صدمة حياتي
بسم الله الرحمن الرحيم
في البدايه اطلب منكم دعواكم ان الله ينصفني ويوفقني ( آمين)
انا عمري 23 سنه من تسع شهور تقريبا تقدم لي شاب كان حاصل على شهاده جامعيه وكل ماسألت عنه كانو يمدحونه لي ويتشكرون في اخلاقه
وانا طبعا لاني ماكنت اعرفه من قبل قلت باخذ وقت افكر في الموضوع ولما فكرت لقيت انه فيه مواصفات فارس احلامي بغض النظر عن شكله كان انسانجامعي ومحترم وكل الناس الي يعرفونه يمدحونه وكان من النوع الي عمره ماعرف بنت او كلم بنت المهم صليت استخاره وحسيت ان الله يسر لي الامور كلها وصارت الملجه
صراحه كل الاهل الي كانوا في الملجه كانوا يشوفون نظراته شكثر هو كان يحبني ويموت فيني وعلى قولتهم الحين كان شكله متخرع عليج لأني مابمدح نفسي لكن بشهادة الناس جميله جدا .... المهم صارت لملجه وكانت حفلتنا ليله من ليالي الاحلام واني دايما كنت احس اني قاعده احلم لان الحفله كانت كامله من جميع المقاييسسس .... المهم
خلصت الحفله ورحنا لثاني يوم من ملكتنا طبعا العصريه انا خذت اغراضي ورحت بيتهم اازورهم يعني ازور امه وابوه وقعدنا وياهم وشبه ان حنا استانسنا بعدين لاحظت ان خطيبي ملامح وجهه تغيرت وكان شكله متضايق فأنا قلت يالله يا (فلان) خل نطلع يوم طلعنا وبالسياره سألته عن الي مضايقه قال لي انا كنت احسج تسويين حركات تثيرين فيها ابوي وتلفتين نظره لج !!!!! انا ماصدقت وقلت له من صجك قال اي انا هني مت من القهر و ظليت اصيح بدال الدموع دم المهم هو تأسف مني بعد ما انا قعدت اقول له انت شايفني شنو ..... الخ من هذا الكلام المهم بعد هذه الليله عشت انا في توتر مع نفسي وكنت كل ماجيت اطلع معاه تصيدني هذه الحاله من التوتر والسبب ان في كل مره نطلع يتهمني بنفس الطريقه وانا اصبر لكن بعدين صرت ماتحمل وقمت اقلل من احترامه واطول لساني عليه مو بكيفي بس غصبا عني
لانه هو كان يستفزني بأسلوبه وكلامه .... المهم ظلت هاي حالتنا فتره طويله من الزمن تقريبا خمس شهور هو يتهمني بأشياء وانا اطول لساني عليه حاولت في البدايه ادخل امه وابوه لكن بدون نتيجه حتى انه في مره من المرات طلعنا ويا اخوه ومرته واتهمني اني كنت اسوي حركات لاخوه المهم كان هو من النوع الي اذا زعل يزعل ويطنشني بالايام في المرات الاولى دخلت خواتي عشان يرجعون لي وبالمره الاخيره ابوي كلمه ورجعه لي اتذكر ان هالسالفه صارت ليلة شهر رمضان المهم رجع لي ليلة شهر رمضان وتأسف مني وانا تأسفت منه لكن رجعت حليمه لعادتها القديمه لين بالاخير طلقني الطلقه الاولى وانا انصدمت منها تخيلوا رفع سماعة التلفون وقال لي بكل سهوله انتي طالق المهم كان باقي على عيد الفطر يومين واستقبلت عيد الفطر بهموم وصياح وماكان لي نفس اعيد وهو سافر وهدني في أحزاني واتصلت له اترجاه اني اسفه وماراح اطول لساني عليه مهما صار وظليت اترجاه لين رجع لي وراح كلم ابوي .... وابوي الله يطول في عمره لان كان مايبي زعلي مارفض الفكره وخلاني ارجع له وطبعا هني بعد مارجعنا لبعض ناس وايد كلموه وكلموني وفهمونا ان الزواج مو لعبه وان حياة مشتركه بين اثنين هو يتنازل وانا اتنازل ومايصير اثنينا نشد
واصطلحت اوضاعنا فتره قصيره والظاهر الكلام كله طلع من اذنه ورد نفس ماكان حتى لدرجة اني ساعات اسولف معاه عن مديري الي في الشغل يقول اني كنت اقصده فيه بس بطريقه غير مباشر ( شاك في روحه ) المهم انا قلت باصبر لان ( ماخاب من استخار) وتنازلت عن اشياء وايد لدرجة انه مايزورني الا قليل وكنت راضيه... المهم
مابي اطول عليكم اخر سالفه خلتنا نتهاوش كنا طالعين مع بعض رايحين مجمع ويوم نزلنا المجمع قال انه ماساحب فلوس قلت له انا بدفع وبعدين رجع لي ..... بعدين بعد مادفعت قال لي اني احب افشله جدام الناس واذله مع اني ماقصد هالشي وراح قايل لي اخذي السياره وذلفي بيتكم وهدني وراح المجمع بروحه ... وظليت اتصل له واتصل له وهو ولا يرد علي رحت بيتهم وكان يحقرني ويقول لي ذلفي عن وجهي كم مره رحت له وهو يقول بس مابيج
اخر شي انا سافرت قلت اعطيه فرصه يفكر لكن للأسف يوم رجعت من السفر كلمته حسيت انه يستهزئ في مشاعري وراح اتصل في ابوي وقال انه يبي يطلق .... وبعدين اتصلت امه وقالت لي ماراح يطلقج الا اذا رجعتي له الشبكه والمهر والدبله و كل الهدايا ( قهرتني حتى ماعبرتني بكلمه حلوه ولا بردت على خاطري وهي تدري اني كنت اروح له البيت واقول له لاتكبر السالفه ومع ذلك ماهمه الا الفلوس
صراحه انا انصدمت صدمة عمري فيه ماتخيلت انه يقدر يستغني عني بهالسهوله وينسى العشره الي بينا انا على الي سواه فيني للحين اصيح وانا اتذكر الي كان بينا لان هو كان اول حب في حياتي وكنت ابي اعيش حياتي معاه بحلوه ومره لكن هو نسى العشره نسى اللحظات الحلوه الي جمعتنا وما تذكر الا الفلوس وماغرته الا الفلوسس هو وامه نسوا مواقفي معاهم بحلوهم ومرهم وباعوني برخيـــص. وانا للحين قلبي يعورني واقول اني احبه
لكن ماقول الا حسبي الله ونعم الوكيل.
كان لي بهادنيا شخص حبيته .... يمكن ماكنت انا اعني له شي بس هو كان روحي كان نبضي كان بسمتي وعيني ال اشوف فيها الدنيا ..... وماكنت ابي اخسره ,,,,, تنازلت وتنازلت وتنازلت وكنت جزاي اني اكون وحيده بهالألم والحسره وهو ولا كنه داري ... لكن انا كلي امل ان ربي ماراح يخذلني
19-02-2006, 12:19 PM
ضوابط المشاركة
العرض الشجري