انا في حالتي
طليقتي حاولت اتوصلي هالشغلات بعد اصرارها الشديد عل الطلاق اب كل سهوله من خلال هالكلام

- احنا مو متفاهمين
- ماكو نصيب انكمل
- انا ما عدت استحمل
- انا ماني قادره أعطي
ومن هالكلام

للأسف الي حواليها حرضوها بقوه للطلاق وكان في منهم كانوا يفشون اسرار بيتهم وأنهم يبون يتطلقون والآن وبعد سنه ولا وحده فيهم تطلقت الا زوجتي. عطوها نظام
- عيشي حياتك
- لمتى مستحمله
- آخذي حريتك
- آخذي استقلاليتك
- إنتي مو آخر وحده اتطلق
- طلبي إنتي الطلاق اول. تغدي فيه قبل لا بتعشى فييج

ابوها الله يهديه طلب مني احضرله بيته بعد الخلاف علشان يعرف وانا لأني احبها رفضت اروح وقلتله يا عمي خل ترجع البيت و انتفاهم تالي نجي انا معاها بس رفض.

يا جماعه اروحله شنو أقوله ؟
أقوله انها اهملتني؟
أقوله انها عصبية عل الأولاد عمال عل بطال؟
أقوله انها وصلت الولد الى حالة عدم الامان وكره المدرسه وفقد الثقه اب نفسه ( هذا كله كلام الاستشاري النفسي مو كلامي )
أقوله ان العلاقه بينا صارت تبي غدا؟ تبي عشا؟ وبس
أقوله اني كنت في اسوء حالاتي النفسيه وهي ولا جنبي اصلا
أقوله ان بسبب ادماني عل المنومات والمهدئات عملت حادث والله ستر ولا اهي ولا اهتمت
أقوله انها فجأه تغيرت وحطت حاجز بالشغلات الماديه
أقوله ان في تجمع عائلي الكل كان مع زوجته وانا كنت وحدي ( اهي راحت لاهلها )
أقوله انها اذا اخطئت حتى ما اتطيب خاطري ك زوج لها ( مو شرط تعتذر )
أقوله ان في آخر سنتين لما نطلع عشا اب مطعم انا آكل ل وحدي وهي قاعده
أقوله ان في عيد ميلادي يابتلي هديه رخيصه وقالتلي سامحني ميزانيتي ما اتساعد بعدها اب اقل من اسبوع اتسافر مع اهلها صارفه مبلغ وقدره. اب ذمتكم شي ما يحز بالخاطر؟


تخيلوا أقول هالكلام لابوها ورجعنا البيت...شلون بتكون علاقتي معاها؟

انا اعترف في اخطاء مني ويمكن اخطأت لما كتمت كل هذا. لا اهي ولا ابوها عطوني فرصه انلم الموضوع

3 شهور كان الوضع متوتر ومثل القنبلة الموقوته

انا لو مو اني مو عارف زوجتي عدل قسما بالله كان ما فكرت ارجعها بس انا عارف ضغوط الحياة واخطائي وهذي اعذرها عليها لكن التحريض والفتن وسماع كلام الناس بره وفوق هذا طلبها للطلاق اهو الي سهل اب عينها الطلاق والآن هي نادمه ( ولو انها ما صرحت ال هالشي ) بس حالتها النفسيه و الصحيه والاسريه السيئه بينت هالشي.

قسما بالله ما فيني خير ان تركتها حتى لو حاليا رافضه.

ساعات احس طلبها اني ابتعد لانها يمكن اتذكر النقاط الي كنت اعاني منها الي ذكرتها فوق + اني ما رفعت عليها اي نوع من القضايا بعد ما اهي دخلتني المحاكم + وقوفي معاها في ظروفها الحاليه بعد الطلاق.
كنها تقول انت مو احسن مني
كنها تجلد نفسها

بالنهايه قرار الطلاق جد مو سهل ومدمر بس احس المرأه اتدمر اكثر من الرجل. كفايه كلام الناس الي ما راح يخلونها ومسؤولية الاطفال الثقيله عليها

حتى الرجل الي يستسهل الطلاق ويطلق ويتزوج ( مباشره ) مرأه ثانيه وثالثه ورابعه يبي يثبت حق نفسه ان العيب في طليقته مو فيه وللاسف ممكن الزوجه الثانيه تاكلها لما يكتشف ان العيب فيه ويطلقها ويتزوج ثالثه او ممكن يرجع لطليقته الاولى.

