أصر على السفر والا أكيف حياتي هنا؟
أرجو من اللي يعرفوني يفيدوني برايهم مهما كان .
واللي ما يعرفوني راح أقول مختصر عن حياتي بقدر الامكان حتى يقدروا يعطوا رأيهم .
تزوجت من 34 سنة .. تزوجت صغيرة وكملت اخر سنتين مدرسة عند زوجي وكان مفروض أكمل جامعة لكن كانت قناعات زوجي وقتها أنه الأفضل تكون زوجته ما خبرت الجامعات ولا عاشت جوهم . وبعد الزواج وبعد كم سنة تغيرت نظرته واحترامه للمرأة العاملة ولشخصيتها كان واضح .
ونتيجة لعدة ظروف منها فرق العمر وفرق الخبرة وتدخلات من الأهل بطريقة غير مباشرة كانت حياتنا عبارة عن تعاسة بشكل عام . نظرة مشتركة مني ومنه بأن كل واحد فينا كان له أثر سلبي على حياة الاخر وسعادته .
جمعونا الأولاد والخوف على مصلحتهم ( اللي كان ظننا بأنه مصلحتهم )
وبالرغم من الأثر السلبي جدا على نفسية الاولاد ونظرتهم للزواج إلا أنهم الحمد لله وصلوا لبر الأمان ولو مع بعض الندوب .
والحمد لله أخيرا وصلنا أنا وزوجي لمرحلة جديدة ... كمان كم شهر يكون أصغر 2 (لتوأم) في الجامعة بألمانيا . والبنات ببيوت أزواجهم والكبير خطب وممكن تزوج . وبنكون انا وزوجي لحالنا بالبيت .
كنا ولغاية سنتين أو سنة ونص سابقة محافظين على بعض من مودة وكنت أضحك على نفسي وهو يضحك عليي بأنه في شيء من الاحترام يكنه لي .
لكن حاليا علاقتنا جدا سيئة . ساكتين لكن عدم الاحترام والجفا واضح مهما حاول أنه ينفيه .. وأنا بطبعي ما أقدر أقابل الجفا بمحبة ولا الاستصغار بتجاهل ... طبعي حاد بعض الشيء وأقابل الاستصغار باستصغار مثله . والتجاهل بتجاهل اكبر منه بحيث أحيانا يكون تصرفي مشكوف ومنتقد فغالبا اظل ساكته حتى ما يكون الحق علي.
هو ما شاء الله عنه عنده القدرة على الجدال ويعرف كيف يطلع منتصر من أي جدال ... عمله ساعده على التفوق بهذي الناحية ..
بالمختصر حياة لا تطاق خاصة بأنه ما عاد في سبب أتحمل عشانه .
بدي أعيش مثل البشر اللي حوالي .. مثل أخته وبنت أخته وبنتنا .. مو طالبه مساحة حرية أكبر . خاصة وأنا أدرك الان أنه موافقتي على خصم مساحة الحرية هذي هو إقرار مني بأني ما أستحقها .
هو مرتاح لأنه ملاقي من يقوم بأموره من خدمة وطبخ وتنظيف وأي تواصل اجتماعي وحاجة اجتماعية وحاجة للتقدير يحصلها عند اخته وبنات اخواته واقارباؤه .. وطلعات يروحها لحاله .
وانا عالنت ...حتى زيارة خواتي مو بسهوله تتم ... تعبت من هذا الحال .
وبما انه أصغر أولادنا مسافرين للدراسة وبما أنه اقترح اني أروح معاهم أول فترة لأنهم صغار بالنسبة لموضوع غربة . لقيتها حل من رب العالمين لوضعي معاه ... اسافر معاهم وهو ما يمنعني خلال السفر بمساحة الحرية اللي اطالب فيها .
لكنه رجع بكلامه مثل دايما وقال أمس بأنه ناوي يسفرهم لحالهم خاصة أول اسبوعين وبعدها نسافر انا واياه عندهم اذا الوضع تطلب ... يعني بنتم مع بعض .
وسؤالي اللي حابه تشاركوني التفكير فيه ... هل أصر على السفر معاهم ؟؟ وللا أظل وأطالب بأني أشتغل أو أدرس أو أو؟؟
... يعني أشوف لي طريقة أعيش فيها بكرامه وأحصل على احترام لنفسي مني ومنه . مع العلم اني مو بحاجة مادية .. الفلوس ما تنقصني .
__________________
07-09-2014, 01:49 PM
ضوابط المشاركة
العرض الشجري