السلام عليكم و رحمة الله و بركاته

أمي الثانيه هي أم زوجي الله يخليها لنا إن شاء الله،، جدأ طيبه،، أحبها و تحبني،،
و تعزني و تستشيرني ديما في شؤون العيله قبل ما تستشير ابنها اللي هو زوجي
اناديها أمي و حتى عيالي ينادوها ماما تيتا. و الحمدلله علاقتنا حلوه

أدري الحين بتقلوة طيب حلو وين المشكله،،

مدة زواجي قريبه من 6 سنوات،، و طول الفتره هذي أبداً ما إتصلت علي
يعني المناسبات، رمضان و عيد و حج كلها أنا إللي ابادر،، أبداً ما عندي مشكله
تعدي ضروف مثل حمل و ولاده و نفاس، كمان أبداً ما إتصلت،، عادي والله ما أخذت في خاطري
نجاح و تخرج،، كمان مافي إتصال،، أنا إللي ديماً اتصل عليها،، يعني ما تمر 10 أيام إلا و أسأل عنها

كل هذا و كان عادي حتى والله ما خذت في بالي انها ما تتصل، أبداً ما حسبتها
إلا بعد الموقف إللي راح أقوله لكم

قبل فتره كنت أكلم سلفتي (زوجة أخو زوجي الكبير) و بين السوالف قالت حماتي إتصلت تسلم ( أبداً ما تناديها أمي)
قلتلها حلو ما شاء الله،، قالت ديماً تتصل تبغى تعرف اخبارنا،، حرمه فاضيه ما وراها شي
قلتلها ليش تقولي كدا بالعكس هي تشتغل و مشغوله بس تحب تطمن علينا..
قالت : بالله ولا مره إتصلت عليكي،، تحبك و تخليكي براحتك و ما تزعجك بقرقرتها
سألتها،، تتصل عليكي دائماً؟ قالت يووه كل يومين متصله .. قلتلها أكيد تحبك كثير و تبغى تطمن عليكي،، قالت إلا تبغى تتأكد إذا أنا و ابنها متزاعلين
المهم قالت كلام كثير و ذكرتني بمواقف أكدت لي فعلاً إنه أم زوجي ديماً تتصل عليها

أنا هنا اتغيرت نضرتي لسلفتي و ما عرفت أجاوبها لأنها أولاً أكبر مني ب16 سنه و احترمتها،
و ثانياً لأنها بطبعها تحب المشاكل فما حبيت أقول شي

بعد المكالمه هذه رجعت شريط ذكرياتي مع أمي (أم زوجي) و تذكرت انها ولا مرة اتصلت علي،،
والله العظيم ولا مره تصدقوا
و حزت في خاطري كثير صراحةً.. و كمان استغربت كيف عرفت سلفتي انها ما تتصل علي؟

برأيكم ايش السبب؟ الحين ما أدري ليش حاسه نفسي غبيه