السلام عليكم
جزاك الله خير اخي ابو مريم
معظم كلامك صحيح
لكن انا ابدا ما بفكر اخد حدا من امه بس يلي صار انو حماتي تعدت الحدود وبلشت بأكل الحقوق ..الخ وما اظن هالكلام بيرضي ربنا

ببداية تعارفنا كنت احكيلو وصلني على البيت وحرام شوف إمك شو بدا وطلعها مشوار, كنت ادور على النت على علاج طبيعي إلها وخليتو يشتريه رغم إنو غالي شوي, كان يحكي بالانجليزي بوجودها وهيي ما بتفهم انجليزي وكنت احكيلو حرام هيك احكي عربي بس تكون موجودة
لكن يا اخي الله يكفيك شر الظالمين والمتسلطين
الشخص المتسلط ما بيرضى ياخد حقو وبس بالعكس بدو يسيطر على كل شي بدون ما يسأل حالو هل هالتصرف فيه ظلم او لا وكلنا منعرف انو الظلم ظلمات

ضليت صابرة لحدما اكتشفت انها بكل وقاحة وبدون خجل بتسأل شو صار بينا وبتتطمن خليتو يعمل كذا او لا! انا بعتبر هالتصرف قمة اللاانسانية وقمة الحرام!
انا بحب الخصوصية كتير وخاصة بالاشيا يلي محرم على حدا يطلع عليها لان الحياء من الايمان

وانا بعتبر الشخص يلي بيحكي اموره الخاصة مع زوجته او يلي بيحشر حالو وبيسأل عن هيك امور هاد عندو نقص بإيمانه

لو انا عندي كيد كنت قبلت الصلحة واستغليت حبه إلي حتى اعاقبها واحرمها منه.. لكن قلتلو خليك بحضن إمك انا ما بقدر احرم حدا من إمو ولا بقبل حدا ياخد حقي ويظلمني

الام لازم تفهم دورها ولازم تفرق إنو زوجة ابنها إلها دور وهيي إلها دور مختلف والسيطرة والظلم بهيك امور بالذات بيخربوا البيوت

كل يلي كتبتو فوق كان رد على كلامك انو الزوجة بتحاول تنسي زوجها إمو ..الخ
يلي بتخاف الله ما بتعمل هيك بس المشكلة قصتي صارت مع يلي بيسموه إبن إمو! يعني بيختلف عن الشخص السوي يلي بار بإمو وبيعرف حق زوجته بنفس الوقت


بالنسبة لعيوب طليقي.. اكبر عيب موجود عنده إنو ما عندو صفات الرجولة الحقيقة وما بيقدر يحميني
ممكن لان ابوه ضعيف شخصية كمان والام والاخت مسيطرين

اهلي ما بينصحوني ارجع.. قالوا البخل عادي لو كان فعلا رجل وقادر يحميكي لكن بيشوفني اتبهدل وبيسكت او بيكرر كلام امه بدون تفكير

اخي ابو مريم انت بتقول بكرا ربنا بيوسعها عليه إن شاءالله وبيتغير
بقول إن شاءالله لكن من تجربتي ومتل ما قلت قبل الموضوع مش موضوع فقر.. مهما صار معه بيشوف انو ما إلي غير يعبي البراد اكل واشتري قطعة ملابس بالشهر وهالحكي بعد ما في اولاد ولا اي مصاريف فكيف لو صار عندو اولاد ممكن يقلي قطعة ملابس بالسنة!

انا طلبت من اهلي بعد ما لاحظنا بخله وقلتلن يعرضوا عليه عمل بمعاش افضل بكتير ويحكولو رح نساعدك بهالشغل علشان تخليها تعيش بنفس المستوى يلي هيي عايشيتو ببيت اهلها

لكنه للاسف اكدلي انو بخيل مهما صار معه ومستعد يبذل ماله لاهله بس حتى لو كان الشغل الجديد بمساعدة اهلي

قبل عرض الشغل الجديد كان يقول حقها بس قطعة بالشهر ومطعم مرة بالشهر والمطعم مش غالي يعني مبلغ تافه تقريبا 20 دولار واحيانا 14
بعد العرض عليه انو في شغل جديد ويعطيني حقي.. فرح بالشغل وللاسف كمان قال الها قطعة بالشهر ومطعم مرة بالشهر وبعطيها جزء من المعاش.. طبعا انت يا اخي رح تفرح وتقول شو بدك احسن من هيك وهاي رح يعطكي جزء من معاشه

بحب احكيلك انها ما رح تكون اكتر من 100 دولار واسأل اي حدا عايش ببلد اجنبي كيف الاسعار غالية وشو بتعمل ال100 دولار.
مرة سالت رح تخصصلي مصروف متل ما اهلي بيعملوا .. سالني اديه بيعطوكي قلتلو ما رح احكي بلكي كنت اكرم من اهلي معي ..انبسط على هالكلام وقلي خلص رح اعطيكي 100!

انا اخر همي المصاري بس انا كنت خايفة من المستقبل معو لان ما إلي عين اتزوج واذا احتجت افتح إيدي لأهلي يعني هوي كيف رح يكون قوّام؟ بس بالعاطفة؟!

انا معك إنو الزواج سكن وقلتلك يا اخي انو لو كان فقير او اخد بالاسباب لتجميع المصاري لامور الزواج كنت صبرت مهما كانت النتيجة بس بيضل يحكيلي المسلمين اولى من انو ادفع كذا وانا ما طلبت شي تبذير ابدا وبرجع بكرر هوي بيقصد بالمسلمين اخته وقرايبه وبيستحي يحكي كمان انو ابوه وإمو بيستغلوه وبيصرف عليهن برغم إنو عمي بيشتغل وعايشين التلاته مع بعض يعني ما في اطفال وما في مصاريف كتيرة
ما تحكيلي هوي وماله لابوه.. لان عمي عندو يلي بيكفيه وماشاءالله بيشتغل وعمي ما عندو غير حماتي بالبيت!

في شغلة مهمة ما بعرف شو رأيكن فيها وما بعرف اذا حدا بيرضاها على حالو
انو حماتي كانت كتير تقول عني ..هيي مش فلانه لحتى تطلب كذا ..بتقصد اختي الصغيرة
ورجعت قارنتني باختي الاكبر من الصغيرة
فهوي صار يقارني بخواتي وهاي من الاسباب يلي خلتني اطلب الطلاق
شو رايك بهالنقطة اخي ابو مريم؟ بترضى زوجتك تتطلع على اخوانك وتقعد تقارنك فيهن؟!

السلام عليكم

تفضل هاي الحديث يلي سألت عنو


النفقة على الأهل أعظم أجرا من جميع الصدقات فعن أبي هريرة رضي الله عنه قال: قال رسول الله صلى الله عليه وسلم: دينار أنفقته في سبيل الله ودينار أنفقته في رقبة ودينار تصدقت به على مسكين ودينار أنفقته على أهلك أعظمها أجراً الذي أنفقته على أهلك. رواه مسلم.

قال المناوي في فيض القدير: ومقصود الحديث الحث على النفقة على العيال وأنها أعظم أجراً من جميع النفقات كما صرحت به رواية مسلم: أعظمها أجرا الذي أنفقته على أهلك. انتهى.

قال النووي في شرح مسلم: قال صلى الله عليه وسلم في رواية ابن أبي شيبة: أعظمها أجرا الذي أنفقته على أهلك. مع أنه ذكر قبله النفقة في سبيل الله وفي العتق والصدقة ورجح النفقة على العيال على هذا كله لما ذكرناه. انتهى.

وعن أبي عبد الله ويقال له أبي عبد الرحمن ثوبان بن بجدد مولى رسول الله صلى الله عليه وسلم قال: قال رسول الله صلى الله عليه وسلم: أفضل دينار ينفقه الرجل دينار ينفقه على عياله ودينار ينفقه على دابته في سبيل الله ودينار ينفقه على أصحابه في سبيل الله. رواه مسلم.

قال في الفتح قال أبو قلابة: بدأ بالعيال وأي رجل أعظم أجرا من رجل ينفق على عياله يعفهم وينفعهم الله به. انتهى.

السلام عليكم

اختي مبتعثة متفاءلة انا من فضل الله بيتقدملي كتير لكن قلت إني مريضة روحياً يعني بعجب الخاطب وبيحكي عني حلوة ومؤدبة ومن هالحكي وبمجرد ما اوافق ما بيرجع واذا انا رفضت هوي بيضل يلح عن طريق ناس او اهله واهلي طبعا لكني بحس بخنقه بس يصير الموضوع جد

مرات بس يتقدملي حدا بيجي معو وزغ بكل زيارة حتى اخوي الكبير ما بيحب يعلق كل شي على العين والسحر والحسد لكنه انصدم من هالشي انو كل ما يجي الشاب بيجي معو وزغ وطبعا رفضت مع انو الكل كان يمدح بالشاب بس انا بعصب وما بتقبل ولا كلمة ومن قلبي بكون بدي .. والموضوع مش بإيدي والحمدلله على كل حال

حتى طليقي لما اجا ما كنت احس فيه ابدا الا بعد الطلاق بطلت متمسحة صار عندي مشاعر وقلت يمكن من الشيطان حتى يحرق قلبي يعني طليقي كان يترجاني نطلع كل يوم وانا اتهرب وكانوا اهلي يدفشوني دفش لحتى طلعت معو المرات يلي ذكرتا قبل

حتى سبحان الله وقت عقد القران إمي واخوي الكبير بكيوا من الفرحة وانا متل الحيط.. يشهد الله ما كنت حاسة بشي ابدا بس كأني بتفرج على فيلم وانا ما دخلني بكل يلي عم بيصير

وبس كان يزورنا كمان بعد ساعات لاقدر انزل ولو كنت صغيره يمكن اهلي ضربوني حتى انزل اقعد معو ومع إمو

اكتر من شيخ فسرلي إنو عندي سحر من القرايب والله اعلى واعلم طبعا وممكن اكتر من عين
وكمان حدا فسرلي إنو عندي تعطيل بالارزاق وبأمور حياتي يمكن لهيك ما فرحت وقت عقد القران ممكن مصدومه انو عنجد صار هيك لان إلي سنين طويلة اتعالج بالرقية الشرعية


وبنصح الكل يحافظوا على قراءة سورة البقرة يوميا بنية التقرب لله وإنو ييسرلنا الشفا من عنده او ختم القرآن باستمرار و مش مهم اديه بتاخد وقت, طبعا بنية العبادة لله وبنية الشفا من كل شي والتحصين والرقية.. النوايا مفعولها قوي بفضل الله