اكمل معاكم (بالرغم والله اني تعبانه )

لكن اكتب ما حدث معي ليكون عبرة ( بالذات لبنات الخليج )

قلت قبل لا اعطيه اسمي وعنوان البيت ورقمه
طلبت منه انه يثبت لي صدق المعلومات
وانه فعلا بنفس الاصل والعمر اللي قاله
علشان اتأكد
لان كل المعلومات اللي قالها عن نفسه كانت عن طريق الماسنجر حتى صورته شلون أتأكد انها صورته فعلا؟؟؟


فكرت؟لقيت احسن طريقة هي ان يرسل لي صورة عن بطاقة الهوية ( البطاقة المدنية)
منها تظهر صورته واسمه واصله وعمره الحقيقي
ومن خلال رقم الهوية اقدر اطلع باقي المعلومات عن طريق احدى زميلاتي
اقدر اعرف اذا متزوج ام لا وهل عليه أي قضايا

توقعوا شنو ردة فعله؟؟؟؟؟؟



























رفض وزعل وعصب وقال هذي اكبر اهانه له وعدم ثقة فيه

قال انتي شنو خايفة منه للحين ما عرفتيني عدل صار لي معاك اكثر من سنة على الماسنجر؟
هل طلبت منك شي غير اخلاقي وهل تعديت معاك حدود الاخلاق والادب في الكلام
هل ألحيت على سماع صوتك بالمايك هل عطيتك رقمي او طلبت رقمك؟
بعد هالفترة والمدة الطويلة تطلبين مني اثبت صدقي؟؟؟؟

وحسسني بغلطي
وحلف انه جااد وقال انا ما عندي لا لف ولا دوران عطيني العنوان واجي على طول اخطبك

لكن ما قدرت ما زلت خايفة ومترددة - طلبت منه مهلة
وصليت استخارة مره ثانية؟؟ لكن ما ارتحت
ورديت وطلبت منه ارسال صورةالبطاقة( الهوية)
واصريت على هالشي وقلت هذي الطريقة الوحيدة اذا كان فعلا يبي الزواج مني
واذا رفض يصرف نظر عن الموضوع
زعل وعصب وقال انتي ما عندك ثقة

قعد يتحجج ويقول هذي اوراق رسمية وما يبي يرسلها عن طريق الايميل يمكن احد يسيء استخدامها
قلت خلاص مو لازم ترسل البطاقة كلها
عطني فقط رقم البطاقة والهوية وانا اقدر اطلع باقي المعلومات
بس علشان ارتاااح

رفض وقال انا ما احب هالاسلوب معاي –كأنك محققة
وانا رجال وعند كلمتي وما ابي اطول الموضوع
عطيني العنوان واجي اخطبك وتنتهي السالفة بلا بطاقة بلا خرابيط

قلت انت تطلب مني اعطيك رقم تلفون البيت واسمي الكامل علشان تخطب وانت ترفض تعطيني رقم بطاقتك المدنية؟؟؟؟
بالرغم من سهولة هالشي وما يحتاج تكبر الموضوع

والسالفة بايدك انت ؟ يعني بمجرد تعطيني رقمك المدني ثاني يوم اعطيك اسمي الكامل والتلفون ، وتاخذ الخطبة مجراها الطبيعي عن طريق الاهل
وقعدنا كم يوم على الماسنجر انا وياه ما عندنا موضوع الا سالفة رقم البطاقة
اهو يرفض وأنا اصر
اهو يقول عدم ثقة واهانه له وانا اقول تمثل ضمان وأمان لي وما تكلفك شي
وقلت له بالعكس طلبي لهالشي دليل اخلاقي وحرصي

بعدها اخذ الحديث معاه على الماسنجر شكل ثاني
مدري حسيت بدأ يتمادى بكلام الحب والغرام والوله
قلت له ترى ما احب اسمع هالكلام

والله العظيم بعدها انصدمت

تدرون شنو صار بعدها

انكشف على حقيقته

لما شاف ماكو فايدة ولا زلت مصرة على الموضوع

تحول من شخص طيب وخلوق الى واحد خسيس ومنحط اخلاقيا وقال كلام فاااضح ووسخ
عمري ما سمعته

من كثر الصدمة قعدت ابكي وقلت انت فلان؟؟ انت اكيد فلان؟؟؟

قال ايه انا فلان واحبك واموت فيك واذا ما كلمتيني ألحين على التلفون ( وحط رقم تلفونه)
راح اسوي شي ما شفتيه

انت شنو ؟؟ حسبالك لما كلمتك على الماسنجر اني من هالبنات؟؟؟رد وقال اجل انتي ضايفتني بحسن نية؟؟
قلت له : انت اللي طلبت اضافتي علشان الموقع اللي سويته

وكل كلامي معاك على الماسنجر ما تعدى حدود الاخلاق
قال : مافيه وحدة عندها اخلاق وتكلم على الماسنجر
واكيد ان فيه غيري معاك على الماسنجر
وقال ان الكلام على الماسنجر ما يفرق عن الكلام على التلفون
قلت خاف ربك ترى مثل ما تدين تدان

ترضى احد يقول لاختك هالكلام

قال اختي ما تكلم ماسنجر واذا كلمت ادوس في بطنها ويكون اخر يوم في حياتها

واصر اني اكلمه على التلفون وتمادى و طلب يشوفني والا راح يسوي شي اندم عليه
رفضت وسويت له حذف من الماسنجر وقعدت اسبوع منصدمة
شلون فيه احد يقدر يخدع لمدة سنة كاملة؟؟

وفي النهاية يطلع اكبر وسخ كلامه منحط وقمة القذارة
وين الاخلاق والاسلوب الراقي في التعامل
وين راح كل هذا???

انا اعتقدت ان بحذفي له من الماسنجر الموضوع انتهى
وما عندي شي اخاف عليه لأن ما يعرف عني الا الاصل والعمر واني غير متزوجة فقط

لكن تدرون شنو سوى

ارسل لي ايميل يبلغني بأنه وقف عضويتي بالمنتدى مال موقعه
فقال اسبقها قبل لا تسبقني

قلت اصلن الموقع ما يهمني لانك انت فيه
ولا راح اشارك فيه نهائيا
لكن اللي اثر فيني ان الاعضاء وخاصة البنات بالموقع كانوا اعز من الخوات وحزينة اني تركته
بالرغم اني قلت لهم الحقيقة عبر رسايل خاصة عن حقيقة هالشخص ( قبل لا يوقف عضويتي وحذرتهم منه)
لكن لا يمكن يصدقوني لان هالشخص يملك من الاسلوب والتلاعب بالالفاظ ما تجبر الاخرين على احترامه

وياليته وقف عند هالحد ؟
قعد يرسل فيروسات على ايميلي وملفات تجسس ( من ايميلات مختلفة) ودايما اضطر اسوي له فورمات

و حط ايميلي في موقع مو زين وتجيني رسايل تطلب التعارف؟؟
الى ان اضطريت الغاء الايميل وسويت ايميل ثاني
حسبي الله عليه
بس مع هذا احمد ربي الف حمد وشكر
تخيلوا لو كنت عطيته اسمي الكامل ورقم تلفون البيت؟؟
شنو راح يكون موقفي؟؟
وشنو راح يسوي فيني؟؟
حسبي الله عليه
وعسى الله ينتقم منه ومن شرفه وعرضه