انا اتفق معاكم حالات الطلاق عاليه جدا ( عندنا وصلت 500 طلاق بالشهر ) المجتمع رجال ونساء بحاجه للثقافه والدورات وغيره خصوصا واحنا في عصر المصخره الانستغرام و الشات وتويتر والحريه الي توصل لقلة الأدب والحرام. نسمع قصص وبلاوي والواحد بدا يخاف صراحه

مبتعثه كم لج منذو طلاقك؟!
شهر .. شهرين ؟! سنه ... مثلا
.
.
.
انتي ما تبين شوك تشد عليج ... تبين ( ابغي حل) تشد شعرك عشان تصحين... ها وش قلتي تنصلح افكارك وإلا أبدا شغل ...


ع فكره انتي مش متعلقة به ك إنسان .. تجربة و عدت بس لانها اخر حدث ف هالناحية من حياتك انتي قاعده تاكلين ف نفسك ... الله يعوضك بزوج صالح و ببذره طيبه تجي تبشرينا هنا .. يا سميع يا عليم

الطلاق ابدا مو سهل
لكن ساعات يكون مجبور عشان يحافظ على ماتبقى من كرامته
واللي يقولك انه طلق وهو مبسوط مو صادق خاصه اذا كان الطلاق بعد عشره
فـ الانسان لو كان محتفظ ومربي حيوان اكرمكم الله والا طير وفقده يحزن عليه
مابالك انه عاشر انسان مثله واكلهم مع بعض ونومهم مع بعض وكان بينهم مواقف طريفه وحكايات
فـ طبيعي انه راح يكون صعب فراقه
لكن ساعات يكون الطلاق هو الخيار الوحيد

مبتعثة متفائلة

الطلاق ابدا ما يكون سهل حتى اللي يصر عليه ويريده بكل قوة ..
وحصول الطلاق بين الزوجين كالموت في حدوثة ...

وحتى الانسان المستهتر الذي نراه يصر على الطلاق للعلم يدخل بعلاقة اخرى عشان ينسى العلاقة الاولى
او يدمن ..او يلتجئ الى الله ويصبر ويتصبر ويكابر ولا يعووود ..!
الا في حالات قليلة ..
مبتعثة الغالية ..
عيشي يومك بكل التفاصيل الصغيرة واسعدي بها ..
الماضي مضى بكل شيء .
هبة رياح الرحيل واقتلعت معها اشياء خفيفة لا تستقر في ارضك ..
ولا تزيد اراضيك جمالأ ولن تثمر ايضا ..!
القناعة والرضا لك مطلب
والحمد لله رب العالمين ..

رد : لماذا الطلاق سهل عند البعض
والله يامبتعثه انا دايم يجيني مثل احساسك لانه طلقني بدون سبب ولا رضي حتى يجي يكلم ابويه او يفكر باصلاح وراح المحكمه وطلق ورسل ملابسي احس بحزن وانقهر من ظلمه لي وين راح حبه بس ارجع استغفر واذكر الله ودايم يقين جوتي ليس الله بظلام للعبيد راح ياخذ حقي وبيعوضني ولازم تقوي نفسك ومانوقف حياتنا على اشخاص كسرونا وخذلونا لان محد بهذي الدنيا للاسف يستاهل وممكن ربي مخبي لنا الافضل بس نثق بالله ويارب الجاي خير وللاسف باخر الزمان قله فيه من الرجال الباقي اشباه رجال الزواج والطلاق عندهم لعبه وتجربه لكن الله حسيبهم


