اولا تسلمين على هالاسلوب الراقي حبيبتي مسزداني .. فعلا النقاش هنا هادئ بدون حروب
علشان جذي حبيت اشارك فيه واعرض تجربتي .. ولا في العادة ما احب مثل هذي النقاشات اللي فيها وايد خلافات

شوفي حبيبتي ..

انا موظفة وزوجة وام لاخواني ولعيالي .. قبل لا اتزوج كنت موظفة بس بوظيفة بسيطة علشان اصرف على اخواني
بعد ما تزوجت زوجي شجعني اكمل دراستي والحمد لله خذيت الباكالوريوس والماجستير وترقيت الى ان غيرت وظيفتي
وصرت الحين مديرة والحمد لله .. ابو عيالي مو مقصر علي بشي وموفر لي كل شي من غير لا اطلب .. وحالف علي
ما اصرف اي درهم من راتبي او فلوس المشروع على البيت او العيال الا اذا ابي اخذ لهم هديه .. وانا حالفه عليه
ما يصرف اي درهم على اخواني وبيتهم الا اذا كان يبي ياخذ لهم هديه واتفقنا على هالشي ..
رفضت دخول الخدامة في البيت من بداية الزواج الى اليوم .. بس اخواني عندهم خدامة تخدمهم .. كنت موظفة
وربيت اخواني وعيالي وقمت بزوجي وبيتي .. بمساعدة زوجي .. وانا اللي خليته يشيل المسئولية معاي وهو يضحك بعد
عمره الدوام ما اثر على حياتي الزوجية والعائلية .. اللي ساعدني وجود حضانة في مقر شغلي فكنت اخذ عيالي معاي
الصبح واحطهم في الحضانة اللي في الدوام .. وامر عليهم كل شوي .. واحيانا اخليهم عند اخواني لانهم متعودين عليهم
ومتربين معاهم .. الشغل بالنسبة لي مو علشان المادة .. انا في نعمه الحمد لله .. لكن انا تعودت على حياتنا جذي
ومرتاحين فيها .. انا اكره الروتين واحب اقدم خدمة سواء في البيت او الدوام .. حياتي مع عيالي وزوجي بوجود الدوام
حلوه .. وفيها حركة .. وقلت لزوجي ابيك توعدني انك اذا شفت اني مقصرة في البيت وبحقك تخبرني وبترك الوظيفة ..
دوام زوجي مريح بالنسبة لي .. دوام بنظام الشيفتات .. يعني لما نتقابل في البيت احرص على ان تكون اجمل الاوقات ..

اجهز الفطور والغدا بنفسي قبل لا اروح الدوام .. واحرص اني افطر معاهم واحيانا اكتب رسالة حلوه لزوجي وعيالي
واحطها جنب الفطور .. عودت العيال من عمر 4 سنوات انهم يرتبون فراشهم وينظفون مكان لعبهم وان يستحمون
بنفسهم مع تشجيع .. ويوم كبروا شوي استخدمت معاهم نظام الجدول اليومي مع المكافآت .. فكل واحد عارف مهمته
وحريصة جدا ان تكون حياتنا فيها الكثير من المرح واعمال الخير والنشاطات ..
تربيتي وزوجي لاخواني وخواتي وعيالنا الكل يشهد عليها الحمد لله .. ناجحين في مدارسهم ومن الاوائل .. متميزين
في مواهبهم .. حريصين على الطاعات واعمال الخير .. تفكيرهم وافكارهم فيها ابداع .. ومحترمين .. والان انا وزوجي
نحفظهم القرآن بعد ما الله من علينا بحفظه ..

اللي ابي اوضحه من تجربتي اختي ان المرأة يوم تفكر صح وتنظم امورها صح وتعزم تقدر تسوي كل شي بإذن الله
حتى تقدر تخلي زوجها يشيل معاها المسئولية وهو راضي .. وصدقيني لو اشوف ان شغلي يأثر على اي جانب في حياتي
على طول بحاول احل الخلل .. واذا ما قدرت بستقيل
ونعم احترم ربة المنزل بشرط ان لا يكون وجودها في البيت مثل عدمه .. الطبخ والغسيل والعيال مش هذي بس الحياة
الزوجية .. هذي الامور يبيلها تنظيم بالتالي بيكون عندها وقت فراغ كبير .. تستغله بالشي اللي يسعدها ويسعد زوجها
وعيالها ..

انا ضعيفه بالنقاش حبيبتي .. بس بغيت اطرح تجربتي واثبت لكل اللي يقول ان النساء العاملات مهملات للبيت والزوج
والعيال .. بأن في نساء عاملات ناجحات وعيالهم متميزين وازواجهم سعيدين والحمد لله ..

بالتوفيق حبيبتي مسزداني وربي يسعدج ..