[B][B]الله يخليكم لي
الله يخليكم لي
الله يخليكم لي
الله يخليكم لي
الله يخليكم لي
الله يسعدكم دنيا و آخره اخواني واخواتي الحبيبات
الله يجعل كل عمل خير او معصيه ارتد عن فعلها ان يجعل الله لكم ولي فيها الاجر
فأنتم اخواني وانتن اخواتي ...
وانا محتاجه لوجودكم وكلامكم معي ... الله يحفظكم ...

والله ........... أحبكم ....

أحس اني بخير .... وجلست مع امي وتغديت اليوم ..

بسوي كل الكلام اللي كتبتوه لي ... وكل ماضاق صدري بقراه مره ثانيه واصبر وانا مرتاحه
لان كلامكم والله يريح ...
ادعولي ارجع مثل اول .. يااارب ..
انا اعرف لازم فتره لين احاول ارجع مثل اول بس والله مايهمني الطلعات ومقابلة الناس..بقدر مايهمني
اني اجدد ايماني وارجع مثل اول انصح طالباتي واحبهم واحن عليهم واستانس معاهم ..

ولي بعض التعليقات ... انا فرحت مره بردودكم الله يكتب لكم الأجر يااارب والله احس امس كأن روحي بتطلع
واحس ايماني زيرووو والحين الحمدلله الحمدلله الحمدلله ان ربي رزقني فيكم اخوه واخوات .. ربي سخركم لي لاني والله مابي اعصي ربي..

وبالنسبه للاخ اللي يقول صارحي ابوك وقوليله وعسى مو من المتشددين بالعصبيه القبليه ..
احب اقولك والله قلت له ابوي ترى لو جاني امريكي ولا بريطاني مسلم وهو زين ورجل يخاف ربي زوجني اياه
وابوي طيب حيل والله لكن ابوي الله يهديه مستحيل يصدق اني كبيره وافهم ابوي يعتبرني صغيره دايم
حتى بالمدرسه يزعل اذا ناوبت وتأخرت يقول انتي يبي لك اللي يقعد معاك كيف تقعدين مع الطالبات
واذا ابي اقدم بوظيفه رسميه بقرى بعيد مثل صديقاتي يقول لا انا بعطيك الراتب بس ماتروحين ولاتقدمين حتلى لوكان بالحسا او النعيريه خليك كذا احسن ..

وعن اللي نصحني باني آخذ يتيم واتبناه ..
والله سويتها وكانت عن طريق الجمعيه الخيريه وجابولي الاوراق وتبنيت بنت يتيمه تقريباً عمرها 7 سنوات
اتوقع صوماليه ..بس والله كانت مملوحه لان صورتها كانت عندي ...
لكن تعالوا شوفوا انوااااع التريقه والضحك من خواتي واهلي كل يوم يطالعون الصوره ويقولون بنت هدى بنت هدى.... هم مايقصدون السخريه والله لان اهلي بفضل الله فيهم خير
لكن الله يهديهم طفشوني وزهقوا حياتي مو متخيليني ا مدري وش قصتهم ..لا وخواتي الصغار كانوا يقولون ليش ما اخترتي شكل كذا او ولد او او ((انهبلوا)) المهم زهقت وخليت الموضوع
بعد ماخلصت المده ولا مددت ..
المهم قبل 6 شهور اختي الكبيره عنده بنت وجابت ولد وانا مره فرحت لاني كنت مره خاطري اني اتبنى طفل من الملجأ ومخططه على كل شي لاني يوم رحت مع المدرسه رحله لهم تقطع قلبي ومابغيت ارجع البيت وقررت وقلت فرصه حلوه اب ولد واختي ترضعه عشان اكشف عليه اذا كبر ..
ويوم قلت لاختي قالت عادي ويوم دروا اهلي امي وابوي خاصه .. بس يعلق علي يقول انتي الحين ياهدى راتبك مايكفيك ووتصرفينه باسبوع وتبين تجيبين يتيم مسكين تبلشينه معك ...
وسكت وقلت طيب لكن والله اذا ماجاني واحد زين بتبنى ماعلي منكم ...
المهم ... معليه طولت بقصة حياتي الممله سااامحوني لكن وش اسوي الله يخليكم لي وبس..

وبالنسبه ان امر على مواضيع الناس واحاول احلها بإذن الله سوف افعل بإذن الله ...لانك صادق ياأخي

واخي سطام بسوي البرنامج لانه عجبني حيل و بدعيلك وبدعي لكم كلكم بإذن اللي عينه ماتنام واله يفرج همومكم..

وبدعي بالسجود الدعاء الحلو والله يريح الله يريحك يا اخي ..

وبقرا هالردود كل يوم ماحييت الله يرضى عليكم .. لان والله تغيرت اشياء كثير بداخلي لما قريتها ..الله يوفقكم ...

على فكره انا اليوم مره طيبه وبخير الحمدلله رب العالمين وبتوكل على الله حق توكله ..
واستغفر واسوي كل شي زين ...
وبرجع مثل اول .. حتى امي اول كنت اول ما ارجع من الدوام اضمها واحضنها واقولها امي ضميني والحين بس اقول السلام عليكم واروح غرفتي .. واحياناً تطلب مني اطلع معها واغير جو ووالله لي اكثر من شهر ما اطلع حتى انها صارت هي تشتري لي اغراضي ..ياقلبي عليها ..
والله اني بهالفتره والافكار البايخه اللي براسي قصرت بحقها ..لدرجة انها والله احياناً ((المفروض ما اكتب هالكلام لكن والله انها تعبت معي مسكينه))انا اول يوم كنت مروقه احب ارقص لكن والله طق بدون موسيقى
المهم امي صارت تقول يلا هدى تعالي ارقصي من زمان ماشفت رقصك .. والله حزنت عليها ما بقت طريقه الا وحاولت فيني وانا اعاند حتى نفسي ..لكن اعوذ بالله من الشيطان الرجيم ..
لكن اليوم جلست معها والحين بعد بروح اسوي شاي انا بنفسي واتقهوى معها واسولف معها ..
وبوسع صدرها ...
والله يشرح صدوركم ويوسع عليكم ويرزقكم من حيث لاتحتسبون يا اخواني واخواتي الحبيبات كلكم سواء من رد على موضوعي وواساني وكان عوناً لي في ارجاعي الى رشدي وصوابي و ايماني .. او مر على موضوعي وقرأه فقط ..الله يوفقكم ..

اختكم اللي تحبكم وتحتاج لوجودكم .... [/B][/B]