خلاص قفلنا السالفة وعديتها وشرطت عليه بعد مايجي يسفرني دبي وحدي اسبوع قلي ان شاءالله بس حسيته يبغى ينهي الموضوع

وحاسه بنتمشكل مره ثانيه بسسب السفر

اختي انصحك اعطي زوجك شوية حرية بالسفر لانك قد ما ضيقتي قد ما بينفر اكثر وتكبر براسه


انا ما بفهم الوحدة لما تحبس زوجها باي طريقة هل تكون سعيدة؟ طيب هو امامك لانه مجبور اما في الحقيقة فهو يتمنى يفتك ويروح يفلها مع اصحابه شو فايدة قعدته امامي اذا مو من قلبه؟ ؟ ويمكن كل ما مريت امامه يتحسب من داخله علي ما ارضاها لنفسي

لازم نفهم ان نحن النساء مجبولين على تحمل الاطفال وتعبهم عكس الرجال، طيب انتي بكل الاحوال متحملة الاولاد بس هو عنده امكانية يطلع من غيرهم ويستانس مع اصدقاءه ليش احرمه؟

وبصراحة السفر مع الاولاد تعب والله ومملة للرجل حتى لو ما اشتكى يعني اصرف فلوس عشان اقعد مع الصغار بالحديقة او الملاهي؟ ؟ سفرة الاصحاب غييييير

انا واخي قررنا الصيف الماضي نسافر مع بعض وكنا بنتفق على البلدان الي حابين نشوفها بالاخير لقيت اي بلد بروح له ما بستفاد شي لان الصغار لا يهمهم المشي لاستكشاف المدينة ولا بيخلوني ادخل مقهى ارتاح او اشوف متحف او اي شي اصلا ولا راح احس معاهم بمتعة السفر فما بالك أخي، يعني مصاريف واجازة من العمل عشان يقعد بالبحر او الملاهي اذا انا مكتوب علي هالشي ليش اجر اخي كمان لهالسفرة المملة؟ بالاخير حجزت عند اخي الاخر بالإمارات وهو راح مع اصحابه عملوا جولة في بلدان مختلفة..

وهذا النظام كنت اتبعه مع ابو عيالي عندنا بالاجازة الصيفية نسافر مع بعض لكن باقي السنة يسافر بكيفه وبما اني ما اضغط عليه فهو اصلا كل ليلة كان يتصل علي وماينام اذا ماحكينا واكيييد لو كنت بسويله دراما كان بيفرح بالفكة ويكبر في نفسه شعور الراحة مني وحتى الاتصال بيستثقله..


زوجك مسافر مسافر، حبيتي او كرهتي، فلا تحطي نفسك بمواقف.. خليه يروح ويكون شاكر لك ويحس بتانيب الضمير ويرجع يعوضك بدال مايحس بالراحة بعد الهروب

__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم

يعني ما انهيتي الموضوع
هو اللي كبر راسه واشترى راحته
وهذاك قلتيها بنفسك
بتتمشكلوا مره ثانيه!


اختي انتي حابه تسافري صح؟
ليه تحسسيه ان سفره معك عقاب
وانه شرط جزائي زي الغرامه
يعني مبسوطه اذا سافر معك مغصوب؟

وبعدين هو سافر مع اصحابه
مو مع زوجته الثانيه !
ليه تحطي رأسك براسهم
انتي كذا تقللي قدرك كزوجه
حطي ببالي دائما انت شي مختلف
وانو متعته معك ماتعادلها متعه
مو انك عبء عليه!


