زوجتي مهملة في واجباتها الزوجية والأسرية(مستجدات#253-395) - الصفحة 4

17-09-2011, 02:49 PM

متورط بمرتي

عضو نشيط

تاريخ التسجيل: Sep 2011

المشاركات: 240

زوجتي مهملة في واجباتها الزوجية والأسرية(مستجدات#253-395)

السلام عليكم اخوتي

بصراحه اعجبني الموقع وحبيت اني اطلع مشكلتي العويصة الي مالها حل اتوقع لاني عرضتها على اكثر من شخص واحاول اطلع نفسي الغلطان بس ماني قادر الكل يقول ابسط حقوقك الي تسويها

نبداء بالقصة والي هي خلتني اعاف الحريم كلهن
انا شاب مثل اي شاب فكر انه يتزوج ولما جيت افكر حاولت اني اختار انسانة قريبة من امي لاني بسكن في نفس البيت في شقة مستقله وتفادياً للمشاكل لكثر مااسمعه بين الزوجه وام رجلها.

المهم دورت ودورت ودورت واخترت بنت بنت خالتي وقالو ياسلام طبعاً امي وافقت على طول لان امي بكل صراحه انسانه عنصرية بمعنى الكلمة ماتقارن في عنصريتها الا هلتر لان عندها اعتقاد ان الي يقربون لها هم افضل البشرية والي يقربون لابوي هم حثالة مجتمع انا اتكلم بصراحه عشان تفهون المشكلة صح وطبعي ماحب المجاملة و التملق بالكلام.

احد الاسباب الي خلاني اخذ بنت بنت خالتي هو ان امي عنصرية ولو اخذ وحدة من اهل ابوي بتصير حرب في البيت لان امي الله يهديها مشوهه صورة اهل ابوي عندنا تقول عنهم كلام ماينقال للدرجة انها صارت تكرهني لما اقول لها عيب تكلمي على اهل ابوي قدامنا وتزرعين فينا كرههم، مالكم بالطويلة اخترنا بنت الاجواد هاذي الي حطوها ميساء مغربي قدامي للدرجة اني صرت احط صور ميساء مغربي خلفيات لجوالي ذيك الساعة وكل ماجيت انام ابوس الجوال وانام، رحنا وخطبنا وتملكنا ومشت الحياة وكانت وقتها تدرس اخر سنة ثانويه وكل مناسبة اجي ادلدل يدي جايب لها هدية مالت علي والله

ويوم نجحت رحت وشريت ساعة الماس الله لايخسر ( لو اني داري كان جايب تقليد )

خططت على الزواج ورحت وحجزت القاعة بخمسين الف وراح الوالد وجاب قنوات فضائية للتصوير الزواج وحجزت في افخم الفنادق ثلاث ليالي وخليتهم يسون لي جناح عرسان وناموسيه على السرير وكيك وشموع وخربطه اكتشفت بعدها اني دلخ وان المره ماتنعطى وجه ودخلت عليها ومن اول مادخلت وانا صاكها نومه ونايم بدون ماعطيها اي تعليمات وش احب وش ماحب مثل مايسون الرجال

اعرسنا والحمد الله وحجزت شهر العسل على النمسا وسويسرا والمانيا واخذتها من بيتها ماتعدت بيتها واول مره تركب طيارة معي وعلى اوربا على طول وتمشينا واستانست ومشكلتي اني اعطي المره وجه واجامل واسكت طبعاً بداية الزواج كنت اشوف المره ماتصحى الا لما اصحى وشنطتي اي فندق نسكنه انا ارتبها وهي الاخت ماتسوي شي سكت وقلت يارجال شهر عسل خلها تنبسط ماعمرها شافت شي وصغيرة سن توها 18 وخلها تدلع وراحت وشرت هدايا لكل اهلها عاد اهلها ماشاء الله كتيبة كاملة تقضيت لهم كلهم كني معرس عليهم كلهم

رجعنا للرياض وقعدنا اسبوع ووديتها لا اهلها عشان توريهم الصور والهدايا الي جايبتها من بلاد برى على ماقالو المصريين
اول مشكلة صارت وهي عند اهلها طبعاً رجعت البيت وصكيتها نومه ولا صحيت الا 10 بالليل ويوم صحيت واحصل مليون الف مكاملة !!!
قلت اكيد فيه شي ولا هي ماتت !!
يوم دقيت قالت بكل نفخه وينك خير ليه ماترد !؟
وانا مستغرق في النوم قلت خير وشفيه نايم تبين شي قالت ليه ماترد البنات يضحكون علي يقولون هههههههههههه مادق عليك سحب عليك ....؟؟

قلت وانا وش دخلني فيهم نايم تبين تصدقي ولا بكيفك واصك السماعة واكمل نومي.

