أنا وزوجي .... و الأشغال الشاقة(المشكله حلت ولله الحمد)) - الصفحة 7

31-10-2007, 08:09 PM

أم سيما

عضو نشيط

تاريخ التسجيل: Jul 2007

المشاركات: 115

أنا وزوجي .... و الأشغال الشاقة(المشكله حلت ولله الحمد))

السلام عليكم ورحمة الله وبركاتة..

أرجوكم ساعدوني مشكلتي كبيرة .. ومقهوووووووووووورة منها وتضايقت من زوجي بسببها ..ومهدده بالزوجة الثانية ...

أنا تزوجت قبل ثلاث سنوات وأربعة شهور ..وحالياً عمري 25 سنة وعمر زوجي 29 سنة .. ولد عمي يحبني وأحبه حيييييييييل ..

مشكلتي تزوجت وأنا أدرس بالجامعة .. وفي بداية الزواج كنت متحمسة وما أقصر في حقوق زوجي أبد .. من ملابس وطبخ وبيت نظيف ودلع وحركات وليالي رومانسية ..

حملت بعد الزواج بستة شهور ... وبدت المعاناة .. حمل وتعب ودراسة .. وما قدرت اوفق بين الدراسة وطلبات الزوج والبيت والحمل .. كنت غير تعبانة وأتنوم في المستشفى .. وحتى الجامعة قل مستواي فيها شوي .. وأثر هالشئ على نفسيتي .. الغياب المتكرر وتهديد الدكاتره بالحرمان .. مع الآلام ..

والأدهى والأمر .. زوجي مارضى يجيب لي شغالة إلا بالشهر الرابع .. والسبب إنه ما يأخذ راحته إذا فيه شغالة ومايحب يشوف حرمه تمر قدامه غيري أنا ..

المهم الحمد لله ربي رزقني بشغالة ملتــــــزمة وكبيرة وعشان كذا وافق وصرنا نجلس بغرفة والشغالة تشتغل بالبيت وإذا بيطلع مثلاً للحمام ( اكرمكم الله ) لازم الشغالة تروح للمجلس عشان يقدر يمر ... وتشتغل ساعتين في اليوم وتضاااااااااايق منها يالله تحمل عشاني ...

الحمد لله خف التعب والوحام .. وصرت نشيطة وأشتغل واتفنن في الطبخ والحلويات ويعزم اصحابه وافرش لهم أحلى سفرة وكان يفتخر بطبخي ولله الحمد ... والله العظيم تنومت اليوم الي بعده على طول بسبب التعب وارتفاع الحرارة وكنت حامل بالشهر السابع ..

بس الشغالة مازالت موجودة لكن تجي يوم ويوم لا ... وبعد ماولدت ورجعت للبيت بدأت المشاكل لأن الشغالة راحت وحلف إنه ما يدخلها بيته ويقول مو عشان الفلوس .. أنا اعطيك مرتب الشغالة
.. وصارت علي التزامات أكثر .. زوج وابن وبيت وجامعة أخر ترم ( تربية عملي دوام في المدرسة من بدري ..مع محاضرات للساعة 6 المغرب )

والله العظيم اجي تعباااااااااااااااااانة ومافيني حيل لأي شئ .. ويكون وراي عشاء، وتحضير دروس، وأبحاث، ومتطلبات جامعية، وبعض الأيام اختبارات، وولد، ورضاعة، وغسيل ملابس، وكوي، وغسل اواني، وتنظيف بيت ، وكل هذا كووووووووم ويبغاني أجلس معه هذا غير لازم كل ليلة ع السرير ...

صرت إذا قمت في الطبخ والنفخ والتنظيف أقصر معه في الجلسة و .... لأني وقتها أخر الليل ابغى أنااااااااام يدوب ساعتين أو ساعة ونص في بعض الأحيان عشان الدوام المدرسي بدري ...

