اعتقد والله اعلم ان زوجتك تعاني من اكتئاب مابعد الولادة...

انا عاااانييييت منه والحمدلله له الفضل والمنة راح مني بعد 7 شهور تقريبا...كنت مثل ماقلت عن زوجتك ماكنت اهتم بالبيت ولا بنفسي ولا بزوجي ولا ببنتي...بنتي كنت اكرهها حتى ما استمتعت بأول شهورها ...وانا عموما شهيتي للأكل كويسة الحمدلله واحيانا زايدة...بس في الفترة هاذي كنت ما آكل واذا احد جابلي اكل وقالي كلي اقعد ابكي كأني بآكل سم....
طبعا الاعراض تختلف من شخص لآخر...المهم اصبر عليها والله ماراح تنسالك وقفتك معاها...وانتبه من الادوية النفسية...صحيح مفعولها كويس بس اذا ساعدتها ووقفت جمبها ممكن تتشافى بدون ادوية افضل...واهم شي الدعاء واللجوء الى الله بالاعمال الصالحة...والاستغفااار..
الله ييسر اموركم انت وزوجتك..

من الان اقولك زوجتك ماراح يتحسن وضعها الا لما تكبر البنوته
يعني ع الاقل سنه ونص
على ما يتنظم (البنوته) نومها وتبدا تاكل وتشبع وتنام كويس وتنفطم عن الرضاعه الطبيعيه لو كانت ترضع وتسنن يعني
تطلع سنونها وترتاح من الله يكرمك الاسهال والترجيع و ارتفاع الحراره واللتهاب الاذن والحلق وووو
هنا مربط الفرس راح تنام زوجتك وتاخذ كفايتها من النوم وترتاح نفسيآ جسديآ ولما تصحص راح تقوى
وتبدا نفسيتها تنفتح للأكل والطبخ والبيت ويكون عندها وقت لك وراح تبسطك
العله با التعب والسهر وقلة النوم وعدم كفايته
يعني زوجتك تعبانه هلكانه شقيانه مع البيبي ومن حقها تاخذ قسط من الراحه حتى تلتقط انفاسها
قلة النوم يؤدي للأنهيار وخربطة هرمونات وتعكر مزاج والطفله من جد اذا كان صعب
وربي انه يوصل امه للموت . يدافع البلا
يعني لو اهلها قريب منكم اتركها يومين ترتاح عندهم واليوم الثالث تجيب
وحده من اخواتها يساعدونها بترتيب البيت
ولا وحده من اخواتك ولا حتى شغالتكم
ولو مافي جيب لها شغاله بساعه مؤقته ترتب وتطلع
وهم انت ساعدها خل لك دور با البيت تساعدها وياريت واتمنى
انك اذا قمت بعمل شيء سواء لك ولا للبيت ما تجلس تمن عليها او تعايرها هذا بيتك
مثل ماهو بيتها وماشوف فيها شيء لو تعاونت معها
تريحها تريحك
وتكسبها وقت حتى ترتاح وتقوم فيك
والوهن والضعف لأنشغالها الشديد بتربية بنتها والعنايه بها وهذا امر صعب كثير
اهم شي حاليآ تنام ترتاح تتغذى كويس مو لازم اكل لا انا افضل السوائل لانها مفعولها سريع
تشرب حليب طازج وتحط فيه بابونج يريح الاعصاب ويرخيها ويانسون
تاكل تمر مع لبن تشرب عصير افوكادو وعصير موز مع عسل طبيعي
تشرب زبيب يمني طبعآ مائه هذا يرفع نسبة الدم وسبحان الله مفعوله سريع ونتائجه تبين بسرعه
تكثر اكل الوريقات الخضراء سبانخ جرجير خس ووووو
تعمل لها عصير كامل مكون من توت فروله رمان زبيب يمني شمندر كرز وبعد ماتخلصه تاكل وراه 3 حبات تمر
وهذي الوصفه انا مجربتها وربي انها عجيبه ترفعه نسبة الدم بشكل ملحوظ وغير كذا تبدا تورد وجناتها وتحمر
ويروح الشحوب
طبعآ العصير تصفيه وتشربه كل يوم ومع استمرار اكل التمر وشرب الحليب الطازج
وخلها تكثر سلطات وفواكه وتاكل لحم يعني مثلآ تاكل مندي او شوربة لحم او صينية لحمه مع بطاطس
او مرق خضار مع لحم .
صدقني راح تتغير صحتها 180 درجه , غير كذا لو كانت مرضع راح ينفعها كثير هي وبنتها
وماراح تحس با الوهن
بعدين لاتنسى ان الولاده لها تاثير كبيره ع المراه
تفقد الكثير الكثير من الدم غير كذا انت قلت مصابه با الفقر
وغير الاكتئاب والتعب النفسي والجسدي
غير التغيرات الي تطرا على جسمها من تشوهات تترك وقع مرير بداخلها
تشققات ارتخاء ووووووو ما الى ذالك
فيستحسن انك تبدا ترفع من معنوياتها وتغير نفسيتها وتغض النظر عن اشياء كثيره بذات في البيت
وانت بموضوعك تمدحها قبل الانجاب وتغير حالها يعني مو بيدها غصب عنها خارج عن طاقتها
وامكانياتها
الحرمه طاقه ماهي بمكينه او اخطبوط لها الف يد والف قلب وش بتخلي وش بتبدي
يا حبت عيني عليها كافي صحتها مدهوره بعد تزيدها هم
عادة الطفل اول ما ينولد وتخرج الحرمه من الاربعين
تصري وشوية لخبطه وكركبه بحياة الزوجين والنظام كله ينقلب فوضى
بعدين حبه حبه يتحسن الوضع وتصير حياتكم مع البيبي مره حلوه وناسه
الله يعينها ويقويها
وترجع تطمنا عنها وان شاء الله حالها يتغير للأفضل .

