المشاركة الأصلية كتبت بواسطة كنافة بالجبن زوجك يقهر الله يصلحه بس اذا هو معزم ومقرر مالك حل لاتجبرينه ولا تفتعلين معه مشكله حاولي تنبسطي زي ماقالت غاده وعيدي وهيصي مع اهلك جهزي هدايا بسيطه للعيد وصينيه حلا وصوري سنابات وانبسطي ولاتشغلي تفكيرك اذا جانا عيال ومدري ايش عيشي يومك لا تحاتين المستقبل ماتدرين بعدين ايش بيصير الهدايه من رب العالمين

أهلين بنات ..شاكرة ردودكم فردا فردا


بعض النقاط :

_ يدخن في السطح مو داخل البيت , بس مثلا لو راح عند أهله ما يقدر يسوي هالشيء لأنه مخفي موضوع التدخين عنهم , برضو لو طلعنا مكان مفتوح يدخن ..طبعا بيت أهله في قوانين وحدود مايقدر يتجاوزها منها التدخين ومنها البرامج التلفزيونية ..وهالشيء مو ممنوع عندي من باب ياخذ راحته في بيته ..ولا يهرب للإستراحة اللي متاحة فيها هالأشياء ..

_هل خنقته ؟ أحس لو خنقته كان مثلا في البداية يجلس في البيت لكن مع الاختناق يهرب ..لكن هو من الأول يحاول يعودني على البعد هذا .. أنا في البداية تفهمت هالبعد إنه توه ماتعود على الزواج وإنه لما يرتاح معي رح يقرب ..لكن الحاصل لا .. الحاصل أفكاره والتعليمات اللي ماخذها قبل هي اللي مخليته يتصرف هالتصرف ..

أكون خانقته لو كنت ألاحقه باتصالاتي , أو باسئلتي , أو بتذمري وشكواي , لكن كل هالشيء مابدر مني ..توني بس من يومين صارحته بشعوري هذا
أنا في البداية إلى وقت قريب كنت أتصرف إنه عادي والموضوع ما يهمني ..(طبعا هذا عكس شعوري) ..توقعت لما صارحته إنه بيعطيني رد حقيقي ..لكن ما أعطاني ..

_ بالنسبة للبس هذا طبعي ويمكن هذا جزء من اهتماماتي , مو لأجله , بس هو يعتبر مستفيد من هالطبع .. وقلته له حتى أفتح عينه و أفهمه إني أحاول أمر على كل الأسباب اللي تنفر الزوج لكني مو محصله جواب ..

- صحيح الإضافة ..بس إضافة عن إضافة وإلا ؟ في إضافة يكون الواحد في ألماس وفي إضافة يكون الواحد أبجورة ..


_ إذا فكرت بتقليل عطائاتي أحتار كيف ؟ لأن أغلبها جزء من شخصيتي أصلا ..مثلا اللبس أشوف إني ألبس لنفسي مو علشاني ..صح يهمني يلاحظ لكن كذا وإلا كذا رح ألبس ..تقدرون تعتبرونها هواية ..
إذا جاء أصير ألهى بالجوال ؟ أصلا خلقة أكون مالة من الجوال أبغى أحد يتكلم معي ..
ما أدري كيف أقلل عطائي ..


_الكلام تكلمت معاه لدرجة شوي وأصيح ! لأني مرررة محتارة منه ! ماعرفت له ! ويمكن لأني عارفة إن السبب منه وهو قناعاته إن هالشيء هو الصح ومايبغى يكون من نوعية اللي تغيروا بعد الزواج ..

_ أنا مرتبة أولوياتي , ومنها إني أستحق رجل مسؤول و فاهم ويعاملني باللي أستحقه ! خلو الحب على جنب ! بس في أصول لكل أسرة سعيدة وأشوفها مختلة عندي ..إني أكون شخص طول الوقت طالع ما أدور زوجتي إلا في حاجتي أتوقع هذا شعور سيء لأي زوجه .. ما أحب أكون كذا كأني جارية ..

_ أفكر أحيانا إن عندي جانب السوالف ممكن ضعيف ! بس رح يكون جهد ممل مني أني يوميا أفكر في سالفة أقولها له ! ما أقدر على كذا خصوصا في الوقت الحالي .. أقول لنفسي ليه ؟

_ أفكر إني أنا فعلا أبعد عنه ..مو علشانه أو كعقاب لكن من باب تطوير نفسي لأني من فترة أفكر آخذ دورة في مدينتي .. ما أدري هل هالخطورة رح تكون كويسة أو لا ؟ طبعا إذا شفتها من ناحية نفسي فرح تكون مفيدة ..لكن إذا فكرت في علاقتنا أخاف أكون أتحت له فرصة البعد هذا وقدمتها له على طبق من ذهب .. خصوصا إنه هو اللي يقترح علي إني أروح في الإجازة عند أهلي ..
طبعا الدورة بإذن الله لو أخذتها رح تكون بعد العيد ..

ايش رايكم ؟