السلام عليكم و رحمة الله

فيه موقف بسيط حصل من اخت زوجي
و بيتكرر بعض المرات .. و عشان قبل لا اتصرف بنفسي و اخد موقف
قلت برضو أستشيركم

.
.

- عملت حلى و قهوة و رحنا لبيت اهله و انا الي قلت لزوجي نروح لهم !؟
مع اني غير مجبرة اسوي لهم و لا زوجي يجبرني .. بس قلت عشان وصلوا أخواته من السفر

- طبعا يسلموا علي أخواته بدون نفس و لا يطالعوا فيا و لا كيف حالك و لاشي .. و سلام بارد
سواء انا او سلفاتي .. مع انه سلفاتي يخدموهم و يشوفوهم دايم .. يعني يتكبروا على حريم اخوانهم
مع انه انا المفترض اشوف حالي عليهم ..

- تغدينا و انا جالسة جنب زوجي ..
و هو يغرف لي و هما مطنشيني طبعا و انا مطنشتهم و أبرد ماعندي ..

مع العلم انه سلفتي تجلس في السفرة الي فيها الاطفال مثل الشغالات يعاملوها ..
بس انا زوجي ناداني بعد ما غرفت لولدي الكبير في سفرة الاطفال ..
و ناداني زوجي اجلس معاه ..

- جلست أأكل أولادي الصغار في الغرفة الي كنّا نتغدى بها .. لانه الصغار كانوا رافضين ياكلوا
و أولادي مو مرة متعودين على عماتهم .. و قلت لكم من اول انه اهل زوجي باردين مع الاطفال مررررة

- ابو زوجي كان لوحده في الصالة عشانه صايم ..
و هما راحوا يبغوا يجلسوا بالصالة بعد ما اتغدوا ..

- قالت لي اصغر أخواته الي كويسة معايا .. تعالي و قلت لها ااكلهم و اجي ..
و زوجي رقد بعيد شوي و قال ابغى انام .. و ناس داخلة و خارجة و انا مع أولادي

- قلت له ليش ما تجلس في الصالة !؟
عشان ابوك .. و طنش و قال ابغى انام

- قامت اخته ترمي كلام و صوتها واصل عندنا و تقول :
اذا بيجلسوا مع بعض لوحدهم .. كانوا جلسوا في بيتهم ..
و انتبهت انها تقصدنا .. بس طنشتها و كبرت دماغي

و رجعت عادت نفس الكلام .. كانوا جلسوا في بيتهم
دام جالسين مع بعض في الغرفة ..

و هما في الصالة و يشربوا قهوتي و ياكلوا الحلى حقتي

.
.

أولادي شبعوا و شلت صحنهم و دخلته المطبخ
رحت جلست في الصالة

و اخوات زوجي مطنشيننا انا و سلفاتي و جالسين مع أخوهم الكبير و مع زوجي
و انا و سلفاتي جالسين مع ابوهم .. و هو يقرا القران كان

زوجي راح غرفة اخوه الصغير و حط راْسه بينام
اخوات زوجي دخلوا كلهم في غرفة و يهرجوا مع أخوهم الكبير ..
و مع انهم راح يشوفوه كل يوم و كل ساعة

و انا و سلفتي لوحدنا

ايش رأيكم !؟
مع العلم انه حماتي مسافرة لكن تعاملها هي و زوجها كويس معايا و الحمدلله
و محترمين حالهم الحمدلله

و زوجي ما يواصل اهله كثير
و كلهم عارفينه من زمان

.
.

ايش الحل المرة الجاية
عشان لا اتهور مع اخت زوجي لو بيوم دقت و رمت كلام