاعر التي قيدتني ومنعت عني الحياه كبقية البشر الطبيعيه !!

ليه عندي شعور انه بالاخر راح يتزوج

حلقة و لا أحلى
كثري منها ههههه

__________________
أشهد أن لا إله إلا الله و أشهد أن محمدا رسول الله صلى الله عليه و سلم