يا كنافة ما ادري وش اقول لك وانا اشكي مثلك واكثر

زوجي زي زوجك معدنه طيب وبوادره تقول انه يحبني

بس لما احاول اعيش معه الدور الطبيعي للانثى مع الذكر تبدا الامور تتوتر

ردات فعله تحسسني انه يشوفني شي وباقي الحريم زينات والا شينات شي ثاني

ادخلي موضوعي وشوفي اللي صاير معي

وللحين انا واياه في هذي الدوامة ..
ابي اتذكر نفسي اول كيف كنت عايشة حياتي ومبسوطة ما اشيل همه وش يشوف ومع مين يتكلم وبايش يفكر

وودي ارجع زي ما كنت .. بس مو مخليني .. كل فترة يفاجئني بتصرف جديد يهز مركبي يشككني بكل شي بنيته معه

دخلت المنتدى زيك ادور حل ابي احد يعلمني كيف اتصرف ووشلون اتعامل معه .. مالقيت حل يرضيني .. ما حسيت احد يفهم زوجي زيي ولا يفهم مشاعري مهما كتبت


انا واياك يا كنافة نحتاج قبل ما نعرف نتعامل مع الزوج نصلح وضعنا من جوا


طالما انتي حاليا تعيسه بسببه وهو مو حاس فيك .. ما راح اقول لك سويله ليالي ملونة وصيري له شهرزاد لانه مهما سويتي ماراح يجيب نتيجه

انا واياك نحتاج نتعلم اننا نرجع نحب انفسنا ونتمسك بكل الاشياء الحلوة اللي بحياتنا وما نسلم الرجال مفتاح سعادتنا مهما كان

عن نفسي لقيت اشياء كثير تغيرت بحياتي غير زوجي .. والتغيير حصل مني انا:

اكتشفت اني ما طلعت مع صديقاتي من حملي الاخير يعني اكثر من سنة
واني بطلت اروح السوق برضو من حملي وصرت اشتري كل اغراضي واغراض عيالي من النت
ومن قبل ولادتي اخذت اجازة من الدوام وللحين اداوم اسبوع وارجع امدد في اجازاتي

يعني صرت لزقة بالبيت ولا لي شغل وهم الا هو واكله ولبسه ونومته


من فترة قريبة اشتركت بنادي .. يوم رجعنا بعد اول يوم وقبل ما اغير ملابسي ناداني قال تعالي سولفي معي

بصراحة فهمت شي من هذا الموقف

انه صار عندي جانب جديد يبي يعرف عنه

حسيت انه المفروض هذا اللي يصير اني اعزز الجوانب الخاصة فيني لحالي من غيره وغير عيالي

لازم اكون مشغولة بنفسي وحياتي واخصص له الجزء اللي يستحقه كجزء من حياتي
مو جدولي كله يصير ملكه ويادوب الاقي وقت لشي والا اثنين غيره

لازم اتمسك بصديقاتي .. باحتياجاتي السوق الصالون النادي ...

حتى بالبيت لازم يصير لي وقت خاص فيني يحترمه ولا يقاطعني او يطلب مني شي خلاله.. سواء اقرا قرآن او اتابع تلفزيون او ارسم ايا كان ..

لازم يصير لي جوانب في حياتي ماله علاقه فيها ولا يعرف كل شي عنها


كنت كذا من تزوجت وانا في دراسة .. وبعدين وظيفة وعضويات في جمعيات ونوادي .. وبزنس ومبادرات .. وحياة اجتماعية حلوة مع صديقاتي وبنات عماتي وخالاتي.. بس يوم قررت اسكر كل الابواب واجلس ارتاح ببيتي واتقرب من زوجي وعيالي نحشت الرجال ههههههههه

والله هذا اللي صاير

فشوفي انت نفسك قبل ما تتزوجين او قبل ما تبدا مشكلتك وفكري وش الاشياء اللي تحبين تسوينها واستعيديها بقووووة

طبعا بدون تقصير في اي حق من حقوقه .. لكن احذري انك تحبينه او تعطينه اكثر مما ينبغي


هذا من اللي تعلمته بالتجربه لعله يفيدك .. ويمكن يجي احد افهم مني يعطيك نصيحة افضل

جميل جداً ياعطر ..
بأنكِ بدأت تتمحور حياتكِ حول نفسكِ وإهتمامتها بعد أن فقدتيها ..وهذا مايجب أن تفعله كنافة ..وكما قالت لها مسز داني ..
كوني وسط ماأجمل من الوسطية في الحياة ..

