يا اخوان ابغض الحلال عند الله الطلاق ..أصبري أختي لعل الله يصلح حاله ..و دمتم سالمين

__________________
JoJo_55

السلام عليكم و رحمة الله و بركاته...

اقتباس:

زوجي بعده صغير وعمره 24 سنة ,, وكلمة توديه وكلمة تجيبه وكلمه توديه ففكرت ان احنا نطلع بشقة لحالنا بعيدة عن منطقة بيت ابوه .. علشان يكون معاي من الدوام للبيت .. وتكون مشاكلنا بروحنا وماتكون مسموعة للي يسوى ومايسوى ... ويكون قريب مني بدال مايتحجج لي ويقول لي انا راح انزل لاخواني الصغار او من هذا الكلام .... ويلجأ لي في مشاكله ويكون قريب مني ومن بنته مع العلم ان راتبه 1800 ريال واجارات الشقق ماتنزل عن 1250 ريال شهرياً ... بس ان شاء الله تطلع لي وظيفة قريبة بــ 2000 ريال وانا راضية بس اهم شئ اعيش مستقرة ومتنازلة عن المصروف وحتى لو ناكل بس خبز حاف ... بس ابي اعرف رايكم ؟؟ هل مممكن انه يعتدل أو رايي فيه نوع من المغالطة أو تلاحظون شئ انا مالاحظته وممكن استفيد من تجربتكم ... خلوكم معاااااااااي لاني بجد تعبت نفسياً

فكرة حلوة الإنفصال عن أهل زوجك...على الأقل تحسي بالخصوصية...

بس برضك لا تتنازلي عن حقوقك...زي المصروف..و إيجار الشقة ممكن يساعدوكم فيه الأهل..

و ممكن زوجك يحسن من وضعه و يلاقي وظيفة أفضل...

أما بالنسبة للإنفصال فأنا لا أنصحك به..

علشان بنتك...لا تخربي بيتك..بسبب صعوبات ( من خلال كلامك) أتوقع فيك قوة تتجاوزيها...

وبعدين منت أول واحدة في الدنيا تواجهها صعوبات في بداية حياتها...خصوصا مع زوج صغير...دي ضريبة الزواج

المبكر...بس بإدن الله فترة و تعدي....

أسأل الله العظيم أن يريح بالك..ويهدي زوجك...و يفرج كربكما...

__________________
أدعوا لي ربنا ينور لي دروبي..و ييسر لي أموري..و يفرج لي همومي..و يبارك و يوسع لي في رزقي..

تسلم اخوي اللي بالفعل اراحني مع الشكر الجزيل اللي وقفوا معاي من

خلال ردودهم ... وأخر التطورات ان صاحب زوجي كلم البيت وكلمني على اساس

يعرف وش اللي ابيه منه وقلت له اذا وافق على شروطي من ناحية احترام وأخذ عليه

تعهد انه مايضربني ولو وش يصير وانه يتحمل مسؤولية ويبطل عنه الاستهتار

ويحاول ينسى عادة البخل ويهتم ببنته وبيته ويطلعني بشقة بروحي ... اذا وافق على هذي

الشروط وقدم راحته على راحتي وفكر بسعادتي وشولن يرضيني ويعيش

مستقر بين بنته وزجته موافقه بس يكون الكلام هذا كله قدام اهلي ... لان اهلي من

جيت للحين وهم تعبانين وضايقة بهم الدنيا على حالتي .. وان شاء الله خير

والحين اخواني ايش تحسون من قراري هذا وشروطي ؟؟؟

اذا فيه شئ انا ماانتبهت له او المترتب على طلباتي وشروطي من ناحيته او ممكن يتغير او

لا ؟؟؟ فساعدوني اكون لكم شاكرة والله يرحم لي والديكم

السلام عليكم :

إلى صاحبة المشكلة ::؟!
نحن لم نسمع من الطرف الثاني شيء ، ولم تذكري شيء من محاسنه ،،
ولكن ... ،

إذا كان زوجك يصلي وأنتي ترضين دينه فاصبري عليه وكوني له من الناصحين لعل الله يهديه ..

