اخ ولهان

بعلق على ما لونته بالاحمر
اخوي في شي تسويه انت وكثير رجال
يكون صح ولكنه بكل بساطة مو الشي الي تتمناه الزوجة

يعني انت مثلا تقدر تجلس على سفرة الاكل
تحدد لزوجتك وش تاكل ؟ لا طبعا
تتركها تاكل الي هي تبيه
لما مثلا تجيب اكل من برا تساله وش تحب
وكلنا نسوي كذا ..

نفس القاعدة تنطبق على حياتكم بكل نواحيها
بمعنى انت الان قدمت كذا وكذا وكذا
ولكن الي قدمته يمكن ماهو الشي الي هي تبيه بالضبط
اقول ( يمكن ) ..

انا كزوجة مثلا ماحب ان زوجي يعطيني الاشياء
الي غيره من الرجال يعطونها لزوجاتهم ويتوقع
مني اسكت وارضى ! الي احب منه انه يعطيني
الي انا ابيه .. مو الي هو او الناس تبيه
وعشان كذا زوجي المفروض بخلال السنوات
يكون فهم شخصيتي وعرف وش احب وش ما حب
زي ما انا عرفت وش يحب وش مايحب ..
مو صح؟

انا ما اقصد ابدا الومك على شي لان تفاصيل
قصتك ما اعرفها كاملة .. لكن
بس احاول اوضح لك وش السبب الي ممكن
يكون خلاها ما تقدر اشياء جميلة انت سويتها لها ..

سؤال : هل خلال نقاشاتكم سالتها وش الي يضايقها
فيك وتتمنى منك تغيره ؟

__________________



احيانا يجب ان نفقد ذواتنا كاملة لكي نستعيدها كاملة ...

طيب اخوي ولهان لتكن هذه اخر محاولة منك
تعوذ من الشيطان واستغفر وحاول تغير من نفسيتك شوي وانسى كل شي وراك
وخذ اجازة من شغلك واطلب من الوالدة او اختك او اهل زوجتك من غير ماتعرف هي انهم يهتموا بالعيال
وفاجئها بسفرة لوحدكم اي مدينة فيها سياحة وحلوة واذا ظروفك تسمح ياليت تكون للخارج
وقبل لاتسافروا اجلس معاها وكلمها قول لها انا باعتبر نفسي اتزوجك من جديد وجيب لها هدية وقول لها بنسافر شهر عسل وسافروا وتعاتبوا وخليها تطلع كل اللي في قلبها وراضيها وانسوا كلكم كل اللي فات وافتحوا صفحة جديدة

لا تطلب التغيير لمجرد التغيير فقط لابد من المحاولات والتضحيات حتى المركب يسير والحياة تمشي

ومعليش تعال على نفسك شوي وضحي اتوقع اذا ما كان عشانها عشان عيالها يستاهلوا تضحي عشانهم

دعواتي لك من كل قلبي ان الله يسخركم لبعض ويهديكم ويصلح احوالكم امين .....

أخي الكريم
والله شكواك توجع القلب وتدمع العين
ردك الثاني آلمني لما قلت لها أنا وصلت مرحلة أتحسب عليكِ