نفس قصتي بالضبط لما الاستهتار بكل هذه السهوله ؟!
ايضا انا الطليقة الثانيه للاسف

كل شي يتعوض الحياة ماتوقف عند احد واللي يبيع الله معاه مايلزمنا بشي

ليته كان سهل مبتعثة .. كان ماضاع عمري معلقة وساكتة وصابرة وألعب على نفسي أقول انتي أرملة ربي عيالك وهو ميت من زمان ... بعد طلاقي الآن وكبر أولادي أقولها لك ليت الطلاق وقع من زمان لكن راضية بتدابير ربي وبأقداره شرها قبل خيرها ..
لن أنكر عظيم فضله علي سبحانه وكرمه فنعمه علي لاتعد ولا تحصى ولاينقصني إلا رضاه عني لاكون أسعد البشر ..
قصة طلاقي الصعب والمتعسر يامبتعثة بأختصار
( استخرت لسنوااااات ثم اتصلت على محامي مشهور وشيخ معروف بعد تردد طويل .. لاانسى كلامه لي في أول مكالمة كيف بترفعين قضية خلع وانتي مكالمة موقادرة تكلمين خايفة وصوتك يرتعش خليك قوية دامك على حق .. ورب البيت ماكان صوتي بس يرتعش كل شي فيني كان ينتفض .. بعد وقوفه معي كتب الله أجره لانه رفض اوكل محامي لعدة أسباب ومكالمته لطليقي لانهاء الموضوع دون محاكم ودعمي بالمشورة وكيف افعل في الاجراءت وما يعترضني ..
تخيلي مبتعثة مجرد اتخاذي القرار بدأته بمكالمة كنت ارتعش وابكي فايش تتوقعين صار لي وانا ذاهبة لوحدي للمحكمة لرفع قضية خلع ؟؟؟
قلتها لطليقي امام القاضي جميع مامضى وما رأيته منك في كفة ووقفتي هذي أمامك في كفة لن أسامحك عليها ماحييت ..
لاني قبلها ترجيته وترجيته أن ينهي مابيننا بالمعروف أن يرحمني من الذهاب لمكان هو يعلم يقينآ انه كالموت بالنسبة لي .. ترجيته الا أقف أمامه مدعية .. فهو أبو اولادي .. ترجيته الا يدعني ناكرة جاحدة أمام نفسي وانا صاحبة حق .. آآه كم مؤلم أن ترحم انسانآ ويجبرك إلاعلى القسوة ويدفعك لها دفعآ ..
طوااال سنوات زواجي لم يكن معي سوى ربي ولم يتخلى عني سبحانه اثناء طلاقي فله الحمد والثناء أسأله شكره وحسن عبادته فقد سخر لي من هناك جميعآ ولله الحمد دون مبالغة .. رأيت في ذلك المكان من لها مدة طويلة وجلسات وخصمها مدمن وووو أما انا فلم يتعدى موضوعي الشهرين تقريبآ رغم ان طليقي ظاهره ومكانته الاجتماعية ومركزه ولسانه وقوته تخيف أي رجل فكيف بأمرأة ضعيفة كان معها الله ..
في الجلسة ال 3 حضر مع الشيخ جزاه الله خير 3أو 4 رجال غير الكاتب للبدء في إجراءات الخلع اعترض طليقي بشدة ورجاء وطلب وساطة الشيخ للصلح وانه لايريد مني مالا وبعد نقاش مع الشيخ ووعده للشيخ ان أعطاه مهلة أخرى فانه سيطلق دون عوض حينها الشيخ بارك الله فيه طلب مني ان اعطيه فرصة اسبوع فقط .. وافقت على مضض نهاية الأسبوع في الصباح وبعد سؤال طليقي لي هل مازلت مصرة ذهب مجبرآ ليطلق كما وعد وأتى بالصك أخذته والقيت نظرة سريعة خاصة لكلمة صك طلاق والختم ثم نمت مباشرة يامبتعثة وكأني لم أنم من سنوااااات كلمني قبل نومي يبكي ويطلب المسامحة ..
بعد أن افقت قرأته فوجدت مع الأسف انها طلقة واحدة حنقت عليه واحسست بغدره يكررره مرة أخرى اتصلت أقول له لماذا ؟!!! انت تعلم وأعلم أنها ليست الأولى .. فقال لي دعي لي أملآ ربما عدتي لي في يوم ما سنة او 5 سنوات سانتظرك وان أصبحت عجوزآ !!! عانيت وما زلت أعاني منه .. أسأل الله الفرج .
خالقي بعد الطلاق مباشرة أكرمني بوظيفة حكومية كنت انتظرها وأطالب بها منذ سنوات
فأعتبرتها ولا أعلم مكافأة لي على قراري ..

موجوعه وقلبي موجوع، وقصتك فيها من الضعف والوجع ما الله به عليم.

اجمل انثى
الحمدلله الخير والعوض قبالك
ووظيفه حكوميه مهب شي هين فضل كبير تغنيك غن خلقه