..

رجعت لكم أفضفض...
والله جاني يأس القى حل أو أفهم وضعي...
مع إني عاهدت ربي ماأشتكي إلا له
بس البني آدم ضعيف مايتحمل السكوت عن القهر والألم....

هنا حكايات حياتي سردتها على مرحلتين
http://www.66n.com/forums/showthread.php?t=228511


ونفذت كلام أختي الغالية Beta2 الله يرزقها الفردوس الأعلى وكل من رد علي....

( الملول لايكمل! )

بحاول أختصر الأحداث بعد اللي كتبت بموضوعي السابق..

زوجي سافر بعدها للحج قرابة 20 يوم
كانت أجمل أيام عمري..هدوء وسكينة وراحة بال يالله من فضلك...

كان يتواصل معي مكالمات بشكل يومي مختصرة ماتتطول
بس كان وضعنا هادي وماشي حالنا....

أرسلت له كلام في رسالة حسيت ضرورية عقب الجفى
اسئلة الحريم المملة القاتلة للرجال لكنها تحيي قلوبنا
انو من انا بالنسبة لك هل مجرد أم عيال
وأني صراحة مو قادرة أتقرب منه بسبب كلماته الجارحة ولأني مو عارفة مشاعره تجاهي وإني متقبله الوضع زي مايكون المهم تكون حياة الإنسان واضحة قدامه

رد علي برد حلو إنه مشتاق رغم اللي صار وإني الحياة ..صدقته ياحبيلي ومشى الحال....

رجع من السفر بعد العيد ب3 أيام ،سويت له حفلة صغيرونة مرتبة حلوة
وكتبت إن عيدنا بدأ اليوم
وما أبي أدخل في تفاصيل غير مهمة.........بس حابة أحكي لكم المواقف اللي مرت...

طبعاً نام أول يوم قبل أجي للفراش حسيته نحشة!
صحى بعد ساعة وخليتها سوالف وبس حتى لمن رجع نام خليته بروحه يريح بدون ماأحشره!

ثاني يوم حاولت أتقرب منه وإني مشتاقة - لي 11 شهر- مالمسني بتاتا البته: (

رحب فيني ونمت جنبه..
الرجال حسيته مشتاق وولهان ولو إن أسلوبه غير مرضي لي!

حاول ينام معي...

ماقدر...
أقسم برب الكعبة ياهو حسيت روحي كأني أطيح من برج الفيصلية: (

مادري ليش مايقدر ولا أعرف السبب!
هالشي يقتلني

خليت الوضع عادي المهم إن الحاجز أنكسر

ثاني يوم نفس الشي قسم بالله حسيت بوحشة بصدري
مو القصد إني أبي هالشي
بس ليش ماعاد يقدر يسوي شي!

تعرفون الحرمة وتفكيرها وين يروح!

قعد يبرر إنه مايكرهني وإنه ولهان بس فيه ترسبات!
ماأقدر أجي يبي لي وقت..!!...عمري راح وهو له كم سنة وهو يحس بترسبات!

وقعد يتعذر إنو فيه اشياء تضايقه
وش عذره!
ريحة الصابون!!

في خاطري أقول ياولد قول غير هالكلام!

لأني واثقة هذيك اللحظة ماأشم إلا ريحة نظافة ومتأكدة من هالشي مليون بالمية

ومو معقول الواحد له 11 شهر مالمس زوجته ولمن يجيها يتاثر باشياء بسيطة
وين الرغبة اللي خلقها ربي!! وين الفحوله !

قلت أبشر ولا يهمك وصرت يومياً أستخدم الديتول الشخصي مع المسك أرش فيه كل جسمي
ريحة منعشة ولليوم مالمسني يعني فقو 10 ايام!