بعدها ولاني طيب قلب رحت واخذتها وقلت يالله بنمشي جدة بنروح نتمشى واخذ خواتي معي وواديها جدها والعبها في الملاهي واشتري لها وادلعها علماً ياجماعة ولله اني كل سفرة ماعمري سكنتها في سكن اقل من 5 نجوم فنادق جدة كلها تعرفها وجربتها يمكن.
رجعنا ياجماعة الخير وبديت الاحظ ملاحظات عليها البنت تنام ماتصحى الا المغرب وكل ماجيت من الدوام اجي القى امي الله يهديها مطلعه لها الاكل وترسل لها الشغالة تنظف لها ويسون لها كل شي وحاطينها اميرة.
انا ضاق صدري من الموضوع هذا وقلت لا اشوفك نايمه ولا حياة لمن تنادي مير كني اكلم جدار كل ماجي احصل الاخت نايمة قعدت لها فترة تصحى لما اجي من الدوام وبعدها رجعت على طريقتها.
المهم بعد فترة عرفت انها حامل وانا متفق معها مابي عيال الحين خاصة اني بديت الاحظ عليها انها ماهي راعية بيت.

قدر الله وحملت ولما دريت قلت لازم تنزلينه خاصة انه في الشهور الاولى وحاولت وهي حاولت بس مالله كتب وكملت الحمل وحملت الاخت وصرت اخذها معي وهي حامل لان كان عندي دورة في جدة واسكنها في الهيلتون ابي ادلعها وابي اهلها يدرون اني ماني مقصر معها وسبحان الله مشاكل في مشاكل انسانه بمعنى ياناس ماتصلي مادري وش ديانتها هندوسيه ولا بوذيه ولا وش مذهبها ورغم هذا ساكت واذا قلت لها يابنت صلي قالت انا اصلي مو لازم تشوفني اذا جيت اصلي ووش دخلك ؟؟!!!

سكتنا وقلنا صبر جميل والله المستعان مشت الايام طبعاً كان عندها حب التطفل وانا انسان اكره التطفل من اياً كان اشيائي ماحب احد يتعرض لها ولا يضيعها ولا يلمسها للدرجة اني شاري لها مثل ماشري لنفسي عشان ماتعرض اغراضي حتى مقص الاظافر لها مقص ولي مقص لان هذا طبعي اغراضي ماحب احد يضيعها لي ولا ياخذها.

البنت سلمكم الله احس اني دلعتها بزيادة كل مره نتهاوش وبعدها اسفرها وانسى كل شي لي سنتين الان وكل سنة تمر لابد انها تسافر اقل شي 3 مرات وهذا غلط فيني وهي لازالت تنافخ وتصايح وتنام، اخر مره من شهر 5 الى نهاية الصيف وهي من ديرة في ديرة معي بس برضو كان فيها هواش ورفعة ضغط.
طبعاً ماهو مدحاً لنفسي ياجماعة بس ولله اني ماقصرت في شي ولادتها اخليها تولد في افخم المستشفيات وتعالج في افخم المستشفيات ولا اوديها حكومي واقول لها ترى انا اوديك ابي مقابل ابي معاملة حسنة وتقدير للي اسويه كله ترى انتي مانتي مثل خواتك شوفي وش سويت لك وهم وش سوو لهم رجالهم وللاسف تقول ليتك مثلهم بس اقول الحمد الله اني مختلف عنهم انتي خواتك اقصى ماوصلو له جدة وانتي مابقى مكان مارحتي له بس قدري الوضع هذا ازين لك .
مالكم بالطويلة البنت هاذي عوبا عوبا عوبا وكم مره تهاوشت انا وياها تخيلو ياجماعة سلة فواكة قعدت شهر ورب الكعبة شهر لين عفنت على الطاوله ماشالتها ويوم تهاوشت معها تقول البيت نظيف وهي اكبر نصابة انا اشوف الوصاخه في كل مكان ولا فيه ترتيب ولا تنظيف ولما ارتفع صوتي وجو اهلي تخيلو وش صار امي يوم قلت شوفي راحت امي وترميها في الزبالة ماتبي ابوي يشوف عيوبها واطلعها من الزبالة واقول خلي ابوي يشوف ليه تغطين عليها انا تعبت منها ماتفهم.

جربت كل الطرق معها بس تتوب يومين وترجع بعدها مثل ماكانت ولو تسئلها العذر جاهز على طول وليتها تتأسف بالعكس تعاند وهي احسن الناس في نظر نفسها،

استخدمت جميع الوسائل معها الهجر الضرب طبعاً غير المبرح اقصى شي عندي كف عساها تفهم والكف ترى ماجا من فراغ
لكل فعل ردة فعل ولانها تسبني تخيلو !!! حتى اهلها علمتهم بس للاسف تجي وتقعد تصيح عند امها ولا نها دلوعه الماما يحسون الغلط علي واموت قهر...