معقول ما لقيت حل كل هالسنين
ولا حتى الزواج الثاني ؟

__________________
الحمدلله الذي بنعمته تتم الصالحات

اعتذر عن عدم الرد عليكم بردود مفصلة كلٍ على حده ... لمتابعتي لمشاكل الاعضاء و محاولة تقديم حلول لهم و أملي في ذلك انني ان لم استطع تعديل حياتي لعلي اكون سبباً في سعادة غيري ...
يا إخوان يا خوات ... لو تكون نفسيتي عال العال حتى و إن كنت راجعاً من العمل ... بمجرد ما ادخل البيت ينقلب حالي مو مني لا ... ادخل البيت صراخها و كلامها على الأولاد و تكشيرتها و منظر البؤس الذي تكون فيه هذا عدا الهيئة فلا تسريحه و لا روج او كما اقول لها دائماً ... كحل و لا حتى كحل ... و أنا لم أتضايق او أزعل دون أن أنبهها و أطلب منها ... فغدة مرات طلبت منها ان تلبس و تتعدل و تترك البؤس و تترك العبوس و التذمر ... و تضحك لأني ما عمري ضحكت معها ... مو مبالغة او تكبير للأمور هذه الحقيقة طيلة اكثر من 15 سنه ما ضحكت معي مو انها ما تضحك لا تضحك مع خواتها بالتلفون تضحك مع العيال بس بمجرد دخولي تسكت ...
في احد الردود قيل لماذا لا تسافروا ... وان استطعت للخارج ... عرضت عليها ان نسافر للخارج ... قالت وع اعوذ بالله الله لا يبلانا .. قلت ليه قالت الايدز و الامراض ... قلت كيف قالت إيه اللي يروحون برا يمكن يجيهم إيدز قلت من الهوا ... قالت من الاكل و الا ( تكرمون الحمامات ) وع وع ... قلت طيب نخلي العيال و نروح لمكة كم يوم و جده كم يوم ... قالت انت تحب نفسك !!! تمشي نفسك و ما عليك من غيرك اهم شي روحك يا شينك أنا ما احب كذا و الله وناسة عيالي اهم من وناستي ... أنا في ذهول و قلت تصدقين فعلاً أنا اناني احب نفسي قالت إيه أشوا انك قلتها من نفسك أنا يوم قلتها لك قبل كذا قمت تكلم علي و تلف و تدور تقول ما هو صحيح بس أشوا اللي اعترفت على نفسك بس الشكوى لله مدري وشلون تعدل الله يعين ... طبعاً كنت في قمة الروقان و اصبحت في قاع الإحباط و قلت تدرين نامي و على قولتك الواحد لازم يحب غيره مثل ما يحب نفسه فعلا كلامك صح و إن شاء الله بروح بعد بكره ... قالت إيه رح أنا ماني زيك احب نفسي و اهم شي أونس نفسي و الله ما استانس وهم محشورين !!! و تجي بالسلامه طبعاً أنا متأكد انها لا تعرف معنى الأنانية و لا تعرف قيمة تجديد الحياة الزوجية بسبب جهلها ...
اما الاخت اللي ردت و قالت السفره و ماني عارف ايش ... و أعطيها اللي هي تبي ... باختصار أعطيتها كل شي كل شي بلا مبالغة ... إلى درجه علبة موية اللي تجي 3 او 4 لتر ما تشيله .... طبعاً تقول المره ما يصير تشيل ...
و اللي يقولوا جيب شغالة جبت عدة شغالات بس اقتنعت انهم بالنسبة لي خسارة على الفاضي ... الكشه نفس الكشه و العبوس و النكد هو هو و اللامبالاة هي هي و لا فيه اهتمام بشي ابداً و لا تتزين و لا غاب صراخها ... ما غير نوم 24 ساعه ... و الحاجة الثانية الخوف من ذنب يلحقني منهن ... فتعطيهن تعليمات اول ما يجون ... لازم تصحى 5 الصباح بما فيه الخميس و الجمعه و العطل ... ما تنام الا و هي مخلصه كل شي و غالباً ما يخلصون شغل الا عالساعه 2 ولازم تصحى 5 يعني تنام 3 ساعات ...
قلت لها لا هذا حرام ... الشغل للساعه 11 و لو فيه اي شي تخليه و تكمله الصباح ... و تصحى 6 مو 5 لانه الأولاد ما يصحوا الا 6 وبعد ما يروحوا الاولاد للمدرسة تنام ل 9 او 10و الظهر ترتاح من 2 إلى 4 و اي وقت ما عندها شغل خليها ترتاح ... و تكون ردودها ترحم الشغالات و الناس كلها و قسوتك علي !!! المهم اقتنعت ان مالها داعي و خصوصا لا هي موظفة و لا تتعب نفسها من الاساس .... تنام لو هي صاحيه من نومة 10 ساعات ...
كنافه كذابة ... حمداً لله على سلامتك ... كل واحد جالس بظلاله ... واحد نايم و جايز له الظلال و الثاني يتحرقص و خايف يطلع من الظلال و يلقى نفسه بشمس القوايل ...
يبي له ظلال و يهفهف عليه الهواء و بشرط يكون كله ورود و كل ورده أحلى من الثانية ما يكون ظلال و السلام ... و المشكله مشكلة مجتمع فرض علينا شختك بختك ...
ما دعاني للكتابة ... هو انها من ذاك اليوم اللي قلت لكم انها نايمه بغرفة العيال ... طبعا تتكلم لا مو تتكلم ... تسأل بس و أنا اجاوبها على سؤالها و احيان اطنش ... غبية و كرهتها و العن يوم عرفتها فيه ... اللهم اجعل عقاب أعدائي زوجات مثلها ...*