تفاصيلي هذي ضرورية لي لاني شكيت بروحي

وانا واثقة زوجي صريح ماعنده لف ودوران


طبعاً وقتها حاولت أفتح موضوع إنه يقرأ عند شيخ لأني حسيت الوضع فيه إنا مو طبيعي
تفاجئت من بكرة بالفعل راح لشيخ وقال مافيك شي
اليوم الثاني راح بشيخ ثاني وقال مافيك شي
الحيت يكمل كل هالأسبوع لأنو لو حسد قديم مايبين بسرعة
بس ماعاد تحمس وما الله كتب...!


ورغم كل هذا مخليه الأمور تمشي طبيعي بس صرت أكثر توتر وعصبيه

أهم شي عندي وقتها رجعت علاقتنا زي قبل
يدورني وييدور رضاي ومحترم معي ويقرب مني بس إنه مايفوت طلعة برآ البيت!
يعني مستحيل يقضي الوقت كله معنا!

الشي الثاني موقف صار أبيكم تحللون فيه نفسياتنا !

هو متعود ينام الويك آند في مزرعة مع ربعه
هالشي يمرضني وتعودت عليه


من رجع من السفر ماتم أسبوع إلا ويوم الخميس قال بروح
ويسـتأذن مني وإذا يضايقك مارحت وانا عارفته مثل البزر يأخذ أذني بس لو أرفض زعل وكتم وسبب مشاكل!

قلت رح بسلامتك!


الاسبوع هذا جاء من دوامه بدري فرحت بجيته قلت :لايكون بس تعبان
قال بطلع معزوم في مزرعة معهم وبنام هناك ماتسوى أرجع ظلام وليل!

بين علي الزعل يعني ماخذ راحته ع الآخر وأدور رضاه حتى بالأشياء اللي تزعلني
ومع ذلك ماأسلم من زعله ونقده وذمه لي..إلى متى يعني! متى يصحى من غيبوبته!
سكت وقلت الله يحفظك
عطاني فلوس وراح

وأنا من يطلع مثل هالطلعه أحس العفاريت تنطط بوجهي
أعصب على نفسي وعيالي وحتى القطوة لو مرت من عندي

قلت يابنت تعوذي من ابليس وانبسطي
يوم الخميس ماأتصل يتطمن
متوقعته يرجع
على أساس عزيمة إربعاء وخلاص!

لاأتصل ولا جاء
أرسلت رسالة بيجي قال لا بكرة اللي هو الجمعه...

جن جنوني من أنانيته

قسم بالله لنا اشهر تمتد لسنة ماطلعنا بر وكل ماقلتله قال مافيه- ربيع- قلت أتفرج على رمل على جبال
مو مشكلة اهم شي مكان مفتوح نغير جو...الرجال كان كثير يتعذر من العام تخيلوا!
وأدري لأن أنسب يوم لنا الخميس او جمعة وهاليومين يكون يوم مزرعته!

لاتقولون متزوج!


والسفر نفس الشي يجي 3 سنوات ماطلعت من الرياض

ولا تمشيات زي قبل ولا روحات ولا مطاعم

يوفر لي الفلوس ومعتمد ع السواق ومعطيني حريتي عنده هالشي كفاية

طبعاً هالشي مريح لي وله لاني ماأروح مكان إلا يخلق مشاكل!
ماأنبسط زي الناس لاأنا ولا عيالي يأذخها أوامر وعسكرية...

لمن جاء الليل كتبت رسالة من قلبي

وش أنا مقصرة فيه يوم الناس في الويك آند ياكاشتين بر أو مسافرين أو يتغدون مطاعم!
وش مسوية انا لمن أقضي الوقت مع عيالي بدونك ووش أجرمت لمن حتى الفراش منصرف عني
متى آخر مرة سافرنا..الخ

والله ماكنت برسلها..كنت بفكر أول..وكانت نوع من الفضفضة
بس قرادتي وانا بعدل ضغطت إرسال - أنصحكم لاتشترون أيفون وخليكم ع النوكيا-

لو تنسحب الرسالة سحبتها
ماعندي مشكلة تروح له بس أكون قررت مو كذا بغتة

قلت خلاص لعلها خيره

بعد وقت أرسل رسالة
اللي تامرين فيه تبين سفر تبين مطعم تبين أي أنا حاضر ياقلبي!!!