ياحلوك ياعطر الفجر وياحلو كلامك.. كنت انتظر ردك..
انا متفقه معك تماما بسياستك اللي اتخذتيها..
لكن ما اظنها تعالج المشكله الاساسيه.. عالاقل بالنسبه لي..

زوجي ياما اتهمني اني بدون انوثه.. اذا عصب..
وكان تحليل الاعضاء لاني مقصره معه بالعلاقه..
لكن بعد صداته الاخيره اتوقع الموضوع اعمق من كذا..
صرت اشك انه حتى بأوقات الصفاء مايشوفني انثى..
يعاملني بحنيه واهتمام صحيح..
لكن بدون ما ينجذب لي مثل اي ذكر وانثى..

بالمقابل تصرفاته الثانيه تظهر نظرته لي..
يعني بأخر مشكله صارت مصيبه بسبب النقاب..
هو يغار علي جدا..
وسبق وقال ان النقاب يبين شكلي مو حلو..
واذا رفعته صرت فتنه.. حسب كلامه
يعني هو مقتنع بجمالي وجاذبيتي..
رغم عدم تفاعله معي..

برضو من اسبوع تقريبا طلعت معه السوق
وكنت لابسه كعب.. وطلب مني ما البسه بالسوق..
يقول الكل يناظرك بسببه!! حسيته يبالغ طبعا

ولما اكون معزومه بزواج كبير واتزين..
يذكرني اقرأ على نفسي ويقول لي حصني نفسك..
وينبهني ما ارقص حتى مايحسدوني الناس..

شغلات كثيره والله تبين انه يشوفني بنت حلوه وجذابه..
لكن اذا صرت بغرفه لحالنا صار كأنه مع اخته..
واذا عصب علي قال انتي مو انثى..!!!

فكرة قلب الطاولة انسيها

بالعكس استمري بوضعك المثالي وابتساماتك الجميلة وتسامحك وروحك الحلوة .. بس انت حاليا امراة مشغولة من متى لمتى عاد يحصل له ؛)

كنافة اساليه وش مفهومك للانوثة

سبق وسألته.. لو اقول لك جوابه تنصدمي..
يقول لك الانثى هي اللي ماترد ابدا على زوجها..
قلت له حتى لو شتمها وسبها؟
يقول ايوه.. حتى لو اهانها تسكت لانها انثى..

هالكلام يقوله اذا صارت بينا مشكله..
لكن اذا مابينا مشاكل ما اسأله ولا اناقشه..
حتى لا ارجع للخلاف..
وحتى ما اعطي الموضوع برأسه ابعاد ثانيه..

اما تعريفه السخيف للانوثه
فانا عملت فيه.. ولا تغير شي

كنافه بالجبن كل لي اقدر اقوله لك اني حاسه فيك تماما

__________________
أقّسَمتِ مِرآراً وُتِكٌرآراً أنَ لآ مكَآنْ للّرحِيل بيَننا وُلكِنْ الرّحيلْ كٌآنْ أصَدقْ ...

تسلمي حبيبتي.. الله يقومك بالسلامه

أختي الكريمة

بقولك شئ يمكن ما يعجبك... بس هذا رأيي

مشكلتك... مثل كثير من النساء
من تهتم بالتفاصيل وتدقق بالأمر وتعمل من الحبه قبه
وأنها تعبانه نفسياً ومظلومة.. وكل هموم الدنيا فوق راسها

مع العلم أن الرجل لايدقق بالتفاصيل بشكل كبير ولا يلحظ تصرفاته.. لأنه يعتبرها أنها طبيعية وتلقائية

ولكن حينما يشعر بتغير زوجته عليه.. يعرف أنه دخل في مرحلة الزعل والنكد... فيحاول بتلطيف الأمر بطريقة هو يرى أنه لين فيها ويقدم إعتذار ضمني ومراضاه بإحضار شئ تحبه زوجته أو تنفيذ رغبه سابقة لها أو غير ذلك

ولكن للأسف.. يجد أن زوجته ترغب بالتصريح والمناقشة ومراضاتها بشكل يليق بعواطفها.

لا أدري... إلى متى لازلنا نبقى في دوامة
الرجل لا يفهم المرأة.. والمرأة لا تفهم الرجل

أعانك الله

كلام جميل ..مع هذا الرأي كثر الله من أمثالك أستاذ الرسمي ..
تجاهلت ماكتبته أنا ..ولها حرية القرار ..!
أتمنى لكِ السعادة ياكنافة وتحرري من هذه الزواية الضيقة ..لتحي بسعادة ...
أحياناً تفاصيل صغيرة جداً في حياتنا قادرة أن تهزنا من الأعماق سعادة ..!