وش اللي مضايقها مني ...
مثلا زي موضوع المطبخ .. أنا السبب ورا الطفح ...
مشكله حدثت عند اهلها ... أنا من تقع على رأسه تبعات هذا الشي ..
كهربا تقطع عن الحاره أنا يجب ان أتصرف ...
أنا مغرور و شايف نفسي ، و حظها طايح لشأنها تزوجتني ، و خواتي نفس الشي و لا ينفعن بأي شي و لا لأي شي لكن حظهن بأزواجهن و معطيهن الله رجال ما تشوف او تشوف و تسكت ... مع أني ما ادري وش دخل خواتي بحياتنا و الأهم ان خواتي اذا جونا كأن الوحده عروس ما شاء الله و من البهذله اللي أشوفها قلت يمكن خواتي يتزبطون لأنهم جايين لنا و اتعمد اروح لهم ببيوتهم بدون ما اقول لهم و بعدة اوقات مختلفة و الاقيهن متزبطات وهن ببيوتهن و اللي تقول عنهن سعيدات ما شافت مني 5٪ من اللي يمر عليهن وكم مره ادخل في مشاكلهم هو وازواجهم و يتبين الخطأ من ازواجهم !!!!
تخيلتي ما تقول شي محدد تبدا فيني و تاخذ لفه على خواتي و شرشحه و ندخل لموضوع ثاني اذا قلت خليهم على جنب ما لهم علاقة اهلي من قريب او بعيد حياتنا لا يدخل فيها احد و لا ندخل بحياة احد مالنا شغل ...
ما عندها شي تقوله ولكن لا تستحي من اللفلفه و رمي الكلام لمجرد الكلام وهذا الشي هو اللي يصرقع فيني .

غريبة زوجتك فعلا
أحس فيها كآآبة داخلية و ترميها عليك
* عموما كملاحظة قبل أعتقد ما تقصده الأخت ما اعطيتها ,,لا تقصد الأشياء المادية
و توفير الحاجات و رغم ذلك أتيت بمثال ,,علبة الموية!!!

,,
أذكر قليلا من مشاكلك , لكن أذا لم يكن عندك مانع أخي الكريم
أن تنشط ذاكرتنا ببعض المعلومات ,,لعلنا نفيدك
أو ضع رابط لموضوع قديم لك إذا ما فيه كلفة عليك

...
لأني أذكر من مواضيعك أن زوجتك كبيرة بالسن
كم عمرها
و كم عدد أطفالكما
و كيف عرفت أنها مريضة نفسية
هل تم تشخيص حالتها؟
,,,
الله يعينك ف 15 سنة
فتررة كافية لتعرف الزوجة كيف تجذب زوجها و كيف تحبه
و أن تحبه ,,,فهي أظنها من تذمرها
تريدك أن تحمل معها الجانب الذي (يهمها) أعني الذي يسبب لها الهم
و تظهره بشدة ظنا منها أن الحل عندك ..و ان عليك ان تجاريها بجمل
كــ..نعم انت تعانين,,كم هذا متعب,,الله يعينك..

وتترك جانب الفرح و الاشراق لغيرك من قريباتها و صاحباتها للأسف
..

