هلا اطياف والله يعطيكِ العافية

اللي لونته بالاحمر شدني كثير

اللي اعرفه عنكِ يااطياف ان دراستكِ كانت بمدارس تحفيظ القرآن يعني نشأتك من الصغر دينية

وهذا نفس وضعنا بالبيت اخواني واخواتي وحتى ازواج اخواتي ماازكيهم على الله لكن احسبهم والله

حسيبهم من اهل الصلاح وحتى بمجال عملي مركزي يتبع للدعوة والارشاد , فبيئة البيت والعمل كلها

محافظة وهذا اللي بعد الله يثبتني ويزيدني خير .

وانا نفسياً ماارتاح لغير المتدين بس هالفترة الأخيرة صرت اقول اهم شي الصلاة والاخلاق ومايدخن والفضائيات ممنوعة بس

مع اني اتمنى افضل لكن ماقدامي خيارت احسن , سبحان الله اخواتي كلهم اول متقدم كان متوفر فيه

الصفات الطيبة واهمها كلهم طلبة علم وخلوقين , والحمدلله مرتاحات الله يسعدهم ,

وواحدة منهم تقولي الزواج يبيله صبر عشان الاختلاف في الطباع والتفكير وكذا ,

فمابالكِ تأخذين واحد مقصر يبيله جهاد وصبر كبير

مره يااطياف قرأت لكِ رد كنت تذكرين صديقة لكِ لها فضل عليكِ بعد الله في تجاوز اول سنة من الزواج لأنها كانت شوي صعبة, طيب هالصعوبات لها علاقة باختلاف مستوى التدين بينكم ؟

وهل كان حاط فضائيات بالبيت؟

وبعدين إذا حب يسمع اغنية ولا يشوف فلم انتِ وش تسوين؟

حاولتي تغيرينه في امور وقدرتي؟

طيب اطياف انتِ لما استسلمتي ووافقتي ماكنتِ مقتنعة ومرتاحة ولا ارتحتي بعد الشوفة؟

لأني انا استخير وماارتاح وموضوع الشوفة الشرعية دائماً اجله واجله الين الناس تمل وتبطل , والى الان مادخلت ولا مرة للشوفة

وبعدين هذا المتقدم , زوجة اخوة وصديقة والدتي الله يرحمها بينهم قرابة , وانا كثير ازور صديقة الوالدة الله يرحمها واحضر مناسباتهم ونفس الشي زوجة اخوه تحضر مناسباتهم

فهذا الشاب اتصل على زوجة اخوه وطلب جوال صديقة الوالدة الله يرحمها وكلمها وقعد يسألها عني اسئلة دقيقة وبصراحة تافه وقلة حياء بعد ,وصديقة الوالدة الله يرحمها من حبها لي اكيد طلعتني السما

انا مااحب الرجل اللي مره يدقق بهذا الشكل وفي امور مايصير يحادث فيها حرمه اجنبية

و انا ماتعجبني هذي الجرأة مع النساء

وبعدين انا مو خريجة شريعة , انا خريجة لغات وهذا الشي عجبه كثيييير وسأل عن شكلي ووصفوني ان كان زوجة اخوه او صديقة الوالدة الله يرحمها ودقق كثير في اوصاف الجسم بالذات

فأحس هو بس هذا اللي عاجبه فيني ويمكن هو في باله انه يقدر يغيرني بعد الزواج واترك ماأنا عليه

واقول يمكن هو عجبته اوصاف البنات اللي كانوا معه بالدراسة فيبي وحدة تتكلم لغتهم... احس اني قمت اوسوس



واخر مناسبة في بيت صديقة الوالدة الله يرحمها كل اهله جايين مع زوجة اخوه وهم مايقربون لصديقة الوالدة الله يرحمها واول مره يدخلون بيتها لأنهم عارفين اني معزومة

يعني وش دخل الخالات والعمات وحريم اخوانه في الموضوع وهو مابعد صار شي رسمي

وهم ناس مبسوطين وحنا على قد حالنا وبسيطين

وبعدين من ناحية خلقه ودينه ماعرفنا شي يبرد القلب لأن حياته كانت بالخارج وماله غير اربع شهور بالسعودية

ولو قلت له ماابي دش واغاني ووافق , هو رجل ويقدر يدخلها بعدين وماراح اقدر امنعه

واخاف اتعب معه لأني انا اصبر في اشياء كثير بس من ناحية الدين فتاخذني الغيرة والحمية وانا حارة

اذكر مرة وانا طالبة كان عندنا درس عن هوليوود وانواع الموسيقى الجاز والروك وماادري وش بعد لأن منهجنا من الخارج وفيها كثير مخالفات فكنت طول المحاضرة اتناقش مع الاستاذة والبنات لدرجة وجهي صار احمر وحسيت خلاص ببكي ماقدرت اتحمل كلامهم عن حثالة واسكت

المشكلة الوضع والظروف الحالية تخليني افكر اتزوج وخلاص حتى لو مااقتنعت بالمتقدم

لأن اكبر اخواني كل مره يأجل موضوع زواجه وانا عارفه انه انا من بين الأسباب

صعب بنت الناس ترضى تعيش معي انا وهي ببيت واحد والبيت كله شقة وصعب تنقسم

هي عروس ومن حقها تفرح بنفسها وببيتها وتلبس لزوجها فوجودي صعب بالبيت

واقول بنفسي يعني هم كل البنات تزوجوا بقناعة بعضهم اهلهم اجبروهم وتزوجوا وعاشوا ما ماتوا

ادري يااطياف قرقرت على راسكِ ودوختكِ بس شسوي , اخواتي بطلت اقولهم اي شي جديد معي عشان لا يشيلون همي و يكفيهم هم ازواجهم وعيالهم

فأعذريني والله لايحرمكِ اجري ولا تنسيني من الدعاء