اولا عزيزتي مهما كانت مشاكلك مع زوجك غلط تقولين عنه هالكلام انتي تقولي تبينه يعاملك باحترام فمن باب اولى تحترمينه
الله يقول ولاتنسوا الفضل بينكم
انتي قلتي انو يجي ياخذ بخاطرك لما تزعلين ويرسل لك رسايل عالجوال حلوه فهذا بحد ذاته حلو بس اتوقع ردة فعلك هي اللي تعصبه يعني لما سألتك انبسطتوا من طلعة المطعم بدل ماكنتي تقولي ايوه رس كنت معصب كان الاولى تقولي اكيد انبسطنا واحنا معاك الله يخليك لنا ولايحرمنا منك
بالنسبه للعلاقه اتوقع شي طبيعي اذا صار في مشاكل وتوتر والجو مشحون ع طول مايكون عندو رغبه
ياعزيزتي جداتنا يتداولون حكمه دايما اسمعها تقول لقيت للرجال طبٌ هين --اشباع بطنه والكلام اللين
ودايما يقولوا الكلام اللين يغلب الحق البين
يعني خليك ذكيه واعرفي كيف تكسبي قلبه
وفعلا كلام زوجك صح لما يقول الزين
مو كل شي اهم شي المحبه والاحترام والموده بين الزوجين
انتي هالفتره مركزه اهتمامك على حاجتين وضيعتي اوقاتك الحلوه معه بسببها
الاولى هو زواجه وخلينا صريحين وش تستفيدين لو عرفتي او قالك انه متزوج راح تنقهرين وبس ماتقدرين تتطلقين ولاراح تقدرين تسكتين لذلك لاتبحثين عن شي ممكن يوجع قلبك
الشي الثاني طلعاته اليوميه دام انه طول الوقت معاكم ويروح ع قولك يدخن ويرجع فما اشوفها كارثه تخليك تنكدين على نفسك وعليه عشانها
بالعكس طلعته هذي تخليكم تشتاقون لبعض هو يغير جو وانتي تشوفين اشغالك
تعلمي ياقلبي تعيشين حياتك عادي والوقت اللي يجي فيه استمتعي بوقتك معاه وخلي هالوقت سوالف وضحك مو هواش حاولي تحببيه فيكم وفي جلستكم
ولا تحاولين تشحنين اولاده عليه بالعكس علميهم يحترمونه واعطيهم اعذار له عشان يحترمونك انتي بعد
ونصيحه لاتحاولين تمارسين اي شي هو مانعه في غيابه لان هذا راح يخلي اولادكم يستخدموا هالاسلوب معاكم بعدين ويسووا اشياء ماترضيكم في غيابكم
علميهم يحترمون ابوهم في وجوده وفي غيابه
اخيرا ادخلي ياعسل يوتيوب مقاطع مره حلوه عن الحياه الزوجيه راح تفيدك كثير
''' همسه لك اختي'''
انا من اول ماشفت عنوان موضوعك الاول كنت حاسه انك متاثره بالاغاني والمسلسلات
اذا تسمعين اغاني بطليها واستبدليها بشي ينفعك واصلحي بينك وبين الله يصلح مابينك وبين زوجك
وعليك دايما بالاستغفار فمن لزم الاستغفار جعل الله له من كل هم فرجا ومن كل ضيق مخرجا ورزقه من حيث لايحتسب
الله يصلح شأنك انتي وزوجك

...

..

يسعد صباحكم الماطر بكل خير ومحبة...

شكر كبير من أعماق قلبي لحرصكم على أختكم في الله وسؤالكم عني
الله لايلومني فيكم

وشكر كبير للغالية Beta2 اللي من حرصها كتبت ردين بدون تلوين خخخخخخخ
هالشي يدل على طيب قلبك ومعدنك
جزاك الجنان ورضى الرحمن....يارب....


بحكي لكم تفصيل للي صار بس معليش هذاك اليوم كنت مواصلة يومين وكمان صار معي آلم بمعدتي مادري قولون أو برد..فما دخلت النت..

ياحبيلكم بس..


-

رد سريع لمعدن الأنوثة

أنا ماني ضد تنصحني ولا ضد توجهيني ولا ضد تقولين عني غلطانة أبداً
لكن هل يعقل تقولين إني متأثرة بأغاني وعايشة حالتي على هالأساس!
مراهقة يعني!
أسلوب كتابتي تدل على عقلية صغيرة لهدرجة!

أحب أقولك إني أصلاً ممتنعة عن الاغاني فوق السنة يارب لك الحمد

ولا اتأثر بشي بحياتي لااغاني ولامسلسلات
أنا أعيش لحظات أني مو فاهمتها او حاسة فيها لاأقل ولا أكثر

أسلوب كلامي مع زوجي حلو دايم وينقط عسل
أشكره على كل شي وأثني عليه ومعطيته فوق حجمه
لكن اشكره ومعاملته سيئة وأحنا من زمان ماطلعنا معليش ماأقدر
اشكره على وشو؟؟؟
ماشفت شي بسيط يخليني أشكر
أنا زعلانة ومخطي بحقي وهو بنفسه قال أنا مقصر بس طلع يصلي ورجع وأنقلب مزاجه مو ذنبي أدلع وأدلع حجر!

أسلوب كلامي أنا ماأقول حلو
بس انا أكتب إنفعالات اللحظة
الوقت الصعب اللي كنت أمر فيه
أنا هما أفضفض بكل شي حتى شعوري
ماراح أنتقي عبارات ماأحس فيها

أرجع أقول
أنا كنت أنصح الحريم قبل وكان البعض يستفيدون منها ويشكروني
وفيه ناس ماتستفيد وكنت أقول العيب فيكم

الحين بعد تجاربي المريرة عرفت إن النصح سهل والتفكير والخيال سهل
بس أنا ماني مخرج مسلسل كل الخطوات وردات فعل جميع الاطراف بيديني

شاكرة لك..

لي عودة بحكي شنو صار..

الله يعينج اختي ف الله

عليج بالدعاء والاستغفار

والله مو حابة اعملك احباط
زوجك واحد من الاثنين
اما متزوج بالسر
واما فعلا عنده مشكلة جنسية مع حاله قصدي يعاني عجز جنسي
طيب ياختي علشان لا نظلمه خلينا على الثانية
انت اعملي بحث في قوقل عن العجز الجنسي وعلاجه والماكولات اللي تزيد الرغبة
وضعك طول
ومو طبيعي
عندك حلين اما تجلسين معاه جلسة صراحة وتفتحين قلبك له وصارحيه برغبتك
او انه تطلبي منه العلاج
والا
انت عارفة الباقي ما فيه داعي اكتب والا شو 000000

جزاك الله خير ام شحشوحة...يكفيني دعواتك فديتك..

هدوء..لا مو متزوج..هو يمر بمرحلة في حياته ماني فاهمتها
يمكن يؤدي فعلاً للزواج...كنوع من الهروب..أو تجربة وين الخلل!..أو بداية جديدة يغير فيها طريقة حياته عشان يستقر..بمعنى بعض الرجال لمن تكون حياته خلافات ماعاد يتازل..ويكون مثلاً صعب..
بس مع الثانية فقط يتغير عشان مايكرر حياته ويتنازل عن أشياء كثير..فهمتوا علي؟!


زوجي أنا فاهمته زين
بس ماعرفت وشلون أوصله!

بس فعلاً أختي الحبيبة Beta2 فاهمة الوضع عدل والرابط اللي حطته أكبر دليل
خلاص بتصيري مستشارتي الخاصة

حطيت ردين بدون تلوين !!!!!!!!!! .... يلهوي

دام اني مستشارتك الخاصة بتجرأ واقولك رأيي بشخصية زوجك واطلع كل اللي عندي

أشوف انه تحت درع العسكرية وتحت درع الإباء الذكوري هناك رجل حساس جدا عاطفي يحبك أكثر من ما تصوري
عنده معاك مشكلة واحده لو تقدري تتجاوزيها بتحلي مشاكلكم بالفراش وخارجه وهو قالها لك اكثر من مرة لكنك مو قادرة تصدقي انها فعلا مشكلة كبيرة ...

لو تقدري تشعريه بخضوعك له بتنتهي مشكلتكم ...

لي عودة بعد تعليقك وسردك للي صار بجلستكم ...

__________________

اختي مليت...انا مليت وانا انتظر نتيجة الطلعة مع زوجك

طمنينا ....ان شاء الله طلعتوا انتوا الاثنين بنتيجة مرضية لكم ؟؟

الله يفرج همك ويرح لك بالك

يسعد مساكم..

صراحة كل ماجيت أكتب ماحبيت أسترجع سوالف هذيك الليلة
أحس ماني فاهمتها..تكرار لنفس الكلام...

طلعت معه وحنا بالسيارة وين تبين نروح اي مكان؟؟!

قلت أي مكان أهم شي كوفي انسب لمثل هالسوالف..
ماحددت مكان قلت أي كوفي..كنت متعودة قهاوي معينة كنا نروح لها ..

في الطريق قال: نبي نتكلم بهدوء وصوت واطي ونحسم الموضوع
هالكلمة أنا اللي قلتها وصارت وبال علي!

قلت ابشر...

جلس يتكلم
انو مو شرط الناس لازم تستمر
وعادي لو صار طلاق
وماوقفت الدنيا على أحد!!

طبيعي قلت أنت ليش تول هالكلام هالشي أنت حاسم أمره!

أرتفع الصوت وهز السيارة أنا ماقلت لاتقولين شي عني أنا تكلمت بشكل عام وبدأ يسب
قلت شرطي في الطلعة الإحترام ماله داعي ترفع صوتك وتعصب لازم تعطيني فرصة أتكلم وترد علي بهدوء
بعدين تكلم عني وعنك الموضوع حساس ماله داعي تتكلم بشكل عام الموضوع مايحتمل!

ووضحت الطلاق يمكن يكون راحة للطرفين
وممكن يكون العكس
ليش الواحد مايحل مشاكله ليش على طول أحسم الموضوع يا أبيض ياأسود

يعني عشرة 20 سنة مانجحت فيها وش جرأتي أفكر اخوض بغيرها!

وكان كلامه زي ماهو!

زعلت على نفسي ليش يبي صوتي واطي واكون محترمة وهو العكس تماماً!
كيف بكمل حواري معه!
كيف بحكي اللي بخاطري!
تفاجئت وقف عند سوق على أساس القهوة خارجية!

تفاجئت إنه وقف عند سوق على أساس فيها قهوة لها باب خارجي!
قلت هنا!..قال أنتي قلتي أي مكان..قلت على أساس زي ماتعودنا
ماتوقعت بسوق بيكون المكان أكثر ناس وقلق يعني ماراح نأخذ راحتنا!

طبعاً لف لف ووقف السيارة وفتح الباب ونزل! بلا أي إعتبار
طبعاً ماأقول ينفذ كلامي بس أقلها يقولي كلمتين انو ماعليه لو ماأعجبك مشينا
خلينا نشوف..
أول مادخلت قال نروح لغيره..قلت لا خلاص دخلنا ..جلست وراح يجيب الطلب
بكيت من قلبي..بحرقه...حسيت إن كلامي بيكون صعب وماله اذن تسمعه..
حسيت إني بسمع كلام بياذيني بدون إعتبار لي
جسمي منهك من كثر ماأسمع نفس الكلام منه وشكل الليلة بتكون كذا!
يعني مليت كلام وسب بدن كنت أبي فايدة شي يغير حياتنا للأفضل..

جاء وقعد وسكت وأنا ساكتة...واستمر السكوت يجي 10 دقايق شعور رهيب
ولمن رفع عيني له شفته يطالعني بتركيز....جعلكم ماتحسون باللي حسيت فيه هههههههههههههههه


بلعت ريقي..وتكلمت..مادري كيف كان كلامي بالضبط بس بحكي المهم بنقاط...
ويكيفيكم المقدمة الطويلة اللي فوق ههههههههههههههه

كنت حريصة إني ماأكثر الكلام في نقاط مختلفة تشتت تفكيره وتحسسه إنه شي سيئ ويتنرفز
وماكنت بحكي عن سالفة الجنس لأني مادري لو هي السبب
ولأني هاللحظة جداً متوتر أي كلام في هالموضوع بيقلبني فوق تحت...

كان تركيزي بشي واحد

أبين حبي أنا والعيال له وإني شي غالي بالنسبة لنا ونفتخر فيه ولا نكرهه

بتقولون ليه!
( لانه دايم يقول إذا مت بترتاحون مني!)
( إنتم حياتكم غير وأنا غير )
- المهم دايم يبين إني والعيال مانحبه ولا نتحمل نقده! -

النقطة الثانية تكلمت عن أسلوبه وعن كثرة تبرمه وإن هالشي هو اللي خلق فجوة
لأنه من كثر مايوجهنا وينتقدنا ويبينا مثاليين توتر وصار جو البيت له متعب
واحنا في أي تصرف نتوتر نخاف مانرضيك!
هالشي شتتنا وماجمعنا...
ماأبي منه غير يروق ويفصل جو العمل من البيت ويعطينا الجو الاسري
مانبي مهرج بس نبي مرونة في الفكر في ا لتعامل في الحوار...

وبينت إني إذا متوترة أو يحس جوي غير مناسب فهذا طبيعي

كيف وحده زوجها ماينام معها وينام الويك آند برآ ويحرص على الطلعة بشكل مستمر
ويتوتر من أي كلمة وأغلب كلامه توجيه كيف هالشي يزرع داخلي الثقة والراحة!
كيف أصير بالحرمان هذا كله زوجه مريحة وهي ماأرتاحت!
الف علامة استفهام فوق راسي!

أتقبل اي شي لو حسيت إني إنسانة مرضيتك ومرتاح لها

حسسني إني زوجتك إني وحده تحبها وترتاح لها إني شي غالي
حس بأنوثتي بوضعي اللي أنا فيه...عطني الآمان زوج هادي احسه مرتاح

أنت دايم تقول حياتنا بيدك أنتي اللي تصلحينها

طيب جرب مرة تبادر أنت وتحلها
جرب إنك تكون أكثر مرونة وتقبل لنا شوف وش يتغير في وضعنا
مو تعتمد علي كأني في إختبار وتحط المجهر تترصد أخطئي وتنتظر أنجح أو لا

هذا كان مجمل كلامي...

بتجيكم عاد الطامة في إفتتاحيته كنت شوي واقلبه هو ويا كرسيه

بس معليش دخل الحين وبحكي شنو صار في وقت لاحق...

وسامحوني فيه تفاصيل قد تكون مملة للبعض
لكن بدونها أحسكم مو في الصورة..

فسامحوني...

منك انت ياعزيزتي مليت ....ما نتضايق من ادق التفاصيل

بالعكس ...فضفضي عزيزتي

وربي يعينك

فديت قلبك يالغلا
انتي عاد عارفة الأكو والماكو بس ماشاءالله عليك دوم معي ع الخط
ونعم الأاخت..