أختي مها الكويت..

بالنسبة للي صار مو هو القضية!

يعني شكلك انت مجمعة مواقف من زمان.. وهذا اللي حز في خاطرك..

لان الموقف ما اقولك سهل بس صدقيني الوحدة ممكن تمشيه.. واتوقع انك عارفة طبع زوجك وش ممكن يصدر منه..
بس اذا انت تعبانة من مواقف ثانية وصير قلبك مليان عليه ففعلا لا تليني انت..لان الموقف راح يزيد كذا..
خذي لك راحة فترة... لا تكلميه.. وخلي الورق وسيلة الاتصال بينكم..

بس اذا تبغين نصيحتي لا تعاملينه بقسوة لكن بيني له انك زلعانة ومانت قادرة تلكمينه بعد اللي صار..

مقدرة نفسيتك صدقيني بس انت مستحيل تعيشين معاه على هذا الوضع فترة طويلة..
وهو بعد ماراح يرضى..

ولكن اذا كان احد من اهلك يمكن يتدخل بأسلوب حكيم وعاقل يبين له إن لك حقوق وإن المراة مشاعرها حساسة علشان الحياة تمشي لازم كل طرف يراعي حقوق الىخر.. ومن هالكلام اللطيف اللي فيه تانيب غير مباشر... لان الرجل يخاف من الرجل ويحترمه... واذا جاء كلام الأهل بطريقة راقية ومهذبة فإن الرجل يحترم الموقف ويؤثر عليه الكلام بشطل ايجابي بعكس اذا كان بعنف وشدة..
وكثير يخافون من هذي الطريقة مع انها مؤثرة في أحيان كثيرة... اذا كان اسلوب الاهل راقي..وبالعكس يشعر الرجل ان زوجته وراها أهل يخافون عليها ويهتمون بأمرها..
الله يوفقك...قلبي معاك....

اختي مها الكويت انامع الاخت البتول
والزوج تاج الراس الكل يتمنا لبس ذاك التاج
في زعلك فرح للشيطان وغضب للرحمن وانت اختاري الطريق الانسب

أيتها الزوجة المصون

سلام من الله رب ذا النون

إليكِ نصحي من خبرة هذا الكون

إذا جد الأمر بين الزوجين

ودخل الشيطان بين البين

فأغلقي الأبواب والجدران

ولاتخبري الأهل والخلان




وأعملي بمافي هذا البيان:



لاتعانديه ولو بكلمتين

فبالعناد سينسى كل ميثاق وديّن


ولاتخيريه بين أمرين

فسيختار منهما الأمرّين (أي المر)


وأكسبيه بحرفين

وعاتبيه بدمعتين

وأغريه بحركتين



ستجدينه قد ذاب تحت الرجلين

وهذه نصيحتي ضعيها حلقة في الأذنين

أم جمانة

__________________

الاخت مها قلبي معك والله انا اقول ان الشيطان مبسوط على حالكم لانه واضح ان زوجك برضو وده يرجع ولكن ابليس مانعه والدليل انه يجي عندك ويقول الحمد لله والشكر يعني وده يكلمك ووده تردي عليه
المهم قرري اليوم اليوم وليس غدا بمناسبة ليلة الجمعه المباركه انصحك انك تناديه وتقفلي عليكم الباب بهدوء وتكلميه بهدوء
وتقولي له بغض النظر عن المخطي انا او انت (ولا تناقشي الموضوع)
ترضى ان حبيبتك زي ما كنت تقول وام عيالك وصاحبة الحلوه والمره معك وووو
ترضى انه تجلس كل هاليام وهي متكدره وزعلانه بغض النظر عن سبب زعلها او زعلانه على مين
المهم عموما فكريه بالايام الحلوه وانه المفروض ما يتركك زعلانه كل هالمده حتى لو يعتقد انك انتي غلطانه المهم فكريه وقوليله اني انا كلمتك عشان نضع حد لزعلنا وما هانت علي عشرتنا ولا ابي الشيطان يفرح انه انتصر علينا
والله يجمع بينكم بخير ويكون رجوعكم لبعض يبداء ب(0000)العاده الي انتم متعودينها بعد كل زعل
والسلام :14:

