والله يا كنافة رح تخليني اقول اشيا عن حياتي ما كنت حابة قولها ويمكن في ناس بتتخطاها وناس توقف عندها
انا زوجي منيح معي بكل شي ووقفت معو ووقف معي باصعب ايام حياتي وتحملها معي وكريم وحنون بس عندو صفة سلبية اكتر صفة كنت اكرها بالشخص وهيي اي مشكلة تصير بيناتنا يروح يخبر والدته انتقام مني وبيعرف نقطة ضعفي انو ما حدا يعرف بخصوصية بيتي 13سنة زواج واقرابي ما بيعرفوا شي عن زوجي غير الصورة الحسنة والزوج الرائع وكان يخبر والدته لانو كان قريب منها وعاش حياة قاسية من جهة والده وانظلمت والدته من والده بس حماتي ما كانت متل حماتك كانت تسمع من زوجي وتحط ملح عالجرح وتعاديني وتصير تخبر اهلها بمشاكلنا وكل عيلتو تعرف وانا اكره زوجي بهاللحظات ويترجاني ويبكي انو بحبني وما عاد يكررها ومع كل مشكلة يرجع يكررها لحد ما حطيت براسي اني ما عاد تفرق معي كلام الناس وما فرجيهن انو هيدي نقطة ضعفي
وحمااتي اللي كانت تطلب من زوجي يطلقني وهوي يرفض لبعد 7زواج اتعلم درس قاسي لانو ما عاد يحكي شي بخصنا واي مشكلة بتصير بيناتنا
وهلئ صارت الكرة بملعبي صارت حماتي بدها رضاي وتعمل الف حساب قبل ما تجيب سيرتي
وهلئ بتصير بعد الاحيان مشاكل بيناتنا وبنكون مضغوطين مرة هوي بيحتويني ومرة انا بحتويه وبعد فترة بننسى اللي صار وما بنرجع نندقق بالمشكلة واقسم بالله وقت المشكلة بصير بحكي كلام ما بعرف أبعادو توصل اني جرح برجوليته وهوي كمان نفس الشي بيحكيني كلام بيجرح انوثتي مع انو بعدة فترة صغيرة بيمدح فيني وبجمالي وعطول بيمدح قدام الناس فيني انو محظوظ انو انا زوجتو
وصارت حياتنا معتمدة على مبدأ المصارحة والتطنيش يعني وقت الغضب قول كل اللي بقلبي وهوي ما يرد ولا ياخد لكلامي ابعاد وانا بالمثل والحمدلله حياتنا سنة عن سنة تفاهم اكثر حب مضاعب ومتجدد وبنحس مستحيل نكون بعاد عن بعد
بالنسبة لك اختي انتي اعرف بنفسك كيف الحياة بدك تكمليها يا انك تعيشي عند اهلك بحياة هني حاطين قواعدها ولازم تحترميها وتعيشيها وانتي مرتاحة من دون ما تتأثري من امك او اختك لانو رح يصير بعد اختلاف في طريقة الحياة
او تصبري شوي لتشوفي زوجك رح يغير من حالو وقت الغضب ورح يتعلم درس او لا وعلى اساسها بتقرري
او بتقرري الانفصال واكيد مش نهاية الكون بس اكيد مرحلة مختلفة عن مرحلة الزواج وبنتك بما انها نقطة ضعفك لازم تدرسي فكرة انو ممكن كلام والدك يكون صحيح وياخدها بعد السبع سنوات
بهيك اذا ما قدرتي على هالاحتمال فيكي تغيري من كنافة لمصلحة كنافة فقط انك تبقي ملكة بيتك والاآمرة والناهية فيه وتروحي طلعات وسفريات وطلباتك تتنفذ بس وقت غضب زوجك تصيري لوح ثلج امام كل كلماتو وكلام الناس اخر همك
فخدي وقتك اختي وادرسي موضوع الانفصال ونتائجه وقرار البقاء ونتائجه وخدي وقت طويل بالتفكير وشوفي اي حياة بتناسبك اكتر من الان الى المستقبل وخدي قرار مقتنعة فيه من داخلك وما بيتأثر لا باهل ولا باي موقف ولا اي شي
اسأل الله ان يلهمك الصواب ويجعل هذه الايام مباركة عليكي وعلى عائلتك
احترامي
10-07-2014, 03:53 PM
ضوابط المشاركة
العرض العادي
