اطلق ام لا ؟ - الصفحة 3 - منتدى عالم الأسرة والمجتمع

24-07-2013, 08:57 AM

So Unhappy

عضو جديد

تاريخ التسجيل: Jul 2013

المشاركات: 9

اطلق ام لا ؟

بسم الله الرحمن الرحيم

مساء / صباح الخير لكم جميعا ...

أنا قصتي مع الزواج اعتبرها مأساوية ... كل ماارجع بالذاكرة خمس سنوات للوراء ... اسأل نفسي هذا السؤال
وش كنت احس فيه ... عشان احطكم بالصورة الكاملة خلني احكي لكم عني باختصار..

ثم عن خطوة الزواج ...

ثم الحياة بعد الزواج ...

ثم بداية المعاناة والمشاكل ...

ثم الندم ...

وقبل كل شئ الحمدلله على قضائه وقدره ... اللهم اجرني في مصيبتي واخلف لي خيرا منها ....

عن نفسي ...

نشأت في بيئة صارمة وشديدة ... كنت البكر ...

الوالد الله يسامحه كان شديد معي جدا ... كان من الشيبان الاولين اللي مايتفاهم الا بالخيزران والله ياانه طقني طق ماانساه في حياتي ... الله يسامحه .... وكل كلامه تحطيم ... انا فاهم البيئة اللي كان عايش وجاء منها
لكن والله العظيم اني صرت اسأل نفسي بعض الاحيان هل أنا ولده ام لا ... لان معاملته مع اخواني كانت مختلفة جدا ... قد يعتبر البعض هذا فيه مبالغة لكن والله هذا الواقع ... عموما ماابغى اوقف كثير عند هالنقطة لاني حاليا تجاوزتها ... عموما في مرحلة المراهقة ماكان مسموح لنا الخروج من البيت ابدا ... بدأت اتمرد في عمر 17 وصرت عناد ماارجع الا الفجر ... لكن مع اني كبير كان يضربني ... الله يسامحه ... ماانسى وانا بها العمر ضربني امام عماني واولاد عماني بماصورة مياه ,,, والله ماانسى هالموقف ماحييت ... انا عمري حاليا 32 ومستحيل ماانساه ... ليه ... لاني من القهر بكيت ... وبعدها والى يومنا العلاقة معه رسمية وباردة ... والله اني الحمدلله بار فيه وفي الوالدة لكن مستحيل انسى هالموقف ... مدري وش دخله بالزواج لكن اعتبروه فضفضة

بعدها الحمدلله كملت الدراسة وكل شئ ... وتخرجت ...

اول ماتوظفت شارت على الوالدة بالزواج ... طبعا انا بتهور وبدون دراسة الوضع وافقت عشان ارضي الوالدة ... وقع الاختيار على البنت ... البنت الحمدلله جميلة ... وأهلها طيبين ...

عمري انذاك 26 وعمرها 19....

قبل الزواج تحملت ديون كثيرة ... وكان وضعي المادي صعب ... طبعا اناقلت ان شاءالله ربي يفرجها ,,, والحمدلله تحسن الحال ...

مرت الايام وتم الزواج ...

بعد الزواج 15 يوم ... حصلت اول مشكلة بيني وبينها ...

لكن كانت الشرارة اللي المفروض انتبه لها قبل مااستمر معها ...

المشكلة عادية جدا وامر تافه مايستاهل ... كان بيجينا ضيوف ... وانا قلت بطلع السوبر ماركت اجيب اغراض ... هيه رفضت في البداية ... لكن يوم اصريت فجأة حلفت علي وقاتل والله ماتطلع الحين ... طبعا قالتها بعصبية ومو مزح ... كردة فعل قلت تخسين تحلفين على والله اني طالع ... بزر عندك تحلفين علي ...
ثم بعدها انفجرت وطلعت شخصيتها العصبية ... وخذ صياح وتبكي بكاء خيالي لين حسيت ان فيها شئ ... كل مااقرب منها تصيح اكثر ... طبعا بعد العلة راضيتها بهدية ...

مرت الايام والاحظ فيها عصبية عجيبة ...

خلال شهرين تم الحمل ... ثم بعدها الولادة ...