برأيك,,مما تشكو,,بالضبط مالذي يزعجها,,

هل قلة وعي و عدم اطلاع عندها و أفقها حصور بالبيت و تلبية العمل بشكل روتيني
جعلها هكذا
,,
ماهي وظيفتها؟؟
و هل تقرأ كتب أو تهتم بأمور توسع الأدراك.


الله يعينك

__________________

مااني فاهمتها ابدا ابدا ايش ها القلوب اللي عند بعض النساء يارب

طيب انت سئلتها مرة اذا بتحبك وليه تتصرف شذي

ايش بيكون جوابها

احس انها شاايلة في قلبها عليك والمشكل انك كتبت انك مو مقصر معها في شي اذن ما سبب هذا التعامل والجفاء منها

في سبب غير واضح لازم تعرفوا والا روح تزوج غيرها لان هذا النوع يستاهل

سلفة السفر والايدز ضحكتني وقهرتني بنفس الوقت هذي لساتها عايشة بالعصر الحجري

اقسم بالله اقسم بالله وقفت وقفات رجولة و قدمت أشياء لا تأتي الا من شهامة لا اقول هكذا من باب تعظيم ما قدمت بل أنا انسان افهم و اعي أنه من الممكن أن يقوم الزوج بتقديم أمور لزوجته ليست من واجباته الزوجية و لا يلام ابداً على عدم عملها و لكن شهامة الانسان و رجولته هي التي تفرض عليه القيام بها و رغم انها فوق طاقتي و لكن أبيت الا ان اقوم بما قمت به و كنت استحضر ردودي على كلامها الذي ستقوله و شكرها لي بعد القيام بما قمت بتقديمه و أنني و إن قمت بهذا الشي فهي تستحق و ما قمت به لا يستحق كل هذا الكلام و الشكر ... فهي زوجتي و ام أولادي و يكفيني فخراً ان تفتخر بي ( هذا الكلام كان يدور في راسي انني لا أريدها ان تبالغ في الشكر لكي لا احس بإنكسارها و جبري لهذا الكسر ) و كنت اقول هذا الكلام و أنا في طريق عودتي حيث كان طريق سفر و عارفه انني راجع و تعلم ان ذهابي لهذا الامر رغم مشقة السفر و طول الطريق و تأخري في العودة و مخبرها بوقت وصولي و طالع من الصباح و راجع قريب الفجر و تعلم انه لا اكل و لا نوم و لا راحه يادوب خلصت الموضوع و رجعت و اقسم بالله انه بآخر الطريق كنت مو شايف ملياااان نوم و ارهاق وكل شويه أغسل وجهي بموية بارده لحد ما وصلت بتسهيل من الله ... و دايخ ابي شاي قهوة عشا ... دخلت لقيتها نايمه و لما حست أني دخلت الغرفه و لا رفعت راسها ... قالت الحمد لله على السلامه هههههههههههههه يخرب بيت الشغله و رميت نفسي عالسرير ونوم للظهر و لما صحيت ما شاء الله مهتمه الآدمية و تسألني تقهويت البارح ؟! قلت لا طيب تعشيت ؟! قلت لا ... قالت وليه ما تعشيت و أخذت لك قهوة والا شاهي المطاعم بكل مكان و فلوسك معك !!!!!!!!!!!
و عادي زي كذا دائماً البارح تقهويت و الا امس تعديت يخرب بيت الاهتمام هذا اللي يرفع الضغط

أخي الكريم
لا نستطيع معرفة مشكلتها ,و أنت لا تجيب ,,بل تستحضر
مواقف و مواقف ,,
هي غلطانة فيها ,,,
علينا أن نعرف دواخل نفسيتها ,,لما تتصرف هكذا
ماهي الأدوات التي تنقصها ,للحوار ,,للتطور في علاقتكما ,,لفهمك

__________________

ههههههههههههه

يا اخي هي على بالها انها مهتمة فيك ذلك ما تعرفه وذلك ما تقدر عليه

انت حااول تفهمها وتعلمها خبرها انك محتاج منها كذا وكذا,,,