هدي أعصابك شوي ..! ترى الدنيا فانية

أسأل الله أن يوفق بينك وبينه ويصلحه لك ويصلحك له

وأسأل الله أن يرزقكم من خيري الدنيا والآخرة

عزيزتي ام نور
زوج مثل زوجك حتى وان ابدى ندمه سيعود على ما هو علية فالحياة معه جحيم لا يطاق
لا ادعوكي لأبغض الحلال ولكن ما الحل وهو كذلك
اذا كنتي تستطيعي الصبر من اجل ابنتك فاصبري ولكن الى متى فاسمحيلي ابوك لن يدوم لكي طول العمر فمن اين يتصرفين عليها وهو بخيل

بصراحه الطلاق افضل بحالتك واستفيدي من الدورة التدريبية لعلكي تستطيعين العمل والصرف على نفسك وعلى فكرة نحن في قطر توجد لدينا مؤسسات لحماية المرأة والطفل ويؤخذ تعهد على الزوج وتتدخل السلطات فهل توجد لديكم مؤسسات مماثلة
اتمنى من اللله ان يمن عليكي بالهدايه ويهدي زوجك وجميع ازواجنا
والحمدلله على كل حال

اختي صاحبه المشكله...
الرجال من صنف زوجك كثار...
اسمحيلي احلل شخصية زوجك حسب ما فهمت من قصتج...
1-تزوج و هو صغير و يحسب نفسه رجل
2-منعدم الشخصيه عند الكل لكن عندج سي السيد
3-نظرا لزواجه المبكر فهو غير مؤهل لتحمل المسئولية يعني يشوف انه معاشه لازم يكون له مو لغيره (حتى بنته و زوجته)
4- انتي الغلطانه

واليكي الاسباب
1-الرجل مهما كبر ووصل حتى لعمر التسعين فهو يظل طفلا من الداخل(هذا رأيي) فما بالك برجل(صبي) عمرة 20 سنه(اول ماتزوجتيه كان عمره 20 سنه صح؟؟) يعني في عز طفولته هذا تقدرين باسلوبك تلفين مخه و تحطينه خاااااتم باي اصبع يعجبك
2-عندما تزوجتي كان عمركي 18 سنه يعني ما لومه يفرض شخصيته الضعيفه عليكي لانك ايضا صغيره و يمكن ما عندك احد من اهلك (خواتك) يعلمك مكر النساء قبل الزواج..لكن و الله العظيم يا اختي م غير مبالغه اعرف فتيات في عمر ال 17 او حتى اصغر.... عقلها يوزن بلد و تزوجت اصغر منك و مشت زوجها على عجين ما يلخبطه و يا سلام لو يكون ذلك الزوج مثل زوجك(صغير) بصراحه تعيد تربيته و تشكله على كيفها...ما اقصد انه يكون خبل مثلا...لكن يكون في عز رجولته و شخصيته فل الفل...لكن طلبات الهانم اوااااااامر.....
3-اختي الحبيبه و الله العظيم ضاااااق خلقي و انا اقرأ قصتك...و الحين تأكدت ان في حريم لحد الحين بهذه السذاجه......


