السلام عليكم
أسعد الله صباحك / مسائكم بكل خير

راح اطرح مشكلتي بدون قدمات
انا مخطوبه وعمري 23
مشكلتي ان خطيبي نفس عمري يعني تقريباً فرق انه اكبر مني بشهور معدوده فقط .. والأهم من ذلك انه قصير القامه

يعني اتوقع انه بنفس طولي واحيانا اخاف انه اقصر ..
لا تقولوا ماشفتيه بالنظره !!
لا طبعاً ماكان في نظره لأنه يصير ولد عمي وكثير يشوفني بالغلط ومن احنا صغار كنا نلعب من بعض ..
وحتی لو ابغی نظره شرعيه ما احس راح تفيدني بهذا الشيء .. واحس صعب اني اطلب .. وهوا يعرفني اكيد فما طلب

رغم ان كثير غيره تقدم لي لكن ماحصل نصيب و لا ارتياح

ووافقت عليه لأنه يحبني ومتعلق فيني بشكل كبير من الصغر وقالوا لي ماراح تلاقي شخص يحبك زيه بالإضافه انه شخص يتحمل المسؤوليه وحنون ومرح ومحبوب في العيله .. بينما بعضهم يقولي ودعي الكعوب من الحين وانسيها تماما

اما بالنسبه لمشاعري تجاهه في ارتياح كثير لكني لا احبه ولا اكرهه شخص عادي بالنسبه لي ..

بدون مبالغه دائماَ هذا الشيء شاغل تفكيري و اعتقد طبيعة كل فتاه تحب يكون فارس احلامها طويل او علی الأقل اطول منها وحتی بالعمر تحب يكون اكبر منها .. لكن مايهمني العمر زي الطول
كثير ما اعقد افكر كيف حيكون شكلي جنبه !! كيف حنزف جنبه وشكلي أطول !! بعد الزواج وفي العلاقه الزوجيه كيف !!


ولا تفكروا اني طويله مرا انا طولي 160
.. فكرت اسأل ماما عن طوله بس خايفه ان الكلام يوصله وما ابغاه ينجرح او يحس بنقص لأنو شخص طيب ..
وكثير ما اتسائل واستغرب معقوله هوا مافكر في هذي النقطه زيي !!

أرجوكم اعطوني أرآئكم بدون استهزاء او تجريح .. لأني فعلياً احيانا افكر بالرفض قبل ما أملك عليه وبعض الأحيان افكر بحبه لي واتراجع ..

سؤالي لكم
خصوصاً انتو يارجال عادي تاخذ وحده بنفس طولك .. او أطول بقليل ؟!!

والمتزوجين اللي أطول من زوجها انسجامكم مع بعض .. هل الطول أثر عليكم أو لا ؟؟

شكراً لكم ..