المشاركة الأصلية كتبت بواسطة املي الجنان

[SIZE="5"][B][CENTER]السلام عليكم

موضوعي طويل جدا وقصتي طويله بحاول اختصرها قد مااقدر

انا تزوجت من شخص مو من منطقتنا في فترة كانت حرجة بالنسبه لي كنت اخر سنه بالجامعه والوالد كان مريض وحسيت بانه وده اني اوافق طبعا مااجبرني بس عيونه كانت تتكلم ( الله يجمعي فيه بفردوسه الاعلى يارب ) كان وده يتطمن علي ويرتاح وفعلا وافقت وقبل الزواج توفى الله يغفرله ويرحمه ولا حضر عرسي ولا درى وش صار لي

المهم تزوجته وكانت حياتنا جميله في بدايتها كان مبتعث للدراسه برا ورحت معه وبعد فتره من الزواج بدينا نفكر بالحمل وراجعنا المستشفيات لين اكتشفنا عقمه الله يشفيه ومن بعدها بدت رحلة العذاب النفسي

انا انسانه اعشق الاطفال وسببي الاساسي في الزواح هو تكوين اسره لاني وحيدة اهلي ماعندي اخوان ولا اخوات

المهم حاولنا بالعلاجات وتعبنا كل شي جربناه وبدون نتيجة كلهم يقولون انسو الموضوع
بدات نفسيتي تتآزم والمشكله في جو هالظروف كان تعامله معي قاااااسي جدا وبدال مايساعدني واساعده في هالظروف حط حيله فيني طبعا كلنا وقتها كنا ندرس وغربه يعني ضغوط البعد والدارسه زايده علينا وهو ماقصر فيني كمل الناقص

من ناحيه حقوقي وش اقول بس بكل النواحي مقصر المصروف العلاقة الخاصه الاحتواء كل شي حتى الاشغال الشاقه بالبيت انا اسويها .. شايل ايده من كل شي انا اجيب العامل ،اقعد معه لحالي سباك كهربائي اي شي انا اللي اوقف على راسه واحيانا اذا اقدر اسوي الشي اسويه بدون ماااجيب عامل


للامانه ماكان كذا في البداية بس مع الوقت صار يسوء الحال وكل ماله يزيد

المهم صبرت وصبرت لين رجعنا السعوديه وانا كنت ناويه من هناك اطلب الطلاق بس قلت اصبر لين نرجع وفعلا بعد رجعتنا بكم شهر تكلمت معه بكل هدوء وقلت انا ابي الطلاق لاني ابي ذريه

قلب الدنيا فوق راسي وصراخ ومشاكل وكبرت المشاكل ودخل اهالينا ومابقى غلط ماحطه فيني وفجآة يتاسف ويعتذر وبعدها يهزئني انا مالومه ابد على اللي سواه لانه كان مصدوم بس للاسف انه فضحني وفشلني عند عماني وبالاخير رفض يطلق الا بمبلغ المهم صار خلع ودخلني المحاكم الله المستعان وانتهينا من هالموضوع


تعبت نفسيتي كثير بعد الطلاق

كل ماحاولت انسى يرجع ويقلب علي المواجع يرسلي ايميلات يسبني فيها ولا يسب امي ( هو مقتنع ان امي هي سبب الطلاق وهي اللي فرت راسي )

ومرات يذكرني بمواقف جميله بيننا

متقلب خطب مرتين عقب طلاقنا في اقل من سنه وتفركش موضوعه في كل المرتين

والله اني اتمنى انه يشوف طريقه ويتوفق يمكن اقدر انا بعد اشوف طريقي

حاليا انا مخطوبة بس خايفه جدا جدا جدا من محاولاته في التواصل معي

لا تقولون لي احضريه حضرته بكل البرامج وحضرت اهله كلهم بس مافي فايده يطلع ارقام ويحاول

حتى التويتر يكتب كلام صريح واحيانا غير صريح دق فيني وتلميحات لي

مادري وش المفروض اسوي انا تعبت كثير كثير لين حاولت انسى الموضوع

وجاني كلام من اهله ومن جماعته في منطقته يسم البدن كلهم يغلطون علي وحاطيني انا السبب

مدة زواجنا كانت تقريبا 5 سنوات
وحاليا لي سنه ونص منفصله

محد يدري من عايلته ولا من عايلتي وش سبب الطلاق ولا يدرون عن مشكلته الا المقربين من عايلتي عماني وجدتي وخوالي وخالاتي البعيدين مايدرون وش السبب ماحبيت اتكلم عنه بالسوء

مشاعري ماقدر اوصفها احس بخوف رهيب من تكرار الزواج وكمان اخاف من محاولاته في التواصل معي لانه قد ارسلي رساله يقول والله لو اشوف زوجك بالشارع لاقوله مستحيل تاخدها مني بس الظروف اقوى يعني احسه متهور وممكن يضرني
طبعا انا عمري مارديت او تواصلت معه اتجاهله كنه ماوصلني شي وانا قلبي مجرووووح

ساعدوني وانصحوني جزاكم الله خير

تم تعديل العنوان ليتناسب مع المضمون