اليكي عيوبكي:
1-لا تعرفين فن التعامل مع الاطفال(الرجال)...
2-من اول مرة ضربك فيها عديتي السالفه و كأن شيئا لم يكن...اذا سكتت المرأة على ضربها مرة فهي الغلطانه... انتي ساكته كل هالسنوات على الاهانه و الحين تقولين تعبت....سكتي على اهانتك امام اهله...هل تعرفين معنى ذلك؟؟؟ هل تعرفين معنى ان يمد الرجل يده على زوجته؟؟؟لا و امام اهله؟؟؟
3- ما سأقوله الان هو من ناتج خبرتي ...كزوجه تقدرين تقولين زوجه مخضرمه...هههههههه...هونيها و تهون.....المهم.....بصراحه بصراحه بخصوص موضوع المصروف يمكن اول الايام كنتي تستحين تطلبين فلوس لكن مع الايام تعود زوجك على انك لا تطلبين منه بل هو يعطيكي متى ما رااااق باله....لكن انا اظن ان هذا الموضوع يجب ان يكون محلول و متفق عليه من الاول خصوصا انك كنت تكلمين زوجك قبل الزواج....
4-من اول مرة دخل فيها اهله كان المفروض يكون لك موقف حااااازم...ومعنى كلمه حااااازم يعنى انك لا تلينين من مسج او من مكالمه(فكلام الليل يمحيه النهار و العكس صحيح)
5-اكبر خطأ هو تعودكي على صرف ابوك لك و هذا الشيء لا يقبله رجل على نفسه و حتى اذا قبله سيتعود و ما يشيل المسؤوليه


مميزاتك التي يستغلها زوجك:

1-طيبه
2-مو ملسونه( مو سليطة اللسان)
3-تنطقين و تسكتين


اخيرا الحلول:
1-تنفصلين عن اهله (تطلعون بشقه بروحكم) علشان انتي تبعدين عن اهلك و هو كذلك
2-تضعين شروووووط واضحه و محدده لذلك الطفل(زوجك) و يجب ان يسمعك عدل للاخر و يسكت و انتي تتكلمين(انا اقصد ان يحترمكي)
3-تحددين مصروف سنع لك فقط و ابنتك هو والدها و هو المسؤول عن مصروفها(حمليه المسؤوليه)
4-قوي شخصيتك و خلي كلمتك موزونة
5- يجب ان تعلمي ذلك الطفل ان هناك شيء بالعالم اسمه احترااااااام
6-اعلميه ان كل ما يحدث بينكم يبقى بينكم و لا يتدخل اهله بتاتا
7-مثل ما انت تحترمينه لازم هو يحترمكي و هذا شيء غصب عنه مو بكيفه



على فكرة اختي الرجال باول الزواج دايما يحبون يفرضون شخصيتهم...فما بالك بطفل مثل اللي عندك؟؟؟
اما من الناحيه الجنسيه فانا اعرف ان الرياضي يحافظ على نفسه فلا يمارس الجنس بكثرة....بس من ناحيه بروده و استحقاره لكي لا تنسين هالنقطه... وتكلمي معه بهذه النقطه بينك و بينه


عندي احساس انه راح يتغير للاحسن و الله يو فقك



دوووووووووووووووووووووت

اختى

ما عليك إلي الصبر وان شاء الله ينز ل عليك الصبر بأذن الله سبحانة وتعالى

بس والله قصة تصلح حق مسلسل درامي

أعود لكم حبايبي وشاكرة لكم حلولكم وبالخصوص أختي الكويتية دووووت ...

أخر الاخبار والتطورات طلب اليوم انه يشوف بنته وامي قالت لي خله يشوفها

وبعدين كلمني على جوالي ورفعته وقام يتأسف لي ومن هالكلام وقال لي

بكرة (( الخميس )) بجي من الدوام وبطلع معاج بمكان بعيد بس انا وانتي ونقعد

نتفاهم بدون ماحد يتدخل فينا وتحطين شروطج وأحط شروطي ونتفق عليها ونتنازل

عن بعضها فقلت له ارد عليك بكرة (( الخميس )) .. وكلمت امي وقلت لها اللي صار

فقالت لي .. تبين تروحين لزوجك روحي والامر يسعدني اني اشوف بنتي مستقرة في

بيتها مع زوجها واولادها بس انا متأكدة انه ماراح يتغير لانه تربى بهذي التربية

ونفس المجتمع اللي هو تكون فيه يعني أساسه غلط وانتوا بديتوا غلط فماأظن انه بيتغير

وانا مااقولج انج تيأسين من رحمة الله ... بس انا عارفة ان عاطفتج اقوى من عقلج والحين

جى هو ولحس مخج بهالكلمتين .. ومومعقولة انه في شهر والا اسبوعين بيتغير ... لا هذا النوع

مايتغير .. وبعدين هو لو عنده كلام ومعتبر نفسه رجال .. يجي هني البيت لابوج وابوج يوقف

عمامج بالسالفة علشان يقول ان وراها اهل .. بس ابوج مايبي يكلمه والا يحط لسانه بلسان زوجج

مو تفكرين ابوج ساكت عنج طول هالمدة معناتها مو جايب خبرج ؟؟؟ لا هو يبيج تجين انتي

له وتقولين له رايج انج موافقة عالانفصال علشان لو صار شئ لاتجين بعدها بكم يوم وتلومينه

وعلشان يوكل اقرب شيخ ويقوله يسّر البنت بس انه يكلمه مرة ثانية فهذا لا لانه مابيتغير ...

هذا الكلام اللي مكتوب فوق كلام الوالدة لي ... وانا الحين زادت حيرتي والهم ذابحني وحاسة الدنيا

طابقة على انفاسي وصعوبة الطلاق جايبة لي الرعب وحاسة اني بموت قهر وحاولت اهدي نفسي

بس مو قادرة العيشة معاه صعبه بس الطلاق صعب صعب صعب وموقادرة اتأقلم عالوضع وخايفة من

الاستخارة وكل ماجيت بكلم شيخ علشان يسوي لي الخيرة .. يايكون نايم الا بالمسجد والا محد يرد

وكذا شيخ وكل بنفس الحلة وحتى الشيوخ صاروا يتغلون ؟؟؟ ساعدوووني خلاص خلاص الهم شيبني

الله يكوووون بعونك حبيبتي

طولي باااااالك شوي وهدي نفسك يا وخيتي

بصراحة انا استغربت من كلمة خايفة من الاستخارة!!!!!!؟؟؟

وخيتي من الألطف والارحم والأعرف بالصالح لك واللي فيه الخير مو رب العالمين؟

شلون اجل تخافين من الاستخارة

بالعكس الاستخارة كلها خير ورااااااحة واطمئنان وفيها تفويض كامل للي خلقك وخلق العباد انه يتولى أمرك

بعدين تعالي هنا يعني شلون شيخ يسوي لك الخيرة؟

الاستخارة الانسان يسويها لنفسه وما فيه احد بيكون احرص عليك من نفسك يالغالية

عموما يا قلبي لا تضيقين صدرك ولا شي


اذا تبين شيخ تستشيرينه فيه الشيخ محمد بن صالح المنجد عنده درس يومي بعد صلاة الفجر بتوقيت المنطقة الشرقية بالسعودية .. وهذا رابط للموقع اذا فتحتيه روحي للبث المباشر بتلاقين خانة مكتوب فيها (ارسل سؤالك حول المحاضرة) .. اكتبي سؤالك وارسليه للشيخ طبعا ما يشتغل الرابط الا بوقت البث

http://islamicaudiovideo.com/

وكان عندك برنامج البالتوك للمحادثة .. الشيخ المنجد عنده غرفة هناك ينقلون نفس الدرس وبعد الدرس يجاوب على كل الاستفسارات والاسئلة.

ولو تبيني اسأل لك انا ما عندي مانع بس انتي صيغي لي السؤال بالضبط وحطيه لي هنا

وانا اجيب لك الرد بتسجيل صوت الشيخ ..

وش تبين بعد؟ آمري وكلنا ان شاء الله بنخدمك باللي نقدر عليه
بس نبي دعواتك

الله يشرح صدرك ويزيل همك وكربتك عاجلا غير آجل