شوف اخوي معلومه مهمه فقر الدم يجيب الاكتئاب
وضيقة الصدر والتعب من اي مجهود،،،،
ويمكن زوجتك والله اعلم مصابه بالعين ولازم لها رقيه
لاني مرت علي هالحاله مالي نفس لشي وبس جالسه اهوجس
ولاآكل ولا انام وضايقه فيني الوسيعه
والحمدلله بعد الرقيه تحسنت بفضل من الله
القرآن شفاء حتى من الامراض العضويه
حاول فيها تقرأ سورة البقره يوميا او انت ارقها وانفث عليها
وفي الماء والزيت وتتصدق بنية الشفاء والدعاء
وتكون على طهاره طول اليوم وتتغذى كويس
وبتشوف النتيجه بعد شهر ان شاءالله
اسأل الله العظيم ان يشفيها شفاء لايغادره سقما
ومرضى المسلمين.

الله يشفي زووجتك وان شااءالله اياام وتعدي على خير وانت تحملحها وان شاء الله مااراح تنسى مووقفك معهااااا..
ابشر بالدعووه في ظهر الغيب لك ولزووجتك..والله يخلي لك بنتك..

اخوي كتبت كل شيء ولم تقل انك سألتها عن سبب ضعفها

اسألها اخوي وشف يمكن مقصر فيها بشىء ......... نفسيتها تعبانة من شيء .............. ترا النفسية لها دور كبيرر في النشاط والحيوية

والله يوفقكم

إذا تقدر توفر لها خادمـــه تساعدها بشئون المنزل فلاتقصر
إذا ظروفك ما تسمح..ساعدها وعاون وسو لها تحليل للغدة لأن الكسل والخمول من أعراضها

__________________
اللهم صلي وسلــم على سيدنا محمد
وعلى أصحـــاب وأزواج سـيدنا محـــمد
يارب إني مسني الضر وأنت أرحم الراحميـــــن..لا إله إلا أنت سبحانك إني كنت من الظالمين

لي عودة للتعقيب إن شاء الله ..

مشكورين على اهتمامكم ..

الله يوفقك وجزاك الله خير على كل اللي بتعمله تجاه زوجتك
واتمنى لها الشفاء العاجل بإذن الله وترجع لك بنفسية احسن وافضل يا رب

السلام عليكم ورحمة وبركاته ..

الحمدلله الله الذي لا يحمد على مكروه سواه ..

زرنا المستشفى وطلع معاه فقر دم ..

طبعا فعلت الآتي :
1/ جبت لها خدامة
2/ غيرت لها جو ومشيتها ..
3/ مؤسستي دوامي لها صار جزئي .. يعني بمعدل ساعتين باليوم فقط ( وقت العصر ) . طبعا وضحت لها إنه هالشهرين فقط وبعدين بداوم إلى العشاء أو بعد العشاء بساعة
4/ وديتها هايبر بنده .. ههههههههههههه أول مرة تسوق عربية ههههه وأول مرة أشتري بهالمبلغ 1358 ريال تقول حق شهرين عشان ماتروح الشهر الجاي ( ياعيني على الكسل ) ههههههههههه
5 / كافأتها على على اهتمامها بالبنت وبالبيت ومن هالكلام .. والحمدلله تحسنت زوجتي كثير وخاصة نفسيا .. وهو الأهم ..

الله يكتب أجركم وما قصرتوا ..

تقديري لكل من مر من هنا

الله يخليكم لبعض ياارب ولا يغير عليك وعليهااااا اهم شي هاايبر بنده والمقااضي حقت الشهرررين ههههههههه واهم شي نفسيتها ارتااحت عشاان انت بعد ترتااح نفسيتك وبالتووفيق ياارب,,,