إذا هي تضغط عليك وليست صادقه بطلب الطلاق

لأنها تعرف أنها المتضرر الأول

البارح تم فك الحظر عني لقيت العيال نايمين بغرفتهم قلت الحمدلله بداية موفقه اكيد لانت وخلاص انتهى الموضوع

جوالها كان جنبي على الطاوله اقرب لراسي شوي يهز على الهزاز اعرف رقمها السري كنت بحطه صامت لاهزاز ولا شئ بنام

لقيتها رسالة من صديقتها بالرسائل العادية تقولها فلانه وش صار معك لاتضعفين خلك قوية لاتضعفين لاقرب منك صديه وكلام كثير وتعتذر ان عندها مشكله بالشبكة

فتحت الواتس لقيت بلاوي ماودي اذكرها لكم لكن فعلا كلامها يسم البدن ولاحول ولا قوة الا بالله

قررت الغي كل شئ ماتستحق ولاشئ من اللي سويته ربوها اهلها على الدين ونسو يربونها على حقوق الزوج

اذا كان الزواج شئ ثانوي بالنسبة لها انا بالنسبة لي شئ أساسي

واذا كانها تطلقت اول وتحس الرجال مالهم امان وبتضمن وظيفتها وتأمن نفسها تشبع بها

أول شئ بسويه بكنسل السواق لو ماراح تدفع راتبه بتنازل عن كفالته

ثاني شئ تدفع رواتب الخدامه الخدامه لها وتساعدها بشغل البيت ماتبي كلمت المكتب وكنسلت الاستقدام ماعاد ابيها واتعذر ان الفترة تعدت 4 اشهر المتفق عليها وخلاص

ثالث شئ تدفع مستلزمات السيارة بنزين او اي شئ

وبكيفها بترضى ياهلا وياسهلا ماراح ترضى مالي شغل عايش مغفل طول هالسنين متزوج حرمتين وانا مادري وحده عايشه جسد معي ووحده عقل حسبي الله عليها خلها تنفعها بكره ترجع هي لبيت اهلها وصديقتها ترجع لبيت رجلها وتنام بحضنه وعيالها حولها

وحسبي الله عليها وعلى اشكالها

خلاص ماعاد ابي نصايح تدعي علي وتتكلم كلام ماله داعي على امي الله يحفظها اللي مسكت عيالها وهم صغار لاراحت للدوام صدق كافره بالنعمه

والله اني كنت بدعي عليها بس ام عيالي وحرام بس حسبي الله ونعم الوكيل مقهور قهر ماتوقعت بحس بهالاحساس غليان دمي يفور من امس مانمت الا بعد الفجر ولا داومت

خلاص قراري اتخذته ياتتكفل بكل تبعات دوامها يا تكنسله وماراح اتفاوض مع احد اذا بتفاوض مع احد بقولها كلمي فلانه وخلها تجي تتفاهم معي مهزلة

السلام عليكم
اعانك الله وفرج همك وهم اخي الوحيد متابع لكم ودايم الدعوات لكم لاني نفس المشاكل تقريبا وادعو ان لاتنسوني من دعائكم

انا نزلت موضوعي قبل فترة ولقيت ردود طيبة ولكن لم اعمل بها..

انا رافض تماما الوظيفة لاني مدرك تماما تبعاتها وشرطت عليهم قبل الزواج ووفقوا لكن لم اسلم من المشاكل بسبب هذا الموضوع

فمع كثرة المشاكل وديتها عند اهلها خشية اني اطلق
واستغلوا الفرصة بشكل فظيع وسريع ودخلوا واسطات ووظفوا البنت ظاربين بشرطي عرض الحائط بحجة اني تركتها عند ابيها فلاسلطة لي عليهم وبجب ان اقبل الامر لانهم وقعوا عقد ومستحيل تركه

المهم لم علمت جن جنوني طبعا ورحت لابيها وشار علي الاخوة ومن ضمنهم اباالحكيم اني اقبل بهذا الامر لغاية مدة انتها العقد وهو الفصل الاول
لكني لم استطع ذلك ابدا فاخبرت والدها بان تتخلى عن الوظيفة وترجع الى البيت قال استشريها وارد عليك كنا وقتها في اجازة الحج
ورد علي قبل بداية لدوام انه صعب جدا التخلي عن العقد طيب والحل

قال تاخذها وتكمل مدة عقدها قلت مااخذها وانتهى الموضوع على كذا

والى يومك لاحس ولاخبر ومدري هم عل ايش ناوين بعد ماينتهي الفصل

بس انا خلاص 7شهور كذا اتاقلمت عل حياتي الجديدة ومعاد تفرق معاي

الله يفرج هم كل مهمووووووم يارب ..