وبعض الأحيان يكون ولدي تعبان ما أسوي شغلي كله .. ويجي ويطلب شماغه ويكون مو مكوي.. اقوله دقيقة اكويه لك يقولي الحين تكوينه ؟؟ المفروض يكون جاهز !! أو يتأخر عشاه يعصصصصصصصصب ويتنرفز ما صار يتحمل شئ ... وبعدها فلتت الأمور من يدي ما عاد اقدر اجمع بين هالطلبات كلها وخصوصاً كانت نفسيتي مرررررره تعبانة خايفة ارسب وما أتخرج وابغى أنجح بتفوق بأي طريقة وحسيت إني حطيت نفسي في موضع ماني قده ..

هو من الناحية المادية ما يقصر مثالي بشكل لا يوصف .. كل شئ ابغاه يجيبه وزيادة .. هذا غير الهدايا والجوالات ..والله حتى مع أهلي ما يقصر إنه رافعهم للسما .. وأمي وأبووووووي يحبونه مره ..

ويقولي مثل ما أنا ما أقصر معك .. ما أبغاك تقصرين معي أبد ... تعبتني مثاليته يبغى كل شئ تمام وفي الوقت المحدد ما تتأخر .. وإذا تأخر والله دقيقتين يقولي خلاص لا تجيبيه سواء أكل أو لبس ويطلع زعلان ...

يوم اشوفه كذا وما يعجبه شئ .. لازم اكون مثالية ومتكامله مثله .. يأست ما قدرت اوفي كل شوي ينقد.. ما أقدر اصير مثله مثالية بسبب الأشغال الي قلت لكم عليها قبل ..

ورفعت الرايه البيضاء وكل شئ صار في البيت على حاله .. لا أنظف ولا أغسل ولا الحق اكوي والأواني في المطبخ تكومت على بعض .. صار البيت في حال يرثى لها وهذا كان وقت اختبارات دورية ... وإذا قلت لأختي الصغيرة في الإبتدائي تجي تساعدني يعصب ويزعل .. يقولي أبغاك إنتي تكونين حرمه سنعه وتسوين هالشغل كله لحالك .. وابدأ اشتغل واشتغل واطنش كل شئ وخلاص إذا مافيني حيل وقلت بكره إن شاءالله أكمل هالشئ .. اجي الاقيه معصب ويجلس ينظف الباقي .. وأنا أنقهر وأتضايق من هالشئ ..

المهم صار يهددني بالزواج من قروية وغير متعلمة عشان ترتب له ملابسه وتكوي له وتأكله وما تهتم بس بالشياكة واللبس والمكياج ( صحيح إني اهتم في ذي الأشياء بس هذي غريزة فينا لكن الأشغال الشاقة افففففففففف منها )وصار يجحدني لو اسوي اي شئ يشوف إن هذا ولا شئ ..

والمصصصصصصصصصصصصصصصصصصصصيبة في يوم تضايق لأني مارتبت دولابه مثل ماقالي جهزت ثوبة لكن الشماغ لا .. كنت اسوي العشاء راح لأمه وقالها .. إني مقصره في كل شئ وعمتي تحبني وخايفة عليّ قالت لأختي الكبيرة من ابوي وهي في نفس الوقت زوجة ولدها الكبير ( يعني سلفتي واختي في نفس الوقت ) جاتني هي وأختي الثانية الكبيرة وجلسوا ينصحوني وقلت لهم من قالكم قالوا إن زوجك قالنا خايف عليك ويحبك ومايبغى حياتك تنتهي معه .. ( ماقالوا لي إن عمتي هي الي قالت لهم ) عشان الموضوع ما يكبر .. وكان زوجي نايم يوم صحى وسمع صوت خواتي على طول ندم إنه طلع الكلام وبعد ماطلعوا خواتي اعتذر واعتذر وحط الموضوع بسببي لأني قصرت معه كثيررررررر وماسمعت كلامه ... وقالي يمكن من خواتك تسمعين الكلام بس أنا زعلت كيف يطلع الي يصير برى وزعلت عليه اسبوعين كل يوم يجي يترجاني ويجيب هدايا .. ويعزمني برى بس أنا مطنشته .. قلت له مو مشكلة تبغاني أصير لك آلة أصير بس لا تطلب الحب من قلبي لأني تصرفك هذا كرهني فيك..ماراح أسامحك .. وإلى الآن ما نسيت هذا الموضوع ..