__________________

اختي في الله : مها الكويت
عاتبيه ثم عاتبيه وافتحي قلبك واخرجي كل ماالمك واحزنك حتي لايتراكم علي مر الايام وتثقل القلوب
عاتبيه بلطف وحنيه عشان يحس بالذنب ويعتذر عما بذر منه وتركي الخصام أذا حاول مصالحتك فقد تخاصمتوا يومين وأعتقد بانها مدة كافية حتي لاتتعودوا علي الخصام الطويل لانكي لن تتحملي لانك بكل بساطة تحبينه ويحبك ومالكم الا بعض الله يهدي القلوب وتتصافي النفوس وترجعون احسن من الاول
تحياتي

__________________

تدرون شنو الي مستغربه منه واحس انه فعلا غير

اني ما ودي اشوفه والله لو ظروف اهلي تسمح واني ارتاح لو اروح لاكن الوالده الله يديها حنانه
لكنت رحت والله العالم متي يشوفني


بارك الله فيكم اعزائي وفعلا اسعدتوني بتواصلكم

__________________
ارجوكم دعواتكم لقريبتي بالشفاء العاجل بان يرجع لها بصرها ويشافيها من الجلطات الي اصابتها ويرحم ضعفها وترجع لها عافيتها ويرجعها لاطفالها وزوجها سالمه اللهم امين


لايرد القضاء الا الدعاء

تدرين يامها متى نصل لهذه الحاله
اذا مرت اكثر المواقف ضدنا وحسينا ماعاد فينا شيئ بقى يذكر
نصير مثل ماقلتي ماودنا نشوفهم

وانا وصلت معي هالحاله
والله صرت استغرب من نفسي شلون صرت كذا
شلون صرت ماابغي اشوفه
ورحت بيت اهلي
بس الحمد لله عدت على خير
على الرغم اني ارتحت كثير ورجعت بمعنويات اشوي مرتفعه الا اني ما انصحك
تسوينها تدرين ليه ..؟؟
لان الرجال مو كلهم مثل بعض
يعني مو كل رجال يرضي ان يجيب زوجته من بيت اهلها
حتى وان هو اللي مزعلها
ويمكن يعد هالشيئ اهانه بالنسبه له

تعوذي من الشيطان وشكلك انتي ماخذه على زوجك عدت مواقف مو هالموقف
بس اللي ذكرتيه .. وان شاء الله يامها فتره وتعدي
واذا كنت مو قدره وتحسين انك بتضغطي على نفسك اكثر من الازم
روحي بيت اهلك يومين ورجعي
وان شاء الله تتحسن امورك للاحسن
ربي يهديه ويسخره لك .. اللهم آآمين

اختك هنوده ...

__________________
الحمد لله على نعمه وفضله وكرمه ..

مشكوره يا هنوده انك فعلا معاي والله انا فعلا ماخذه منه عده مواقف اشرايك اني كنت طالعه معاه مره علي انا بنشرب قهوي بري وبعدها بساعه نتعشي ولاحظي اني كنت مو ماكله شي وكان هذا حزه الساعه 7 المهم اول ما ركبنا السياره دق ابني وطلب من ابوه عشا من المطعم الي في الجمعيه الي يم بيتنا قاله حاضر ولما نزل ما شفت الا الي جاب معاه صمونتين وبيبسي ولما شفته قال ( ما اقدر اقاوم الشاورما) اتعشي وبعدين اوديك تتعشي

والله من بعده علي طول للبيت وحسيت انه فعلا نذل وبعدها حصل الزعل ( يعني فعلا ماخذه عده مواقف ) وانا من النوع الي ما ازعل بس اذا زعلت ما ارضي بسهوله

الف شكر لمرورك مره ثانيه فعلا اسعدتيني

__________________
ارجوكم دعواتكم لقريبتي بالشفاء العاجل بان يرجع لها بصرها ويشافيها من الجلطات الي اصابتها ويرحم ضعفها وترجع لها عافيتها ويرجعها لاطفالها وزوجها سالمه اللهم امين


لايرد القضاء الا الدعاء

أختي تقولين إن زوجك قال ( ما اقدر اقاوم الشاورما) اتعشي وبعدين اوديك تتعشي

وهو ماقدر يقاوم شكل الشاورما ونفسه جات فيها

واللى فهمته أنه قال بيوديكِ تتعشي في المطعم ؟؟؟؟؟صح فهمي وإلا لا؟؟

وإذا صح تحليلي أجل وين الغلط هو ماقصر وقال بيوديكِ تتعشي ؟؟وين النذالة في تصرفه؟


أتمنى توضحي المشكلة علشان نعرف نجاوب

__________________