هد اعصابك وحاول تسترخي

خرابات البيوت في كل مكان ..
اايدك صراحة بقراراتك
ولمح لها انك دريت بكلام صديقتها
من تحس انه ثقتك انهزت فيها وانه ممكن تخسرك .. بتعيد حساباتها

الله يكون بعونك ويجمعكم على خير

الله يكتب أجرك ياخوي ع صبرك من أحل أبنائك وتأكد إنه مافي شي يضيع ربي يصلح لك أبنائك ويبروك في كبرك زي ما بريتهم في صغرهم ......

بالنسبه لزوجتك ياليتك واجهتها وانت مصدوم وفاير من رسائل زميلتها ووضحت لها انه مابياكلها غيرك وبعدها وضعت لها القرارات الي اتخذتها بسبب سماعها لصديقتها منها دفع حق السواق والشغاله عشان تعرف انه تصرفك هذا ردة فعل منك بسبب سماعها لخرابة بيتها وهي مارح توصل لصديقتها هذا الكلام لانها هي السبب في الي حصل

بينما لو اتخذت قرارك كذا بدون ماتشعرها انه السبب سماعك لصديقتك بتروح تقول لصديقتها وتعطيها اوامر تخرب حياتها اكثر واكثر،...

واضح زوجتك كلمه توديها وكلمه تجيبها يبغالك شدة وحزم وتوضح لها انه كل ما ارخيتي اذنك لغيرك كلما تغيرت معاك اكثر ...

ومع رأي الاح حكيم ...

كلم زوجتك وقولها انا بوديك لاهلك اقعدي معاهم كم شهر وبفكر بالطلاق خلال الفتره هذي ولاتنناقش مع ابوها اذا جيتهم خذ الاولاد واطلع بهم ورجعهم وكل يوم في موعد محدد كلم الاولاد يطلعولك مثلا من العصر للمغرب اذا منعتهم يوم لا تسوي سالفه روح واطلبهم وقت ثاني واكيد بتسوي كذا عشان تعرف مصيرها معاك ...

خلها كم شهر تشرشح عند اهلها واعطها السواق بدون السياره اذا كانت السباره لك ....

خلال الفتره هذي لا تحظرها لكن لاترد عليها شوف في البدايه بتكون رسايلها قاسيه شوي شوي بتهدأ وبتحاول تتقرب منك ....

وع فكره زوجتك ذكيه لما قالت مابطلع الا بعد ماتنتهي العده لانها عارفه انك مارح تطلق وللاسف هي قاعده تلعب بالنار ...

لما توديها لاهلها غير كيلونات ابواب بيتك عشان ماترجع لوحدها للبيت واعطها كل ملابسها اكيد مارح ترتاح عند اهلها خاصه وبترجع بشروطك باذن الله خاصه لو تركتها اكثر من شهرين....

اعانك الله اخي الفاضل ،، منذ بداية قرائتي للموضوع شعرت ان هنالك من يملي ع زوجتك


لاني اشعر باقتناعها بك ..ولكن تدخلات من حولها يتعبها !

عموما لي موقف مشابه لموقفك ،،احدى المرات كنت مع صديقه لي

نتحدث ع الواتس وكانت هي ف مشاكل مع زوجها ،،من باب المشكلة

ذكرت نقطه خلاف لي مع زوجي ،،ف ذات الليلة قبل النوم

دخلت ع زوجي واذا به مكتف سألته مابك / ففتح لي المحادثة

حقيقه خجلت منه مع انني لم اكتب مايسيء إليه ،، ولكنه لايحبد ذلك

فمواجهته لي بهدوء وبالدليل القطعي كانت لي رادع ان اذكره بما لايرضى امام اي احد

الشاهد / واجه زوجتك بالادلة القطعية ،، وابعدها عن تلك الصديقه حتى لى اضطررت ان

ترد عليها بقولك ،،ارتاحي ي فلانه أنا زوج فلانه (اسم زوجتك) خربتي بيت صديقتك ،، وماعاد ابي اشوف لك رساله ع جوالها! واختم رسالتك بقول الله تعالى (وما يلفظ من قول الا لديه رقيب عتيد )
فرج الله همك