بكيت
وربي بكيت

لأني كنت خايفة كعادته يعصب ويقول وش أنا مقصر فيه!

حبيت إنه تفهم إحساسي...

لمن رجع الجمعه بالعادة يجي 2
مادريت إلا داخل علي الساعة 11 وانا نايمة

يالزعول ويبوسني ويجلس عندي وانا أنخرشت مرتاعة منه
وليش هالكلام والله بغيت أجي من وقتها وإني تنكدت
آمري تبين نتغدى بفندق تبين اي مكان والسفر أصبروا علي ماديتي صعبة شوي هاليومين
والواحد ماأقول مو مقصر بس انا أعطيكم وحريص عليكم وخربط علي كلام ناسيته
ومعطيكم فلوس ..........الخ

تجهزوا أنتي والعيال وعلموني وش قررتوا

طبعاً اللي قهرني إنه متعود كل جمعه يتقهوى مع أهله
تمنيت إنه كنسل الروحة لهم عشان يعطينا وقتنا
بس قلت براحته معليش
أتصل 2 كنت جاهزة وعيالي

دخل غير الوجه والأسلوب اللي كان قبل ساعتين

تعرفون شعور الشخص اللي تدفينه دف!
والله هذا كان شكله

ويشاور وش تبون!
اختاروا أنتوا مو تقولون بعدين شي0 أسلوب منه منفر!

ركبنا السيارة كأن معنا ميت بالسيارة
صمت وكلامه جاف وجاد وذب بالكلام

ويهاوش العيال ويعصب عليهم

من جد ندمت على رسالتي وعتبي

نزلنا المطعم وهو بس اوص اوص كأننا ردح واغاني!
حتى لمن نتكلم بهمس يقول قصروا صوتكم!

طبعاً عينه علي
والله عباية راس ومحترمة وينتقد عبايتك مبينه جسمك
صدرك واضح ومدري ايش
ودايم ينتقد والله لو هو مطوع عذرته

تخيلوا لمن تسكر علينا المكان يعني خلاص مافيه أحد
نزلت عبايتي وطلعت رقبتي وصدري يمسح بيده يقول كل هذا طالع!
قلت طيب!
أنا بمكان مسكر ومستر!!
ويهاوش العيال من أي حركة والله نسمع ضحك الناس وأحنا يارب رحمتك

طبعاً أستغل العيال طلعوا قال لاعاد ترسلين هالرسالة
تحسسيني إني سربوت ومافيني خير!
والله إني- استفرغت عشاي أمس وقايم من الفجر بسبب رسالتك!
وانا سااااااااااكتة!
هذا أسلوب الحريم خليني أنكد عليه!
وأنا ساااكته

خلصنا قال تبون كوفي أو مكان تتمشون فيه قلت بخاطري ليش مهبولة!!
رفضت طبعاً قلت خلاص نروح البيت

من يوم رجعنا عيالي يقولن ندمنا ع الطلعه!
وش هذا
ليش أبوي كذا!

طبعاً قاعدين بالليل قعدة رايقة مع نفسي قعد يعيد السالفة
أنا ماقصرت معكم حتى كلمة الله يعافيك ماقلتوها!
بصراحة كان جوه والله قلق وأعرف عيالي لمن يصير مكشر ينسون يشكرونه
كنت فاكرة أنا بس قلت مايستاهل شكر على أسلوبه!
وكمل ليش تنشبون لي وحسبي الله ونعم الوكيل

