صدمة ما توقعتها تصير من أمي ...!! - الصفحة 4 - منتدى عالم الأسرة والمجتمع

22-06-2010, 07:56 AM

البنت الخجوله

عضو جديد

تاريخ التسجيل: Jan 2010

المشاركات: 17

صدمة ما توقعتها تصير من أمي ...!!

السلام عليكم ...

مشكلتي اللي بقولها لكم صارت لي مع أعز الناس ( أمي الغاليه ) اللي أحبها .

للأسف أمي ما عطتني مجال اني أعطيها حبي وحناني لها

طبعا ً أنا البنت الكبيره من البنات والأولاد ودائما ً وجهات النظر والتفكير مختلفه تماما ً بيني وبينها ..!

مع ان فارق العمر ( قريب ) من امي لكن للأسف وجهات النظر مختلفه وكل واحد له تفكيره ..

مهما اسوي لأمي من بــر وخير وخدمه تشوف اني مقصره بحقها ..!

واختي اللي بعدي تشوفها احسن مني وتفرق بيني وبين اختي وتقول لي : اختك اطيب منك وقلبها حنون علي ..وانتي ( قطع منك ومن قسوتك علي )

مع اني والله احبها احبها يا ناس بس هي ما حست بهذا الشيء

أنا استغرب أبوي يحبني و يحس فيني ويحس بحبي له وبحناني ،
وهو اذا شافني معه كذا يعبر عن مشاعره لي انه يحترمني و يوجهني وينصحني ويتقرب مني انه يسأل عن اهتماماتي .

واذا صرت في مشكله يكون قلبه قلب أب لبنته .

لكن امي عكس ...! اقول في نفسي وش لون تفكيري وتفكير ابوي ( متطابق مع بعض ) وامي تفكيرها في الغرب وانا في الشرق ...؟؟

لا حظت ان اغلب مشاكلي مع امي من ناحيه :

- تدخلها في خصوصياتي وتاخذ اغراضي اللي في غرفتي .

- تستخدم لاب توبي أكثر مني .

- تفتيشها لمكتبي و شنطتي .

- ( تفقد ) لغه الحوار الهين اللين الحنون في اسلوب الحوار بين الأم وبنتها .

- عصبيه وتغضب لأتفه الأسباب ولسانها يأخذ بالسب واللعن والدعاء علي .

- اذا شافت مني خطأ أو تصرف غير صحيح ما توجهني بطريقة إجابيه إنما تكتفي
بالإنتقاد السلبي ، مثل ( انتي فاشله ، انتي مسكينه ، انتي عديمه التصرف ، انتي قاسيه ، ...الخ )

وكل هالنقاط اللي ذكرتها اذا صارت لي مع امي نتهاوش مع بعض و تعصب واعصب انا
واصيح في غرفتي وهي تدعي علي و للأسف كل طرف خسر الثاني

الحين امي زعلانه وما تكلمني بسبب انه حصل بيني وبينها موقف تافه جدا ً وصارت هالنتيجه ..!

والله اني ما غلطت هي اللي غلطت علي ، وسبتني ودعت علي .

انا الحين اصيح بحرقه من قلبي لأن زعل امي معذبني واحس بألم وكأني بدون امي مثل شخص غريب أوطان في دنيا غريبه

انا ودي اراضيها واحب راسها بس انا عارفه تصرفها اذا راضيتها وحبيت راسها راح تمسح وجهي في الأرض وتذلني
يعني ابوي اذا تضايق بشيء على طوووول اراضيه واحب راسه ويقول لي ما حصل الا الخير وأجلس معه وكأن ماصار شيء .

بس امي ( لا ) اذا حبيت راسها تجلس تعايرني و تمد بوزها
وتتغلى ولا بعد فوق هذا كله تزعل علي مره ثانيه وتتجاهلني يعني يصير الزعل زعليـن

انا الحين ابيكم توجهوني ابيكم تنصحوني من الغلطان انا ولا امي ...؟؟

وش لون اتصرف ...؟

الحين هي زعلانه مني ولا تكلمني كيف اراضيها ....؟

كتبت هذا المووضوع وانا دموعي بحر لأن ما لقيت احد يوجهني

.

.

.

التعديل الأخير تم بواسطة البنت الخجوله ; 22-06-2010 الساعة 08:00 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه