غالبا كدا يا فتوشي وهتلاقي النهاية واحدة من كله ........... تقولك عملت وعملت وفي النهاية .....!!!

بوصي انا قريت كتير والمشكلة بتاعتك دي عدت عليا بحذافيرها قبل كدا......... يعني نمطية المشكلة بحذفيرها بتتكرر دايما

البنت اليتيمه

سياسة تعامل سي السيد والتضحية بالظبط بالظبط

حتى الجواز المبكر ...

كان متشابه

بس الفرق ان جوزك مزواج وبقيت الرجالة بتكون واحدة تانية وخلاص .. بس الظلم ماحكلكيش عليه في فرق بين ان الراجل يتجوز وانه يكون ظالم بجميع المستويات بجوازه.. وكان جواب الست لما قولتلها ليه كدا برده انها اتعودت على النوع ده من العطاء وان دي طبيعتها وانها مش بتحس بنفسها الا بالطريقة دي ؟؟!! معقول الكلام ده !!

لو ابنك كنتي بتديله فيتامين كل يوم كنوع من العطاء والاهتمام ... وبعدين الدكتور قالك ان ابنك كليته او كبده ابتدي يبوظ بسبب الفيتامين ده وانك لازم توقفي كل ده وماتعمليش معاه غير انك تأكليه وتشربيه بتوازن وبس !!!

هتوافقي الدكتور وكلك صدر مرحب وحب.. ولا هتقوليله سوري بس انا كدا هو ده اخلاقي وأصلي وطريقة اهتمامي بإبني ولازم اعمل كدا !!! ماينفعش طبعا ....

ومن ملاحظتي ان الراجل حتى في المنتدى هنا زي مابتقولي

هتلاقي ان اغلبية الرجالة اللي بتشتكي هنا من الست الانانية .. بيجروا وراها وبيتمنوا رضاها .. رغم ان افعال الستات زاد عن الحد ... وتلاقي الست مدفعاهم فلوس واللي وراهم واللي قدامهم ومديون وخايف يرفض طلباتها

وهتلاقيهم على قلب ازواجهم زي العسل ... وبيجروا وراهم ويراضوهم الا في حالات نادرة من جنون العظمة اللي بيحصل للستات دي بياخدوا فوق دماغهم بالطلاق طبعا ... و ده في الشديد القوي وبعد محاولات مستميته من الراجل لاصلاحها

ب معظم الرجالة كدا ... ماشيين بمبدأ الفريسة والصياد ...هي دي الغريزة اللي جواه ... بيموت في الصيد ربنا خالقه كدا وبيتبتر على السهل اللي في ايده...

ماشي بمدأ الانسان المتواضع اللي يتمنى الاميرة المبهرة ... يجري وراها لحد ماينول رضاها واول ما الاميرة تبتدي تضحي وتتنازل عن كل اموالها وبريقها في سبيله يدور عن واحدة تانية ..

بوصي في حاجة في جوزك كمان بيعرف يستميل الجماهير ناحيته ولازم دايما تسبقيه بخطوة

ولازم يبقى عندك قوة ... وكمان تعرفي تديري حياتك بطريقتك

هتفضلي لحد امه تحت امره ... مبقاش جوزك باه مجرد راجل غريب بيعمل اللي هو عاوزه فيكي بدون وجه حق !!

دوري على طريقة مهما كانت قاسية تعرفي تقفي على رجلك تاني بيها ومش هتكوني اقسى من اللي عدى في حياتك

على فكرة اول ماهتبتدي تلاقي اعذار اعرفي بجد انك مش هتوصلي لحاجة ...

وبجد هي حياتك وممكن تكوني مستريحة في الدور ده رغم ان واجعك بس هو ده اللي تعرفيه وقلقانه من القوة والتضحية والتنازلات هي طريقك .. واحنا اللي بنختار ادوارنا في الحياة عموما ...

بوصي انا بجد مستمتعة اني باخد وبدي معاكي ... انا مقدراكي جدا جدا... وعشان كدا موجوعالك

ابتسامة طفله انا بجد ممكن انتحر لو افتكرتى للحظه انى بفكر فيه او بحبه او عاوزه ارجع له
يالهووووووووووووووووووووووووووى دى تبقى مصيبه لو انتى فاهمه ده

بصى حبيبتى حبيبتنا حلوايه كفت ووفت انا فعلا اديت بزياده

وانا كنت بعامل ربنا .........القابض على دينه كالقابض على جمره من النار

انا مش هعيش فى دور الداعيه ولا الورعه
بس انا عندى حاجات ونعم ربنا اداها لى منها العطاء

انا شايفه روحى حته دهب
كل انسان فى نفسه ملك

ابوكى وامك وابويا وامى وكل الناس اللى كانت راضيه بقسمه ربنا لا اصطادوا ولا حبوا الفرايس
كل كاتب يطلع يقولك الراجل بيحب الصعوبه والقنص وما اعرف ايه خربوا عقول الرجاله يا شيخه والله العظيم والواحد منهم لقى لنفسه الف مبرر واحنا الستات غلابه والله عاملين زى القرود فى السيرك والمهزله دى
البسى له واقلعى له وابعدى وقربى واطلبى واهدى وامنعى وهببى
يا شيخه بلا وجع قلب
الرجاله صدقت روحها واتجننوا بقوا حاسين ان كتر خيرهم انهم بيرضوا بينا .......غلابه مش كده؟
وكل واحد عايش فى الدور انه ملك زمانه وفلانتينو اللى يقولك نكديه واللى يقولك مش نضيفه وكل واحد يطلع القطط الفاطسه فى اللى معاه
نفسى يبصوا لروحهم بجد
يا حبيبتى انا هقولك حاجه او مثل
لو واحد طول عمره بيشتغل فى منجم بيدور على حديد ولقى حته دهب بالصدفه تفتكرى هيعرف قيمتها
اكيد لاء
هيفتكرها حته حديد بايظه وممكن يحطها فى الفرن يبهدلها على انها حديده
هل ده هيغير خواص الدهب
اطلاقا
عارفه يعرف قيمتها امتى
لما تروح منه وتتقدر بره والتقدير مش لازم راجل تانى يقدرنى لا
كفايه اوى انى لامه الاربع عيال حوالى وهو الضيف كفايه انه لحد دلوقت ما قال لاهله انه اتجوز الرابعه
كفايه ان انا اللى هو شايفنى ضعيفه ومستباحه رغم القرف مش عاوزه ارجع له
اظن ده احسن عقاب ربانى من عند ربنا سبحانه وتعالى
جحود النعمه اخرته زوال للابد
ايه رايك فى فلسفتى
مقنعه صح
اوعى تقولى غير كده .......هاه