احنا نتفق ان السفر من حقك
ولك اولويه فيه
بس زوجك عاجنك وخابزك
عشان كذا اناني معك
راجعي نفسك يا نرجسيه
الامور ما تؤخذ كذا
غيري قناعتك وبتسعدي بحياتك

عفية عليك انتي مرأة عاقلة وهوا رجل متزن
وتستاهلين السفرة

__________________
سبحان الله وبحمده سبحان الله العظيم

انا عارفه انه مسافر ولا فكرت اقله يبطل منها ولا انا رافضه السفره شاكه زوجي زوجي مو صغير ولا راعي خرابيط
بس حتى ماقلي انا بسافر وفشهر كذا ابشري نحجز ونسافر وحدنا انا كمان ودي اسافر وانبسط بدون رجة الصغار وهذا اللي خايفه يرفضه بعد كذا وقلت له حتى بنتي ما باخذها حتى مايتحسس من الموضوع

الشغل الدائم والموضوع المتكرر بحياة كل متزوجة
والله شوفي انا اعاني منه اكثر منك تعبت من سفرياته
انتبهي انتبهي تعطينه الضوء الاخضر وانتبهي تقفلين بوجهه وتزعلين وتسببين هوليله
بيني له انك منزعجه ومارضيتي ولاحبيتي الفكرة باي اسلوب من الاساليب
ودايم الرجال يجي بالاقناع والكلمة الحلوة
وانا عادي خليه يسافر لكن اقلها يسفركم قبل , لايسافر وينبسط لحاله وهو حارمكم من السفر , مدري نقطه تنرفز ...
عموما موضوع يطول , ومو زين ابدا يسافر وانتو متطاقين انتبهي مب زين خصوصا اذا كان بيروح بلد كل شي مفتوح له
رتبي شنطته وجهزي له اللي يبي وسلمي عليه واستودعيه الله
لكن لا تتلهفين عليه ولا تطيحين بحضنه وتنهبلين انه بيسافر
وبعدين اذا راح انشششششغغغغغللللللللي
روحي لاهلك حطي لك برنامج سوي اللي بخاطرك تسوينها
نامي زي ماتبين اطلعي مع صاحباتك مع اهلك روحي سبا سوي مساج حمام مغربي غيري من نفسك العبي بعمرك ودلعيها , مره مره مره مره انشغلي عنه
وادري انه غصب بتفكرين لكن اول ماتطقك الهواججيس تحركي من مكانك والهي
انا كان قااااااهرني راح تخيلي ماسمعت صوته ابد , بالرغم انه كان مسافر وعادي بدون زعل او شي
ولمحت له مره مرتين لدرجة قلت له بوجهه وينك وليه ماسمعنا صوتك ..ألخ
تخيلي وش قال!! قال خلينا نشتاق لبعض مابي اعيش بروتين
وللاسف كمل سفرته بدون أي تواصل مجرد رسايل بسيطه انه بخير ويسال عننا وفقط
ماتتصورين الجرح اللي بقلبي أي اشتياق واي خرابيط هذا اهمااااااااال
نقدر نشتاق وانا اسمعك ولاطلبت انه يكلمني طول الوقت دقيقتين تكفيني
ومن خاطري والله من خاطري عففففففت اول كنت انتظر منه الرساله والصورة
عقب ماشفت سحبته مره مره مره عفت وطاب خاطري وسفهته ومعد سالت
وحتى لما كان يسال كنت ارد عااادي ويوم طول الامر تخيلتي انه هو اللي ارتاع
واستغرب من تصرفاتي , وجاني يركض .. وحتى لما رجع ماكنت متحمسه اشوفه ابد
لكن الحمدلله على كل حال وعدت وخذتها درس صراحة
مره مره انشغلي ووسعي صدرك واعتبريها بريك
والرجال بشكل عام طبعهم كذا ..
اهم شي ماتكثر سفراته اكثر من مره او مرتين بالسنه كثير مره
والبلد اللي بيروح له بعد مررررره مهم ومع مين
لكن فكرة السفر نفسها عادي ووسعي صدرك وانبسطي
ولا توسوسين بشي لو يبي يسوي أي شي سواه قدامك ومعك وببلدك
مارح ينحاش عشان يسويه ,
الله يسخركم لبعض ويهدي بالك وسرك ويرضي خاطرك وقلبك