أخي الفاضل... لي عوده ان شاء الله... بتغدى و برجع لك... بس شكلك من الإمارات ممكن تقول لي من وين؟ بشوف لك بعض الحلول و من ضمنها التوجيه الأسري...

انا من دبي وعن حلول ما خلليت توجيه الاسري وغيره مالهم دور الحين وحتى وداد لوتاه له ما منها فائده مجرد تمويه وكلام بلا فائده عندهم. اذا حد يقدر يحل مشكلتي الله ومن بعده هي ام ساره نفسها تقتنع وترجع او انني اتزوج باسرع وقت ممكن عسب انسى كل شي وعقب لو تموت ما ارجعلها . ما اعرف ليش سوت جذي كل شي له حد وانا على حافة الحد هذا وبنفجر اى وقت ، تعبت والله تعبت نفسيتي صدق تعبت ، ويا جماعه توجيه الاسري ولا غيره مالهم دور لسببين واحد ما منهم فائده لان بس كلام قبل نعم كان يجتهدون والحين مجرد تمويه ويكملون يومهم ويستلمون الراتب ، والسبب الثاني انا الردي طلقت طبعا صبا عنى عن طريق القاضي طلقه وحده. الله يرحمني بس.

أخوي انا ما اعرف كيف في ردي السابق ما انتبهت انك طلقتها...

الحين انت طلقتها في المحكمه... طلاق بائن ب3 طلقات او طلقه واحده فقط؟ و إذا كان بطلقه واحده فهل انتهت العده او ما انتهت؟

إذا ما انتهت العده تقدر ترجعها و بدون رضاها و تقدر ترجع للفتاوي في هذا الموضوع... إذا العده بعدها ما انتهت روح رجعها في المحكمه و خذ الورقه من المحكمه انك رجعتها أثناء العده و روح لبيت أهلها (في هالوقت لا تصر انها ترجع معاك البيت)... كلمها بالهدوء و الشرع و بدون تذلل هالمره و قول لها انك مازلت قائم على العشره و انك مكانتها في حياتك ما تغيرت (بدون كلمة حبيبتي و غناتي و غيرها)...و انك رجعتها اليوم في المحكمه لأنك تبي تحافظ على بيتك من الشتات و انك طول الفتره الماضيه اقررت بأخطائك معاها و انك متفهم انك جرحتها الفتره الماضيه و لكن آن الأوان نحكم عقلنا و نفتح صفحه جديده من أجل العشر سنين اللي عشناها مع بعض و من ا جل بناتنا و بيتها مفتوح وقت ما حبت ترجع بتمر تاخذها... و انتهى الموضوع عندها..

بناتك: مب من حقها تمنعك من التواصل معاهم... و ما له داعي التصعيد للمحكمه.. لكم اخوانها بالموضوع و بكل هدوء و بدون عصبيه و بدون التلميح انك بتروح المحكمه او انك ما تبي مشاكل... هالكلام ابدا لا تقوله لأنه يشحن و لا يهدأ الوضع... افتح حساب قاصر في البنك باسم كل وحده فيهم و هذا افضل شي في حالتك و شهريا حط مصروفهم فيه و عط امهم في جلسه عائليه البطاقه البنكيه لكل بنت و حتى لو رفضت الأم انها تاخذهم و سمعتك كلام طنش و لا كإنك تسمع و اترك البطاقه و روح... هالشي واااااااااااااااااااااااااااااااااايد مهم... لأنك لازم تفكر لبعيد شوي... وضعك المبالغ الماليه كل شهر في حسابهم راح يثبت للمحكمه انك تعطي النفقه لأبنائك و راح تكون نقطه ضدها في حال ارتفع الموضوع للمحكمه...

إذا طليقتك طلعت من العده فلازم تعرف انها حاليا محرمه عليك و ما يجوز تكلمها باي كلام غزلي و تودد لها بأي طريقه و حتى لو كان السبيل ارجاع العائله.... روح لعائلتها مثل ما قلت لك و اطلب الجلوس معها و كرر نفس الكلام اللي قلت لك تقوله قبل و زيد عليه... انا حاولت اصلح وضع الأسره و اقريت باخطائي و ما في انسان معصوم من الغلط... و الحمدلله اخطائي ما تعدت هفوات و ما ارتكبت اي كبيره من الكبائر تستاهل ان العائله تتفرق بسببها... و انا بذلت كل اللي وسعي في سبيل اعادة المياه لمجاريها و ابري ذمتي في حالة انها رفضت ترجع بعدين... و اتركها فتره تفكر و لا تتواصل معها بتاتا...

الجانب الديني:
- في سجودك ادعي " ربنا هب لنا من أزواجنا و ذرياتنا قرة أعين و اجعلنا للمتقين إماما" و قبل التسليم كذلك... لأنك وقتها تكون في حضرة الله سبحانه و تعالى و تكون لاجئ له...
- قيام الليل: صلاة الفجر عندنا في الإمارات تقريبا الساعه اربع و نص.. قوم الساعه 3 و نص و صل ركعتين و ادعي ربك إذا كان رجوع طليقتي لي فيه خير لي و لها فارجعها لي.. و إذا كان الرجوع شر لي و لها فاصرفها عني و اصرفني عنها... ادعوا الله بقلب موقن بأن الله سبحانه و تعالى يعمل الخير لنا وين..
-الصدقه: يوم واحد في الأسبوع اشتر وجبه غداء ل48 عامل تتكون من ماي و عصير و صحن عيش و لحم (كله ما راح يكلف اكثر عن 350 درهم) و بنفسك وزعها... روح اماكن تجمع العمال او اماكن البنا و وزع بنفسك هناك و انوي بالصدقه تفريج الهم لك... و إذا شفت العامل بس قول له ادعي لي اسرتي تجتمع... دعوتهم ان شاء الله مستجابه...

أهم نقطه... من اللحظه احذف رقم طليقتك من الموبايل... و اتخذ الخطوه اللي قلت لك عليها و اختفي نهائيا و تواصلك علشان عيالك يكون مع احد اخوانها فقط... خلها تعرف ان اي حب يقابل بالصد ممكن ينتهي بعدين... أحيانا الحرمه تكون عاطفيه و ما تفكر بعقلها فاتركها شوي تفكر... بس مع تنفيذ خطوه الذهاب لبيتها و بعدها اقطع التواصل نهائيا معها.... لا مسجات و لا شي... حتى لو تبي تسأل عن عيالك كلم احد من اخوانها...

أخوي في النهايه حابه اقول لك... كون على يقين ان الله سبحانه وتعالى يحب الخير لكل عباده... و كل شي يصير لنا لحكمه منه سبحانه ما نعلمها... إذا ما رجعت طليقتك لك... انساها و اتمنى لها الخير... و لا تنسوا الفضل بينكم يا خوي... ادعي لها بكل خير و توكل في طريقج... و شوف نفسك وقتها و ابدا دور على زوجه خلوقه تكون زوجه أب طيبه مع بناتك...

انت مب ردي يا خوي... لا تقول جذى عن عمرك بارك الله فيك...

انزين ننسى التوجيه الأسري... و نركز على النقاط اللي ذكرتها في ردي السابق...

يا رب تكون ما طلعت من العده يا رب...

و اخوي ابيك تهدى شوي... اعرف غصبن عنك و ما تروم بس اهدى شوي...

ممكن تسير مينا السلام و تسوي مساج (طبعا رجل هو اللي يسوي لك المساج مب حرمه)... علشان بس شوي تسترخي...

او روح البحر و اسبح....


المهم طاقة الغضب اللي فيك حاليا تطلع منك...

بارك الله يا اخى او يا اختى ، مشكوره انج طلعتي وقت وكتبتي كل هذا بارك الله فيج/فيك.

اولاً بخصوص الطلاق نعم طلقه وحده وهى طلعت من عدة يعني ما اروم ارجعلها الا بعقد يديد .
ثانيا من ناحية انى اروح لاهلها وكلمهم. اصلا من فتره طويله حاولت معهم لاكن هم له شجعوها من بداية واخوها العود ما تدخل بشي كلمتين ثلاث نصحها واخر شي قال كيفج سوي له تبين وهذا يسمى عمره ولى امرها. قبل لا اطلق كلمت امها كلمت اخوها رفض يكلمني امها قالت انا بكلمها وغيرت رايها ليش فقط اساس ام ساره مب راضيه طيب كلهم يعرفون اسلوبها معىى وعصبيتها واخوها اعترف انتي بعد غلطانه في وايد اشياء بس مثل ما قلت محد اهتم . قبل شهر بطلاق وافقت وزقرني اخوها وتفاهمنا خلاص كل شي اوك بس ردت ام ساره غيره رايها . حاولت حاولت بكل الطرق وصح الحين ما راح احاول واصلا ما كتبت لا مسج ولا شي على رقمها من يوم ما طلقت ، بس وفرت تلفون حق عيالي بس مثل ما قلت ما اقدر اوصل لهم ولازم كل مره اتصل في حد لين يكلموني. وعن النفقه ادفع شهريا اعطي بنتي ساره تودي لامها. من اول اسبوع من رمضان مسافره هي والعيال واهلها لين ىالحين ما ردو اتصل بالايام ما ترد عسب اكلم اليهال يعني هذا مب ظلم. انا ابا بيتي يرجع مثل ما كان واذا النسيان سهل جان نسيتها زمان بس ما اعرف شو اسوي والله ما اعرف.

مب سهل تنسى لأنك حسيت انك فقدت بيتك فجأه... شي عمرك ما توقعته و لا حسبت له حساب... لهالسبب انت حاس بالذنب و حاولت المستحيل انك ترجعها...

اخوي... هل لك رغبه انك ترجعها لك؟ إذا لك رغبه سو الخطوات اللي قلت لك عليها... لا تقول حاولت و حاولت... خلها آآآآآآآآآآآآآآآخر محاوله يا اخوي..

و رجاءا رجاءا رجاءا... دام الأمور مع زوجتك وصلت لدرجة انهم ما يردون عالموبايل.. اقول لك رجاءا... إذا ما تبي حساب خاص (خاصة الحين مع قوانينا الحلوه اللي تقول لك ادنى حد في الحساب 3000 درهم او بينخصم منه) لالالازم يوم تعطي المصروف لبنتك يكون في حد شاهد عليك... أخوي انا اكلمك بمنطق قانوني لأنك ما تعرف الأمور اللي تصير في المحاكم... صحيح انا احسن الظن في ام ساره بس ما تعرف شو ممكن يصير في المستقبل... ما ابي يجي يوم من الأيام و تنكر انك كنت تدفع نفقة العيال... هالأمور القانونيه مهمه وايد... و ياما صارت في المحاكم... و محاكم دولتنا انا ادرى فيها... صحيح الأمور تطول.. بس معظم الأوقات تكون بصف الحرمه...

و انا اختك بارك الله فيك...

عموما اخوي... كن على ثقه ان كل شي له حكمه... خاصة اذا الإنسان بذل كل الأسباب في سبيل الوصول للي هو يبيه و مع هذا ما وصل له... معنى هالشي ان في حكمه في الموضوع نجهلها..

تقدر تحاول محاولة اخيره و لو الموضوع خير لكم انتوا الإثنين ان شاء الله راح ترجعون لبعض...

بارك الله فيج يا اختي ، انا قررت اهدي الموضوع شويه شهر شهرين وعقب بشوف مانه قبل شهر كنت قاعد في بيتهم جدام امها واخوها العود وتاسفت منها جدامهم ، بس تدرين مب سهل حتى لو دريت انه يمكن يكون خير لى بس شو اسوي ذكريات والندم على خسارتي ، كان البيت فيها روح والحين كله ظلام وهدو له يذبح مجرد اطلع على غرفتي فوق واكون داخل لين يوم الثاني اطلع فقط للصلاه. انا ما اقدر اتخيل حياتي مع وحده ثانيه ، اباها هي وبناتي وابا اموت بين اهلى وعيالي وما عندي قدرة ابدا من يديد ، دعواتكم ان الله يهدي ام ساره وتفكر وترجع بيتها امين. ومشكوره على مشاركتج والله يجزيج كل خير .

[QUOTE=bosara1;2846708]بارك الله فيج يا اختي ، انا قررت اهدي الموضوع شويه شهر شهرين وعقب بشوف مانه قبل شهر كنت قاعد في بيتهم جدام امها واخوها العود وتاسفت منها جدامهم ، بس تدرين مب سهل حتى لو دريت انه يمكن يكون خير لى بس شو اسوي ذكريات والندم على خسارتي ، كان البيت فيها روح والحين كله ظلام وهدو له يذبح مجرد اطلع على غرفتي فوق واكون داخل لين يوم الثاني اطلع فقط للصلاه. انا ما اقدر اتخيل حياتي مع وحده ثانيه ، اباها هي وبناتي وابا اموت بين اهلى وعيالي وما عندي قدرة ابدا من يديد ، دعواتكم ان الله يهدي ام ساره وتفكر وترجع بيتها امين. ومشكوره على مشاركتج والله يجزيج كل خير .[/QUOT

السلام عليكم
ياخوي اسمع كلامي وبعد عنها وطنشها ولاتوريها انك ميت عليها والله والله والله وانشأالله انها بتندم وبترجع
ياخوي الحرمه الي تاخذ قرار بدون دراسه وتفكير صدقني انها بتندم و بترجع انت لاتلوم حالك
هي الي ماعرفت تتعامل معك وتحتويك وتبي تحط راسها براسك يمكن انك غلط بس مو الغلط الي يدعو الى خراب البيت

انا مو فاهمه ايش هاللخبطة المشكلة بتخص مين samad123 ولا bosara1 انا بدي انجن حدا يفهمني؟؟؟؟؟!!!!!!!!!!!!!!!