جن جنوني
قلت تتحيسب عشان وديتنا مطعم!
تتوقع أغلب الناس كذا يطلعون عيالهم ويتحسبون عليهم!
أنت أصلاً ماشفت شكلك منيت علينا قسم أحس الأكل بحلقي للحين
ودايم تهيني وتسبني وعيونك علي قال أصلاً مالي خاطر فيك!!
إذا تبي حريتك وتشوفها شي عادي
خلاص حتى أنا بلبس عباية كتف ساترة عشان مايطلع شي مني وعادي ترى اشعب كله صار يلبسها
لأني كذا والا كذا تنتقدني
طبعاً السالفة هذي توتره مثل مايوترني نومه برآ

قال أصلاً مابيني وبينك إلا العيال والبسي اللي تبين

بصراحة هو دايم لمن أصوم أو يشوفني أصلي الليل أو أقرأ قرآن يحسسني كني وحده رقاصة توها مخلصة حفلتها وقاعدة تدعي ربي !!
دايم يقول تلعبين على ربي!

أنا خلاص سكت وحسيت إن حياتي معه منتهية بس مادري متى ننفصل!

خذت حبوب منومة لأن أصلاً فيني نوم ولأني ماأبي أشوفه ولا أسمع صوته

نمت..دخل...بدون إحترام انو فيه أحد نايم

قعد ع التي في واول ماقفله بينام جاء الصغير يبي حليب

صحيت فوراً وعطيته قام الرجال أنبسط ولع النور وشغل التي في

ولمن جيت أنام وعطيته ظهري
قال يكون بعلمك العباية ماتشترينها من فلوسي
والبسيها بكيفك بس معي لاتلبسينها!

سكت أنا لانها مو قضيتي ولا همي

ويتكلم ويسب ويذم ماعطيته اي كلمه

وبدا أسلوب الإستفزاز

وقام يحكي أنتي مايأدبك إلا طلاق أو حرمة!

هنا عاد عصبت مووت

قلت جيبها اصلاً فكة منك يعني وش ماخذه منك غير الهم

قام يضرب السرير قال مكانها هنا

أسلوبه مستفز كان ودي اذبحه

قلت ايوى جبها

اطلع نام إربعاء وخميس وخليها بالبيت شوف إذا بيرضيها!
كل يوم أطله الإستراحة وأتركها بالبيت شوف إذا بيرضيها
عصب عليها على غبار والا شي ماترتب شوف وش بتسوي
لاتطلع ولا تتتمشى معها ولا تنام معها وتعاشرها شوف ايش وضعها

أنت تحط بلاويك فيني وبس

قال ماعاد اشتهيك من أفعالك وماعاد يعجبني جسمك!
علماً ان جسمي عادي ماأقول توب بس مافيه عيوب


قلت اللي مبطي عن زوجته والله والله مايرده شي لو فيه فحولة
أنت أصلاً مو قادر تسوي شي مو عشان جسم ولا شكل هذا أنا من خذتني وش تغير!

المهم صرت أسكته والرجال مواصل كلام

أترجاه يسكت ويحترم شيباته وغن الحوار صار متدني ومامنه فايدة
ومصر يكمل كلامه

كنت شوي واتسبب في مقتله

طلعت ورجعت يمكن يحس على دمه والرجال معاند

آخرتها خذت وسادتي ونمت بالصالة وتركته للسانه...........

ولمن رجع من الدوام ماشافني كالعادة
أسمعه يسأل العيال وين أمكم رايحة ؟؟

تغديت معه وأنا صمت مطبق
وأشوف البنت وهي تعطيه اللقمة عمرها 3 سنوات قال تدلعيني وأنا شايب اصلع ومكرش!

بغيت أفطس ضحك بس زين مسكت نفسي
أنبسطت إن كلامي مأثر فيه للحين

طبعاً طول اليوم محد عبر الثاني
ولا أدري وش ربي كاتب لي

والله إني أحترمه مهما زعلنا
وأحسب حساب الكلمة

بسس الفترة الأخيرة صرت أعطيه الكلام من قهرري منه...

* أعذروني
طولت بالحكي كثير وذكرت تفاصيل لكن غصب عني أبي أحكـــــــــــــــــــــــــــــــي....