وأول ماتخرجت سوى لي حفلة وعطاني 3 الآف ريال كله عشان أرضى ... بس والله إلا الآن حاااااااااااااااقده عليه بسبب هالموضوع ...لأنه يقول أنتي الي خليتيني انحد لهذا الشئ وانتي مقصرة وأنا ما أقصر معك ابد .. ( طفشت من هالسمفونية )

وعشان يرضيني أكثر سجلني في دورة مكياج لأني أحب المكياج.. ولأن هوايتي السباحة سجلني في نادي سباحة مخصص للنساء ..وكلها كلفت عليه مبالغ ..بس هو يقول هذي ماهي رضاوه هذا لأني أحبك .. وأنا مقهوره ودي يعترررررررررف إنه غلطان .. غلطان ..

والله العظيم قلبي مجروووووووووح ما توقعته ما يصبر .. ليش انتم يا رجال ماتصبرون علينا والله حرام عليكم .. كفاية تعب الأولاد .. ياليت الكل يراعي إذا كانت الزوجة طالبة ( وأنصح أي بنت لا تتزوج إلا إذا تخرجت لأن قلوبهم قاسية وحجر ) ..

إلا الآن استحي من عمتي مرررررره .. ومن خواتي .. وأعصب على خواتي يوم يسألوني كيف الوضع . وسأت اخلاقي معهم أقول مااحد له شغل في حياتنا .. وكل يوم أبكي بسبب هالموضوع ..

وعشت سنة حلوووووه بعد التخرج ... وناسة وسفرات وطلعات .. ودورات ممتعه .. وما قصرت ولله الحمد معه ابد وهو ملاحظ هالشئ ... ويشكرني دائما ..بس بعض الأحيان تصير مشاكل لأني ماسمحته إنه طلع الموضوع لأمه ...

الآن الحقووووووووووووووووووووني بديت ارجع مثل أول لأني ادرس ماجستير وبدأ التقصير مره ثانية ( وللعلم هذا كان طموحي وكان عارفه قبل الزواج عشان كذا هو اليّ أصر إني أكمل تعليمي ودفع 30 آلف ريال تكلفة الدراسة )

وخايفة يصير لي اليّ صار قبل .. لأنه رجع ينقد مثل قبل ارجوكم الحقوني بالحلول وقولوا لي مين الغلطان ..وكيف أنسى هالموقف لأنه منكد عليّ مرررررره ..وبالله عليكم يابنات كيف توفقون في شغل البيت كله مع الدراسة أو الوظيفة ؟؟

يابخت الرجال ... والله القوامه سهله بس أوامر ونواهي وتبطح وتسدح والريموت ماينزل من يده .. وأكل ونوم .. وطلعات وجلسات .. المطلوووووووووووب منه يصرف بس ... أما الحرمه شغل وكرف وطبخ ونفخ وتنظيف وكنس وغسيل وحمل وولادة... وعيال ..والقائمة تطووووووول ... والمصيبة إذا عندها دراسة أو وظيفة .. والله هـــــــــــــــــم وقلق ...محكوم علينا بالمؤبد مع الأشغال الشاقة

وبليز لا تجي وحده وتقول نظمي وقتك لأن مافيه وقت اساساً ... وأنا متأكده مافيه حرمه بهذي الدنيا ما عفن له أكل في المطبخ .. أو ما أنحرق لها قدر ...

الله يخليكم ساعدوني ... والله رجع ينقد بقووووووووووه انقذوني ايش اسوي .... وانتم يا الأزواج بالله ايش عندكم أفكار تساعدوني فيها أو كلام يحنن قلبه علي شوووووووي .... ويخفف من شخصيته القوووووووية مره ... والله إني إذا ما جهزت الشراب والجزمة ( اكرمكم الله ) أخاف منه ... ويوم الجمعة كابوس ليّ لازم اتأكد من كل شئ ... وإجباري اكون مطيبه لبسه .. وإذا فيه اي خلل الله يعيني على نقده ... هل كل الأزواج كذا ما يتغاضون ولا يرحمون ... ردوا علي الله يرحم والدينكم .. ويحرم وجهكم من النار ...

آسفة ع الإطاله تحملوني والله تعبت من الهم الي فوق رأسي ..

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه