السلام عليكم ورحمة الله وبركاته ..

قررت قرار نهائي لا رجعة فيه .. سوف أعطيها ورقتها وأريح نفسي ما أبغى أعلقها لأنه ربنا سوف يحاسبني على ذلك .. ولكن ربنا عالم من الظالم ومن المظلوم .. العادة الزوج ظالم ولكن في حالتي الله العالم كم صبرت لعل وعسى ..

بالأمس وعندما ذهبت شقيقتي لإحضار بنتي .. خرجت أم زوجتي وزوجتي وأختها في محاولة للاعتداء على شقيقتي وقالوا لها "مافي لكم بنت عندنا وبينا المحاكم".

أم زوجتي كل ماراجعها أحد من الناس تلعب دور المظلومة وتقول لهم أنتم ما تعرفون أيش مسوي في ينتي قولوا لهم يتقوا الله بنتي يتيمة ..


بالطبع والدتي لما يرجعون لها الناس ويسألوها وش صاير بالضبط فتقول لهم كل القصة وقصص قديمة من غير ماتزيد فيما حصل .


المهم أتصلت أمس أم زوجتي بوالدتي تقول لها:
"أنا رحت عند شيخ وقالي أنه مالكم في البنت لازيارات ولايحزنون والبنت لأمها .. ولو ما بطلتي توسطين ناس وتقوليلهم ويش صار .. با خلي عيال أختي ينشرون قصص عن بناتك في الانترنت ويقولون أنك تدخلين عليهم عيال البيت يزنون فيهم .. وولدك ماعرفتي تربيه ولا ما كان تخليه يضرب بنت عمرها 3 سنين وتسكتين له. وأن شاء الله تجيله زوجة ترويك نجوم الظهر ... ويارب تصيرين عمياء وتجي ولدك مصيبة وترى أنا دعوتي مقبولة"


أمي طبعا ردت عليها ..
"أنا غرضي من أني أقول للناس عشان يراجعونكم وربنا عالم بنيتي .. أنت مالقيتي طريق على ولدي وتبين تتبدعين عليه أي شي .. وترى دعوة الظالم ما تنقبل أما بناتي الحمد لله كل وحدة في بيت زوجها .. واتق الله في نفسك لأن لكل داء دواء الا الحماقة أعيت من يداويها وأنا ما أحب قلة الخير وكلامك مردود عليك "


وعلى قولهم اخر الدواء الكي .. والطلاق هو الحل لا محالة والله يمهل ولا يهمل .

بسم الله....اخوي الاحظ من فقدان زوجتك ابوها في عمر صغير....انها تحتاج لرجل ترى فيه اباها......فهمت قصدي....حاول انك تكون مثال الرجل الفاهم العاقل....وان تحن عليها في كل صغيره وكبيره....وان لا تجيب لها كل مطلبها حتى لو كنت تستطيع......وانشالله ربنا يجيب لك اللي فيه الخير.....


وبالله التوفيق

__________________
أقسى كلامي لك رجى وأعذب كلامك لي جروح
مافيني شي منك نجـى وانت تخليني وتـــــروح

مشكور أخوي مجرد إحساس لكن للأسف قراري هو أني أعطيها ورقتها في أقرب وقت والأن أحاول أعرف عن مدى صحة كلامهم بأني بعد الطلاق ليس لي حق في أن تبات عندي بنتي أبدا .. البعض يقول أنه لك من ليلة الى ليلتين في الاسبوع حسب تقدير القاضي فلو فيه منكم أحد عنده خلفية الرجاء الافادة

وشكرا

علما بأن بنتي عمرها 3 سنوات ونصف الان وكل ما أكلمها تقولي أنا ما أحب بابا . أسألها ليش ما تحبي بابا .. بابا يحبك وانت ما تحبيه؟

ترد علي بعفوية الأطفال لأنه ماما تقولي لا تحب فلان بالأسم؟

وبعدين !!

شقلنا !!

انا كم مره اقولك اصبر ؟؟

انت ليش على طول استسلامي ؟؟

وبعدين انا قايله لك ان المساله بتتطور ويمكن ماتمر ببساطه يعني ممكن تتعقد ممكن تضيق
بس في الاخير بتنفرج وتنحل وانت الكسبان في كل الحالات


افهم ولاتنسى موضوع انك اتطلق انساااااااااااه

مو وقته الطلاق وانت مو خسران شي مستعجل ليييييييييييييش !!!

اهي تبي تروح المحاكم تروح !! بس انت صمم على رايك ولاتطلق
ولو كنت انت ماتبيها فعلا فخل قرار الطلاق اخر شي يعني تحصيل حاصل
بس مو اللحين !!
يعني لانها طلبت تتطلق تقوم تطلقها !!
لازم شوي تتعب وبعدين انت عادي ماراح تتضرر لو ماطلقت بس اهي المتضرره لو ماطلقتها
فخلها شوي تتعب في المشكله اللي هي وامها السبب ماتبيهم يتعبون ويروحون للمحاكم
خلهم يشوفون نهاية حركاتهم وين بتوديهم
وانت خلك هادي وعلى اعصاب بارده ولا ياثر فيك كلامهم

كنت متوقعه يطلع منهم تصرف همجي وهاي اللي خلاني احذرك تروح لهم ولو بنية الصلح !!
بس ترى عااادي اخوي تصير مثل هالمشاكل واخس منها
وتوصل لضرب وقطيعه بس بعدين تهدى النفوس وترجع المياه لمجاريها
يعني عاااادي تصرفهم!!!
اهم مقهورين ومتخبطين ومايدرون شلون يتصرفون بس صدقني تصير مثل هالامور
مبين انهم بدوا يفقدون اعصابهم بس انت خليك ريلاكس

شوف انا اعرف قريبه لي تطلقت وولدها عمره سنتين او اكثر
وحكمت المحكمه لزوجها انه ياخذ ولده ثلاث ايام في الاسبوع ولمده ثلاث ساعات ويرجعه
بس ماظن وافقوا له يبات ولده عنده بس ياخذه بالساعات ويرجعه لامه
وهذا اللي اقدر افيدك فيه بخصوص بنتك
بس انا اعرف ان زوجها من قبل يطلقها طلع حكم من المحكمه انه يشوف ولده يعني مانتظر الين يطلق زوجته
وانت تقدر اتطلع هالحكم من المحكمه اللحين وتشوف بنتك وتاخذها بامر من المحكمه

اما عن كلام بنتك عاادي لان امها ماثره فيها
بس لمن تشوف حنانك وطلعاتها معاك راح تنتظر الايام اللي انت راح تجي تاخذها على شوق ولهفه
مافي طفل مايحب السياره والطلعه والحب والحنان

وقوي قلبك .. اذا ام بنتك اللي هي (ام )!!! مافكرت باضرار الانفصال على بنتها !!
تقوم انت تتاثر وتفكر باضراره !!

خلاص......!! قدر الله وماشاء فعل ولاحول ولا قوة الا بالله هي اللي حدتك لهالشي

اما انت فلازلت لاخر لحظه مصصم ماتطلقها

حتى لو ماكنت تطيق زوجتك بس علشان بنتك!!

تتزوج عليها ايه من حقك!!!

توافق على رجعتها بشروطك بعد من حقك!!!

بس طلاق لا !!!

وهذا اكبر دليل لبنتك مستقبلا انك كنت لاخر لحظه شاري امها بس هي اللي عندت !!




وبالتوفيق

اختك صريحه جدا

__________________

ياأخي الكريم استخر الله أكثر من مرة وإن ارتحت لطلاقها فطلقها ..

أعوذ بالله من حياة الذل والإهانة والجحيم ..!!

ياأخي هذا ابتلاء لك من الله ، ودرس في الحياة لكي تستفيد ..

ورغم إني مطلقة ، وكثيرا ماأقف (بسبب تجربتي السابقة) ضد الطلاق ، وأحزن أن تهدم البيوت بالطلاق ..
ولكني في حالتك أنت بالذات أؤيد الطلاق ..
أتدري لماذا ؟!
لأنه الحل الوحيد الذي سيؤدب زوجتك ..

أتذكر قصة حصلت للأستاذ خليفة متخصص أسري كبير ومعروف ، يقول جاءني زوج يشتكي أن زوجته تضربه ..
يقول : فانصدمت من غرابة الشكوى ، وقلت : كيف تضربك وأنت الرجل ؟!
أحبها ، ولذلك صبرت عليها ..

يقول فجمعته هو وزوجته في مكان واحد ، وكنت قد أمرته أن يطلقها طلقة واحدة ثم إذا تأدبت يردها قبل انتهاء العدة ..
يقول وبينما كنت أتحاور مع زوجته ، أرسلت للزوج إشارة أن (((طلقها))) ..فتردد كثيرا ..

والزوجة تضحك وتقول : هذا مستحيل يطلقني ، مايقدر ..أتحداه ..!!
يقول فتشجع الزوج وقال : أنت طالق ..
يقول فسكتت الزوجة لحظات ، ثم أجهشت بالبكاء وأخذت تعتذر لزوجها ..
يقول الزوج : فمامدت يدها علي بعدها ..

شوف اخوي لايفل الحديد إلا الحديد ..
وإذا لم تكن حازما معها فاسمح لي أن أقول : أنت ضعيف شخصية ..

ثم تأكد ابنتك لن يضيعها خالقها ..
ولن تضيع المحكمة حقك فيها أبدا ..

أنا مطلقة وطليقي يأتي كل اسبوع يأخذ ابنته من أربع إلى خمس ساعات ، وكنت قد سألت أحد القضاة فقال لي ( يحق له أيضا أن تنام عنده يوم يومين ) ولكن الاستقرار يكون عند الأم ..


وفقك الله وأصلح لك زوجتك أوعوضك خيرا منها ..

شف إذا طلقتها ، كن حازما واحذر أن ترضح لأي محاولات خارجية أو داخلية لارجاعها ..
وإذا بقي على انتهاء العدة أسبوع (علما أن عدة المطلقة ثلاثة اشهر)، خيرها بين الرجوع بشروط وبين الفراق ..
فإن قبلت بالشروط فردها وغير أسلوبك معها إلى الاقوى وواصل واستمر إلى الأبد ..

وإن لم تقبل قل لها ( الحريم غير ك كثير) ..
ابحث لك عن زوجة وتحرى في السؤال عنها وعن أمها فكما قيل ( اقلب القدر على فمها تطلع البنت لأمها)..

__________________
أحب جبالك يالجنوب وأحبك لأنك أنتي الجنوب

لاحول ولاقوة الا بالله

الأخت صريحة جدا وزرقة البحر ودفء الحياة وجميع الأعضاء ..

أشكركم جميعا على تشجيعكم المستمر وأخذكم بيدي ..

أختي صريحة جدا ..

تقولين أنا ماراح أخسر شيء سواء طلقت أو ما طلقت ..

أقولك .. أنا في الأول لما كنت حريص على أن بنتي ما تعيش حادثة انفصال ابوها وأمها كنت مطول بالي عالأخير ولكن بعد أن زادت تصرفاتهم وخرجت عن المألوف الى الهمجية والعنترة .. فوالله أكون أغش نفسي وأغش بنتي وأغش زوجتي لو قبلت ترجع لي بعد اللي جرى .. فبما أني مقتنع أقتناع تام بأني لا أستطيع الاستمرار مع زوجتي بعد محاولاتي العديدة فلماذا أنتقم منها بتعليقها ؟؟ فيه رب يأخذ لي ولبنتي بحقنا .. وأنا ما أبغى ربي يحاسبني على تعليقها لأني في قرارة نفسي خلاص ما أبيها الحين .. لو كنت معلقها وأنا لي نية أرجعها كان ممكن أقولك كلامك صح.

ياعزيزتي أنا أنسان أعمل في جامعة صباحا وفي المساء أدرس للتحضير لشهادة الدكتوراة وخلال الثلاث أشهر الماضية لم أنجز أي تقدم في بحثي لأن تفكيري كله في بنتي ومتى سوف تنتهي مشكلتي ولو أستمريت على هذا المنوال سوف أخسر كل شيء .. فلابد أن أضع حد لهذي المشكلة وأمضي قدما وأستفيد مما جرى لي مستقبلا أن شاء الله.


أختي زرقة البحر ..

قصة جميلة وقد مرت علي في شريط للأستاذ القدير جاسم المطوع ولكن أصابع اليد ماهي سوا ولا وش رأيك أنتي؟؟

أما عن أني ضعيف الشخصية فصدقيني أن شخصيتي والحمد لله معتدلة فيني من القوة وفيني من الضعف .. وضعفي هو بنتي اللي ما أبيها تعيش حياة بائسة وفي كل مشكلة تصير أتنازل على الدوام لأن صورة بنتي وهي تتنقل من بيتي لبيت أمها تصيبني بالضعف وأرثى لحالها كثيرا .. وقوتي أنما هي من عند الله باتباع شرع الله وسنة نبيه عليه الصلاة والسلام. حاولت على الدوام أن أكون حليما مع زوجتي لأني رضيت بها بكل ماجبلت عليه من خير وشر ولكن أن أرضى بتدخلات أمها وتجاوزاتها المستمرة فالله ماقالها ..


لو أن تعلقي الشديد ببنتي يسمى ضعف شخصية فأنا أضعف مخلوق في هذا الكون .. أكيد كل أب وأم لهم نفس الأحساس ولكن أنا عندي أعيش في نكد طول عمري ولا تعيش بنتي معقدة بسببي أنا وأمها. إلا أنني فكرت في المشكلة مرة أخرى ووجدت أن أنهي هذه العلاقة الان ببنت وحدة أفضل كثير من أن أنهيها لاحقا بأكثر من طفل.

لا حول ولا قوة الا بالله
الله يكون بعوونك

اخوي مو العبره انك تعلقها!!
العبره شي ثاني !!
واللي اقصده انها ماتضرك يعني اخطب وتزوج وعيش حياتك عادي ماعندك مشكله مو مثلها لازم تتطلق
علشان تتزوج ......... وثانيا لو هي فعلا قررت ترجع البيت وخلاص موافقه على شروطك وقتها انت تقول
انا ماعاد ابيها وهي طالق ............. يعني انت بتطلق بتطلق شي اكيد بس مخليها للاخر

بس خلاص اخوي انت شكلك مقتنع ماتبيها وماتنلام انت طيب وماتحب المشاكل
بس هذا ابتلاء من الله وانت صبرت وهذا حدك مع انه والله العظيم ان فيه مشاكل تصير اكبر من كذا
وترجع الزوجه لزوجها ومع الوقت تتحسن العلاقه
و انت الله يلوم اللي يلومك
واللي انت حاب تسويه سويه احنا حاولنا نساعدك باللي فيه الخير لك ولزوجتك
بس زوجتك معنده ........وانت مستسلم واسمحلي على مستسلم لان انا كان ودي انك تستمر
لاني حاسه ان شخصيتك سلميه وفيها طيبه وهدوء وتنازل ودايما انت اللي تبادر في الصلح
وانهاء المشكله بس احيانا تعند وتصمم على رايك
وحابه انك تتعود على المشاكل شوي مع زوجتك الحاليه قبل ماتطلقها وتتعلم الصبر للمستقبل
ترى ماتدري يمكن الزوجه الثانيه لمن تشوف طيبتك وتساهلك تتمادى بعد وتعيد نفس القصه
وقتها ماظن راح اتطلقها اكيد راح تصبر !!!
علشان جذيه حابه انك تتعلم من الزوجه الحاليه الصبر وقوة التحمل والتطنيش
ومايمنع انك تخطب اللحين يعني ليش ماتدور لك على بنت الحلال من الحين
وقولها انتي الزوجه الثانيه بس اذا اثبتي انك زوجه كفؤ راح اطلق الاولى
وانت اصلا الاولى بتطلقها بتطلقها بس علشان الجديده تشوف انك تركت زوجتك وام بنتك
لخاطر الجديده لانها تستاهل التضحيه لحسن عشرتها معاك وتقدر تقولها دايما
انا ضحيت بزوجتي وام بنتي لاجلك لانك تستاهلين وانت كفؤ تضحيه

اخ Fahacci

صدقني يا ماسمعت من الحريم مشاكل من ازواجهم من ضرب واهانه وتقصير بكل شي
وحتى طلاق مايطلقها الا بعد طلوع الروح واحيانا احس ان المشكله صعبه جدا
يعني لو انا صاحبة المشكله بانهار من تعقيدها برغم ان الحق مع الزوجه بس الزوج يكون لئيم جدا
ويناحس زوجته لاخر لحظه حتى بعد الطلاق يناحسها بولدها وماينضبط بكلام المحكمه من نفقه
ومن حضانه يعني المحكمه مثلا تقول ياخذ الولد ساعتين يخليها عشر ساعات والمحكمه تقول
النفقه 500 ريال وهو يدفع 300 او مايدفع شي رغم انه قادر !!!
لدرجه ان الزوجه او المطلقه خلاص تتنازل عن كل شي وماتطالبه باي شي!!
تبي تفتك منه بس يحل عنها !!!

لكن انت كل هالامور غير متوفره عندك !!!

رغم ان مشكلتك مقارنه مع غيرك من الازواج تعتبر بسيطه ورغم ان الحق كل الحق معاك

ومع هذا ساكت وراضي تتنازل ومو خايف الا على بنتك

وبصراحه .............

انت عمله نادره بين الرجال انت طيب وتخاف الله وفيك الخير
ومحد راح يخسرك غير زوجتك

وانا عطيتك كل اللي في جعبتي حبيتك تفهم الحياه وتصمد فيها وتواجها وتتعلم منها

بس انت ادرى بنفسك واللي انت تشوفه لصالحك ولراحتك نفذه وتوكل على الله

ولا يكلف الله نفسا الا وسعها

ومالنا الا ندعيلك

والله الله بالوالده وصها بالدعوه الصالحه والزوجه والذريه الصالحه

وعليك بالدعاء وكثرة الاستغفار

بس في شي !!!

صراحه زعلني اهمالك بشهادتك كله الا الشهاده !!!

استغل هالظروف لصالحك ماتدري لعله خيرا لك !!!

بقولك قصتي مع مشكله من مشكلاتي كانت اسوأهم علي بس استغليتها وكانت خيرا لي
وبنفس الوقت صبرت وجاني الفرج
وراح اقولك مشكلتي اللي صارت لي بحياتي الزوجيه وكانت اخر مشكله كبيره واخر مره اروح فيها بيت هلي
لان بعدها الحمدلله انحلت اغلب مشاكلي الين اختفت وصارت مشاكل عاديه وتقريبا ماتعتبر مشكله
المهم بقولك سالفتي .........
اولا انا عكسك يعني انا زوجي يسمع كلام امه وخواته وبسببها تصير لي مشاكل واروح بيت هلي
وبعدين بشروطي يوافقون عليها ومن ارد يعتدلون شوي ويرجعون مره ثانيه مثل قبل واسوأ
واخر مره تدخل اهل زوجي بحياتنا وتطور الامر ورحت بيت اهلي وكنت اسمح لزوجي ياخذ عيالي
واهلي يستقبلون زوجي ويرحبون فيه وانا اسولف مع زوجي والامر عادي بس تدخل اهله الغير طبيعي
والمستمر بحياتي كان فوق طاقتي!!
تخيل لو مثل حطيت ورد بغرفتي النوم بتقولي ام زوجي ليش تحطين ورد !!
ولوغيرت مكان التسريحه مثلا بيقولون ليش حركتيها من مكانها !! اي تسريحه !!!
والله لو احرك كرسي التسريحه بيقولون ليش !!!
يتدخلون بكل شي مالي خصوصيه حتى في غرفتي النوم وقيس باقي الامور !!!
فقررت مارجع الا وانا في بيت مستقل................
كان موافق زوجي لاني اطالب بشي شرعي بس رد لاهله وشاورهم وبعد غسيل مخ رجع مره ثانيه
واهلي غير موجودين...............
فبدا يسمعني كلام هله اللي حفظه منهم وان مافي بيت مستقل وتهديد.... الخ
ومع انه كان جاي ياخذ العيال مثل كل مره ..... لين يسوي لي بيت مستقل الا انه هالمره قالي
مافي بيت والعيال باخذهم ولا راح تشوفيهم ( طبعا استقل ان اهلي مو موجودين في البيت وانا بروحي!! )
المهم......... اخذ العيال وركب السياره وهم يصيحون وانا اصيح على عيالي !!

وكلمت اهلي وابوي قالي راح يردهم غصبا عنه واوريه ولمن هديت قالي راح يردهم بس انتي اصبري!!!
قلته اللحين تجيبهم لي وزوجي انا مابيه ابي اتطلق !!
وغيرت رايي من بيت مستقل الى طلاق !!وصممت على الطلاق!!
بس ابوي صبرني وقالي لو تبين اروح المحكمه واجيب لج امر من المحكمه وبالشرطه تاخذين العيال
وغصب عنهم بسويها انا قادر وانتي تدرين ... بس اسمعي مشورتي واصبري !!
ماراح يتحملون عيالج وخاصه انهم صغار وسوي بشوري يابنتي صدقيني هم بنفسهم راح يجيبون لج العيال !!
سكت....... ووافقت على راي ابوي مع اني مو مقتنعه وكل يوم اقوله شلون ياخذهم واصيح
بس قالي ابوي اهم يبونج تنهارين!! وانتي دايماً تقولين زوجك طيب بس امه وخواته يعني هذا تصرفهم هم
مو منه .... قلت له ايه ..... قالي خلاص اصبري!! انا افكر للمستقبل وابوج ووهلج ماراح يدومون لج........ !!
وتحملي تنهارين !!
قلت له ماراح يهتمون في عيالي بيهملونهم ..........
قالي الله بيحفظهم........!!
وكل مره اقول لابوي ابي عيالي يقولي اصبري عليج بالصبر!!
رغم انه قادر يجيبهم لي بس قالي جربي نصيحتي واصبري وشوفي !
وكنت وقتها طالبه في الجامعه ووقت امتحانات فكان يقولي ابوي فرصه استغلي عدم وجود عيالج في المذاكره
فرصه تلاقين جو هادي بلا زوج وعيال ..... !!
فكرت في كلامه وقلت خلاص ابوي صاحب خبره وهو دايما حكيم في تصرفاته بمشي على اللي يقوله لي....

وكنت دايما لمن اذاكر اتذكر عيالي !!!

احس اني اسمع ضحكتهم عندي !!

واشوف حركاتهم ولعبهم جدامي !!

اتخيل نفسي اشوفهم يضحكون واضحك معاهم !!

ولمن انتبه واعرف انه خيال وانهم محد ارد اصيح !!

ودموعي تنزل على كتبي !!

وشوي اقول شفيني باستخف !! انا شفيني !!!

وارد اتذكر كلام ابوي (( خليج قويه اصبري وورى الصبر الفرج وركزي بدراستج))

ووقتها امسح دموعي واجع اذاكر وعلى هالحاله!!

لين صارت المساله عندي تحدي فعلا ..........
وصرت اقول اذا برسب في الامتحانات وش العبره اني اصبر على حرماني من عيالي ..........!!
واكرر الله بيحفظ عيالي ........ شوية صبر وبتفرج..... اردد كلام ابوي ............ وبنفس الوقت
اركز بمذاكرتي ............. لدرجه اللي يشوفني في الجامعه ماسكه كتابي واذاكر بكل تركيز
واقدم الامتحان مايصدق اني عايشه بمشاكل ومحرومه من عيالي !!
ومايصدق ان اخر موقف لي مع عيالي وابوهم ياخذهم مني وهم يصيحون وانا اصيح وقلبي يتقطع!!
ومع كل هالظروف !!!!!!!!
النتيجه ماتتوقعها !! والله العظيم درجاتياغلبها امتياز والباقي جيد جدا !!

ماكنت اقدر اجيب هالدرجات وانا مع زوجي وعيالي!!!!!! واللحين مع هالمشاكل اجيب هالدرجات !!!!!!!!!
( يعني فعلا كان خيرا لي )

وكان زوجي واهله يراقبوني!! يعني يسالون عني شلون حالتي ........... فيسمعون اني اطلع
واروح الجامعه واللي ياكدلهم انه شافني في الجمعيه واللي شافني اضحك !!!
وهذا شي قهرهم حسوا انهم ريحوني لمن اخذوا مني العيال !!!!
وبدوا يقولون للناس هذي ماتبي لازوج ولا عيال حتى عيالها وضناها مايهمونها ومطنشتهم
ماعندها امومه ......... وماتعرف وش معنى الضنى....... مافكرت تسال عنهم ولا اثر فيها غيابهم !!!
ولا بعد تروح الجامعه تدرس وتمتحن ومو هامها شي ..... الخ

ووصلني هالكلام وقلت لابوي هالشي قالي من صالحج واصبري....!!!

( لدرجة اني كرهت هالكلمه !! )

وتقريبا من يوم ما اخذ عيالي الين بعد ماخلصت الامتحانات مر شهر تقريبا وانا ماشفت عيالي !!!

تخيل...!!! ..................... شهر. !!!!

وانا ام !!!!

وكنت لمن افقد صبري اقول لابوي كله من تهاونك انت ساكت وهم تمادوا انت ماتحس فيني!!
ليش تحسسهم اني ضعيفه وماقدر اخذ حقي ........ في ابو يسوي اللي سويته فيني رغم انك واصل ؟؟!
فيعصب ويقولي تبين اطلع لج امر اللحين من المحكمه واجيب عيالج من بيتهم بالشرطه ونعلنها حرب !!
انا مستعد .......!! واقدر !! واصلا الشرع والقانون معاج .........!
بس انا حاب انهم هم اللي يجيبون العيال لانهم صدقيني متمللين منهم بس هم مكابرين .......... وانتي محسستهم
انج مرتاحه تدرسين وتطلعين وهم تعبانين بالعيال ......... وصدقيني مستقبلا ماراح يقترحون هالاقتراح !!!
ولا راح يفكرون ياخذون عيالج مره ثانيه ! ولا تفكرين اني مو حاس فيج بس انا ابيهم يتادبون ومايعيدونها
انتي شايفه كم مره تجين عندنا تشتكين وهم الغلطانين وكل مره ياكدون انهم مايعيدونها..............
وزوجك ياكد انه يصير رجال !! ومع هذي يرجع في كلامه ........ فخليهم يشوفون منج تصرف ثاني الشروط
والوعود وكلمة رجال ماتنفع معاهم !!!

وفعلا طلعوا متمللين من العيال ومتحسفين انهم اخذوهم ...... ومره وهم يشكون مني ومن تركي لعيالي لشخص
قريب لنا الاثنين ويتكلمون عني قال حتى لو قلتوا ماتبيهم امهم اكيد هم يبون امهم ودوهم لها خاصه
وهو شافهم شلون ساكتين وهاديين لاني مو موجوده بعكس اول !! وبعد كلامه كانهم ماصدقوا يفتح فمه
وعطوه العيال هو نفسه مستغرب شلون بهالسهوله عطوه !!
وجاب لي العيال وكانت فرحتي ماتتصور !!!!
لميتهم وحظنتهم وحضنوني وقعدت ابوس فيهم وانا ابكي وهم يبكون وحاضنيني بالقوة و كانهم يقولون
والله مانفك ايدينا منج ...!! فديتهم وفديت رجولهم الله يحفظهم ويطول بعمرهم
وابوي كان يشوفني وهو فرحان وبعدين قالي شفتي يابنتي مو قلت لج راح يجيبون لج العيال بنفسهم
بس اصبري !

وفعلا الصبر جاب نتيجه حتى زوجي تغير اعتذر ووافق يطلعني في بيت مستقل عن هله
بعد ماحس انه بيتوهق بالعيال وصدق اني بايعه لدرجة انه اعتقد اني حاطه بالي على حد غيره !!
ونفذ طلبي المشروع ......... مع ان هله رافضين واعتبروه عاصي فيهم !!
بس هو بنفسه حس انه خسران وان ماورى امه وخواته الا المشاكل ولو مايبي يبين لي !!

وبس........ هذي مشكلتي حبيت تعرفها وتستفيد منها وتعرف شلون انحلت بحكمة ابوي ووصيتة لي بالصبر

ومن صبر نال علشان جذيه دايما اقولك اصبر وتحمل واخر الصبر الفرج ان شاء الله

والله يفرج همك ويوفقك ويثبتك ويكتب لك الخير

اختك صريحه جدا

__________________