المشكلة الاخيرة طبعاً هي تبي تدرس في الجامعة وانا قايل خدامة انسي اجيب لك والحين عندنا ولد وش سوت الاخت راحت لامي واتفقت معها ان امي تعتني بالولد وقت ماهي تروح للجامعة وامي وافقت لها وقلت لها اوكي خلها تدرس يمكن تخالط مجتمع صاحي يعلمها كيف الحياة الزوجية ورحت وجبت سواق عشان يوديها،

طبعاً لها اسبوع كامل ماتصحى الاخت الا 12 بالليل وانا انام 11 بالليل بصراحه ضاق صدري يلعن ام الحياة عايش مع صديقي انا مو زوجه وليتها واقفه على كذا لا اهتمام في الجسم ولا اهتمام في البيت ولا في الولد اقصى ماتسوي اذا صحت من النوم غيرت للولد وشربت حمضيات وكاكو كنها عربجية !!

الولد كان تعبان ولما صحت الاخت سئلتها قلت عطيتيه علاجة قالت ايه قلت شلون ايه وانتي نايمة من امس حتى صلاة ربي ماتصلينها قالت انا سائلة الدكتور يقول مره تكفي قلت مو انا الي جايب العلاج مره ماتكفي لازم ثلاث مرات المهم حاولت تكذب في الاخير قالت خلاص ياخي بعطيه .

قلت سوي لي اكل قالت مافيه طماط مافيه بصل قلت اكيد مافيه ورى ماقلتي لي قالت شلون اقولك قلت اكيد اسبوع نايمة عندك العذر الولد يسهرك زي كل مره وتاخذينها حجة جاية للبيت مبتعثة من عند اهلك اكل ونوم وخدمة وبس..............

طبعاً ياجماعة ولله ان الاكل والمعلبات في مره من المرات يوم فتحت الدرج انها منتهي تاريخها بس اشتري على الفاضي وفي الزبالة ختى خواتي صارو يحرصون على عيالهم لاياخذون شي من عندي ياخفون يكون منتهي تاريخه وليتها تحس ماتحس

واذا سئلتها وين الاغراض تقول عيال اختك ياخذون ومادري ايش تتحجج بأي شي وفي الاخير اكتشف انه منتهي تاريخها

جوالات اخر اجهزه لاب توب اخر نوع بس مايفيد الدلع

عموماً كل هذا امشية واسكت ابي الحياة تمشي طالت المشكلة وارتفع صوتي وهي كالعادة يرتفع صوتها والاعذار جاهزة وهذا الي يرفع ضغطي وتتكلم علي وعلى اهلي حتى ماتستحي ولا في وجهها حيا وكل مره اهددها بس للاسف ماينفع حتى العرس قلت ولله ماطلقك الا لما ابرد كبدي فيك بعد كل الي سويته لك تجازيني بكذا انتي ماتسوين عندي شي ومثلك مثل الجدار، والجامعة مافيه انسي..

قالت اذا مافيه جامعة ودني لااهلي قلت يعني مامجلسك الا الجامعة قالت ايه وانت خيسيس ونذل وملعون وكلب وحيوان!!!!!!!!!!!!
وش تبي بعد !!!!

بروح للجامعة وادشر مع البنات وبقلب ولد عندك شي ؟؟
تبي تقول لا اهلي قول ماعلي منك واهلي ستر وغطاء علي !!!

وانت اصلا عارفة انك بتقول كل شي لهم مانت مخلي شي قلت ولله لا اقول بس بعد كلامك هذا انسي اني اطلقك كذا تروحين بارده مبرده لا مافيه ابد
قالت عشان ولدك خذ فضلتك مابيه يومين وانسى..........
يلعن شكلها هاذي وين عايشها خويها انا تتكلم معي كذا !!
قلت لا ماهو عشان الولد بس ابي ابرد كبدي فيك لين اعرس عليك بعدها اخذ ولدي وتنقلعين لا اهلك انتي عوبا عوبا عوبا ماتربيتي
وش رايكم ياجماعة في هالحكي ترى ولله احس اني صابر عليها صبر ايوب ولله لو انه غيري كان قطع العقال على ظهرها

ياجماعة البنت هاذي تحس نفسها مستقلة بحياتها
تخيلو لما يجي عرس انا اعطي وهي تعطي ماكان الحساب واحد اخرها خالها معطيه في عرسة 2000 ريال واكتشف انها بايعة ذهب ومعطيته انهبلت قلت ترى الذهب لك ماني محتاجة احفظيه وماله داعي تفرقي بينا.

ياجماعة ابي حل مع هالانسانة
لاتصلي ، وعنيدة وترفع الصوت وتنافخ ولا تسمع الكلام وتحس نفسها احسن الناس وانا انسان جاي من عالم اخر تشوفني مريض نفسي بالله من المريض النفسي ياناس ولله اني سئلت اكثر من شخص ابي احاول اطلع نفسي الغلطان عشان ماتسرع في قرار اندم عليه وللاسف كلهم يقولون هاذي عوبا ومتمرده.

تكفوووووووووووووووووووووووووووووووووون ابي تفيدوني

التعديل الأخير تم بواسطة ذكريات لاتغيب ; 23-09-2011 الساعة 11:57 PM السبب: تحريم اللعن وخاصة سب الدهر

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه