مااقول غير الله يصبرني ويعيني
معليش منغثه شوي تحملوني

هل المثل الي قايل
يامربي في غير ولدك ياباني في غير ارضك صحيح

ماذا حصل معك من مستجدات؟

الحين الولد معاه كرديت كارد وابوه يحول له كل مابغى
قلت لابوه لا تحول له الا اذا قلت لك
لانه بصرفها على اشياء غير ضروريه وصار مايرد علي ويطلع ويروح دام الفلوس معاه وعرف المنطقه
اذا بتحول قول لي انا ارتب مصاريفه واعرف وش كثر يحتاج
احسن مايقعد وقته كله برى وانا احاتيه بحجه معاه فلوس وبيصرفها باي طريقه
مارد علي ابوه وسحب وصار يعطيه كل مابغى
انغثيت
هذا جزاتي الي حريصه على الولد
لو يصير له شي انا مسئوله وهو بعهدتي
مسكينه بس الي ماعندها عيال وزوج
جد

هل انا بطلبي هذا غلطانه

صراحه مفروض طلعاته مقيده

ومفروض ابوه مايحول دون علمك لانه معاك ولو حصل شي بينسون غلطهم ويلومونك

خصوصا بعد حالات القتل والنصب ينخاف عليه وهو مراهق ممكن لحظة طيش تضيعه

هالمحرم وجوده زي عدمه الا تفكير وخوف عليه ومسؤليه زايده

مبتعثة معليش ما تزعلي مني ! بس عبارتك غريبة وش خليتي للي طول عمرها عايشة بقرية ولا مدينة صغيرة ولا بحياتها طلعت منها وشافت الدنيا !! وش دعوة عاد خليتي اللي ماعندها زوج وعيال مسكينة وينرحم حالها ! لا تجحدين نعم الله عليك الصحة والعافية والدين والإبتعاث وغييره كثير .. أشياء غيرك يتمناها ولا طال ربعها !

ترى فيه متزوجات يتمنون عيشتك ! نفسها تنفصل وتكمل دراستها ثم تتوظف وتعيش سيدة نفسها بس مبتلشة بعيال وأهل ماهم فاتحين بيتهم لها ! وفيه متزوجات توهم يكملون الجامعة وشايلين مسؤولية بيت وعيال وزوج مدلل كل طلباته أوامر عارفة ليه ؟ لأن الدنيا لعبت فيهم لعب بعد ما صفقتها الحياة عرفت إن الزوج ماهو السند وصمام الأمان وإن الشهادة هي السلاح الأقوى بيد الوحدة !

والأغرب إنك عشتي بأرض الأحلام ولسه عندك تقديس للزوج بهالشكل وكأن الحياة ماتكتمل إلا برجل !


ولد أخوك كان دخلتيه معهد لغة يشغل نفسه فيه ويستفيد؟! بعدين ماني فاهمة شلون أخوك يحول له فلوس بشكل مباشر ولا يسمع كلامك ؟! أخ بهالعقلية ماعنده لغة حوار وتفاهم وولده نمبر ون عنده شلون تقبل يسفر ولده مع أخته !!

ثم 15 سنة صغير يعني سهل تاكلين بعقله حلاوة وتمشينه زي ما انتي تبغين .. المثل يقول إذا كبر ولدك خاويه .. تكلمي معاه وخلي فيه حوار واتفاقيات بينكم .. بعدين هو إجازته مطولة ..؟! إذا لا خليه يشتري وينبسط .. صغيير وبأمريكا والدنيا فاتحة هناك له ذراعيها خليه ياخذ كل اللي في خاطره ~

يامبتعثة .. نصيحة مني إذا بكرة تزوجتي وجبتي عيال عشان تكسبيهم جاريهم وانزلي إنتي لهم ولعالمهم لا تطلبين منهم يطلعون لك ويعيشون معاك سنك !!

__________________
فقدتك يا بعد عمري وحبي وأطهر أشواقي، فقدت أيام ما ترجع فقدت البيت واللمة، رحلتي بالفرح كله وبعدك مابقى باقي، وتركتي وحشة الذكرى تجر الروح يا يمه، يا أغلى قلب ودعني ومثله صعب أنا ألاقي، يا أروع من عن الدنيا رحل وأطهر ثرى ضمه ..💔

فرح تاثرت لما قلتي لا تجحدي نعم ربي
اي والله نعم ربي كثيره
استغفر الله يارب
بالنسبه لمعهد اللغه
هو عارف ان هالمعهد ماله شهاده يعني داخله يتقوى بس
وسبب خلافنا انه ينام ويسحب على الحصص وانا اتنرفز
مااحب يضيع الوقت والفرصه
حابه يستفيد
بس هو حاط بباله انها اجازه ولازم يستمتع وماهو ملزوم يقوم الصبح ويضغط على عمره
الي زعلت منه اخوي
شلون يحول له بدون علمي
يقول مصروف له
ضايقني هالموضوع كان مالي دور
جايز انا غلطانه يمكن
بس تنرفزت
نزلت لمستواه صار يمون بزياده
ورجعت اشد معاه

مبتعثة كذا تتعبين نفسك.
لازم تعرفي أن المراهق من طبعه نومه ثقييييييييييل، صرتي مثل أختي ماغير تشكى من أن عيالها مايصحون للصلاة.

أنتي لاتتعبين نفسك، صحيه من النوم للصلاة، إن استجاب خير وبركة، وإن ماستجاب ذنبه على جنبه، أهم شي لاتهلكين نفسك باشيلة همه.

وبعدين من قال أنها مسؤوليتك وبذمتك ومادري إيش!!؟ وش دخلك أنتي؟ أنتي بتحاسبين فقط على عملك مو على أعمال الأخرين؟ حتى لو ماقومتيه للصلاة هذا مو ذنبك ولا مسؤوليتك ولا ذمتك، ترى هالشي يردد وهو غير معقول ولا مقبول.
عليك فقط بنصحه بالتي هي أحسن وبالأوقات المناسبة

أرحمي نفسك وريحي بالك.

النقطة الثانية/ ترى المحرم فكرته هو حماية الأنثى، وطالما أن الأمور فيها أمان فلا داعي له، هناك الكثير من الأخوات ممن ليس معهن محرم يعيشن لوحدهن أو مع صديقاتهن وأمورهن بالتمام، وأنتي تعرفين ذلك جيداً، إلا إن كان الموضوع لها عقبات سلبية على المستوى الشخصي أو الاجتماعي بالنسبة لك فالشكوى لله.

فيما يتعلق فيه هو، لازم تنصحيه يستغل الفرصة ويتعلم، المهم أنك ماتتعبي حالك.
اقتراح أخير، لماذا لاتستبدليه بمحرم آخر، شخص يقرب لك يريد الاستفادة من اللغة أو الدراسة ويطور حاله؟

__________________
ياصبحِ لاتِقبل !!
عط الليل من وقتك..

مبتعثة ..

في الحقيقة أتفق مع نيت مان.

لا تحمّلين نفسج مسؤولية مب لج.

كل اللي مطلوب منج تنصحين .. وتبلغين أبوه بتصرفاته .. وهو يتفاهم مع ولده.

معاج حق طبعاً تزعلين من تهميشج .. ولو أنا كنت مكانج كنت بازعل .. لكن ما دام أخوج مب متفهم وجهة نظرج ولا متعاون معاج فما باليد حيلة .. وفي النهاية هو المسؤول عن ولده.

بخصوص الصلاة .. وإن أمه تحسسج بالتقصير لأنج مب قادرة تلزمين ولدها بالحرص على الصلاة.

فما عليه يا مبتعثة .. الولد عمره 15 سنة .. يعني المفروض تجاوز مرحلة التعليم والملاحق عشان يهتم بصلاته .. وكونه وصل لهالعمر وبعده محتاج حد يذكره بالصلاة فهذا خطأ أمه وأبوه .. وهم اللي المفروض يصلحونه مب إنتي.

__________________


اللهم طِيبَ الأثر .. وحُسْنَ الرحيل.