__________________




ربِ هب لي من لدنك ذرية طيبة أنك سميع الدعاء

احتفظ بصور من محادثتها لمواجهتها بها

حتى لاتستطيع نكران خطأها

__________________




ربِ هب لي من لدنك ذرية طيبة أنك سميع الدعاء

أتمنـــــى من كل قلبـــــــي إنك ماتتخذ أي قرارات وأنت بهذا الضغط والضيقة

والله وعلى حسب ماذكرت من صفات لزوجتك إنها مسكينة وضعيفة

وأنت رجل طيب وفيك خيير لكن واضح إنه شخصيتها تتأثر بوقت الحزن

أنا أبصم لك بالعشرة مافيه شي يحزن المرأة ويخليها متخبطة ومهزوزة مثل الحقران بهجرك لها

ولو تلاحظ إنه بوقت الزعل مافيه شي واحد مزعلها منك تلقاها تتكلم وتنتقد كل شي حتى أنت ماتدري وش

اللي مزعلها بالضبط مثل زوجتك الحين

أنتم تحبون بعض لكن الشيطان متربع بينكم الحين للأسف

زوجتك ماتبي الانفصال لكنها ماتدري كيف ترضي اشياء جواتها وبنفس الوقت ترضخ لك وترضى

ترى أكبر دليل إنها ماتبي تبعد عنك لما ارسلت لها كلام مع ولدك رجعت ردت عليك تبي أي موضوع يفتح بينكم

تطلع اللي بقلبها وتشوف عنك وش اللي تفكر فيه

نصيحتـــــي .. لا تفكر بالطلااااااق نهاااااائيًا

حاول تتنازل وتهدي بالك وتعتبر زوجتك الحلقة الأضعف بحياتك وأنت الأقوى والمتحكم

خذها لحالها واطلع تكلم معها بهدوء حاااااول حتى لو ماتعرف للحوار تكلم معها بعاطفة المرأة

ووضح لها انك شاري حياتك معها قلها انك تبي سعادتها حسسها إنك تبيها صدقني بترضخ وبتلييين

علمها وفهمها انك ماتبي تتنازل بسهولة لكن لازم تساعدك انكم تكونون مع بعض على الحلوة والمرة

خلها تحس بالأمان والارتياح خلها تشوف جانب حنون منك جديد عليها مافيه إمرأة ماتجي بالعاطفة

بالأخير قلها يافلانة ترى ماراح يعيش الألم اذا تفرقنا إلا أنا وأنتي وعيالنا

وأي صديقة إذا كانت تستحق تكون صديقة حقيقة ماراح تحس باللي تحسينه ويمكن تنبسط انها خربت بيت كان ناجح

قلها فكري بكلامي قبل تقولين أي قرار وخلها تقولك عن اللي في خاطرها

ماتتخيل الكلام والفضفضة عن الخاطر وش راح تسوي بينكم بما انه الحب بينكم

واضح زوجتك مشحونة منك ومو ضروري تكون أشياء كبيرة ممكن تكون هي حساسة وتشيل بقلبها

وتراكمت فوق بعضها وصارت تتكلم لزميلاتها وياكثرهم الحقودات اللي ينبسطون اذا خربوا على احد حياته

ضروري ضروري تتكلم معها لحالكم لو تدورون بالسيارة بمكان فااااضي وتتكلمون صدقني بتتغير نفسياتكم

أنا كتبت كلامي من تجربة ووالله انه الهجر أكبر مصيبة على المرأة

اسبوعين مرت علي كنت حزينة من تصرف زوجي معي وكنت ساااااكتة وجواتي بكااااء

لما الحمد لله تكلمنا وطلعنا اللي بخواطرنا تغير الوضع

والمحزن وشوووو ؟

إنه بنتي عمرها 5 سنوات جالسين بعد مارجعت الاوضاع طبيعية ضميتها شوي

فجأة قامت تصييييح والله تشاهق من الصياح

وش فيكي ياماما ؟ تقول أحبك مررره

أنا فهمت احساسها يعني لا تزعلون وتسكون مع اننا مابينا شي قدامها الا اننا مانتكلم مع بعض

فما بالك بطلاق وفراق وتشتت

الله يسخركم لبعض ويبعد عندكم شيياطين الإنس والجن