صح لسانك والله صادق تسلم على النصيحة

السلام عليكم طبعاً كتبت موضوع هنا قبل عدة اسابيع
عن مشاكلي مع المدام وبعدها اتصالحنا لما كانت امها في دبي عشنا اجمل 3 ايام مع بعض ولمن رجعت امها غلطتي اني خليتها عندها عشان تسلم عليها بعد وصول امها ب ساعة ارسلتلي رسالة انها اتسرعت في قرارها بالرجوع وما صارت ترد ماني داري ايش اللي صار
فرحتلهم البيت دقيت الجرس امها قالت مين قلت انا ما فتحت الباب قالتلي ايش تبغا
قلتلها ابغا اتكلم مع المدام شوية قالتلي روح مرتك نايمة قلتلها عادي اصحيها
قالتلي الصباح رباح وقفلت الباب بالمفتاح و دخلت غرفتها ورقعت الباب
طبعا جلست خايف على زوجتي ان يكون فيها شي دقيت عليها اكتر
من 30 مرة ما ردت عليا بعدين ارسلتلي رسالة فادي خلاص
اللي بيننا انتهى وانا كانت ماخدتني العاطفة والحنان
وحنيت عليك لمن شفتك تعتذر كتير بس دحين فقت
قلتلها كويس انهم رجعو من دبي خلوكي تفوقي من العاطفة والحنان اللي كنتي فيهم
المهم وجلست يومين ما ااتصل ارسلتلي رسالة قالت هو انت يا تجلس معلقني وما تتصل
يا تضغط عليا وتتصل كتير
ما رديت الين دقت عليا
قلتلها اسمعيني يا بنت الناس في بداية المشكلة وعدتك بكل شي جميل وعدتك بمصروف شهري 4 اضعاف اللي يقوله القاضي
وعدتك اسويلك غرفة في بيت اهلك وعدتك ما احرمك من ابنك بس دحين كل دا اتغير
بما انه الطلاق بسبب امك " طبعاً هي بتنكر تماماً انه بسبب امها " ف انا عندي شروط
1- ابغا المهر " والله ما اقدر اخذه منهم لاني احب البنت وما اقدر ااذيها في شي بس قلتها من قهرتي لان امها هي اللي حتدفع اكيد
2- ولدي عمره 9 شهور ابغاه بعد ما يكمل سنتين وما راح اشوفه خلال دي الفترة كمان " برضه ما راح اخده منها بس ابغاها دحين تحس بفقد الولد زي ما امها خلتني افقد ولدي ومرتي
3- تعالو شيلو ملابسك وملابس الولد كلها من البيت
4- مالك الا 500 ريال حقت المحكمة نفقة الولد وخلي امك تدفع الباقي .
5- لو وصلت درجة تخريب البيوت ان امك ترسلك المحكمة ترفعي قضية خلع راح ارفع عليها قضية "تخبيب " ، دا الكلام قلته وانا صادق فيه انه لو وصلت لدرجة الخلع والله ما اضيع حقي وحق ان ولدي يعيش عيشة كريمة بين احضان امه وابوه
مدري احس جرحتها بكلامي بس والله انا اتحملت كتير طرد من البيت و قالتلي كم مرة ما ابغاك
و انا صابر واروح واجي عليهم وبمن اتصالحنا جريت جيتلها هدية اسورة كان نفسها فيها
قلتلها حتى ولو انك ما كنتي مقتنعة بالرجعة انتي اعطيتيني فرصة اثبتلك اني اتغيرت
حتى ولو كنتي مو مرتاحة كنت حعرف كيف اريحك كيف ابسطك ليش تعشميني بشي بعدين تسحبيه مني حرام عليكي ...
بالله ابغا ارائكم اللي سويته صح ولا غلط يعني الكلام اللي قلته لها انا كان مقصدي انها
تفوق من اللي هي فيه وتفكر قبل اي شي
المهم دحين ليا كم يوم ما اكلمها و حاسس ببرود يعني حاس نفسي صاير بارد من كتر اللي صار فيا لا صار عندي كلام اقوله ولا صار عندي شي
كل الكلام استخدمته وكل الندم شافوه ف دحين حاسس بخيبة امل ووالله احبها وخايف بالافعال دي حقتهم اكره البنت ف الله يستر

لا حول و لا قوة الا بالله

نسأل الله ان يُصلح ذات بينكما و يجمعكما في خير...

ما هي اسباب رغبتها في الطلاق ؟

ماهو ردها على كلامك ٥،٤،٣،٢،١؟؟؟

للاسف جلست تبكي وانا والله ما ابغا اكسر قلبها ولا كنت ابغا اكون سبب دمعتها
انا كل كلامي دا عشان اطلع امها من موضوعنا حرام الولد يضيع بيننا
وحرام اضيع العشرة والمحبة اللي بيننا عشان كلام فاضي ولو كان زعلنا على شي ف والله
لاغير كل شي مو عاجبها بس المهم نحل مشاكلنا بنفسنا وماله داعي تدخل اي طرف تالت

المشكلة الاولى موجودة في الموضوع اللي قبل ذا
والمرة التانية بعد الصلح لا يوجد سبب غير امها اللي قالتلها
ان اللي فيه عيب ما يغيره ولا يضحك عليكي بالهدايا و .... الخ

انت قلت اللي عندك وكنت حازم بالموضوع ،، اتركها الان ولا تعتذر او ماشابه وهي لها قرار تحمل تبعات قرارها وان ارادت فعلا مواصلة الاخذ براي والدتها ام استقلالها بحياتكم الزوجية ...

انتظر اتصالها ...

الصبر و الدعااااء ...

اراها تتخبط بين شد و جذب - فتح الله بصيرتها لكل خير - ، فيظهر لي في رسالتها عدم رغبتها قطع التواصلِ معك ...
فبعد تجاهلك لها ، بادرت الاتصال ..فما كانت تريد حينها ؟؟

شكراً يا ام مريمي فعلاً كنت احتاج ان اكون حازم من البداية ولكنني للاسف كنت اتعامل
بحسن نية ومهدت لها طريق الطلاق ورسمت معها حياة كريمة لها وللولد بعد الطلاق
ولكن عندما سنحت لنا الفرصة ان ننفرد ببعض وبعد محاورات طويلة توصلنا لحل وتفاهمنا وقبلت بشروطها وقبلت بشروطي الى ان تدخلت الام وهدمت كل شي بنيته فتحولت عاطفتي الى حزم وتحول حبي الى تبلد وتحول الامل الى تشتت والله ييسر الامور

كانت تبغا تقنعني ان الطلاق منها مو من امها