ذكرتيني بنفسي الله المستعان
حبيبتي لا تعطينه وجه زيادة عن اللزوم ولا تبيني غيرتك انا تراني زيك واكثر لكن الوضع مامشى مع زوجي كذا
ادخلي على موضوعي دعوة للنقاش وشوفي نصايح الاخت نور الايمان لي ولو حبيتي انسخ لك كلامها ابشري
الشى الثاني لازم تثقين بنفسك ولا تضعفين ابد مهما قالك مهما صار هو يبغى ينزل من معنوياتك لا تعطينه لذة التمتع بها
طنشيه على الاخر وتكلمي معه بهدوء ماتشوفين ان هدوئه رفع ضغط؟ اجل سوي زيه واحرقيه صدقيني راح يتغير ولا تجلسي تقولي له يتمناني احسن منك بل عبري عنها بدون كلام وخليك دائما غامضة ولا تبكين ولا تضعفين ابد مهما حاول يستفزك واذا عطاك مصروف خذيه وفي نفس الوقت لا تطالبيه بالزيادة
انا طبقت شغلة بسيطة من قالته لي الاخت نور وصار زي الجنون لاني طنشته يوم واحد فما بالك لو طولت التطنيش
مثل ماقلت لك حبيبتي اهم شى حافظي على هدوئك ولا تضعفي ابدااااااااااااااا
الله يجعلك قرة عين له ويرزقك منه الخلف الصالح

اقتباس:

ذكرتيني بنفسي الله المستعان حبيبتي لا تعطينه وجه زيادة عن اللزوم ولا تبيني غيرتك انا تراني زيك واكثر لكن الوضع مامشى مع زوجي كذا

وهذا اللي قاعدهـ افكر اسويه ب الضبط .. لأن جربت وياه هَـ الشي مره

اهوهـ متعود مني اذا راح الشغل اتصل فيه اسأل عنه ووو إلخ

وجربت يوم قلت باطنشه باشوف شيصير ... وظل اهوهـ يتصل سويت روحي مشغولة قلت له

عندي خط ثاني بعدين احاجيك سكررره وظليت 3 ساعات مادقيت عليه واهوهـ كل شوي ظل يتصل !

غريب امرهم هَـ الريايل !

اقتباس:

ادخلي على موضوعي دعوة للنقاش وشوفي نصايح الاخت نور الايمان لي ولو حبيتي انسخ لك كلامها ابشري

يعل عيني ماتبجيج ... اتصفحته البارحة تصفح سريع وان شاء الله بعد شوي بادش بقراه بالتفصيل

اقتباس:

الشى الثاني لازم تثقين بنفسك ولا تضعفين ابد مهما قالك مهما صار هو يبغى ينزل من معنوياتك لا تعطينه لذة التمتع بها طنشيه على الاخر وتكلمي معه بهدوء ماتشوفين ان هدوئه رفع ضغط؟ اجل سوي زيه واحرقيه صدقيني راح يتغير ولا تجلسي تقولي له يتمناني احسن منك بل عبري عنها بدون كلام وخليك دائما غامضة ولا تبكين ولا تضعفين ابد مهما حاول يستفزك

ذكرتيني ب كلام ابوي ... ليلة اللي يا ريلي اهوهـ واهله يشوفوني .. قال لي ابوي

" احنا الريايل هَـ الطينه من هَـ العجينه كلنا نفس الشي ، نحب البنت اللي احنا نركض وراها

اللي تعطينا الكلمة الحلووووة بعدددددد تعب منا يعني ب إختصار البنت الصعبه ..

ف لا تضعفين له وانسي سالفة الدموووع مو على كل شي تبجييييييييين "

وشكله صج هَـ الكلام !!

المشكلة ما اعرف شلون ؟

شلون اكون هادددئه ؟ شلون ما اوريه غيرتي ؟

صعبببب !