بعدها بدأت المشاكل ... والله تفتعل مشكلة من لاشئ ... وانا الحمدلله احكم عقلي ... وامشي الامور ...

..............................................

بعد المولودة الثانية انقلبت 180 درجه ...

صارت وقحه اكثر ,,, كلام كانه سم ... صارت حياتنا كلها كل واحد يحاول يرفع ضغط الثاني ...

طبعا انا حاولت والله كل الحلول والله كل الحلول ... والله اني في قمة الحلم معها ... لكن ان لهذا الحلم ان ينفجر ...

انا ماابغى امدح نفسي لكن والله هذا الكلام بشهادتها ...

اني ماقصرت معها ... وفي البيت وعلى الاولاد ... لكن تقول هذا طبع فيني النرفزه والعصبية ...

والله من بداية الزواج واني حاط لها مصروف لحالها فقط ...

1000 ريال ثم رفعته الى 1500 ريال شهريا ,,,

اغرقها بالهدايا ... والكلام والاجهزة ...

انا ماامدح نفسي وماراح احط نفسي انسان كامل .... لكن عندي بعض السلبيات حسب كلامها ...

لكن كلها مش كريتيكال ... عادية جدا ممكن تشوفها غير لكن مثلا ... اني انسان بارد ...

مش رومنسي

مااحب الطلعات كثير لكني تغيرت وصرت افضل من اول ...

وانا حاليا اكتب لكم من مكان سياحي ... خذيت اجازة من العمل شهر عشانها ...

طبعا كالعادة حصلت مشكلة ... وسوت مشلكة من لاشئ ... وحنا مصيفين ... وتصيح على وتقول ودني بيت اهلي ... طبعا المشكلة باختصار انك ماتساعدني في الاولاد وشغل البيت ( حسيت انا امريكان ) وكل الشغل على انا ... كنا نايمين والبنت الله يخليها صاحت حوالي الساعة 3 قبل الفجر ... صحتني من النوم وقالت سو له رضاعة ... انا رفضت ... لاني في سابع نومه ... ثم قامت وتشغل اللمبات وتنفجر في وجهي (والله هذا الحاصل بدون مبالغة)... انت ماتساعدني .. بشخصيتها العصبية المنرفزة المقززة...

وتصيح ودني بيت اهلي ...

على غير العادة وبدون نقاش قلت لها رتبي اغراضك ... ووديتها بيت اهلها ...

طبعا فهمتها كل شئ وقلتلها اذا بتستمرين على كذا صعب نكمل ,,, وانا والله ماابي امد يدي عليك ... لاني مؤمن ان المرأة ضعيفة ... لكن يوم شفتها بتتمادى وديتها بيت اهلها ...

والله ماهو عجز لكن رحمة بها ...

عموما انا على مفترق طرق ... بعد القصة الطويلة هاذي ... محتار اكمل معها ام لا؟...

اللي رابطني معها بس البنات ...

صدق اللي سماهم كلبشة ...

الحب معها انمسح وانقلب الى بغض ... فقط كاننا روبوتات في البيت ...

ممكن هي تحبني لاني كل مانتناقش تحلف انها تحبني ... لكني اقول لها مستحيل احد يتحمل حبك بالطريقة هاذي ... طبعا توعدني تتغير ... لكن كلام... وصدق من قال الطبع يغلب التطبع ,,,

لو طلقتها راح تتبهذل عند اهلها اذا ماجاها نصيب ... ( ممكن تستغربوا عن النصيب ... ايه لهاذي الدرجه ابغضها )

والبنات ماتخيل نفسي بدونهم ... هم الشئ الوحيد في الحياة اللي يضع البسمة على وجهي ...

انا عفتها ... لكن تعلقي ببناتي الصغار هو اللي مانعني من الطلاق ...

طبعا لو طلقت مستحيل اتزوج مره ثانية لان الزواج عالم من النكد ورفعة الضغط .... والله العظيم مهما تسوي للمراة ... والله ان تنسى كل شئ في اول مشكلة ...

واصل 70% نسبة لصالح الطلاق ...

وش رايكم .. اسف على الاطالة ولكم المايك ...

التعديل الأخير تم بواسطة داماس ; 25-07-2013 الساعة 04:59 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه