الله يصبرك قلوبكم يا اخواتي وعسى الله يعطيكم كل الي تتمنونه سواء بالرجوع للازواجهم او بالزواج من رجل آخر يصونكم ويعوضكم عل الي راح.

الله يوفقكم

انا حاليا جالسة اعيش واتقمص دور المطلقة
ليكون اخف علي لو قدر الله وصار
متزوجة من 5 شهور ، اغلبها عايشتهاعند اهلي بحكم دراستي

اكثر مايؤلمني ويرهق تفكيري انه ليش وافقت ؟ ليش ما اصريت ع الطلاق قبل الزواج
ليش وليش وليش
الله يرزقني القناعة والرضا والتسليم بالقدر
لكل من مامر على ردي .. دعواتك لي ❤

انتبهي لنفسك يا نقاء و ارجعي اقري المشاركات اللي في موضوعك

حياتك نجاحها بيدك و انتي توك فالبداية

لا تستلمين من بدايتها و لا تتشائمين

انتي ايجابية لا تخلين اليأس يدخلك و تضيعين الرجال من يدك

بعد كم سنة لما تقرين كلامك هذا بتضحكين على نفسك و بيتغير تفكيرك كثير

انتي لسه ماعرفتي يعني ايش زواج عشان تخشين معمعه الطلاق

الله يشرح صدرك ويسر امرك

__________________

‏
الوعي هو الملاذ ..

أستغفر الله العظيم ؛
( الفردوس غايتي )

ماني مستوعبه كمية الألم اللي في تجربة كل وحده كتبت هنا .. معقوله الطلاق مؤلم لهالدرجة .. أرجووووكم أثروا الموضوع بالكتابة أكثر لأنه فتح عيوني على أشياء كثيرة جداً .. هنا الوحده تكتب كل شي حست فيه ومرت به بحذافيره .. عكس الواقع أنا أعرف مطلقات كثير أحسهم مبسوطات للآخر ومو مؤثر فيهم أبد بالعكس تكون الوحده أحلى وأكشخ وخفيفة دم .. مدري مدري بديت اكتشف من هذا الموضوع ان كل التغيير اللي اشوفه في الواقع يخفي وراءه ألم فضيع تصارعه المطلقه وحدها مع نفسها فقط ..أنا أعرف إن الطلاق كسر للمرأه وصدمه بس توقعتها بلحظتها وتزول بعد فترة وجيزه .. وتخيلت ان الطلاق بيمحي كل موقف حلو كان بحياة الوحده مع طليقها ويذكرها بس بسلبياته ..
اكتشفت أشياااااااء كثيره من هالموضوع
وأعتذر لكم إذا كلامي ضايق وحده فيكم .. بجد أنا آسفه ..بس حابه هالموضوع تثرونه أكثر عشان أي وحده تكون فكرة الطلاق براسها وفيه إمكانية لاستمرار حياتها الزوجييه تحاول إنها تحافظ على بيتها وتحسب للطلاق ألف حساب ..

__________________
استغفر الله العظيم وأتوب إليه .. سبحان الله ..الحمد لله.. الله أكبر

بالنسبة الي
المه كان لا يوصف
كنت من شدة المي امسك قلبي خوفا من ان يخرج من بين اضلعي
الالم يكون اشد عندما يكون هناك خذلان و احساس بانك لا تستحقين مصيرا كهذا
وعندما تشعرين انك كنت خير زوجه .. بذلتي و اعطيتي و سترتي و تغاضيتي و دستي على كرامتك من اجل ان يستمر بيتك قائما بينما الطرف الاخر وعند اول اعتراض منك على وضعك التعيس معه يتخلى عنك
وتاكدي من شئ واحد عزيزتي
لن يداوي جرحك غيرك
مهما تعاطف معك الجميع
في النهايه كل مشغول بنفسه
وانتي فقط من سيأوي الى فراشه كل ليله وحيدة
الشجاعه هنا ان تتجاوزي هذا الوضع باسرع وقت ممكن
ولا تتركي نفسك للالم فتره طويله
وهنا قد تحتاجين الى دعم من استشاريه احيانا
لا تتردد اي مطلقه من الاستعانه باستشاريه ..
في النهايه يعتمد على شخصيتك و كمية الايجابية التي تحملينها
كما و يعتمد على قوة ايمانك بالقدر و الرضا
الان في وضعي ما اتمناه هو ان ينزع الله هذا الانسان من قلبي نزعا حتى ابات لا اذكره ابدا
ارغب بالنسيان .. لانه تأتيني لحظات ضعف .. اتمنى زوالها تماما
واحيانا اقول لن تزول هذه اللحظات الا ان احببت من جديد و احللت مكانه رجلا اخر .. ولكني اجده صعبا جدا .. الا ان كتب الله لي نصيبا اخر

__________________

تدرين أنا قبل كنت أسمع وأقرأ أن الطلاق كسر للمرأه حتى لو هي طالبته
وماكنت مستوعبة هالمعلومة لحد مامريت فيها
وﻻ مره بينت إني متأثره كل اللي حولي مستغربين مني
اللي تقولي انتي ماتحسين متبلدة واللي تقول إنتي قوية واللي تقولي أستمري على تفاؤلك وحبك للحياة وهاذا الصح
لكن لما أروح فراشي الله العالم بحجم اﻷلم اللي أحس فيه كانت أمي تستغرب مني
تقولي إنتي تنامين قبلنا وتصحين بعدنا وهي ماتدري إني أتقلب بفراشي ساعات
أفكر باللي صار وليه صار وكيف .. أصعب شي إنك إنتي اللي تتخذين قرار اﻹنفصال
وتتحملين النتيجة صح إني كنت أضحك وأسولف وأطلع أحضر مناسبات وزيارات ودخلت دورة وسويت مشروع ومارست هوايتي
بس في ألم فضييييع مايظهر وﻻيبان مدري كيف مرت علي ذيك اﻷيام
كيف كنت بهالقوة والكبرياء يمكن ﻷن طبعي ماأحب أشتكي وﻻ أفضفض وﻻ أظهر ضعفي وﻻ أحب أحس إني أثير الشفقة
حاليا عايشه حياتي ﻷني ﻻزم أعيشها ماراح أتقوقع على نفسي
لكن من داخلي فيه ألم وحنين ويمكن حب!
أول ماأنفصلت عنه أنسألت مرتين من شخصين مختلفين قالوا لي حبيتيه؟
وقتها أستغربت ليش هالسؤال بالذات معقولة يكونون شايفين فيني شي ماشفته
أو يمكن فداخلي عارفة هالشي بس أكابر! ويمكن هالسبب اللي خلاني أرفض أتزوج مرة ثانية
من عدتي وأنا ينعرضون علي أشخاص كان من ضمنهم ثنين عزاب طلبوني باﻷسم ورفضت
ﻷن الجرح لسه ماطاب وفي داخلي بقايا شي لطليقي أستناه يتلاشى تماما عشان أبدأ من جديد
ماكنت أتخيل الطلاق صعب دايم أقول بنفسي رجال بداله رجال بس الحقيقة مو كل الرجال زي بعض
وﻻ أحساسك بيكون نفسه مع كل واحد حتى لو زوجك مليان عيوب شوفي حسناته اللي يمكن ماتنوجد بغيره
وقبل الطلاق ﻻبد الوحده تنفصل عن زوجها وتقطع أي تواصل معاه وتعيش كأنها فعلا مطلقه و وقتها بتختبر نفسها لو بتقدر تكمل حياتها كذا أو ﻷ
ولو في أي مشاعر ناحيته مع الوقت تظهر ممكن كثرة الخلافات والمشاكل وخيبات اﻷمل دفنتها
بس بقول نصيحة لكل وحده أو واحد يفكرون باﻹنفصال وهاذي أخطاء أنا أرتكبتها وندمانة عليها وأستوعبتها متأخر للأسف
أوﻻ كلنا لنا عيوب بس عيوب عن عيوب تفرق لو شريك حياتك يرتكب أخطاء كبيرة مثل الزنا وترك الصلاة والخمر وتعاطي المخدرات ﻻتقولين بسكت وأستر عليه أستشيري شخص ثقة وحكيم وضامنه ماراح يطلع أسرار بيتك
لو في أشياء مضايقتك بشريك حيياتك ﻻتسكت وتكبت وتجامل خلك صريح و واضح من البداية وﻻ تقول أخاف يفهم غلط أو أجرح مشاعرة ﻻبد من المصارحة لكن بأسلوب لطيف ولو المواجهه صعبه اﻷفضل تكون برسالة ﻷن الكبت ممكن يوصلك لمرحلة اﻹنفجار اللي هي الطلاق
اذا الموضوع ظل مستمر ﻻبد من تدخل أحد من أهلك يتكلم معاه مره ومرتين وثلاث
أهلك بالنسبة للبنات ﻻزم يكون عندهم خبر ولو رؤوس أقلام على اﻷقل لو واحد من أهلك أمك أبوك عمك خالك واحد من أخوانك ﻷن الشخص لما يواجه مشاكله لحاله يضيع
اذا لسه في بداية الزواج أبد ﻻتستعجلون على الطلاق ولو كان اﻹستمرار فيه ضرر على أحد الطرفين أنصح باﻹنفصال مؤقتا
وإذا فيه أطفال بدل ماتفكر مرة فكر ألف مرة ﻷن ئأطفالك يستحقون منك التضحية
ﻻتعطي أذنك للناس وهاااااذا اللي واجعني اللي شجعوني على قراري لو وحدة منهم كانت بمكاني كان آخر شي فكرت فيه الطلاق وينهم الحين عني؟ كل وحده في بيتها وبحضن زوجها مافيهم وحده نفعتني
صح القرار كان قراري وماشاورت أحد بس كنت بوضع نفسيا غير مؤهلة أتخذ هالقرار المفروض يهدوني وينصحوني ويحكون لي عن الطلاق ويكونون منصفين إن طليقي مو بهالسوء وأنه بالرغم من كل سيئاته أفضل من غيره بكثير
يمكن أخطأت بقرار الطلاق ويمكن أستعجلت لكن كل شي يصير لحكمة
وأخجل من نفسي كثييييير لما أشوف أزواج أو زوجات يعانون أشد المعاناة مع شركاء حياتهم وبالرغم من كذا مايفكرون باﻹنفصال أبد
الدنيا مدرسة وكل يوم نتعلم منها وأنا تعلمت إني أشوف اﻷمور من زوايا مختلفة وأقدم شوي تنازﻻت وإﻻ الحياة ماتمشي وماأبحث عن الكمال وأركز ع اﻹيجابيات وأطول بالي وأصبر وﻻ أيئس من المحاولة


...

حبيبتي يأم خالد
امين يارب الله يسعدك ❤

وعندما تشعرين انك كنت خير زوجه .. بذلتي و اعطيتي و سترتي و تغاضيتي و دستي على كرامتك من اجل ان يستمر بيتك قائما بينما الطرف الاخر وعند اول اعتراض منك على وضعك التعيس معه يتخلى عنك......


يااااااااااااااه ياعذووب .. .. تأكدي بأن ماعند الله خيرٌ وأبقى ..

__________________
استغفر الله العظيم وأتوب إليه .. سبحان الله ..الحمد لله.. الله أكبر

انكسار حلم ،،،،
الطلاق موووو سهل وكل وحدة وقوت تحملها وشخصيتها
انا ضده بس كان الطلاق انسب حل لردع المفسدة ولانه زواج فاشل الاستمرار خطاء فادح ..
بس سبحان الله الي تنظلم يبرا جرحها بدري او تحس ان الله معوضها باشياء ماتحلم فيها
ويغني الله كلن من سعته..
وبالنسبة لي ،، مو كل رجل ينترك ولا كل رجل تضحين بنفسك عشانه
الرجل ان كان فيه ذرة خير لو بصيص امل انا مع الوحدة تصبر اما ان كان لامنه ولاعليه
اتركه والعوض من الله ... والله يوفقكم الجميع رجال وبنات

ومن تجربتي بالحياة الطلاق قد ينظلم فيه الرجل ويوقف المجتمع مع الحرمة لضعفها
ويترك الرجل على زاوية الاتهام ولا ينصف !؟
والفرق ان الرجل يكبت بقلبه ولا يبينه بس البنت لا تفضفض وتبكي وتنسى
واذكر مرة قريت دراسة عن الطلاق ان الرجل قد يتاثر اكثر من المراءة بدرجات،، فالله يعوض الجميع
🌹🌷

انكسار حلم
مو كل مطلقه تطلع للعالم وتبين كسرها
انا من الناس الي احلوت بعد الطلاق وكنت عادي
لكن بالليل اه من الليل
كنت اتفزز من نومي
قلبي ما يهجع ينبض ينبض طول الليل
اخذ وساده احطها عليه لا يطلع من مكانه
واحيانا افكر احط ثلج لعل وعسى يبرد مافيه
لكل وحده سبب للالم
وعلى فكره مو بس حنا
حتى الاجنبيات الي تشوفينهم متحررات ويفترض طلاق مايقوم ولا يقعد عندها
لو تقرين تجاربهم والمهم شي يحزن
الحب صعب والفراق اصعب
انا حزني كان لاني تزوجت متاخر
وخلاص بعيش الزواج بكل شي
افكر بالبيت الملك والاطفال الي يملونه واستغل الباقي من الوقت
والي معي يفكر يتخلص من الزواج ويرجع للعزوبيه والوناسه
وتم الطلاق
وكانه حكم بالموت وانت عايش
كانت تجربه مريره ومحبطه
كل احلامي تكسرت امامي
والمشكله هالاحلام ماتحقق الا بشريك طال انتظاره
يمكن تستغربون تقولون معقوله حبيتيه بوقت قصير
انا حبيته من قبل ماعرفه
عشر سنوات وانا انتظر زوج المستقبل
ولما جا انذليت وانهت وانجرحت وتكسرت وانهدمت في لحظه
وقعدت الملم نفسي بعد هالتجربه
ماكان طلاقي في سن صغيره عشان يمديني ابدى من جديد
ولا كان بعد عشره اكون خلاص اكتفيت ومعاي اطفال اربيهم بين حضني
لكن اولا واخيرا
الحمدلله يارب العالمين
الشي الوحيد بين سلبيات هالتجربه ان هالشي كتبه ربي
وله الحمد في ماكتب وقضى وهو ارحم فيني وفي كل المطلقات من اقرب اهلهم
الحمدلله يارب ماارحمك ومااكثر عطاياك يا رحمن