اقتباس:

واذا عطاك مصروف خذيه وفي نفس الوقت لا تطالبيه بالزيادة

إن شاء الله =)

اقتباس:

انا طبقت شغلة بسيطة من قالته لي الاخت نور وصار زي الجنون لاني طنشته يوم واحد فما بالك لو طولت التطنيش مثل ماقلت لك حبيبتي اهم شى حافظي على هدوئك ولا تضعفي ابدااااااااااااااا

ألحين باروح اشوف نصايح نوور .. وباطبقها ب الحرف الوااااااااااااااااااحد

اقتباس:

الله يجعلك قرة عين له ويرزقك منه الخلف الصالح

تسلمين فديتج ... وعسى الله يهنيج ويسعدج

ياحبيبتي الزوج يبيك اخطبوط ورجل آلي وطباخة وممرضة ورجل في المهمات
ويبيك بنفس الوقت نعومة ودلوعة وماتعرف شي

خذيها نصيحة من اخت مجربة
لا تفقدين ثقتك بنفسك من انتقاده لأن هو يبيك أحسن زوجة في كل شي
يبيك دلوعة عنده وشقردية عند اهله

أنا زوجي يقول عني كسولة ولا عندي امومة ولا اعرف اطبخ

وبإذني اسمعه يقول لاخواته حتى يوم تجي من المدرسة ماتنام تسويلي مساج
ويقولهم على اهتمامي بولدي واسلوبي مثالي في التعامل مع الاطفال

أنا كنت زيك حساسة وازعل من انتقاده لأنه يحطمني وبعد ماسمعته صرت ارد عليه واقول انت اللي تنتقدني وانت اللي تشجعني ويكفيني شهادتك عني عند اهلك

وبالنسبة لسبيس تون خذي راحتك انا لي سنين متابعة تيمون وبمبه والمحقق كونان
خالتي عمرها فوق السبعين وتسألني عن بشار لقي امه ولا لا هههههههه

اقتباس:

المشاركة الأصلية كتبت بواسطة رواء الإيمان ياحبيبتي الزوج يبيك اخطبوط ورجل آلي وطباخة وممرضة ورجل في المهمات ويبيك بنفس الوقت نعومة ودلوعة وماتعرف شي خذيها نصيحة من اخت مجربة لا تفقدين ثقتك بنفسك من انتقاده لأن هو يبيك أحسن زوجة في كل شي يبيك دلوعة عنده وشقردية عند اهله أنا زوجي يقول عني كسولة ولا عندي امومة ولا اعرف اطبخ وبإذني اسمعه يقول لاخواته حتى يوم تجي من المدرسة ماتنام تسويلي مساج ويقولهم على اهتمامي بولدي واسلوبي مثالي في التعامل مع الاطفال أنا كنت زيك حساسة وازعل من انتقاده لأنه يحطمني وبعد ماسمعته صرت ارد عليه واقول انت اللي تنتقدني وانت اللي تشجعني ويكفيني شهادتك عني عند اهلك وبالنسبة لسبيس تون خذي راحتك انا لي سنين متابعة تيمون وبمبه والمحقق كونان خالتي عمرها فوق السبعين وتسألني عن بشار لقي امه ولا لا هههههههه

ما اعترض على خلقة ربي ... بس احياناً اتمنى اكون ريااال !

الله يهنيج حبيبتي في ريلج ويسعدج .. ويخليلج ولدج

=) باحاول اخذ الامور ب بساطه !

على فكرة

فيه أشياء ينتقده الرجل
وهي تعجبه

فأنت بذكائك فرقي
بين النقد مع الرفض والنقد مع الاعجاب

اقتباس:

المشاركة الأصلية كتبت بواسطة نبض الدان على فكرة فيه أشياء ينتقده الرجل وهي تعجبه فأنت بذكائك فرقي بين النقد مع الرفض والنقد مع الاعجاب

-) ما اقدر افرق بين اي شي ملخبطه !

مشكورة فديتج

|

قبل شوي حاوولت ان اسوي كنترول على روحي .. واحسس ب هدوئي

عشان اثير فضوله ويحاول يكلمني ..

ومن يسأل ارد عليه ب كلمه ولو اقدر اسوي الكلمة بس حرف واحد جان ما قصرت ..

بس في النهاية خرررربتها ..

