ام عبدالله << انا رحت فلسطين مرتين وانا عمري 5 سنوات والمره الثانية وانا عمري 15 سنه

لكن الاردن كنا نروحها كل سنه مع الوالد لانه عمامي عايشين هناك وصارلي عشرسنين مارحتها

اهلي بينزلوا واختي الكبيره كمان لانه زوجها اردني اما انا جدا صعب لانه زوجي اهله هون وماله حدا بالاردن

فااكثر روحاتنا على الدول اللي القريبه

__________________
اللهم ياحنان يامنان ياحليم يامالك الملك بيدك الخير كله اسألك باسمك العظيم ان تشفي اخي شفاء تاما لا سقم بعده ..

أم عبدالله كريستال قطرية من أصل فلسطيني

وانا كمان أردنية من أصل فلسطيني بس مواليد الكويت و قبل ما أتزوج كنت أنزل على فلسطين و على الأردن
بس الحمدالله هلا دار حماي عايشين بالأردن و احنا بيتنا بالأردن و هم كمان أصلهم فلسطيني

__________________

كل الناس خير وبركة
والناس بطلت تفرق معهم
وين ما تكون لقمة عيشهم بيعيشو
الحمد لله رب العالمين

__________________

أم عبدالله شو غداكي لليوم ؟ شو ناوية تعملي ؟

انا كمان ساعه بخلص دوامي و زوجي بخلص على 4 يعني رح لحق ان شاء الله أحضر غدا قبل ما يجي
وناوية أعمل الرز البخاري لقيتها في مطبخ المنتدى

__________________

احنا عنا الساعة هلأ 11:09 يعني احدعش وعشرة
لسا للساعة 2 لما يخلص دوامي
وزوجي على 4
بدي اعمل شيشبرك
ان شالله الحق
خصوصا انو حلا بدها ساعة بعد ما اروح غيار واكل
جربي البخاري وقوليلي كيف بيطلع معك... بلكي علمتيني اياه

__________________

احنا عندنا الساعه هلا 12:15 الظهر أذن الظهر قبل 10 دقايق وعلى 1 بخلص دوامي الحمدلله
ما عندي عطلة الا يوم واحد بس الجمعة و السبت دوام بس زوجي والحكومة وبعض الشركات الخاصة عطلتهم جمعة وسبت

ان شاء الله انا شفت مكوناته و طريقة عمله حسيتها سهلة وانا و زوجي بنحب الرز بالخلطة قولت بجربها

صحة وعافية مبارح كنا بسيرة الشيشبرك علميني اياها عشان أعملها واعملهم مفاجأة

__________________

انا كمان عندي حقد على اللي بعطلو جمعة وسبت
لاني كمان بداوم السبت
وزوجي موظف بنك... وانتي عارفة عطلتهم جمعة سبت
بالنسبة للشيشبرك كتير سهلة

وهاي طريقتها على السريع:
اول شي بتعجني عجين ... بيكون طحين وملح ومي ... وتكون العجينة جامدة شوي
وبتخليها ترتاح شي نص ساعة
بعدين بتحضري الحشوة:بصل مفروم ولحمة مفرومة وفلفل اسود وملح(بنطبخهم سوا)
بعدين بنقطع العجينة وبنفردها بالمرقاق عشان تصير رقيقة كتير وبنقطعها بكاسة صغيرة على شكل دوائر
وبنحشيها متل القطايف وبنلفها على بعض... بتصير ومدورة وبنحمرها شوي صغيرة بالفرن
وبعدين بتكوني محضرة اللبن مثل لبن المنسف وبيكون يغلى على النار... بتوقعي العجين في وبتخلي شي تلت ساعة يغلو مع بعض
وبعدين بتقلليلو تومة... وصحتين وعافية

__________________

على قلبك يارب يسلمو ايديكي العجينة كتييير سهلة بس هلا بدور على طريقة اللبن كيف بتنعمل لأنه ولا عمري طبخت لبن

__________________

ولا عمرك عملتي؟
انا بقلك
هلأ عندكم جميد ولا لبن رايب عادي؟
في كمان جميد سائل جاهز
هاد كتير اريحلك
بس بتحطي على النار مع مي مغلية
مكتوبة المقادير بالزبط على العبوة
اما اذا كان عندك جميد ولبن رايب فانتي بتنقعي الجميد بالمي المغلية
وبعدين بتخلطيه على الخلاط كتير منيح
وبتضيفيه في الطنجرة بعد ما تصفيه طبعا
كمان بتخلطي الرايب لحالو وبتضيفيه فوق الجميد من غير تصفاي(خلط منيح)
وبتضلي تحركي فيهم على النار الى ان يغلو منيح كتير(ديري بالك طول ما هما على النار لازم تضلي تحركي)
ممكن تضيفيلهم معلقة نشا صغيرة مع شوية ملح ليمون مدوبين بكاسة في بداية وضعهم على النار
عشان يعطيها ثخانة وحموضة
وبس
ازا ما فهمتي شي خبريني بوضحلك

__________________

أكلات اللبن معتمدة فيها على ماما ان كانت منسف او كفته بلبن او أي شي فيه لبن

بس هلا ان شاء الله حابة أحس انه انا ست بيت و أطبخ لزوجي كل شي و أربي أولادي واهتم بأمور بيتي
عشان هيك ما بدي الشغل كله

انا كتيييير بنقهر اني بداوم السبت لانه دوامي بكون للساعه 4 و زوجي طول الوقت لحاله بالبيت

__________________