سلام عليكم،
راح أكتب كل الي مضايقني بلهجتي العامية،يمكن عل و عسى أحصل ع أجوبة إن شاء الله تفيدني.
متزوجة من سنة و نص تقريباً.مشكلتي اني بين فترة وال2 اسمع من زوجي ما يلي:"مو حاس بالحنان،ناقصني حنان".
حتى لدرجة ان إذا أجوف موضوع هني كاتبنه رجال يشكو نقص الحنان مع زوجته،أشك ف نفسي.
أحس روحي عوبة،على هبلة،على جاهلة رغم أني مو صغيرة"23 سنة"على مو عارفة شلون أكسب الرجال.إذا طلعنا و أجوف زوج و زوجة مجودين أيادي بعض،تطفر عيوني من السيارة،أحسه سعيد وياها،و ما أحس زوجي سعيد وياي.و إذا كان سعيد فهو مو مرتاح من كلّ النواحي.

صحيح بحكم دراستي صرت أغيب عنه واجد،بس الحين خلاص قايلة ببدي برنامج جديد ع أساس إني تخرجت الحمد لله.صحيح صارت بنا مشادات و خلافات واجد،بس كلها تستمر بسبب عصبيته،و بسبب عنادي أعترف.ساعات إذا قعد مع نفسي أحس إني غريبة،و أن مالي أحد في هالدنيا.علاقتي مع أهله أقرب إلى الرسمية.و يمكن هذا سبب مؤثر خصوصا أنه يهتم لراحة أهله،و يحبهم.بما انه تكلمت عن طاري أهله خلني أجيب لكم سالفة زاعجتني جداً موجودة ف بيتهم.

زوجة أخوه ما تغطي كامل شعرها و تتمكيج،و اني هني خلاص أغلي،أنقهر،أغاااار،ودي أصفعها.المشكلة أن ما يرضى أتكلم عن الناس عشان محد يتكلم عني.بس أني جد أحتاج أخبره أن ترا هذي الإنسانة باطة جبدي!ساعات من كثر ما أنا مقهورة منها،يمتد القهر والغضب على زوجي.ليش؟لأن أحسها عايشة حياتها طول بعرض،و أني؟ أني أشياء واجد مو قادرة أسويها رغم أنها في حدود الشرع و المعقول.أدري هي مو زوجته و ماله حق عليها،بس لما أقعد أطالع أقول ليش الزوجات يقدرون يعيشون مثل ما يبون،و أني لا؟ بغض النظر عن خطأ الي تسويه!
انزين المهم نرجع لأساس مشكلتنا. مشكلتي مو قادرة أتحكم في علاقتي بزوجي.يعني ما أعرف شنو المفروض أسوي عشان يحبني،وما يفكر في يوم من الأيام أنه اختياره غلط.الصراحة ما ابيه يحس أنه ناقصنه حنان،و هو عنده زوجة.أدري و عارفة أن الحين بجون أعضاء بيكتبون الحنان فطرة و طبيعة في المرة.يا ناس يا عالم أني طالعة من بيت بااارد،ما فيه أحضان،ما فيه تصيح قدام جماعة،ما في كلام معسول. أحس نفسي جداً عوبة،و على طول أفكر وش تسوي النسوان حق رجالهم؟أصلاً وش يبغي الرجال؟ أحس اسئلتي المفروض يجاوبون عليها الرجال أكثر. و شكراً جزيلاً -صدعت راسكم أدري.