لأن قال بيطلع بيروح الديوانية لأن الليلة ربعه هناك كلهم

فقدت سيطرته وقلت له هالحجي

" انت توك ياي من الشغل وقابلت اللاب توب لين شبعت وألحين ياي اتقول انك بتروح حق ربعك ؟

بدال ما تقعد معاي ؟ "

وقفلت باب الشقة عنه .. وظل يقول لي بتصل لأهلج

قلت له عاادي مش مهمممممم

قال لي ترى والله بتشوفين شي ماشفتيه

قلت له : اشتبي اتوريني ؟

بتطقني بتضربني ؟

بتطلقني ؟

بتذبحني ؟

بتزعل مني ؟

كل هالاشياء ما همتني

قال لي ماباطقج ولا باطلقج ولا كل هالاشياء خليني امشي < كان يتكلم ب هدوووء يستفزني !

قلت له : لا آآنه ابيك ترفع يدك وتطقني طقنننننننني

قال لي : ما اكون ريال اذا مديت يدي عليج

قلت له : آآنه ابيك تطقنيييييييييييي ورفعت يده قلت له طقني او طلقني او اشكيني لأهلي اذا تبي "

=) اموري متلخبطه .... ماقدرت اثبت على هدوئي للآخر تعبت !!

إلهي كيف أدعوك وأنا أنا .. وكيف أقطع رجائي وأنت أنت .. إلهي إذا لم أسألك فتعطيني فمن ذا الذي أسأله فيعطيني ..

إلهي إذا لم أدعوك فتستجيب لي فمن ذا الذي أدعوه فيستجب لي .. إلهي إذا لم أتضرع إليك فترحمني فمن ذا الذي أتضرع إليه فيرحمني ..

إلهي فكما فلقت البحر لموسى عليه السلام .. أسألك أن تصلي على محمد وعلى آله وأن تنجني مما أنا فيه وتفرج عني فرجاً عاجلاً غير آجل .. بفضلك ورحمتك يا أرحم الراحمين


|

ضيقتي ما يعلم فيها إلا ربي

الله يهديك

انتي مستفزه وهو العاقل ؟؟

مهما كان فاانتي خربتي كل شيء بسب مشكلتك الاخيره !!
وهو ذهابه للديؤانيه ......

اقتباس:

المشاركة الأصلية كتبت بواسطة همس 2009 الله يهديك انتي مستفزه وهو العاقل ؟؟ مهما كان فاانتي خربتي كل شيء بسب مشكلتك الاخيره !! وهو ذهابه للديؤانيه ......

ادري ... والله ادري

حتى عصبيتي زادت عن قبل !!

من كثرة الضغط والمشاكل ... صرت عدوووانية وهَـ الشي امسبب لي ارق !

قبل كنت اعصب واصارخ اي ..

ألحين اي شي في يدي اقطه على الأرض

ل درجة إن البارحة لما طلع للديوانية قطيت تيلفوني على الطوووف وتفكك !

حتى سويت عمري بابوسه وآنه قربت من خدده وقرصته فيييييييييه بكل قوة

وخذيت ايده وضغطت عليهااا

ابي افرغ شحنات الغضب اللي فيني

حتى قمت طقيت روحي ب علبة الكلينكس !!

اعصابي جداً مشدودة وصرت اخاف على روحي من هَـ الشي من عدوانيتي وعصبيتي

اللي بدال ماتنقص صار اضعاف !!!!!!

عسى الله يصبرني !!

السلام عليكم ورحمة الله وبركاته

فديتك يا زينب .. قطعتِ قلبي بكلامك .. أنا أتذكر يوم أول ماسجلتِ وقصيتي قصتك مع زوجك ..

وإنكم تزوجتوا عن حب وقريت مواضيعك مع أهل زوجك ومع غيرتك وغيره وغيره

شوفي يالغالية .. أنا أحس إنك رح تكونين له مثل مايبي ومثل ماتبين .. إشلون ؟

إنتِ مجرد مارح تخلين هالشي هدفك .. اللي إهوا الأشياء اللي تعجب زوجك .. رح ترتاحيــــــن وايد لما تتحقق فيك وتقدرين تنفذينها له وبتحقق رغبتك ورغبته

سالفة الغيرة كل ما أقرا كلامك وشعورك أحس ودي أصيح .. لأني أعاني نفس الغيرة وبنفس القوة ..

بس أنا طبعي كتوم .. أحرق نفسي من داخل .. ماحب أظهر غيرتي أحس إني بنكسر قدامه لأني بصير كأني مو واثقة بعمري !!

فـ إنتِ خلي هالشي بعد عندك إذا تقدرين .. كل ماحسيتي في هالشعور إقتليه بداخلك

وقولي لنفسك أنا واثقة بنفسي وكل شي عندي .. ليش أخاف يروح عني وأنا مسعدته !

ولو حسيتي إن قلبك خاف شوي من آخر جمله وحس إنها مو صحيحة وهي " أنا مسعدته " معناها هذي هي النقطة اللي تشتغلين عليها

شوفي أنتِ شنو فيك مو عاجبه .. أو شنو فيك اللي مو مريحه أو متحاجه منك وماتوفر فيك .. وتدربي عليه تدريجياً لين ماتتقنينه وتتطبعين عليه غصب .. حتى يطمئن قلبك إنك أسعدتيه وحققتي مراده

مثل الطبـاخ ..

إبتدي بداية صح .. وحطي هالهدف قدامك وخليــه شغلك الشاغل

وتخيلي شنو الإيجابيات اللي بشوفها من رجلي لو صرت طباخة أطبخ الوجبات بفن وإبداع ؟

وفكري فيها وتخيليها وشوفي نبض قلبك حزتها .. رح تحسين بفررح وودك اليوم تتحقق عشان يرتاح قلبك

هالشي بيعطيك قوة وإندفاع عشان تحققين له سعادته = سعادتك يالغالية

هذي أول نقطة

ثانيـها .. الغيرة ..عطي نفسك مجال ثقة فيه أكثر

ومن تشوفينه يتكلم مع بنات بمنتدى أو موقع .. قولي حق عمرك هالبنات مثل خواته ..

الرجال مايقصد شي ..

أعوذ بالله منك يا أبليس ..

أنا حلاله وأعطيه كل حبي وإهتمامي وحناني وإهوا مايستغني عني ..

يعني بالمختصر عطي نفسك كلمات ترضي الغيور بداخلك .. وتحسسه بالأمان من حبيبه ..

وصدقيني يا زينب .. إنتِ أول خطوة ناجحة لك في هالمشوار هي إنك حاسة بالمشكلة وبكبرها وبعظمتها وجاية تدورين حلول

لا تخلين أبد السالفة تصغر عندك .. لأن رجلك هذا حبيبك وهذا اللي يستاهل التضحية ويستاهل التعب

خلاص .. إبتدي صفحة جديدة .. وصيري تلميذة تدرسين مادة " زوجك " .. تعلميه وإحفظيه وذاكريه دايم

وحلي الواجب .. ولا تتأخرين بالتسليم .. لأنه ممكن تخسرين درجات .. ويقول عنك مهملة .. وترسبين في الإختبار

لا توصلين لهالمرحلة من اليأس يا زينب ..

وحطي النقاط المهمة قدامك ..

مثل الطبخ => تعلميه حبة حبة .. وإبتدي في الأصناف اللي يحبها

صديقيني مو شي صعب أبد أبد أبد أبد .. خصوصاً طبخ العيش .. نقعيه => غسليه => حطي قدر نصه ماي مع ملح وزيت وإنتظري ليما يغلي الماي وحطي العيش وخليه 10 دقايق وبعدين صفيه بالمصفاية
..
وعاد إنتِ بعدين رح تبدعييـــن شنو تسوين بجانب العيش .. حمسة لحم بالصلصة ووووإلخ .. ربيان مع بصل وأعشاب وصلصة .. دجاج مقلي مع بطاطس وجزر وكوسة .. وغيــره يعني لا تخافين الشغلة سهلة يازينب

وفيها أشياء متكررة وايد .. مثل حماس البصل والثوم والفليفة والطماط .. سوا العيش .. سوا الإيدام ..

يعني بتحسين بتعب بسيط بين الطبخة وغيرها مارح يصعب عليك تتعلمين أي طبخة

والكبسة أو المجبوس أسهل عليك وأغلب الأكلات الخليجية ترى إعتمادها على العيش عشان كذا زوجك مهتم فيه لأنه أهم شي في أكلنا

لا تيأسين زينب أبدددددد.. أنا أقولك رح تتعلمين هالأشياء بسهولة لأنك رايدة تسعدين زوجك ..

الله يوفقك يارب ويسعدك قولي آمين إنتِ وبو الشباب